CAA HMAN A NI DAWN TA E

CAA hi inthlan hma, Parliament-in a ngaihtuah lai vel kha chuan CAB tih a ni a. A awmzia chu Citizenship Amendment Bill tihna a ni a. Dan ni tur leh dan a nih theih nan dan siam pawlin an pass phawt a ngai a. Tichuan inthlan a zo a, dan siamtu turte kan thlang ta a, kha Bill kha dan siam pawl chuan an ngaihtuah tha leh a, pass ngei tha an tih avangin an pass tha  leh a. The Citizenship Act, 1955 chu tlema zawng siam thaa tidanglamin, The Citizenship (Amendment Act, 2019, (Act No 47 of 2019), chu Parliament, dan siam pawl chuan a lo pass ta a. 

Hetianga dan siam pawlin an dan siam hi India President-in a remtihpuina a ngai a, a remtihpui hma chuan dan a tling lo a ni. Tichuan President chuan December ni 12, 2019 khan ziakin a remtihpuina chu a pe a, hemi ni la la hian Gazette of India, Extraordinary, PART-11, Section-1-ah chhuah a ni nghal nghe nghe a ni. Hei hi  Sawrkar laipui chanchinbu ti ila a dik mai awm e. Tin, CAA section 1(2) angin a hman hun tur erawh chu sawrakar laipuiin bitukin sawrkar chanchinbuah khan a la chhuah leh tur a ni thung a.

Tichuan Ministry of Home Affairs Hriattirna, No S.O. 172( E), Ni 10-1-2020 angin a hman hun tur chu January ni 10, 2020 aṭangin a ni a, hei hi Gazette of India,  Extraordinary, PART-11-Section-3-Subsection (ii) Dt. 10-1-2020, thla bial zan, mahse khaw vawh em em vanga kan thlir that peih loh, a eng var-bial pup, Awkin a lem zan khan hman a ni tawh tihna a nih chu. Aw lunglen a thar nang vangin, Ka tan tahna mai i lo ni; Pialleiah inthen mah ila, Min rawn zawng chhuak leh la, Parte van Pialralah, tiin lunglengin rum chhuak mah ila, CAA vanga leng erawh ka nih lo ring bik suh ang che aw.

Hman deuh khan hmun dangah ka sawi zeuh tawh a,CAA hi Bill a nih lai te, Act a nih tep lai te, a nih tawh hun thlengin,  a duh loho chuan an do luai luai a, tharumte hial an thawh a, a mawi loin a zahthlak ngawtin ka hria. India chu democracy ram poui ber pawl a ni a, dan siam pawl, Legislature-in ram leh mipui tana tha tur leh mamawh nia a hriat dan a siam thin. Democracy a nih ang zelin tha ti lote pawhin zalen takin tha an tih loh chhante sawiin an sawi chhe thiang a, an duh lohzia an lantir thei a, tharum thawh erawh a democracy tawh lo va, khua-leh-tui tha tih chi a ni lo va, a YMA loin a Kristian hek lo. A Mizo lo ti ila a dik ber ang.

He CAA-in a han khawih danglam ber nia lang chu, a Principal Act, Citizenship Act, 1955 section-2 (1)(b) belha a dawt a, Afghanistan emaw, Bangladesh emaw Pakistan emaw aṭanga December ni 31, 2014 ni emaw,a hmain emaw, India rama lo kal, lo lut emawte Sawr­karin dan anga a lo remtih te, Hindu emaw, Sikh emaw, Buddhist emaw, Jain emaw, Parsi emaw Kristian emaw sakhua an nih chuan, dan lo anga lo pemah ngaih theih a ni lo, tih a ni a. 

Tin, CAA section 3 (4) angin he dan hi tribal area of Assam, Maghalaya, Mizoram leh Tripura-ah bakah   The Bengal Estern Frontier Regulation anga The Inner Line, 1873 notified-naah hman theih a ni lo. Democracy chu politiks a ni ti ila kan dawn em lo ang chu. Dan siam pawla a tam ber leh chak Party-in tha a tia a siam a, eptu lamin tha an ti lo ni mai awm a ni. Keini Mizote phei chu Kristian kan ni a, lawm viau turah ka lo inngai ngawt pek a. Mosolman-te erawh Pakistan aṭanga lo kalah min telh ve lo, tia lungawi lo chu nise a awm viau. 

Amah kan Ukil Pu R.Thangkanglovan, thenawm ram pathum aṭanga lo lut India khua leh tui nihna dan min siam a, India ramah sakhua a tam nen, sakhua 6 lek chutiang tur chuan he dan hian duhsak takin a thlang chhuak a. Keini kristiante, sawmte chu tam tak, thlante rawh thlem te, a nih laia kan tel ve hi lawmthu sawia biak in tina tawngtai mur mur awm zawk kha, a tha lo kan duh lo, te an han ti vel a. An duh loh chhan pawh hi an hriain ka ring lo. Mizoramah a hman ve theih dawn loh lehnghal a, lawm hle tur kha lawmna chang hria lah tlem te chauh. Tha titu deuhte ram phatsantu, te an la ti ta deuh deuh va! Donald Trump, USA President ram phatsan tia eptu lamin an puh miin an nuihzat ang deuh hi a ni, a ti. 

Engpawh nise, CAA chu hman a ni tawh dawn a. Mi tin an chunga roreltu thu thuin an awm tur a ni, roreltu chu Pathian ruat a ni a, roreltu dodal chu Pathian ruat dodal a ni, tih ziak hi dik kan ti nge tha kan ti zawk? Nge zawm tlak lohah kan ngai zawk le?