EBENEZER

Khulai ruam mo­tor tam deuh dah theihna hmunah khuan Ebenezar damdawi in lianpui a la ding luah ang a, kei pawh a chhungah ka la han lut fo ang, tiin inthlan dawna Party zawlnei thupuang ve thin, dik ngai si loten min hrilh ta sela awih a har khawp ang, min hrilh lo hlauha ka vannei a ni ta ber awm e. 

Engtin tin emaw ka zu vak lut ve rawih a, a lun phian bawk si a. Kan doctor-te leh a thawkate atua mai pawh an fel em em vek a. Ka ha kuh vang leh sam sei vang a niber ang, an khawla mi endik vek an tum niin ka hria. Khawl  pawh an nei chikim changkang a. Ka thisente hi an la fo a, x-ray te an ti a, CT Scan te an ti a, MRI tean ti a ni awm e. An tih dawn tepte hian, ka pu thla la lawk  ang aw, te hi an ti thul. 

Ka thisen an la an en dik thin a, a lo sang vak lo a ni ang, HB an ti emawni, eng tihna  ka hre lo, a hniam tuk tin ta mai a. Kan nui tawp. Rei deuh awm ila chu khum hnuaiah a lut  hial ang. Kan bialtu MLA, Minister ni bawk te, kan District Judge leh CJM, Law Secretary, High Court-a kan Judge leh Registrar te, kan Judicial  Officer hmun hrang hranga awm  te, leh kan LC members leh chairman ten  min kan a nih chu. Rin loh deuh maiin kan Chief Secretary te nupain min rawn tlawh nawlh mai phei chu, hmun leh hmuna kan inhmuh vawi khatna a ni bawka a ziaawm lawmawm hle a. 

A chang hi chuan min duat a ni ang, ka kal an awih lo, chair-ah min thuttir a,  min nawr vel, ka nuih hi a za  thin a, kei lah kel te a pui hnute hne tur a lim zek zek angin ka lim ziai ziai thei reng si laia chutianga min han nawr vel chu nuih a za ru duh. Chutiang reng reng chuan hun kan hmang a. 

Tin, heti hi a ni a, khatia ka HB an tih mai, ka thisen a hniam tak zela san lam a pan that duh tak si lohah chuan doctor-ten thisen petu neih theih chuan a pawi lem lo an ti a ni ang. 1990 chho velah khan mi thisen ka lo pe tawh a. Ka thisen hi, O negative an tih ang chi hi a ni tih chu ka chiang ve khawp mai a. Chutiang chu a vang em a, chuvang chu a ni ang, thian tha min hmangaihtuten a ni ngei ang, FB an tih maiah te, Whatsapp group an tih mai hrang hrangaah min lo tlangzarh ut  mai a, a lawmawm hle rualin a zahthlak duh hle a. Manipur lam aṭangin a tul chuan kan lo kal dawn, te an rawn ti a, kei tehlul thisen min pe tura khita tanga rawn kal inhuam an awm tih hriat chuan a thlamuan thlak hle mai. 

Zanlai a thleng tep tihin Muanna Veng aṭangin tlangval pakhat thisen min pek tumin a lo kal phei chu a zahawm hle a. A tuk lawkah Zuangtui aṭangin nula pakhat thisen min pek tumin a lo lang hlawl maite chu ka hriat ngai pawh ni lo, lo ruk zeihs  mai asin ka duh rum rum zawk. Hrethiams? 

Ka thisen chu a lo sen lutuk tak loh avang chuan thisen sen deuh zawnga buaipui chu a ngai ta a. Tuk dang ang bawkin ka thisen chu bur te reuh teah an la a,Civil Damdawi In lamah an keng chho a. An lo en dik a, kum 30 dawn kal ta a, O negative kha, O positive a lo ni ta daih mai a. Doctor Mamuana te ka zawh lahin a theih loh, an ti bul hut ringawt. Hmana negative, tunah positive lo ni ta daih, ka awih bik lo kher mai. Ka buaina ram thlalerah hian, Ka Lal ka tlantu hmel duhawm, tih hla sak rih a ngai a ni ber mai. Ka thisen chu an la tha leh a, an endik leh a, positive an ti leh a, awih lo chunga awih a ngai a ni ber mais. 

Doctor lam chuan a theih loh, ti bur mah sela mi kan zawt kual ve ta thung a. Zuangtui aṭanga nula lo kal ka tih khan a sawi dan chuan, blood group hi inthlak thei lo chu a ni lo a, mahse khawvela thil thleng ngai zen zen lo, thleng khat tak, mahse inthlak thei a ni e, tiin a sawi a. A sawi ang chian chuan Nurse pakhat leh pa pakhatin an sawi bawk. Kan Lalpan tui uaiina a chantir kha a mak a, mahse tunlaiah chuan thingzaite pawh hi kan tlangvalte chuan uaiin emaw rakzuah emaw an chantir thei tawh. 

Thisen O positive chu a lo tam a, mi dang tibuai lem lova tihdan a lo awm zawk a. Min pek dawn erawh chuan a khaitu tur Nurse ka vau ve thung a. A ni lo zawk i khai a nih chuan khi lamah kan inchibai a tul ngei ang, ka ti chu a nuih a zain dik a tih hmel ve khawp. Ka sawi tak ang khan 1990 chho khan mi thisen vawi hnih ka pe ve a. Kan blood group hlawm kha Civil Hospitalah lehkhabuah an an chhinchiah a ni awm e. O negative ka ni tih ka hre lo va, chutiang a awm tih ka hre hek lo. 

2004 kha niin ka hre ta, zan khat chu nu pakhatin min rawn phone a. Khawngaihin i thisen mi pe rawh, O negative i nia, a ti a. Chutiang a awm em ni, engtin nge I hriat? Ka ti a. Hetah damdawi in hian min hrilh. O negative ni ve Pu Newmana zun thlum a vei sia, CRP 2 an awm a, pakhat a chhuti lai a lo ni si a, pakhat lah inkhel turin hmun dangah a kal daih bawk si a, khawngaihin min tanpui hram rawh a ti a. Awle ka ti a. A tukah chuan thisen pe turin ka han chho a, Bethlehem veng nu, nau nei tur a lo ni a. Ka han zawng chhuak  a.  A hming pawh ka hre lo. Chutihlai chuan Dr Ramzaua a lo kal a, ama case a lo ni a. Enge i rawn tih a, a ti a. Ka sawi a, nui chung hian, nanga cancer thisen kan duh lo, a ti a, a kal leh ta mai a. Nurse-te khan a ngai lo a nih kha haw mai rawh an ti a, ka haw leh ta a. Chuvangin ka blood group-ah chuan ka chiang ve tawkin ka inhria a. 

A huho hian kan MJS Officers-ten min rawn kan a. Tuna  Serchhipa kan Chief Judicial Magistrate, Manguri chuan ani pawh a blood group a inthlak thu leh doctor-in a awih lo a, a thisen vawi thum an lak phah a, an exam a, mahse a lo inthlak miau si thu a sawi ta a. Chuti a nih chuan khwvela thil thleng zen zen lo, mahse eng emaw avanga awm ve zeuh thei a ni tia an sawi kha a takin ka tawng ve ta a ni ber mai. Lazara, thlana ni li lai awm tawh  kan Lalpan a kaitho a, sakhaw miho khan an awih lo, mahse a kaitho miau si ang deuh kha a ni ta ber awm e. 

Persia dan ang maia danglam thei lo hi a lo awm ngawt lo ve, dan kantihte pawh hi ram leh mipui mamawh dan a zirin leh a hun a zirin an lo siam danglam fo thin a lo ni a. Chutiang deuh chuan kei pawh ka thisen group kha a tul a tih avangin Lalpan a lo thlak a ni berin ka hmu. Kei thingpui heh, meizial nghei loh hram hram tum thin kha,  Aw enteh an nun a dang ta, Chu ram ropui han thleng te zawng, tih hla ang mai khan, thingpui leh meizial hi chu ka ka hian a tui ngang lo rih chu a nih hi. Thingpui hang in ai chuan in loh law lawl duh thin kha, thingpui thlum chu ka ti theih ngang rih lo ta chu a ni e. 

Mahse kan dam ang a, Lalpa zarah thingpui thlum leh Mizo zial chu tui ti takin ka la in lehin  dan bawhchhe si loin ka la pak khu leh liai liai ang tih erawh ka beisei a, rinna mitin chu hun tur chu Jordan lui kama dinga nghakhlel taka thlir angin ka thlir ni tin dawn a nih hi. Ni rei a ni lo ang, ropuina ni a lo hnai ta, tih angin dan ang thlapa thingpui rialchini thlum ka in leha meiziak lachhum hringatawn ngei tui ti taka ka zuk leh hun chu chhaktiang kawlrawnah khian a lo la inher chhuak ngei ang ti raw? Ka Unau.