Dan leh hrai: URLAWK NI LEH ZAN KHA

Urlawk ni, December ni 24, 2018 Thawhtan chu kum dang ang bawkin motor kal phal loh a ni a, chuvangin kea kal a nuam a, kum khata bazaar-pui vawi khat tal hmuh loh chu ka duh bik lo a. Tichuan a leina tur nei lem lo mah ila, engmah lei ka tum lah ni hek lo, kal ve hrim hrim chu ka duh avangin Bazar lam pan chuan Canteen kual atangin ka phei a.

Haw lam nge kal lam tih pawh hriat loh kan insul zut zut a, motor kawng laiah chuan mihring kan tleh dul dul a, chuti khawpa tamah chuan hmelhriat hi an vang khawp mai. Dawrpui biak in ka va thleng a, ka kual thlaa kawngpuiah zel kalin Elektrik veng lam atanga bazarpui luhna kawi chhak lawkah chuan kawng chhak in chhawng atang chuan sweet niin ka hria, an rawn vawr thla thin a, an inchuha an au dual dual a.

Kawipui ka zu thleng chu bazaar atanga haw lam leh kal lam chu an innek tulh tulha a hmuhnawm phian a, ka thlir reng a. Bazar-puia kal tura han let leh chu ka peih si lo a, chuti khawpa mi tamna karah chuan mipa ka nia lawm le, tiin kan zu inzep ve a, mihring kan tawt em em a, chutihlai chuan buaraa thil lian pui pui pu hi an lo kal a, kha ka lo kal lawk aw, an ti zel a, han inken theih ni chuang hek lo, an rawn inhnawh chho tawlh tawlh a. A khawi laiah mai pawh chuan mi hi an tam a ni ber mai.

Innek tawlh tawlh chung zelin bazaar chu ka va thleng a, engmah ka lei lo, ka kal a ni ve tawp. 2018 chhunga ka kal vawi khatna a ni a, eng emaw chang chuan ralkhat deuha hmelhriat han hmuh mial chang a awm zeuh tih mai loh chu chutiang zozai  mihring zingah chuan hriat erawh an awm lo. Bazar luh thlakna step-a kan chho chu a lo chhuk an tam ang bawkin a chho pawh kan tam, kal chak a har hle mai.

Chutia ka chho chu ka hnung atang hian nu pakhat hian min rawn kuai a, kan han inchibai lawp lawp a, a hringhrana ka hmu che chu ka va lawm em, khawvelah ka ngaisang ber che, min ti a nih chu! A naupang tawh vak lo a, a hmel ka en a, kei ai em chuan tha deuh mah se, hmeltha tak erawh a ni bik lo. E, ka pi ka van lawm ve, ka paw dawn che em ni? Ka ti a. Mi an tam sia han inpuak pawh chu a rem chiah bawk si lo.

Kei ha hmai pahnih lian hlai hlup, sam sei chal lang ha kuh ve tak, ka khawi lai hi nge maw a ngaihsan ang aw, tih bak ngaihtuah reng ka nei lo, ka nuih ta pawh chu a za zawk a, a hmel ka en lah khan a fiamthu a ni chiah chuan ka hre bawk si lo. A awmna ka zawh khan, Zemabawk a ti ni tain ka hria. Hria ni ila puakpuan kenga va lena puak a phu ka ti. Ka rilru te te chuan, engpawh nise, hmelah na na na chuan ka u, Revd. Chuaua ai chuan ka tha hrim hrim tih chu ka thu tawpna a ni ta deuh ber.Kut ruakin ka kal a, kut ruask bawkin ka kir leh a ni ta deuh mai.

Urlawk zan chu a lo thleng a, tun hma deuhte kha chuan inkhawm ban hian zan rei tak tak thleng lengkhawm zai leh khuang ri hriat tur a awm thin kha a ni a, mahse Aizawl khawpui chhungah zan lama zaikhawm khuang ri hriat tur a tam lo hle mai. Sawrkar leh YMA lamin halpuah hal an khap avangin a reh ruih a, a nuam khawp mai. Chutianga lengkhawm zai leh khuang thawm hriat tur awm ta mang lo chu, Upa Chawngbuaian, Thlarau Thianghlim par tlante zawng, Ka thlir hian mual an liam zo ta; Aw ka Lalpa rawn hruai kir leh la, Tlantu zaiin kan awi ang, a tihte chu ka hre chhuak uai uai thin.

Kum tawp, kum hlui ni hnuhnung ber chu kan thleng ta kha, a hma zawnga sawrkar leh YMA lamin an khap halpuah chu, la tawmim rih mah sela, kum hlui a liam dawn meuha zanlai dar sawmpahnih a rik meuh chuan tun hma ang tho khan khap loh ang maiin a ri leh dum dum ang a, dan kan zawmna thinlung chu dah thain kan hal ri leh dur dur tho mai ang aw, tih hi ngaihtuahna thinlungah a riak ru veng veng a.

A hun a lo thleng ta, keini erawh kan vanneiha siamin kan zai tui phian a, zanlaia ei tur ar kha an siam a, dar 11 a pelh atang chuan, unauten, Dana lo kiang teh ka nau i ni, Hmangaih Lal Isua nen puan kan zawn lai khan, Nang hi khawiah nge i lo awm le? An lo ti ang deuh kha a ni ber ang, Krismas hun lai zawnga khapna dan zaha zawm em emtu Kristiante chuan an hal ri ta dur dur mai a. Van boruak zau tak sang si loah khian a puak de eng chhuai chhuai a, chu chu mi tam takin an thlir thup a, A ring apiang chu an nung ang a, ring la i nung ang, tih hla ang kha a ni ber. 

Chung boruaka puak darh de eng chhuai chhuai maite chu eng emaw kawng zawnga ngaihtuah chuan a mawi hle mai thung a. Dan avangin sual a lo awm, tih ziak dikna chu a takin kan hmu thin a nih hi. Halpuah hal kha khapna dan a awm loh chuan sual a ni lo a, zu in leh siam, zawrh pawh a khapna dan a awm loh chuan sual a ni hek lo. Mahse khapna dan a awm erawh chuan sual a lo ni ta mai zawk thin. Pui punna hmuna meizuk khapna dan a awm hma kha chuan meizial kan zuk khan sual a ni lo va, hmana sual ni miah lo kha tuna khapna dan a lo awm hnu erawh hi chuan sual a lo ni ta. Dan avangin sual a lo awm tih hi chu a va lo dik em.

Keini erawh kan zai tui phian a, zing lam dar hnih velah kan tin thei chauh thung. Khap la ni reng chung sia halpuah khapna dan Krismas lai vela zawm tha em em siin kum hlui thlah zana kan han bawhchhe ta vak mai kha engtizia nge ni ang aw, tih hi ka ngaihtuah reuh reuh a. A ni e, mihring thinlung hian sual lam a awn fo va, rukruk te, tualthah te pawh englai pawhin khap a ni reng a, mahse chu khapna dan bawhchhiat avanga mana jail tang erawh a khawhar lo tawk hi an awm reng si a nih hi.

Chuvang chuan, dan hi kan zaha kan zawm a tulzia inzirtir hi a pawimawhin kan uar zel a tulzia a lang chiang hlein ka hre thin. Kum thar zana kan hal rik dup dupte khan a entir chu dan kan zah lohzia leh kan zawm lohzia mai chauh a ni.