KAN DRAGON FRUIT

Upa Dr. Lalchung­nunga, Zarkawt nupui Na-in min puichhuah, Dragon fruit an tih chu kan khawi ve a. Hetiang thei hi an tilar viau a, bazarah hmuh mai tur erawh a tlem hle thung, han ti ngawt dawn ila, bazaar hi ka kal khat ve a, bazarpui ngat phei chu kum khatah krismas dawn emaw krismas leh kum thar inkar emaw hian vawi khat ka kal ve thin hram a, ka kal loh chhung khan an lo zuar thuah thuah a nih erawh chuan ka hre ve law.

A par hun a lo thleng a, a vul var chuai a, Bethlehem pangpar ang deuh hi a ni awm e, zanah a vul thin a, a vul chhung erawh a rei lo hle. Aw i vul lai reng hi a chul dawn lo, nang hi ka ngai ber che min awm rawh, tih nen chuan a inang lo deuh ang. Ruahin an nan zet chu a uai hnup a, thenawmah keini aia nei hmasa an awma anni pawh a vul chuk a, a rah thuah thuah a, mahse a par zawng zawng erawh a rah bik hauh lo tih erawh a hriat theih a.

Hetiang thei hi kei a hriat pawh ka lo la hre ve lo pek a, Dragon chu Mizoten kan hriat dan chuan rulpui lianpui thla nei, arpa ang deuha fep pawh nei ni awm tak a ni a. Chuvang chu emaw ni ka ngai Diabol deuh ruih a. Nikum khan kan Ukil pakhatin min pe ve a, chu chu ka vawi khat eina a ni a, ka la ei leh lo nghe nghe bawk. A tui viau laiin a tui ka ti lutuk lo thung. A  rah kuttum pawh tiat mang lo kha cheng zathum an ti emaw ni lenghal a. Sa lei ila a tui fe zawk ang!

Kan ta pawh chu vawk ekin kan chawm vum thur a, a ngeih a nih  ngai chuan duah hluah hluahna tham mawle. Dragon fruit chu Mizoin Chawng kan tih ang chi deuh kha a ni a. Hling a nei a, a kung kha a hnah a ni nghal mai. Bal hi tumahin dawl bulbawk an ti lo a, dawl lah ba kung kan ti ngai lo. Mak ve deuh asin, bal kha nuin kangvarah a ling a, a lo chawr hnah hlai hlim hliam a, mahse dawl a ni daih thung. Dragon fruit erawh chu a hnah a kung ni bawk kha a chi a ni nghal mai ni awm tak a ni.

Vawk ek kan pe nasa bawk a, a parin a ngeih berin ka hmu a, a vul chuk a, rei lo teah a uai hnupa a lo rei leh deuh a, a aia nasa zawkin  rawn vul leh chuk a, van pangpar leh lawmna chul lo chu, chuai ni reng a awm dawn lo, tih ang kha chu ni se, a zia tak a awm tur, a ni lo remchang hlauh thin a. A par zawng zawngah khan a rah ni se chuan maw, a bawr hian a bawr luai luai ang. 

Chuti khawpa par tam, a mawi lo kan tih hlau ni awm taka vul thin kha, kar khat khua a chen phei kha chuan a uai hian a uia vel hnep hnup tawh a, a nal ang zul bawk si, tenawmah hian a kal tawh mah zawk a. Phai lam aṭanga sangha an rawn thawn thinna bawm var, kil li nei ang chi-ah hian kan khawi a, ka han en vel thin a, a langsar lai takah chuan pahnih hi a rah ve a nih chu. A rah dang ka zawng a, ka en chiam a, ngaiteh, a awm miah lo. Mahse ka thinrim lem lo thung.

Kan Lalpa kha chuan a rah hun lai pawh ni reng reng lovah theipui rah a zawng a, a rah hun lai ni lo napui chu a rah hmuh tur a awm dawn lo tih chu a chiang sa reng mai. A hmu ta lo reng a, a rah hun lai a ni lo tak e, tih chu a tum bik der law, a la thinrim zui zawk mawle. A hau hlum tawp. Kei a rah hun laia khati taka par nasa si pahnih chauh a rah mai chu thinrim ve ta pawh ni ila, ka inthiam lo bik awm lo asin.

Ni tak a, mi dangte hmuh leh hriata par vul mawi em em, a vula vul chuk mai, a ka pawh zen ila min seh lo ang tih hiala mawi, kan dragon fruit ang maia rah chhuah erawh nei mumal ta mang miah si lote hi keini mihring, a bik takin Zofate zingah hian kan awm fur a ngem, tih hi ngaihtuah tham tak niin i hre ve thin lo maw? 

Hlim em em, rau em em, lam nasa sa, kan dragon fruit ang maia par mawi vul mawi en zawh pawha en leh tul thin khawpa vul mawi, mahse a rah erawh hmuh tur awm leh mang bar si lo kha, a lo awm theih dawn khawpin ka hre ta. Kan thei kung a par aṭang hian zirtur tam tak a awm dawn niin a lang. A par lian lian a sei sei a vul vul emaw tih kha a vuaia a lo chul hnu chuan e, a hnawk hnawk paih tur tam tam zu ni leh lawi si tlata mawle.

Biak ina rau ber ber lam peih ber ber, halelui ring hlei hlei thehlei man thei hlei hlei kha, mahni in chhung khurah erawh sakei tluk dawna faten an hlauh, phun peih ber ber sawisel tur hre em em, anna tur lah a hre hlei hlei phunchiar bawm ni ngawt, kan dragon fruit par nalh ber ber rah hmuh tur awm chuang si lo ang deuha thlarau rah hmuh tur erawh vang ve tak, kan Lalpan theipui rah a zawnga a hmu lo ang maia rah zawn ngial pawha hmuh tur awm lem si lo ang te hi, a awm theih dawn ni te hian ka hre ta hial mai. 

Par aiin rah a lo pawimawh zawk a ni e. Mi pakhat ka hriat ve pawh a par vul thei thin a, a tawngtai lah a duah tha, mahse a chhungkhat hnaivaite a tlawh changa a tawngtai a duah hle chuan, fimkhur ngai tak a ni, an ti daih. Pawl sarih kan zirlaiin zingah mi pakhat a lo kal a, a lo kal zing deuha kan la tho kim lo a. A la tho lote pawh a kaihthawhtir a. Duah tawk rei tawk a tawngtai a, a tawngtai zawh chuan, khawimaw chengnga-hnih-khat chu, tiin min dil. U Lala khan chengnga a pe ta niin ka hria.

Kan dragon fruit ang lo takin dan erawh chu a par vul ve chuk lem lo. A hmuh pawh a nuam loin an sawi ngaihthlak pawh kan peih vak lo. Dan inzirtirna, Legal Awareness an tih maiah hian tun hma deuh khan CYMA lam tangkawpin veng hrang hrangah kan kal thin a, mi an tam mawh khawp mai. A par kha a vul mawi chuk lem lo a ni ang, mahse par kher loin a rah tlat thung a ni ber. 

Tunlaiin kan ramah damdawi tam tham tak tak an man thawm kan hre thin,  a vul chuk lo a nia, a rah erawh a tak thung. Commercial Quantity an tih ang phei chu a hremna pawh a na hle. Mahse thubuai tam takah thuhretute an thuhriat sawi tura court-a an kal duh loh avangin dan bawhchhetu tam tak hrem theih a ni lo fo thin. Mahse tunah chuan mipui lam pawh kan harh thar zela thuhretute pawhin an hriat ang diktak courta an sawi tak thin avangin ruihhlo zuartu hrem an ni ta fo hi a lawmawm a, hei hi a ni a rah chu.