A HUAM LO

Keinin lukapui tlang sanga zan thla eng kal ruai hnuaiah ṭingṭang nen a, Lenna vangkhua tlang a dang tur, A pawi ber mai lungrun, Luaithli nula inthen a tul si, Aw tuar i va har dawn em, tia lunglen taka kan zai ṭhin lai hun leh tun hun chu a danglam zo ta, sawi hian a siak lo ve. 

Tunah zawng, zan thla eng lam a ni lo, CAB an tih mai chu kan buaipui luai luai a, anni pawl chuan an do ve lo, keini hian kan do ber nge nge e, tih chu kan hla thunawn a ni zo ta, keini ang rual tan hi chuan a tunge duh lova a tunge duh deuh thung, tih pawh kan thliar hrang thiam ta lo a ni ber e. Enge CAB an tiha pawh chu a awmzia hre lo hi a tam ber chu kan la ni bawk nen. A thlei chuan lunglen a dang zo lo, Hawh teh ṭhiani, mual li liai tlang khanthuamah, A thapin lunglen it hap dun ang, tih ang mai a ni zo ta.

India rama rorelna sang ber, dan siam pawl Parliament-a member tur kan thlan dawn hnaih phei kha chuan, a mi tin a mi tang mai hian CAB tih hi an sawi a, hre ve lo tan pawh hriat loh theih pawh a ni lo. Hman deuh khan kan sawi tawh a, Citizenship Amendment Bill tihna a ni awm e. Keinin Bilthei kan hria, thur tak a ni thur tak, mahse chutiang bill erawh kan hre ve si lo, a tha reuh viau dawn nge a tha lo fe reuh zawk, tih pawh rinna leh ngaihruatna mita thlir mai loh phei chuan kan uipui tui lian thlir vel mai mai a nih hi.

Chutah le, hriat bik loh nakalai chuan kei tehlul hi, he thil hi an sawi an sawi a, a awmzia pawh kan hre tak tak lo a, Mizoramin Special Provision kha kan nei si a, kha khan a dang tlat lawm ni, Mizoram chu Special provision hran danpuia nei ngat kha kan ni sia, tia min han zawt te hi ka tawng leh mial thin a. Ni e, a dik khawp mai a, mahse keini Mizoram chauh hi India danpuia special provision nei kan ni lo tih erawh kan hriat hi a tha ve tho mai. Keini Mizoram chuan India leh MNF inremna zarah danpui chang 371-G angin special provision an tih mai, humhalh bikna ti ila a dik mai em? Kan nei a. Keinin kan neih ang hian India danpui chang 371 angin Maharashtra leh Gujarat pawhin a nei a. Tin, kan hmel anpui ve tak, Nagaland pawhin kan neih ang chi deuh tho hi danpui chang 371-A angin a nei a, 371-B angin Assam-in, 371-C angin Manipur-in, 371-D angin Andhra Pradesh-in, 371-F angin Sikkim-in,  H-na angin Arunachal-in, hei bakah hian 371-I angin Goa-in a nei bawk. Chuvangin, Mizoram hi a special ber chu kan ni bik lem lo a ni. 

Sawi tawh ṭhin angin keini Mizoram humhalh bik kan nihna chu, kan sakhua leh khawtlang inrelbawlna te, keimahni hnam dana thubuai hlabuaia ro kan inrelna te, ram neih leh hralh chungchang angte a ni tih chu kan hre hlawm vek awm e. Hetianga kan neih ang chiah tho hi Nagaland pawhin a nei ve tho a ni. Chuvang chuan a ni, hman deuha bawng talh, a sa zawrh leh lei, ei khapna dan tia kan sawi vul chuk lai pawh khan, kan khawtlang tihdan phung leh krismas pawha ruaia kan ei ber ṭhin, kan sakhua nen a inkalh e, tih mai khan keini tan chuan a tawk der ni mai khan ka hre deuh a. 

Mahse tuna kan Bill sawi mek erawh hi chu kan sakhuana nen emaw, kan khawtlang tihdan phung emaw, kan hnam dana thubuai hlabuaia ro kan inrel dan emaw, ram lei leh hralh lam a ni lo va, India khua leh tui nih theih dan ni awmin an sawi a, chutiang a nih chuan India danpuiin min humhalhna bik khian a dang thei lo niin a lang. A pawn lam daih a nih avangin danpuiin Mizoram min humhalhna bik kha chuan awmzia a nei thei lo niin a hriat thung. 

Kha Bill kha dan a la ni lo va, kan dan siam pawl inpui zawk, Lok Sabha chuan a pass tawh a, mahse in pakhat zawk, Rajya Sabha khan a la pass ve lo thung a, dan a nih hmain keini India ramah inthlanpuiin min nang ta kha a ni a. Kan ram rorelna sang ber, Supreme Court pawhin dan siam pawlin an duh chuan an thar thawh leh thei ang, tiin ro a rel em kha? 

Sawi fo thin angin, keini India ram chu Demo­cracy ram kan ni a, dan siam pawla member turte kan inthlang a, tu pawl pawh lo chak sela, an duh chuan a chunga kan sawi Bill khi an thar thawh leh a thiang a, Lok Sabha-in pass nawn lehin Rajya Sabha pawhin a hma ang khan lo pass duh lo pawh nise, sawi tak ang khan President-in dan siam pawl in hnih kha thu khawmho turin a ti thei a. Tin, danpui angin President chu Prime Minister-in thurawn a pek anga hnathawk tur a ni. President a lal ber a, PM a thu ber, ti ila a dik mai awm e. A awmzia chu PM-in Parliament in hnihte thu khawm dun tura ko tura President thurawn a pek chuan ani chuan a ko mai tur a ni, tihna a ni. 

Lok Sabha-a member zanga chuang an awm laiin Rajya Sabha-ah chuan zahnih sawmnga an awm chauh a, Parliament in hnih kha thu khawm dun ta sela, member awm leh kalte a tam berin an duhdan kha a lal tur a ni. Pa pakhat leh naupang pakhatin thang an kam a, chepa leh vahrit a lo awk a, upa zawk chuan a naupang zawk duhthlantir loh chu niin a hre si lo. I duh zawk thlang la, vahrit i duh zawk chuan chepa ti la, chepa i duh zawk chuan chepa ti law law rawh, a ti e, an tih ang deuh a ni ta ber awm e. 

India danpui chang 371-G angin inhumhalhna bik kan nei  tehmeuh mai, mahse kha kan inhumhalhna bik khan CAB an tih mai chu a huam tel lo a ni, tih hi ka sawi tum ber chu a ni a. Kan sakhuana emaw hnam dan anga thubuai hlabuai kan inrel dan te leh ram neih leh hralh khawi thei a nih erawh chuan Parliament hian India ram pum tan dan siam mah sela, kan State dan siam pawlin he dan hi hman ve tur a ni e, tia an pass ve kher kher a ngai zawk nghe nghe a ni. Engpawh nise, kan Bill sawi hi danpuiin inhumhalhna bik min pek nen inzawmna a nei lo va, a hrang daih a ni, tih hi ka sawi duh ber zawka chu a ni e.