THEIFEIMUNG

Tunah parin lo vul leh la, He khawvel sual thim zingah hian; Khawvel par ni tina lawmtute hi, I hmangaihna hriattir leh la, An boral phal suh la, tia Thanghutan a lo phuahna te chu chu rei tawh hle mah sela, kan tunlai khawvel atan hian a va tul si em. Kohhranin sum tam tak sengin camping a buatsaih a, crusade nen, chutichung pawhin khawvel par ni tina lawm a, zu mai ni tawh loin, damdawi nen, khawvel par ni tina lawmtute lah kan pung tual tual lawi si a nih hi. 

Pawisa puk hming pua bumhmang lah an tam tial tial, a tlangpuiin hmeichhia an ni a, ai hi an nei a ni ang, bum tur hi chu an hmu ve thei zel, chumi avanga mahni suma buai ngial ngial hi an tam a nia, court hial thleng ta lah bo hek suh, thleng lo lah tam bawk, khawvel par ni tina kan lawm dan a dang a ni ber mai. 

Khitiang khawvelah khian kan cheng tawh a, miin phone aia tleipui hi a nei a dawn em ni? Tih mai a awl tawh lai leh amah ngei hi a ni, mahni chauh pawha hlim taka min awmtirtu chu Lalpa ni loin kan phone hi ni awm tak a ni zawk a, khawhar in leh biak inah meuh pawh phone khawih duh khawp kan awm ta maite hi chu, miten hnung lamah an nuih tet tet thin tih hria sela chu, nikum hmasa aṭang khan an khawih duh tawh lo hial ang. 

Chuti khawpa khawvel changkangah kan khawsak mek lai chuan, heti hi a ni a. April ni 17, sawrkar pisa chawlh ni kha a ni a, Saikhamakawnah thihna avangin kan kal a, silpolin pawl phut hnuaiah kan thu a, a lum nuam a, kan chhakah chuan Theifeimung chu a lo buk li liai a, theihai rah sen ni awm tak hian a lo rah sen nil nel a, a inkhai nial nial hlawm a, a uai thiah thiah a, a hnahte chu a hring hliam hliam a, mahse a no lo tih erawh a hriat hle thung a. 

Thing nel tak a ni a, a zar te reuh te pawh hi a khawng a, tuah pawh a tlo hle thin. Fei kan hria ang, a mung an ti a, a zawmna a ni ber awm e, chumi atan chuan a nel a, a tliak har a, a that em avangin hman a ni thin a, chuvang chuan a hmingah pawh theifeimung tih a ni. Tin, herhse thing pawh hi a tha ve tho a, phan thing pawh chutiang tho a ni. Mahse theifeimung hi a tha ber a ni chek ang, fei mungah hman thin a ni. 

Han peng ta lawk ila, kan sikul kal laiin Vai luiah, Mission Vengah a ni a, tuia inchiah Phan thing tuai ke-chawn tiat vel hi ka hmu fuh hlauh mai a, thing pu tura kal kan ni a. In kan thleng chu ka han ek ta a, ka thing ehah chuan a la keh duh lo ber awm e. Hreipuia ka zu cheh khan ka chehna chin chiah kha a kua a ni ber, a nel em em mai a, hnangah hlai ila a that dawn hi, te ka ti ta vel mai mai. 

Tum khat leh thung chu archangkawm hi meilukham tiat vel ka pu thung a, ka han ek chu e, ka thing ehah chuan a eh a la nuam ber awm e, vawi khat kan chek hi a phek phawt zel. Phan thing nen kha chuan inang lo ve tak a ni. Kan pho ro a, kan han tuah chu maw, a alh tha duh lo asin, kan chhem chu a vam nghal huam mai a, a vam rei lo ve lutuk, chhem zawh rualin a mit nghal duk zel, chaw chhum hmin har tak mawle. 

Nia, theifeimung chu kan Mizo thing tha a ni a, fei mungah chauh a tha a ni lo va, tuah atan pawh a tha em em. A rahte hlei hlei hi asin tui chu. Tunlaiah phei chuan bazaar-ah an zuar bawr thiah thiah a, Mizoin an zuar a, theifeimung rah tih pawh an hria, a leitu pawh Mizo a ni a, ani pawhin a hria. Mak ka tih ve em em thin erawh chu, a zuartu khan theifeimung rah ti loin, litchi a ti daih. A leitu pawhin a ti ve tho zel. Serthlum te, dawnfawh te, theihaite pawh an zuar a, a hming an sawi danglam ve lem lo, theifeimung a nih vanga litchi an ti ta daih thung hi chu a chhan ka hre ve thiam chiah lo. 

Kan ramah thing chi hrang hrang a tam mai, mahse kan sawi mek lai hi thing chang leh nel, tha ber pawh chu a ni phawt mai. Thing chang leh duap deuh te, hnah tla kawlh thin leh kawlh thin lote a awm a, thing leh mauin kan ram a khat a, a ni e, mau leh rua nen. Lo neia eizawng hi a mi cheng tam zawk kan nih avangin kum tin lo kan vat a, loh theih lah a ni lo va, thing leh mau kan hal ral dur dur a, chu chu a ngai a, a tul bawk si. 

Mahse kan vah bak, lova kan neih bak ram kan han tikang duai duai mai thinte hi chu a va pawi em. Theifeimung a ni emaw ni lo emaw, eng thing pawh nise, mautak a ni emaw rua a ni emaw a dang chuang lo, meiin a kan tawh chuan mei kha a thing hmingah a buai lo va, eng thing nge a hre lo a, a rah a tui em tih a hre ve lem lo, a hmaa awm chu a kang miah miah mai thin. 

Hetianga ram ruak kan tikang fo thin hi tam takah chuan kan fimkhur loh vang emaw kan inthlahdah vang emaw a ni fo thin. Kuminah phei chuan ruahtui a tlem em em a, kum chanve a ni dawn ruai ta, chutichung pawhin ruah sur mumal a la awm tak tak meuh lo chu a nih hi. Chuvang chuan khua a ro a, kangmei a hlauhawm em em a ni. Kan fimkhur loh avanga ram kan tihkan hian IPC an tih mai angin hrem theih a ni a. Dan bawhchhiatna a nih chu. 

Tin, mihring chenna inte pawh fimkhur loh vang emaw tum vang emaw pawhin tihkan a awm thei a, hetiangah phei chuan kum sawm thleng tan theih a ni a, damchhung pawh tan theih a ni. Chuvangin theifeimung a thing a thata a chana a nel vang pawh ni chuang loin, khua a thal a, ruahtui a tam si lo, mei lakah hian mi tinte i fimkhur ang u aw, dan anga hrem theih a nihna chu thudang, meiin thil a tihchhiat nasat theihzia chu sawi ngai loin kan kan hre vek awm e. I fimkhur ang aw.