Z A N LUNGNGAIHTHLAK

Nipui khaw lum lai pawh ni se, tukverh leh kawngkapui khar a, up leh muk tak maia Pastor-in sakramen an sem a, khunkhan tak maia an han chham a, Lallukhum ropui ber mai chu, Hnehtu lallukhum chu; Vanah Isua ka hmuh hunin, Kei pawh ka khum ve ang - Aw thisen ropui ber chu, Isuan a tuarna chu; Kraws chungah thisen hlu a luang, Rinnain ka lo hmu, kan han tih meuh hi chuan thinlung hi a khawih dan a dang thin.

Tun hma chuan thingtlangah hetianga Good Friday lai vela sakramen an sem hian, uaiin tak tak a awm ve lo va, kurtai kha tuiah an chiah a, an hmet sawm a, chutiang chuan an ti mai thin a. Mizo chhang, buhban an deng a, an kang ro a, te reuh te tein an phel a, an sem mai thin. Kurtai tui kha no bengneiin an sem a, tlem te tein an in inchhawk diat diat a, tenchhe deuh tan chuan a chi vak loh a.

Khaw pakhatah chutianga an sem chu, tlema tlangval huihphai lam deuh khan no chu a la a, a in zo vek a, ka tlak thei hram a ni, a ti. A semtute an leh hrilhhai viau a ni awm e. Good Friday dawn zana an sem hi a inhmeh bik thin. Lalpa zanriah chhuna kan han kil hi chu a la hma deuh hlekin a lang. Hetiang zanah hi chuan, Zan lungngaihthlak Zion pindan chhungah, Ka Lalpan a thisen a semin, Chuti-anga lungngaih chhumpui zing chuan, Ka Lal thlaphangin a lo tahtir, tih hla hian sak a hlawh fo thin.

He hla hi, kan hla phuahthiam Patea phuah angin hlabu thenkhatah chuan dah a ni a. Tin, Kristian HLABU Bihchianna, tih Pu V.L. Luaha Renthlei ziak phek 295-ah pawh Patea phuah anga tarlan a niin a phuah chhante pawh sawi zau a ni. Mahse he hla hi Patea phuah a ni lo va, Pastor Chhawna phuah a ni zawk.

Khawbungah khawmpui a awm a, kohhran pawh an hlim em em a, mahse inkhawmpui tiak tawh ngai lo a la ni bik si lo ta chu, khawmpui reng theih ni hek lo le. A tiak ta a, chutia a han tiak ta mai chu an ui a, chuvang chuan Pastor Chhawna chu an chelh ta a. Ani hi mihlim a niin Pathian thu hrila vak thin a ni a, inlarna a hmuin chu a inlarna phei chu mi tam takin kan tuipui em em a, Mizoramah ngat phei chuan inthlan dawn velte phei chuan kan inhrilhfiah siak hi a ni ber mai. Thlasik pawnpui an sawi ang deuhin kan duh dan danin kan pawt sawi-kawi a ni ber mai.

Thenkhat lahin an pawl tana thatna tur ngeiin an hrilhfiah a, an han sawi tak tak hi chuan a ni thluam a, a awm em em a, a ni mai tak awm mang e, tiin keini ang duang hre ve si lo leh hrilhfiah ve thiam chuang si lote phei chu kan ka ho mai a, hrawkbawk kalh rulh rulhin chil te kan lo lem vel mawle. Mahse e, mak ve deuh chu, inthlan a han zawh meuh hi chuan, an hrilhfiah fiah kuk kha a lo fiah zo lo leh si thin. Tupawh sam tla kawlh chu lu kawlh a ni, tih ziak chu hrilhfiahtu tumah awm lo mahse keini tan chuan a fiah fe zawk.

Khatia khawmpui a tiak, Pastor Chhawna an chelh ta chu, ani chuan thu a sawi a, ani hi Lal Isua tuarna lam hian a lung a tileng a, thu a han sawi ta chu, a tuarna lam kha a sawi a, thlarauin a hmangin a chenchilh bawk a, a sawi thiam bawk nen, a tui em em a, inkhawmho pawh an mittui a tlain an tap per pur hlawm hial a ni awm e. Tichuan, kan hla phuahthiam hmingthang Patea chuan Pastor Chhawna sermon chu hlaah amahin phuah ta mai lo chuan, Pastor Chhawna hnenah chuan, i sermon kha hlain siam teh khai, Khawbung hriatreng nan, a ti a. Tichuan he hla hi a phuah ta a ni. Pastor Chhawna Inlarna, Seventh Edition, 1998, Thuhmahruai phek viii-na en la.

Jerusalem kulh pawn lamah chuanin, Zawlnei thih dan a ni lo an ti; Mahse en teh Kalvari kawng lam saw, Mipui zingah ka Lalpa ka hmu, han tih laite hi chuan mi chu a hneh a lawm, Ka uaina hrui a chat a, tih hla ai chuan kei zawng ka lung pawh atileng zawk fe. Khatia Pathian thu hrila a vah vel thin lai khan, tum khat pawh Thentlangah a kal a. Tawnghriatlohin hla a sa a, ama sawi dan phei chuan, ka lung a leng ta a, Zoram hi a chhawm dup dup niin ka inhria a, a ti.

Ka u, Revd. Chuathuama leh pu M. Lal­manzuala te erawh tawnghriatlohin lungleng khawpin an zai ve erawh ka ring lo, ring la i nung ang, tih ngawt theih pawh a ni bik chiah law. Chutiang tawnghriatloha a zai chu, a sak chu ti tur zawk a ni mai thei, hriat theih turin a letling ta a nih chu. Tawnghriatloh zai lehlin hla hi a vang khawp ang, he leiah hian hmun dangah awm ve tak ang maw.

Chu chu, Aw Kalvari thing chungah chuan, Ka hreng ropui a au; Jerusalem Kanan ram zawng zawng, In Lal a ni lawm ni? tih hi a ni. Hla ril leh ropui tak chu a lo va ni em! Pentecost Nia Peter-an thu an sawi pawh kha, tawnghriatloh kan tih hi a ni lo vem ni? Mahse an mahni tawng ang theuh khan an hre si lawi a nih kha. Ka Pu, S.R. Vala, IAS (rtd), (L), pawh kha, kan khua Sumsuihah ka Nu Chalchhungi khan tawnghriatlohin thu a sawi a. Hming ziak thei hram a ni a, Sap tawngte phei chu kawi khat pawh a hre bik lo. Mahse tawnghriatloha a thusawi kha Sap tawng a lo ni awm e, ka Pu chuan a letling a ni awm e. Mak ve tak chu a ni. Ani chuan Sap tawngin thu a sawi a ni, tih reng a inhre hauh lo.

A ni e, kan zan lugngaihthlak dante hi a lo dang fo si thin. Mi tam takin sum duh vangin zu an zuar a, drugs an zuar a, chu chu MLPC Act emaw ND&PS Act dan emaw kalh a lo ni a, an man a, police leh Excise lock-up-ah zan an riak a, jail-ah an thawn a, zan lungngaih thlak tak chu jail chhungah an hmang fo thin a nih hi. Ka Lalpan a thisen a semin, tih lam a ni lo, dan bawhchhia leh dan kalha thil an tih avang a ni zawk si a.

Chung avanga tang chu ni tin thla tin kum tin an pung zel a, dan dang bawhchhiat avanga tang lah zai hlim tham an awm reng bawk. Zan lungngaihthlak Zion pindan chhungah tih chu, an tan chuan jail a ni zawk si thin. Mizo kan ni lom ni? Kristian Lal Isua hnung zuitute kan inti a ni lo vem ni? Dan chu kan zawmin kan bawhchhe lo tur a ni asin. Haw u, zan lungngaihthlak dan bawhchhiat avanga jail-a kan hman loh nan, dan hi i zawm hram hram zawk ang u aw.