MOTOR-A MEI ZUK

A chuai lo vang ka Chhandamtu chu, Mi nung Pathian Fapa Lalber chu; A mawi ber e, nunna pangpar chu, Fak ru lei leh van mite u, tiin mawi leh nalh tak maiin Suakliana chuan hla a lo phuah a. A lei mit, a mit tak tak chuan nunna pangpar mawi ber chu a hmu bik lo tih chu kan hrethiam a, rinna mit a ni ngei tur a ni. Nunna thing len Nunna pangpar pawh chu kung buk li liai hnah hring dip dep ding thelh thiu thiau ni loin kan Lalpa ber hi a ni ngei ang.

Nunna pangpar chu a mawi ber a, aw nunna thing, i zar hnuaiah van angel rual hlimin an leng, aw chutah kan la chawl ve ang, Israel tlang thianghlimah chuan, kan ti thin a nih hi. Mitdel zawk Suakliana erawh chuan mitvarte aiin nunna pangpar mawizia chu a hmu fiah zawk a, a ni e, Jerusalem thar tia hahipa kan sawi thin pawh hi kan Lalpa nakah a awm ni awm tak a nia. Jerusalem thar khi a lanna tlang dang a awm lo ve, I thlir ang Kalvari tlangah, Tahchuan a lang Chhandamtu nakah chuan, tih hla aṭang hian a chiang kuar lo vem ni?

Pangpar mawi ber chu kan hr eta, mahse pangpar lam a ni lo, mawi ni loin e, mawi lo lam hi a ni sawi ka tum tak zawk chu. Engemaw chang hi chuan khawi iloah kan kalin kan vak thin a nih hi. Chutianga ka vah velnaah chuan motor-a chuang chunga meizial zu hi ka hmuh chang a awm thin a, a mawi lo hi ka ti em em mai a, a mawi ber e, nunna pangpar chu, tih nen chuan inthlau vit vet tak mawle. A chang chuan a motor khaltu ngei maiin a zukte hi ka hmu a, chu ngat phei chu e, a mawi lohzia chu thuin ka sawi thiam lo zawk a.

Tin, heti hi a ni a, a chang chuan ke pahnih nei chi lirthei, two-wheeler an ti a ni awm e, Sap tawng a tela ka lam thiam chiah lo, chutianga chuang, a khaltuin mei a zu lek phei chu, a mawi lohzia chu hria nise chuan kum kal ta khan an simna a rei tawh ang. Meizu chunga motor khalh hi danin a khap an ti a ni lom ni kha? Mahse a dana lam chu thudang nise, chhia leh tha hriatna aṭanga han ngaihtuah pawh hian a mawi lo hrim hrim.

Motor chu a ni chiah lo a, kal nan erawh kan hmang tho a, 1983 August thlaa Lungleia kan va kal khan ka vawi khat kalna a ni a, ram buai lai a la nih kha. Police awmna thlanga thil zuar hnen aṭangin chithlum mum kan lei a, kekawr var deuh leh kawr pawdal ka ha a, Kung-Fu pheikhawk dum mawza tel loin ka bun a, kan la inti Bruce Lee ve deuh lai a ni. Police-ten kei mikhual samsei ha kuh kha MNF emaw min ti a, Pastor khawmpui hmanga kal tur emaw chu min ti chiah lo deuh a ni, an lo tlan thla khup khupa min man tak chungchang kha ka sawi tawh kha kan la hre hlawm ang chu maw.

Khatia police-ten min hai a, MNF emaw min ti min man chanchinbua mi lian tu emaw tlangzarhtir lo va, keimah zawkin ka tlangzarh ta kha kan veng pa pakhat chuan a lo chhiar fuh thawi thuak a ni ang. A hnua mi dang hnena a sawi leh chu e, “Zu rui leh zuarho an man a, ani pawh an man a, tunge tih an hre si lo va. Court-ah chuan an hruai a, Magistrate kha a la kal lo a, an nghak ta char char a, kal har hi an ti lutuk a, a tawpah chuan Pu Liana chuan, keimah hi ka nia lawm, min man daih sia Magistrate thu tur chu ka ni e, a ti a. A han thu a, zu chu an khulh leh a, chumi tuma an man zawng zawng chu a chhuah ta vek e, a ti. Chutah SP kha a phone a, SP chuan, ngaihdam a dil a, ka naute chu an hna aṭangin ka chawlhtir vek ang, a ti a, mahse ani chuan, keimah avangi chuan ni lo ve, tun hnuah erawh lo fimkhur tawh se, a ti e, min ti.

Ka ngaihtuah a, a ang teuh ve ving veng hi ka ti reuh lutuk a, kei ai chuan ka chanchin a lo hre fe zawk a, ka hriat bak a hre hnem hi ka ti a, ka thinrim lo, ka fak a ni zawk. Hetianga mi dang chanchin anmahni ai pawha hre zawk, mual letliama thiante hriat loha tuklo bengngawng perh thla thei hi kan awm ve chawk a, a sawi thiam thiam sawi ngaihnawm ber ber an ni chawk thin. Nuam ve tak chu a ni.

Tum khat leh chu kei aia ka chanchin hre zawkte hi an lo awm ve nual thin a, ani sam sei hmeltha bik si lo kha, pisa kawta nilum a lo ai kha pa pakhat hian, tlangval khi laia kuhva khi min han leisak lawk teh, a ti a, ani lah engmah sawi loin a han leisak ve mai a. Chu pa chuan a hnua a han hria chu a zak lutuk a, titen ka chanchin an lo sawi bawk thin. Kei pawhin tak tak emaw ka ti hial mawle. Fb-ah vawi khat pawh, “Hmeichhe kiss laia an hnute khawih hian ram hmasawnna a thlen lo- K.L.Liana,” tih hi an lo pho lang ut mai ka hmu chu e, ka sawi pawh chu a va nih hmel reuh ta ving veng ve, te ka ti vel mai mai.

Khai aw, motor-a meizuk sawi lai laia a ni lo ka sawi tak vak chu le. Chuvang chuan, a mawi lohzia kha ka hmu a, ka hria a, kei ka nih avanga a mawina tur bik ka ngaihtuah hian a awm si lo, chuvang chuan motor-a ka chuan emaw ka khal emaw hian mei ka zu ngai lo. 1987 kha a ni ta awm e, Lunglei aṭanga Bus-a kan chuang, conductor felzia kha a theihnghilh thei lo.

Kan kal dawnin tawngtaina a hmang thlap a. Chutah, meizu mi in awm ngei ang a, Bus-ah chuan zuk kan phal lo a, mei in zuk duh phawt chuan inthlahrung miah suh u, min hrilh ula kan ding ang a, motor aṭangin in chhuk anga pawnah in zu dawn nia, kan lo nghak zel ang che u, in zuk zawh hma chuan, a ti a. Kei pawh a zu mi ka ni a, ka la ni reng a, ka ni zel dawn bawk. Meizuk duh vanga bus tiding duh khawpa mawl leh a erawh an awm lo niin ka hria.

Chuvangin a mawi loh chu thudang nise, dan pawhin motor khalh chunga meizuk kha a khapin a phal lo a ni lom ni kha? Chuti a nih chuan dan kan zawm ni bawk si, zuk loh kha a va tha dawn em. Motor khal chunga mei zu i hmu ve tawh thin em? Aw ti ve mai la, a mawi lohzia hi ti raw? Chuti a nih si chuan, a bik takin motor khalh thinten i hria ang u aw, a mawi lo teh asin, a zahthlak a, motor khalh lai hi chuan meizuk loh hram i tum ila, i ching ang u. Dan kan zawm a nih avangin a tha a ni ngawt lo va, mi dangte tan hnawksak a ni a, a mawi lo em em tih hi i hria ang u. Dan zawm mai hi a lo mawi khawp dawn a lo ni e, nunna pangpar ni si loah rau rau chuan.