SERCHHIP LAMAH

Kan vawi khat kalna ni turin Muallungthu leh Khumtung inkar kawng chu zawt chawp deuhin ni December ni 13, 2017, Nilaini zing vawt tawh takah chuan kan zawh a. Ruahtui tam em avanga a sulhnu hnutchhiah kal tinuam lo tak takte chu hmuh tur a la tam hle a, an siam tha zela mahse chuti maia han zawh thuai chi rual erawh a ni si lo.

Kal kal takah chuan Khumtung chu kan han chhuak hlawl a, tukthuan kan ei a, tichuan hma lam pan chuan Aizawl-Lunglei kawng, 2008 Khuangchawi thlaa ka kalna hnu kha kan zawh a, kum sawm dawn ka kal tawh lo tihna a ni ber. Kan kal chhan ber pawh, nikum lam aṭanga kan tum kan thulh remchan zel rih, Serchhipa kan Chief Judicial Magistrate, Lalngaihmawia Zotein min sawm vang a ni a. Ani hi chu dan a zir laiin an zirtirtuah ka awm tawh a, miten “Pu” lo ti pawh nise kei atan chuan a ni ve lem lo. An nu nen an inngaihzawn lai pawh ka hre rin rens.

PLV an ti a, chu chu Para Legal Volunteers tihna a ni awm e, mite dan lama an harsatna tanpui tura inpete an ni ber ang, chungho chuan traing an nei a, chuta eng emaw sawi ve tura sawm ka ni a, an tihna hmun chu Serchhip District Court-ah a ni a. Serchhipa Court awmna pawh chu kan hre lo va, a kalkawng chu kan tlan pel a, kan let leh a, kan let pel a, kan kir leh a, ka hmu ta hlauh a. Court awmna chu a va thlaler deuh a, mahse a nuam hle a, a building a thar a, an thawl a, a fel fai a, Aizawl Court ai chuan a nuam zawk daih mai.

Kan va thleng chu maw, Dekchi lian pui pui hi a pawn lamah lei a lo hnawih a, sa chhumna tur a ni a, kan ei tur a ni tih kha a hriat sia, Krismas hmain sa kan ei dawn tih hi thinlungah a cham veng veng a, nuam ve deuh chu a ni. Serchhip YMA Sub-Hqrs-a kan hotupa President Pu R.Sanghmingthanga khan chung traing-hote chu YMA kumpuan, Ram leh Hnm Humhalh, tih kha a lo zirtir mek a. Keini erawh chu kan tlai deuh hlek tawh a, kan lut lo va.

Han let leh ta ila, khatia kan kal kha, Chhiahtlang khawlai kawng chhakah pangpar mawi tak mai hi a lo awm a, fireball an ti a ni awm e, Sap tawng a nih avangin ka hre lo va, ka chhar dawn lo zaiin ka pel mai dawn e, ka di rim reng reng a nam lo ve, tih nen chuan a dang deuh, kan pel thei ngang lo, kan hnung tawlha a thla chu ka la a. Chutihlai chuan a kianga in neitupa putar deuh tawh ka vawi khat hmuhna a nih avangin a hming ka theihnghilh tawh, a lo awm a, e, Pu K.L.Liana a nih hi, thla min han laksak teh u, a ti a, kan han la duh ang lawk a, nula thlalakpui nen chuan tehkhin chi pawh a ni lo, hrethiams? Seling thlen chhoh hmaa kawng sir vei lama thingkung sang tak zem hlum dawna saron par vul kan pel thei thlawt thin lo ang kha a ni ber mai.

Tichuan le, ka hun kha a lo thleng ve ta a, VLP an tih nula leh tlangval, nu leh pa la valai takte chu tlawmngaia dan lam ngaithla leh zir turin an thu a, kei chu ka duh duh dan lam sawi turin min phalsak bik a, nuam ve deuh mawle. Kan CJM, Mangaiha kha a chairman-tupa a nia, ani pek chuan, ani hi nakinah hmeichheho khan thla in lakpui thei a, mahse a chuuks zel che u a ngai thung, a ti, nia a dik ang! Mipate erawh chuan in chibai chuan a tawk mai, a ti thung, huai mai a. Tichuan ka duh duh ka sawi mai loh chuan buaithlak tak a nia, dik taka sawi chuan dan hi a ngaihnawm loh khawp a, tun hma pawhin Aizawl veng hrang hrang hrangah YMA nen tang kawpin dan kan zir thin a, zanah a ni deuh ber, a ngaihnawm loh tih kan hriat avangin fiamthu nen kan chawhpawlh fo thin.

Kan zo chu keia kar kha thla min lakpui ve sup sup a, zep loha sawiah chuan thla min lakpuitu hi an tam ve tawh lutuk asin keimah rau rauah chuan, a chhan ni ta bera ka hriat chu, ka bula thla lak chu an lang hmeltha duh biks. Chhun chawlh a ni a, thingpui thlum leh chhang kan in a, kan ei a tui hle. Thingpui hang dup duh tawkte hi an awm ta thin a, a hahthlak lam deuh.

Chawhnu lamah chuan Mizoram Law College-a kan Principal Pu Rualkhuma Colney hun a ni a. Ani chu bial khawmpui palai ang mai kawngchung nen nghawngawrh nen a inchei nalh bik hle a, kei ve lah jacket ka ha, a hnuaiah T-shirt dumpawl ka ha, nghawngawrh leh ka nghawng a inrem ve lo va, a ipteah erawh ka meizial bawm kum sawmhnih dawn laia upa tawh ka ak a, Mizo zial lachhum hring ngata tawn ka thun khat tlat a, thla a muang hliah hliah. Ani dawtah chuan Law College lama kan zirtirtu Hmingthanpuii Raltein thu a sawi a, chumi chhung chuan keini chuan chhungte kan tlawh kual a.

Tichuan tlai dar thum leh a chanve a rikna tur a pelh tawh zawk chuan chaw chu kan ei a, vawksa chhum antam thlak, arsa mawm tawka kan leh sangha hring pum chhum, puar theih tak chu a ni. Sangha kha nghalim ngat a ni a, nghalim hring chhum ka ei lohna chu a la rei lo va, ka eina a rei tawh zawk a ni, a tui hang kha deuh fak nen, chutianga chaw han ei chu maw, mas aiin ka puar zawk. Tin, heti hi a ni a, kan chhak lawkah chuan sihneh a awm a, a hnah erawh a sin hle a, mi huan a ni a, kan la ngam si lo va, kan thlir zing hle. Vawksa tui kha sihneh nen khan han buhchiar phei se chu aw, dan zir aiin a tui zawk ngei ang.

Khua pawh a tlai lam ta, VLP-te kha hmun hrang hrang aṭanga lo kalte an ni a, anni pawhin haw an duh a, keini pawh riah kan tum bik law. New Serchhip biala an Pastor ka nau PR Hmuaka te quarter-ah kan lut phei a, a thiannu ka farnu Lalrininin thingpui min lo lum a, kan han in leh chu e, kan puar lutuk ka mar pung mai, mahniin ka thaw hle hle mai. Khumtung chu thimah kan thlenga kan bazaar a, a lum em em lo viau.

Tichuan zan khaw vawt a changa chhum chhah takah zingah chuan kan kal zel a, zan rei hmain in chu kan thleng ve mai bawk, dan hi a pawimawh a ni e, keini pawh dan zir tur leh kan hriat ve chhunte mi dangte hrilh turin thlasik khaw vawt hnuaiah Serchhipah kan han kal kha a ni a, a pawimawh em avangin hetianga senso tur hian court sang zawk leh sawrkar pawh hian sum tam tak tak a sen phah a, mahse chungte dan kan lo hriat zauh phahna a nih chuan, kan hloh hlepah kan chhiar, tih an sa thei thin zawk a lo ni, dan hi i zir zel ang u aw.