A ENTU MIT

Thla mang lai a ni a, mahse zan chu a thim si lo, a chhan pawh eng dang vang vak a ni lo ve, elektrik a en vang a ni. Khua erawh chu duhthusam bakin a vawt thung a, chu chu ni 14, Chawlhni zan, Janaury 2018 kha a ni. Kan tan chuan hemi zan hian lawmawmna tak a nei a, chhinchhiah tlak a nihna lai pawh a awm ve tho mai. A vawh vang erawh chu a ni hauh lo thung.

Mi pakhat, chanchinbu sem thin a ni a, ani zawng kei aiin a vak tam a, mi pawh a hmu hnem zawkin a bial pawh a zau a, ani chuan ka kum zat min zawt khiah mai a, nula ka ni lem lo remchang bawka a zia phei chu a awm viau. Diktak chuan mipa tan nula an kum zat zawh nulh mai chu a hawihhawm loh thlak ber pawl a tling a, hmeichhiate lah hian an kum zat hi an zep theih pawl tak a lo ni ve tumhrang thin bawk nen.

Kei chuan, e hei ka upa ve ta, tiin ka kum zat bawr awm vel chu kan hrilh thawi thuak a, ani chuan, e he, ka rin aiin i la naupang daih mai a, kum 80 i nih daih tawh ka lo ring a! a tih chu mawle. Kei ka lo inngaihdanah chuan kum 18 i pel tawh em, min tih ka beisei ruk reuh reuh laia kum 80 hmuha min hmu kha ka lawm viau laiin ka lawm lo ru a, ka sakhmel hi tha a ti teh puak lo niin a lang thei. Hman deuha mi pakhatin kum 56 i nih ka ring, min tite kha ka ngaihtuah a, ka nuihte chu a za lek lek a.

Kan senior ukil Pu R.C.Thanga hi a hmel ni loin a chezia leh hawiher, a la chak dan leh khawsak danah chuan tleirawl malmum hmel a pu a, mahse a ukil-pui pu R.Thangkanglova chuan, RC-a chu kei aiin kum khatin a upa a, kum sawmriat a pel tawh, a tihte ka ngaihtuah chuan kumah chuan ka buai ta bik lo va. Ka chhungten ka hriat lem lohva ration card an siamtirah khan kum sawmnga ka nihna kha a rei tawh char char hle a, mahse kum sawmnga pelh erawh a har viau a ni ang, tunah pawh ka la ni reng tho.

Tichuan kan awm khawm laih laih a, kei pek khan Pu Kanglova chu pehhel loin ka zawt tawp a, pu Kanglo, hmanah khan nuthlawi pakhatin a ruai che a, ukil fee atan pawisa ni loin vawi 25 mutdun kha in inremna a niin i fee chu chutiang chuan i lo chhiar reng em ni? Bakah i fee a pek zawh hma chein Pu RC-a khan a puk thensak che em ni kha? Ka ti a. Ani chuan, nia RC-a khan pukah min dila a puk then ngei mai a, han inrulh leh dan lah a buaithlak khawp mai, kha nu kha ka hmu ta ngai lo va, a la nalh zuarin ka ring, a ti. Pawisa a pung awmte hian an puk thin tih chu ka lo hre ve tawh a, mahse nuthlawi han puk kha chu a rulh leh dan turah khan ngaihdan tur pawh ka siam thiam lo, engzat nge a puk kan tih lahin a ngawi daih si a, inrul loin a ba ral ta a nih a rinawm.

Pu Rualkhuma Hmar, kan ukil-in, ngawiteh pu Lian, hei ukil lah hi kum tin kan pung a, case lah a pung ve si lo va, zu khap lai MLTP Act awm lai kha chuan e, nuthlawi mam per pur chhul lak tawhte hian min be ru sur sur mai a, sawrkarin zu zawrh a phal a, MLPC Act an hman hnu hi chuan case hi a tlem sawt mai a, a tuartu ber chu ukil-te hi kan ni a, nuthlawiah kan ril a tam a nih tak ber hi, kumin hi inthlan kum te a ni bawk a, kohhran hotute hi fuihpawrha zu khapna dan kha hmang leh tura nawrtir asin kan duh, zu khap hi keini ukil leh a zuartuten kan hlawkpui ber asin mawle, a ti te pawh a awmzia ka hre ve ta ri ruai niin ka hria.

Kumin, ni lo, nikum tih tur a ni zawk ang, krismas vuakvet velah khan halpuah halte kha khap a ni a, mahse kan hmu a, kan hria a, December ni 31 zan lai a lo nih meuh kha chuan e, kumin chu kum hlui thlah nan leh kum thar lawm nan nasa takin hal ang u aw, a ring apiang chu an nung ang a, ring la i nung ang, tih ang maiin a ri dum dum mai a, van boruakah rocket a puak ri un un a, a darh suau a, kan mitin a hmu a, kan bengin a hre bawk. Zu khap lai khan zu a tam em em a, an khap pung emaw kan ti hial ang deuh khan, nikum kum tawp zan kha chuan halpuah leh halmawi kha an khap pung an khap ring dum dum emaw tih a awl zawk hial a nih kha.

Khapna dan kan hmu leh kan hriat khan engvanga khati em ema zawm ta lo mai nge kan nih tih khan ngaihtuahna a tithui hle mai. A entu mita zir hian thil thuhmun leh a ngai reng pawh hi a landan a lo danglam thei dawn khawpin ka hria a, kei pawh pakhatin 56 vel ka nih a rin laiin a dang leh chuan 80 tling tawhin min hmu thung a nih kha. Halpuah khapna dan pawh kha kum dang ang thoin a awm a, a ngai reng a, mahse a thlirtute kan mit a dang ta em ni ang khati em ema halpuah kan hal nasat mai chu. Dan kalha haltu zawng zawng kha kan man mite pawhin vaiin man dawn sela a buaithlak turzia chu, man sen rual a ni lo vang.

Mahse hei erawh ka sawi duh a, mas dawn vela halpuah khapna dan tia kan sawi hi chu dan siam pawlten dan an siam a ni hran lo va, dan ding reng lah a ni hek lo. Cr PC an tih mai chang 144-na tlawhchhanin Bawrhsapin emaw khapna thupek a siam thiang a, mahse kha thupek kha thla hnih aia rei a ding thei lo va, sawrkarin tha a tiviau a nih erawh chuan thla ruk chhung a pawtsei thei thung. Keini ramah hi chuan tun hmate kha chuan thla hnih a ral chiah a, khapna thupek thar an siam leh a, dan ding reng ang mai khan a lang thin. Dan ang chuan a thiang lo thung niin a lang.

Tin, ui kawlh emaw ran dang emaw thunun dan tur chu khimi dan a chunga kan sawi bawk a chang dangah tarlan a nih laiin keini ramah chuan khi mi bung leh hmang khian ui chhuah te, kawngsira rawra dahte an khap thin a nih kha, danhremite an nui tet tet thin. A enga pawh chu ni se, dan leh thupekte hi a awm a, khawvela kan chen chhung chuan a awm zel ang, chungte chu a entu mita zira danglam thei a ni lo, keini khua leh tuite hian a zawm kha kan tihtur leh kan bat a nih laia a bawhchhe zawnga kan khawsa vak mai erawh kha chu a mawi lo va, a Mizo lo va, ringtute tih loh tur a niin a lang.

Kum a thar angin rilru thar i pu ang u aw, he leia kan chen chhung hian dante hi kan zahin kan zawm tur a ni, tih hi i hre thar leh ang u. Dan kan zawm loh avanga jail kan tang a nih pawhin tumah mawhchhiat tur an awm lo ve.