Chapchar Kut

Chapchar leh Favang awllen lai hi kan Mizo khawsak thin danah chuan kan nghahhleh a ni a. A chhan chu hnathawk reng reng leh awl pawh nei lova an awm thin vang a ni ber mai. Lo an han vat a, lova neih ngai meuh loh ramchang hmun, maupui leh thing hmun, hreipuia kih ngai an neih phei chuan lo vah kha a hahthlak em em a, inhliam palh pawh a hlauhawm a, inti palh ta pawh an awm chawk. 

Kei pawh ka vat ve tawh a, mautak hmun thelh hen hawn han vahte chu a nuam phian a, tlangsam pik tak hnuaia bawk chunga kan han vat, kan zai se sete thung chu a nuam tehchiam lo thung. Chutahle zairum tuai a lo awm, chem bil tawh lamah kan han chho sah chiah chu e, a tlu har duh asin. Luang leh rairuang hmun bawnpui pui han sah hel map map mai phei chu kut hi a durh duh em em a. Bantawia khan luang hmun vah chu a sam, an ti. A han thlir vang vang a, luang hi chu sah loh, vah loh hian a kang tha duh zawk a, a ti. Thing awm chhunte lah thlam chak leh be ngulah ka zuah a nih hi, a ti a, chuti zawng chu, a zo der! 

Tunah chuan Chapchar Kut pawh kan lo thleng leh dawn ta. Nula leh tlangval pual a ni deuh na chuan mi tin, naupang aṭangin tar thengin a huam ni zawkin a lang. pi peh pu aṭanga kan Kut ropui ber leh nghahhlelh ber a ni a, krismas kan nghakhlela kan thahlel tlukin an thlahlel thin, ti ila kan daw awm lo ve. An ur nasa em em a, a hun a lo thlen chuan lal mualah nula leh tlangval an chai a, an lama nuam an tiin an hlim em em thin. Mautheiin naupangin zu an tulh a, tlai lam a lo nih chuan kawtchhuah lungdawhah chhawng an hnawt a, sa leh chaw, artuite an inbarh hawng hawng thin a ni. 

Hemi ni hian, chhung tinin sa ei an  tum a, ar talh tur  nei lo pawhin thang an kam a,sava emaw sa emaw ei an tum thin. Tin, nupa inhauh a thiang lo va, inthen a thiang lo tihna a nih chu.  chuti a nih chuan ni lawmawm leh hlimawm, remna ni a ni berin a lang. Nula leh tlangval pual a nihna angin, mi pangngai tan chuan ngaihzawng leh hmangaih te pawh an nei tur a ni e, nu leh pa tam tak chu, tun theng pawhin a la ni ang, thikthu tichhe lutuk leh makpa atana duh loh zawngte lantir nasa ta em em an awm thin. Chuvangin, Ka nu hal hal lo la val mawia, Ka zua nena in len lai tinkim dawn la, Kha kha kan iang ve ka di nen hian, an ti thin zuk nia. 

Kan ramah sakhaw thar Kristianna a lo lut ta a, mi tam takin an zui a, tunah phei chuan zaah za Kristian kan ni e, kan inti ta hial a, mahse a tak takah chuan kan ni tawh hauh lo. Mizo Kristian ni hauh lo eng emaw an awm a, chumi avang chuan mi tam tak Israel ramah an pem a, kan thenawmah pawh an awm, patling fa nei duah tawhin serh an tan a, a lo na phian a ni ang, a nat vanglai chuan kekawrte pawh kan ha ngam hlei nem, puan nem kan bih duai duai mai, a ti, a dik ka ring. Mihring thunun nan  chuan Sakhuana leh Politiks hi a tha ber a, patling leh lehkhathiam a awm tak tak theih tawh loha an rui an nu but tawh mai, an tih hi a dik hmel khawp mai. 

Kan sakhaw thar Kristian leh kan Mizo khawsak phung, kan hnam nun leh zia, kan kalchar tam tak chu kan sakhuana nen chuan inmil lo, inkalh kalh tlata hriatna a awmin kan inzrtir bawk  a. Chuvang chuan Chapchar Kut pawh chu ka hmu Hmuithla a, hun rei tak chhung chu phum boin a awm a nih kha. Lei chung zawng zawngah bul hmun khat vekin hnam tinte Pathianin min siam a, kan tan hunbite a ruat a, ramrite min khamsak a, amah chu kan zawna kan dap kan dapa kan hmun theih hramna turin, ani chuan min hlat lo theuh si a, tih ziak awmzia an la hriat loh vang a ni mahna. 

Hun a lo kal zel a, mi thahnemngaite avangin Chapchar Kut leia phum boa a awm ta vang vang pawh chu, engtikah a chi a lo tuha a lo phum le, tih mai awl a, lo kan hal a, parchhuang khawpa a kang a ni emaw ni lo emaw, kangvar tuka khau notete an lo tiak, ni lo, an lo awma an kat sep sep, tih zawk tur a ni ang, ang deuhin sakhuana phen aṭangin kohhran pawhin a ral thlir ve ngam ta a. A lo rei leh deuhah phei chuan a lawmnaa hunserh hmang turte pawhin  kan sakhaw rawngbawltute pawh an tel ngam ta a ni lo vem ni? 

Tun hnuah phei chuan sawrkarin a buaipui ta a, YMA te nen tang kawpin kan hlut em em tawh a, kan Kut Ropui ber chawisan a, humhalh a, tun din lehna chang kan han hre ta hi chu Mizo hnam tan a va hlu em. Hmana mi tin chi tin a huap ang khan tunah pawh, hmana kan la neih loh, Larsap, Chief Minister, sawrkar officer lian pu pui, tirhchhiah, sumdawng leh contractor hausa, sikul naupang, nula leh tlang val, kohran rawngbawltu, zu nam deuh phit phet leh drugs ngawlvei rui meng phiai nen, KS leh S lo pawh min huam vek a, sawrkar pawhin sum tam tak a seng thin a nih hi. 

Hawh u, i Chapchar kut ang u, mahse zu leh ruihlo tel lo leh rui lo, fim takin aw, kan hnam nun leh kalphunga thil pawimawh, krismas tluka pawimawh hi, nupa pawh inhauh thiang lo a nih kha, hlimna leh lawmna Ni, Kutpui a nih vangin chhung tinin sa ei an tum ṭhin. Tunah chuan sa englai pawhin lei tur a awm a, ar nei lo pawhin thangkama sava tal awh tum a ngai lo e, arsa lei tur a tam mai, a duh tan phei chuan uisa thlengin. Kan sawi fo thin Nungcha Humhalna Dan bawhchhiat reng a ngai lo va. MLPC Act emaw, ND&PS Act emaw bawhchhe loin hlim leh fim takin rui loin chung lam hrerengin i kut ang u aw.