HMANGAIHNA NI

Tui a fawn ṭhin kan hria, hmangaihna pawh hi a fawn ṭhin ve tho a ni ngei ang, Suakliana chuan, Hmangaihna a fawn vel e, Lawm ru Haleluia, a ti a nih kha. Hla han sawi taka zarah chuan tlem han hrut hlek ila, van kan thlen hunah chuan a reh thuap mai dawn emaw tih kan hla aṭang chuan awl tak a ni, Thuhriltu leh zaipawlte pawh an lo reh thuap tawh ang, tih hla ang khan. Mahse, Thisen, thisen, thisen, thisen, tiin bang loin kan zai ang, tih hla aṭang thung kha chuan he hla hi chhum lo chat loin kan sa dawn ni awm tak a ni thung, hla dang sakna hun pawh a awm hmel loh e.

Missionary pakhat sawi ka la hrereng mai, khawthlang lam Zoram chhungah a ni a, a awmna hmun kha Mizo ni lote an ni awm e. Krismas ka hmanpui a, a ti. Hla pakhat chiah an thiam a, chu chu kan sa thin a, kan sa zo chiah kha tul deuhin nu pakhat a rawn ding chhuak a, hla thlan ve ka duh e, a rawn ti a. A thlang ta ngei a, an thiam ve chhun kan sak zawh chiah kha a thlang a, kan han sa leh a. A dang an thiam si lo, hla dang thlan chu haw vek rawh u, tihna kha a ni mai si a, khua a har duhin hla dang sak ve hi a chakawm khawp thin mai, a ti.

Kan nun leh khawsakte hi a danglam zel a, hmana Thlanvawng thleng thlangra tiata chaw ei thin kha tunah chuan computer khawvelah kan cheng ta, keini kan tlangval zual lai hunah te kha chuan e, Chapchar awllen hunahte hian romei chhum zam ri riai hnuaia fartuah leh vau a par vul chuk mai thinte khan kan lung a tileng a, Lunglenah damdawi a awm nemaw? Hawh teh, thiani mual li liai tlang khanthuamah, A thapin lunglen i thap dun ang, kan ti zawk thin.

Vanneih changin bialnu te nen thing kan phur a, kan hlim ve em em a, hnahthel ro kan rap ri riap riap a, vazar leh koroten an thai fai hin hen a, thutna turin thinghnah chawr no hlim hliamte kan thliak a, a hnua kan kal leh chuan a lo ro nawi dip dep a, a ngai te tein a lo awm a, Kan thliah thing tin zik a ro nawi e, A chhai ngam lo zarva leng leh rodangin, Hmana mi u nena kan zalna, tih hla ang khan. Chutiang hunte chu kan tan chuan hmangaihna ni, a ni ta ber awm e.

Tunlaiah erawh chuan, Hmangihna Ni, Valentine’s Day an ti a, nula leh tlangvalten khawi maw lai picnic spot-ah a huhoten hun an hmang a, keini ang rual zawngin kan hrethiam ve phak ta meuh lo chu a ni e. A hun leh ni pawh a thleng dawn e, a thleng tan mek a nih hi, chu chu naktuk a lo ni ta reng mai. Keini tan erawh kha chuan maw, hmangaihte inkarah chuan ni tin mai hi hmangaihna ni a ni zawk si thin. Hmangaihna avang chauhin van mipui chhiar sen lohten ui mah se e, min hmangaih hi tuman an hnial thei lo ve, kan ti thin a ni zawk.

Hmangaihna Ni, Valentine’s Day chu kum tin kan hmang thin ta a ni hi, mahse chutichung pawh chuan, Hmangaihna a lo dai zo ta, Buaina leh lungngaihna a khat, tih a ngai leh si thin. A ni e, hmangaihnate hi a lo dai zo ta, kan ram zim teah mai pawh hian han hawi vel ila, han thlir ila, kan mihringpui Pathianin a duh taka a siam leh anpui ngeia siamte chu kan hmangaih lo va, sum kan hmuh theihna tur a nih dawn phawt chuan pawisak pawh kan nei ta meuh lo chu a nih hi.

A tha e, tihna lam ni loin, keini kan hriat ve phakah pawh rakzu Mizo siam diktak, engmah pawlh loh in thin, upa tak tak rei tak dam an awm thin a, zu seh tih hriat ngawih ngawih hnung lam aṭanga en pawha biang lang thei, mahse rei iak dam ve tho si kan hre fur thin awm e. Tunlaiah erawh chuan maw, Hmangaihna Ni kan uar tulh tulha kan inhmangaih lo tual tual thung lawi si te pawh a ang zo ta. Rakzu a ni emaw Sap zu senchi a ni emaw a inte hi lo en ve teh u, a ngawl pawh an vei hman ta meuh lo ve, kum tam chu sawi loh thla tam an daih lo, zu avang hian thi an va tam tawh em.

Chumai a ni lo va, damdawi ruihtheih dang dang a awm zel a, tun hma khan an sawi kan hre thin, Burma ramah chuan miin an faten zu an in chuan an lawm, an ti a, mak kan ti thei em em a, a chhan an sawi pawh damdawi ti lova zu an in kha an lawm a nih chu. Mahse tunah chuan chutiang dinhmunah chuan kan ding ve ta, mi rama mak kan tih ang kha keimahni ramah ngei kan nei ve ta. An fate damdawi ti zua thlak tuma bei nu leh pa tam tak an awm ta. Hmangaihna Ni chu hlim takin hmang thin mah ila, a dai tial tial si chu a nih hi.

Hetianga kan awmna chhan pawh hi a nihna diktakah chuan e, sum vang a ni asin. Sum an hmuhna tur a nih chuan zu leh damdawi khan eng ang pawhin thawk se, thih phah thuai dawn mah sela a zuarte chuan an pawiti hauh si lo, an duh ber chu sum a ni si thin. Kan Pathian thu pawhin, Tangka sum ngainat hi sual tinreng bul a ni, tiin min hrilh a, a dik zet mai. Mahse changthlana hmanga Pulpit tlanga han sawi erawh kan tam lo hle thung chu a nih si hi.

Kum tam tak a lo ni ta, kei tehlul hi kan hotuten financial campaign an tih maiah hian min tir ve khiah mai a. Veng pakhatah kan va kal a, an pulpit-ah chuan kan han ding ve a nih chu. Ka at ka so pek a, Tangka sum ngaihnat hi sual tinreng bul a ni, tih kha kan changthlan pek a nih chu! Ka tifuh nge ka tisual pawh ka hre ta lo, vawi khat mah min tir leh tawh lo, a ziawm phian e.

Hmangaihna Ni kan hriat ve ngai loh kan uar tak em em kan hman thinna ramah hian, zu leh damdawite hian hmun nasa takin an changin bu an khuar nghet ta, a zuarte hian an duh ber chu sum a ni tlat. ND&PS Act dan an tih chu a awm reng a, ni tin mi an thleng thla tin an tam, kum tin an pung zel tih ang maiin he dan anga man hi an pung tual tual lawi si chu a nih hi. MLPC Act dan a awm bawk a, mahse chuti chungin danin a khap zawk zu erawh a rem chuang si lo.

Aw dante hi Mizo kan nihna leh Kristian kan nihna ang hian kan zawm tur chu a ni mawle, mahse Kristianna hi kawrah kan hmang a ni deuh ber, zawm ni ila a khap damdawi ruihtheihte hi tumahin an zuar lo ang a, zu fimchi an zuar hek lo ang a, kan thalaite hi naupang te tein an thi an thi bik lo tur. Dan zawm lova bawhchhetute hian hmangaihna an tlachham a ni ber zawkin a lang ta.