CHAMPHAI LAMAH

Pisa chawlh ni 20, February 2018 zing chuan Champhai lam panin kan chhuak a, Tuirial leh Aizawl inkar kawng pawh an lo siam tha tawha kal a nuam hle tawh a. Selling daia thing kung zam hluma saron lo vul chuk erawh ni dang ang bawkin pel thei loin a thla kan la a, Champhai peng bul Selling kawng chhaka hotel hmasa ber nulahoin an lo nghahnaah chuan chaw kan ei a, an fel hle. Nula khan, Bawihte….min lo ti a, ka puar sawts.

Kawng a lo tha viau a, mahse a chhe lai a tam deuh a, mawng a kham lutuk chu han thuttun ka chak hle a, mahse a rem chiah bawk si lo. Pu Vanlalenmawia, MLSA lama kan hotu lian hnung kan zui a, ani erawh a hma niin a lo han chho tawh thung a, kan thlenna tur vel a lo tifel dim diam a. Ni danga Tourist Lodge-a thleng thin kha Hranga Plazaa Hotel an tihah min thlentir a, a nuam hle.

Ka awmna pindan erawh tukverh awm theih lohna khawpa a laili a ni thung a, khum erawh a zau a, pindan dangah chuan kawr khaina tur almaira an tih ang leh thutthleng sei nghenchhan nei leh choka lam mamawha biakna intercom an tih ang hi a awm a, ka room-ah erawh chuan a awm ve lo thung a, mamawh neih chuan chokaa zu kal a ngai a, mahse khum a zau thung a, a vang zawng pawhin ka mu thei a, ka awmna awm tak niin ka hria, nuam ve deuh chu a ni.

Kan Judicial Officers te, nupui hmuh zawh loh vanga tlangval R.Vanlalena, Addl, District Judge leh a hote, Manguri, CJM leh Thomas, Magistrate te an fel hle a, a tuk zingah Pu Ena chuan mikhual zawng zawng chaw eiah min sawm a, kan puar e. Tichuan Kahrot YMA Hall an ti a ni awm e, tah chuan kan kal khawm a, Dept hrang hranga hotuten an hnathawh dan an sawi a, kan hotupa ber Pu Vanlalenmawia a chair thung a. Aizawl lam aṭangin kan ukil kalte kha thu sawina hun an nei ve lo erawh pawi ka ti a, Joy-a erawh zaithiam a ni bawk a, a zai a. Champhai nula Lalruatfeli a zaithiamin a hmeltha hle thung.

Keini kan ukil Pu K.V.Tlangmawia nen erawh kum lamah a uaithla lam kan ni tawh deuh bawka min dintir ve a. Pu Tlangmawia chu kan nauten fel an ti hle a, a nupui hi Dr. Hmangaihi Heath Direcror a ni a, pasal chu Pathian thu tak pawhin nupuite chunga awm a nih avangin Director-chung, an ti tawp. Kan ukil Johny L.Tochhong leh V.L.Nghata Keivom te erawh chuan thusawina hun an nei ve ta lo va. Mi an kal tha a, mipui pawh an tlem lo ve.

Hun kan hmang zo chu, kei tehlul hi thla min lakpui duh kha an awm ve thin si a, kei ha kuh samsei thla min lakpuite hi chu an lang tha thin sia chuvang chu a ni ber awm e, nula leh la lo, tlangval leh val lote khan min lakpui ve a, a tha zel tho mai. Thla ka lakpuite zingah khan, phu loh an tam a ni deuh ber mai, hrethiams? Tichuan Department hrang hrangten dawr an hawnte chu kan en a, Health Dept chuan engemaw te te, mipa zuzu-tuamna an ti emaw ni hi an lo ngah a, Pu KV-a nen kan la duna thla kan lakpui vel, a nuams.

Chutah le, District Child Protection Office an tih chu Pu KV-a hoin kan va tlawh a, thingpui an lum a, hmeichhia deuh vek hi an ni a, an felin an hawihhawm a ni mai lo, an hmel pawh a tha nangiang e, ka rilru te te chuan kan Addl. Dist. Judge Tv R.Vanlalena tan te ka awt ru vel. Court kha Zote lamah an lo insawn daih tawh mai a, kan la hmu ve si lo va, kan va en a, an pisa a nuamin a fai a, a thar a, Aizawl lam aiin an changkang zawk. Haw lamah chuan kawngpui khu mup mup zawh chung zelin CDPO pisa kan va tlawh a, a tlai ta deuh bawka an lo inkalh thiap a, kan hawsan daih.

Chutah le, kei chu kan thlen in thlang lawkah ka u Sawmi a awm a, an inah chaw ka zu ei a, thla a eng em em a, a vawt bawk a, a lunglen thlak hle mai. Hemi ni, ni lo, zing aṭang hian tih tur a ni zawk mah ang, keini Aircell hmangho kha a thi ta thuap mai a, ka phone neih ve chu thlalak nan chiah a tangkai a ni deuh ber mai e. Hotela thawkte kha an fel em em a, kawr sen leh kekawr dum an ha a, kei tehlul kha thla min lakpui duh, an la naupang an sawi zak a lo ni awm e, mahse kan la ta tho a, ka kal leh hun chu ka thleng leh mai thei a ni, ka zawngchhang tlats.

Hemi ni chawhnu tlai lam hian kan hotupa ber Pu Vanlalenmawia te chuan min hawsan a, keini erawh a tuk ni 23 chuan zing dar ngaah kan thova kan haw a. Khawzawlah thingpui kan in chu e, vawt tak a ni. Biate lamah kan kal a, Serchhipa ka chhungten lung an phuna chu chu kal ka duh si a, Biate tlangdung chu kan la kal thang lo bawk a, a nuam hle. Kan ril hi a tam tawh a, hotel a vang si, chhungte awm bawk si lo, a tawpah Lungdar kan thleng chu hotel a lo awm a, tah chuan kan ei ta nghek a.

Biate kha nikum khaw fai ber a ni lom ni kha? A lo fai hun a, an step-te kha rawng an hnawih a, a mawi lutuk asin, an pangparte pawh chu rawng hnawih lo mahse a sen no chek a, a thlate kan la a. Dan lam zir leh sawiho tur kha kan kal chhan a ni ber a, dan a pawimawhzia leh mipuiten kan phak ang tawka kan hriata kan zir ve a tulzia leh chutianga zirtir tur chuan a pawimawh em avangin sawrkar leh Court sangte pawh sum leh pai tam tak sen pawh pawiti loin a buatsaih thin a, keini mawngkham tawkin kan thu bu lawk lawk.

Tichuan Serchhipah chuan dar khat velah kan lut a, ka chhungte lungphunnaah chuan an lo zai tui khawp mai a, an lam mup mup a, bawng leh vawk an talh a niin ka hria, a lo rei deuh hnu phei kha chuan varmaw lam khan an zai a, a thluk ka thiam ve chiah lo bakah a hla-thu ka by-heard lo deuh bawk a, kan uipui tui lian thlir vel mai mai. Chaw puar tawkin kan ei a, a tuk tuk leh Inrinni mai chu Serchhipa kal leh tur, Champhaia tih ang khan dan lam chi bawk, cham nghal law law rawh u, kan hotupa ber khan a rawn ti ta mai a.

Mahse chu em zawng ni lul suh se, tiin kan haw ta tho a, tha tharin Aizawl aṭangin kan thawk tha leh zawk mai ang, tiin ka haw lui ta a ni. Mipuite kan phak ang tawka dan lam hrilh ve te hi kan bat a ni vein kan inhria a, sawrkar leh High Court pawhin khua leh tuiten dan kan hriatna tur a nih chuan tiin pawisa tam sengin thil a ti thin a, keini mipui lamte pawh hian kan phak tawka kan tawiawm hi kan tihtur a ni tih hriain, dan a hriaten an sawi ngaihthlak te hi peih ila, ngaihthlak mai ni loin a zawma ber zawk kha kan tih tur a ni, tih hi i hre nawn fo ang u.