SERCHHIP LAMAH BAWK AW

Chhiahtlangah chuan vau a sena lo par vul chuk mai chu kawngpui bul maiah chuan a awm a, a bulah chiah chuan a vara par chi chu a buk liai bawk a, Ka ding dawn lo zaiin ka pel mai dawn e, Ka di rim reng reng a nam lo ve, han tih chi rual a ni lo asin. Kan ding a, a thla kan la a, a huan neitupa chu a lo kal a, ka in chhung aṭang sawn va la rawh u, a chiang zawk, a ti chu kan lawm hle. Chu chu ni 24-2-2018 zing lam Inrinni tuk kha a ni.

Tourist Lodge lam pan turin kan tlan zel a, leilung siam tirh ata a vawi khat nan Serchhip College hung chhungah chuan kan lut a, a hmun-hma a nuamin thing a awm chuk a, kawng a thlur deuh sung a, a hnum nuam hle a, kan rin berah chuan kan kal a, a lo dik a, a tawpah chuan Lodge an tih chu kan va thleng hlawl a, a hmun a nuama a in a la tharin a fai tha, a thawkte an fel hle bawk a, chu chu zing lam dar 8:30 vel a ni.

A hma zanin MLSA lama kan hotu lian Pu Vanlalenmawia te erawh an lo thleng tawh a, tukthuan kan ei a, sa tui tak tak an siam a, an chaw a tui hle bawk a, tlangval zual lai deuh chu nise ei teuhna chi a ni, mahse kan tlangvalna a lo rei ta deuh bawk a, ei teuh hi a har ve ta a ni ber. Nipui thereng zuzi hram chuan lung a tileng em em mai a, zo-thingte chhawl li liai hnuai thelh hin henah chuan hahdamna a awm si thin.

Tichuan, kan kal chhan ber mai, Legal Service Camp an tih mai hmang tur chuan Bawrhsap pisa-a an Hall-ah chuan kan phei a, 2007 kuma ka kal tawhna kha a ni. Serchhipa kan Chief Judicial Magistrate Mangaiha chu DLSA an tiha hotu a lo ni a, rem a lo ruat thiam khawp mai a. Khual Liana tan Pu Vanlalenmawia chu a ruat a, ani chu kawngchung nen nghawngawrh nen a induang a, Pastor khawmpui kal a ang, keini ve thung erawh chu a hnungzuitu a thul phurtu tur kan ang thung. Khual Zahawm atana Sub-Hqrs, YMA lama hotupa ber Pu R.Sanghmingthanga ruat a ni a, a awm thluam mai.

Tin, thupuangtu atan zaithiam nula Lancy Remlalhruaii leh tlangval hmeltha deuh a hmang a, a taka Lancy chu ka hmuh vawi khatna a ni bawk a, a zia a awm viau zel. Tin, Aizawl lam aṭangin kan Ukil Johny L.Tochhawng leh V.L.Nghata Keivom bakah zaithiam ni bawk, MLSA-a Ambassador Joy Zairemmawia an kal bawk a, kan Khual Lian leh Khual Zahawmten thu an sawi zawh chuan Serchhipa Depatment hrang hranga hotuten an hnathawhte an sawi a, a ngaihawm hle a, a bengvar thlak em em bawk. Kan zaithiam Lancy leh Joy-a ten zaiin min awi a, a nuam ve lutuk mawle.

Kohhran Upa an tih ang hi ni lo mah ila, kum lamah ka lo upa ve ve ta deuh bawk a, chutia kal ve ta chu thusawi turin min han ti ve tumhrang a, Department hotuten an hnathawh an sawina kara lo din ve ngawt chu e, sawi tur hi a vang asin. Ka chalsam a tlak ve tawh avangin pa-challang ka lo ni ve tawh reng mai a, ka ha a lo kuh ve bawk nen, enge kan MLSA lama kan hotupain mi hruai ve zel chhan chu ka ngaihtuah a, a chhan awm hi ka hre thei hlawls lo, ka sam a ngila a sei bawk a, ka chal a lang a, ka ha a kuh a, thla miin min lakpui hian an lang tha duh thin tih an hriat avangin min lakpui thin a, chuvangin thlala turin min hruai ve ni ta berin ka ring a, Ring la i nung ang, tih ang khan.

A tawpah chuan kan CJM chuan thiam deuh hian lawmthu a sawi a, a pa lian lem lo na vang vangin a sawi thiam khawp mai. A tlip nan, Pu K.L.Liana hi a duh apiangin thla in lakpui thei ang a, mahse hmeichhia chuan ‘muah’ hmasak zel tur a ni thung, tiin min zuar a ni ni ta ber mai. Ei tur tui tak, arsa buhchiar min hlui a, a thlum chu a thlum chiah lo va, mahse a tui khawp mai.

Pawn kan han chhuak chu maw, kan CJM khan tlang hriatah mi rawn hmasa loin min lo phalrai tawh si, kei atan lah ni lul lo ve, han tihna hun awm hek suh, thla min lakpui duh vang hrim hrim pawh ni lo, an lan hmelthat dawn avang zawkin thla kha min lakpui leh ta hlawm a, a lawmawm viau zel tho mai. Kei aia chhe zawk fiiii han lakpui tur hi ka duh ve khawp mai a, mahse an vang duh khawp nia mawle, ka phur kang ve thei dawn emaw, ka bei ang kraun awm chu, tih hla sak top mai chi.

Chutiang chuan hun chu kan hmang a, kan ti nek nek a, haw pawh a lo hun dawn hnai ta reng mai a, cham chu chak viau mah ila, a rem chiah si lo. Kan haw kawng lah chu mitthlaah a cham reng mai a, a chhe lai deuh min sawh bawb bawbna lai turte chu thinlungah a cham reng a, mahse kal kan theih a ni si lo, thla neiha thlawh duai duai mai a chakawm hle. Mahse thla neih chu sawi loh, leia bawkvak chite pawh an awm ve a, thla neih an chak thu an sawi leh lo.

Keini mihring, Pathianin a anpui ngeia a siamte zawk hi kan nihna leh nihphung awmdanah kan lungawi lo fo va, Utawk pawh a mam lo, a bawl ve nasa lutuk, mahse siamtu siam danah vui thu reng reng a sawi ngai lo, a lung a awi em em, keini erawh kan nih lohna nih kan chak a, kan duh fo thin. Sam ngilin a kir a awt a, an tikir a, a kirin a ngil an awt a, an tingil a, chutiang chuan mi ta awt reng rengin kan dam chhung hun hi kan hmang fo thin a nih hi. Ka chantawkah ka lungawi lo, Ka dam chhan ka luah zo si lo, ti awm reng kan lo ni e.

Chutiang chuan keini khua leh tuite hian dan kan hriatna turin sum leh pai tam tak sen pawh pawiti loin sawrkar pawhin ruahmanna a siam thin a, chumi avang chuan keini takngial pawh a ha kuh a ha kuhin mawng kham leh sil them thumin kan zin ve thin a nih hi, dan hriat avang leh zawm avanga inchhir hi an vang hle a, inbual avang leh inkhawm avanga inchhir ta pawh an vang hle bawk. Mahse chutiang a nih lai chuan sawmkaw chho vela Mualpuia Bethel an tih tuma thli leh ruahin a nuaia tam tak an haw leh khan kan Ukil Pu R.Thangkanglova a lo tel ve khiah chu niin. Ka kuang lo ka nawr a ni, zu in tur leh KS zawnga kan kal hi chuan kan tluang purh zel asin mawle… a ti. Engpawh nise, kan phak tawkin dan hi i zirin a thiamten an sawite taima takin i ngaithla thin zel ang u aw.