KOLASIB LAMTLUANG

Motor an tih maiah hi chuan ka chuang ve zeuh zeuh fo tawh a, chuvangin rui lo ve tawh awm takah ka inngai a, mahse a ni lem lo tlat, Sihphir kan thlen hma aṭang chuan ka rui chu a ni titih tawha ka luak hi a chhuak a, ka chauin ka zawi nghulh a, ka vannei a, ar chaw chu ka pe ta em lo hlauh, chu chu ni 27-2-2018 zing lam khan a ni.

Kolasib lam pan chuan kan tlan zel a, he khua hi Pu K.Zawla sawidan chuan, Kawla lalna thin a ni a, Kawla, Chief tih a ni a, Sap tawnga Chief tih chu Lal tihna a nih avangin Kawla Lal tihna a ni. Kawla Chief, tiin an lam thin a, Kawla kha lal a nih avangin a khua angin hnam dang, sipaiten Kawla Chief an tih chu Mizote chuan Kawla Sib an ti emaw an tia, Kawlasib an ti a, a lo rei hnu chuan Kola-Sib tih chu Kolasib tih a lo ni ta a ni.

Tichuan, Circuit House an ti emaw ni, Tourist Lodge an ti emaw ni zawk ni, chutah chuan kan lut rawih a, tukthuan puar takin kan ei a. Kan M.P. Pu Ronald Sapa Tlau pawh a lo awm ve a, ani hi Delhi Mizoram House-ah kan thleng ho tawh a, Zennic-a a awm laiin a pisa-ah kan leng tawh bawk a, a fela a hawihhawmzia kan hre tawh a, tluk lo ka inti khawp mai.

Tichuan tukthuan ei kham hnu chuan Diakkawn YMA Hall-ah chuan kan kal khawm a, Hall an nei thain an changtlung hle a, a nawm pawh a nuam. Legal Services Camp an ti a, camping an tih hi chu ka hre thin a, kan lut ve tawh thin bawk, Isua chu Lal leh Chhandamtuah i pawm em? An ti a, Aw, tih chuan inhlan rawh, an ti a, tichuan kan lo piangthar ta thin ang kha chu ka hre fo a, hetiang camp erawh ka hre zen zen lova a tihdan dante pawh an thiam ka ti.

Kan Chief Judicial Magistrate, Kolasib District-a DLSA-a ziaktu ni bawk, nula Sylvie Z Ralte chuan min kaihruai a, a hmel a thain mipui han chawh phur dan a thiam em em a, a awka a zangkhai a, a fel a, a zei bawk. Kan zawh hnuin a nuin in a leisak kan en a, a nuam hle mai, a kawta saron par mawlh kha a mawi ka ti, ka lung a leng bawk, a in a nawm nen aw, makpa chhungkhung turte hi han hmu ve mial hlauh se, kan va lawm dawn em, huiham.

Tichuan, MLSA lama kan ziaktu lian leh hotupa ber Pu Vanlalenmawia chuan thusawiin mipui kal khawmte hnenah lawmthu a sawi a, MLA hiala lo in-candidet tawh a ni bawk a, thusawi pawh a thiam phian reuh a nia. Pu C.Liankunga, President, Sub-Hqrs YMA chu Khual Lian a ni a, ani chuan thu a han sawi a, a thusawi a ngaihnawmin a sawi thiam khawp mai, President awm tak reng a lo ni e. Kolasib-a Court lama kan hotupa ber Pu Biakzama, Addl. District Judge chuan min awmpui a, thla a muang hle, mahse vawksa thithun erawh a ei ngai lo thung a, ar bawp erawh tui a ti.

Hmun danga tih thin angin Department hrang hranga hotuten an hnathawh leh mipui tana tangkai an sawi a, pawn lamah dawr te an hawng bawk a, a duh duh tan ena zawh fiah theih a ni bawk a. Kei tangkaina nei ve lo kha ka kal ve lawi si a, kum lamah kan lo naupang chhe zawk zawk tawh lo nen, ngawi renga min thuttir ngawt reng chu nuam lo an ti a ni chek ang a, ka duh duh sawi ve turin min ko a, rinai chuan sawi tur a tam lo khawp mai. Vanramah chuan, Thuhriltu leh zaipawlte pawh an lo reh thuap tawh ang, tih a nih laiin, Thisen thisen, tiin bang loin kan zai ang, tih a ni bawk sia khawi zawk tak dik ang maw, tihte ka ngaihtuah vel mai mai. Aizawl aṭangin ukil H. Laltanpuia, ZNP thin chuan thu a sawi bawk a, ani chu politician rim nam a ni bawk a, a sawi thiam tlat.

Hun chu muangchangin a kal ral ve zel a, a tawp nan Pu Ralliantawna, khulai hmuna Lok Adalat-a Councelor chuan lawmthu a sawi a, a sawi thain a sawi thiam a, thusawitu reng reng khan an sawi thiam hlawm vekin ka hria, tawi fel takin an sawi vek a, rei iak han tlak duah an awm lo. Biak inah a ni emaw, pawl thil a ni emaw, a chairman berin thu an ngaha an tlak duah a, sermon pa te an thlak hi chuan a mipui lam tan a ninawm thinzia hi an hria a ni ang, chutiang bawkin chairman-tupa nula Sylvie pawh a chair thiam khawp mai, a kaihhruainaa thil tih chu a nuam a, a thiam hrim hrim.

Kan zo chu e, lehkha khawng bawm sawl lian deuhah hian chaw leh arsa kan tlang lian leng lawng pahnih dah chu an sem a, ei zawh chu huphurhawm duh tak a ni. Pawnah chuan Department hrang hrang dawr te chu kan fangkual a, chenna ngai loh ram fan chu tih ang mai a ni. Project Veng KTP nulate khan Mizo puan diktak ngotekherh sinin mi chiauautu an ni a, an hmel a thain an fel bawk a, a zia a awm khawp.

Hmun danga an tih ang thoin kei ve tehlul kha thla min lakpui a, a dika dik chuan ka ngaihtuah thin a, ka kal ve kha a tangkaina tur hi ka hre mawlh lo, thla la turin kan hotupa Pu Vanlalenmawian min hruai ve a ni ber mai, heiham. Thlalak sawi taka zarah chuan han duham ta zel ila. Routmawii a rawn lar tirha 2006-a a lo kal khan, Temple-a kan inkhawm bang pa pakhat khan, in thla ka la dun duh, an ti mauh pek a, ka hnial hreh si, chanchinbu mi emaw ka ti a, min hruai kira Tempul chhungah min dintir duna kan thla a la a, a tuk tlaiah nu pakhat hian vawiin chu Ruotmawii nen in thlalak bazaar-ah an zuar a, kei pawh ka lei, a ti, mak thei teh thin asin.

Kan ti nek nek a, riak tur nih si loh chuan haw chu a hun a ni ta der mai a, daipawn hla fe kawngpui kamah chuan chawhmeh zuar hi an lo awm hlawm a, ram-ar pawh an zuar a. Kan hotupa ber pu Vanlalenmawia chuan, kha ram-ar kha ka leisak ang che, min ti ta mai a, patling thankin ve meuh tawh ka ni ve si, ka zak ve deuh nen, ka duh bik lo va, khatianga min leisak a han tum hrim hrim pawh kha ka lawm hle mai, a hnungzui a nawmzia ka hriat zual phah hle.

Tichuan dan lam zir leh sawi ni bawk si, sawrkara Department hrang hrangte hnathawh dan hriat phah ni bawk sia kan han zin thinte hi a lo hlawk khawp mai hi a lo ni a, a sawia min hrilh peihtu an awm phawt hi chuan dante hi kan hriat ve a tul avangin mipuite pawhin a ngaihthlak leh zawm hi kan ba e.