ZOKHUA vs ANTHURIUM KUT

April ni 23, 2006, Zirtawp kha Reiek tlang ka hmuh hmasak ber tum leh ka kal hmasak ber tum a ni a. ADM(J) ka nih lai a ni a, ka driver, P.A. leh thian dangte nen kan ni a. Chawhnu dar 12 pelh hretah ka kal a, a la kal lo vek kan nih avangin kan phurin kan hlim khawp mai.He mi kum tawp December thla hian Lungleiah min sawn ang tih erawh mangah pawh kan hmu loin ngaihtuahnaah hian a awm lo hrim hrim a. Kum 2 dawn ka  awm a, thla 2-in kum hnih a tliang lo a, a rei tawh nen, Lungleiah i la awm emaw ka ti a, min ti hi nikum thleng khan ka la tawng mawle. An hre lo ve khawp mai, ka khawngaih zawk thin. Min sawn kha kei chuan hlawk phahna ka ngah mai nia mawle, mi sawntuten an ngah ve em tih erawh ka hre lem hlei law!

Anthurium Kut Reiekah an hmang a, chu chu kan zu chhim  ve a ni. Zokhua a awm a, kan va fang ve a, a lunglen thlak ka ti hle mai. Chu zokhua chu tunhnai mai khan an siam tha emaw thawm tha emaw em ni aw? Chutiang thu lam leh Tourist Minister-in a thlawh thute chanchinbu lam atangin kan lo hmu a, ka lung a leng leh zual a.  Hemi kum atang hi chuan ka hmana ka theih chuan Anthurium Kut hi ka chhim ve ziah thin a ni. 

Eng emaw lai  deuh khan ke Kut hi hmun dangah khan an sawn a, Anthurium Kut Reiek tlanga an nghah loh chuan an tui tawp lo ang, ka ti rilru neuh neuh a, an inhmeh lo tlat. Kal pawh ka kal duh lo hrim hrim. Ka rin ang ngeiin ka Reiek tlangah lo chuan an tui tak tak lo, a inmilin inhmeh ve hek lo, tunah chuan an rawn kir leh ta a nih kha.

Tichuan zokhua chu Zohnahthlak chi hrang hrang te chenna in a ni be r a, di in a ni a, lal in leh bawhbelte a awm a, a lunglen thlak duh em em a. Sa an lo chan hlawm a, a thenah kha chuan uisa te pawh a ni. Mahse kan hmua chutiangin zokhua a awm tih reng hre hmasa kan ni lo, chuvangin kan tan  chuan Reiek tlang kha a pawimawh ber a nih avangin rei kan awm lo, tlangchhip lamah chuan kan chho ta a.

A tlang hualtu tlak lam kham awih vut mai, ngaw hmun ni si chu a hma lawkin an lo hal fai vuk mai a, khawhawi a tinuam em em a. A tlang chhipa di leh hnim ralkhat hla taka tang pawha buh hmun emaw tih khawpa eng tuar thinte pawh chu Anthurium Kut dawn vang nge an lo hal fai a. A hualtu ramngaw zawl phei, chhuah lam chhawn, Aizawl ep erawh a kang lo, chuti mai maia han hal chi niin a lang lo. Dite chu an lo to leh tawh a, kutphah chen velin a hring hlim hliama a mawiin a nalh a, a kal nawm hun lai, an hal fai hlim hnim to leh tawh si la sang si lo, kha thlir nuam hun lai chu a nia lawm. 

A tlang chhipa lungpuiahte chuan kan thu a, kan bawk a, ral atang hi chuan tuk tin tlai tin hian ka thlir a, ka Reiek tlang ti lo thei pawh ka niin ka niin ka inhre lo ve, mi tam tak pawhin min hrethiam a ni awmasin, i Reiek tlang, an ti ve ho mai! Han thlir hi chuan ka Reiek tlang chu Ailawng rama awm a ang zawk te hian ka hre thin a, mahse zing ni chhuakin a chhun leh zan thla engin a en var hnim ruih a dang chuang lo. Kanghmunah pawh insawn phei se, Reiek tlang a ni tho tho dawn si a.

Hman kum khan Reiek leh Ailawngin an lo inchuh fiam tituai deuh a. Kei ka hriat veleh, a neitu pawh rawn lo leh a hriat loin ka tlang te in lo inchun vela maw! Ka zu ti niin ka hre ta. Ni, kei a neitu hi ka  thuin ka lal ber tur a ni zi ri thrawh. Pa pahnih ram inchuh ka hre chhuak a. Sub-Dist. Council Court-a ka awm lai a ni a. Mi pahnihin ram an inchuha an rawn inkhing a, pakhat chuan tun hmain chulai hmun chu huanahte vatin Pass pawh a lo nei tawh thin hial a. Mahse a enkawl zui lo va, a Pass pawh chu kum 5 emaw a lo thi tawh a. Pakhat phei chuan han chuh vena turin engmah chhuanlam leh tanchhan a nei ik lo thung.

Court chuan, ram ruak sawrkar ta a ni a, a neitu pawh ni lo ve vein in rawn inchuh ve mai mai a ni e, awmzia a awm lo, in ta in ram a ni lo ve ve, tiin thuremna a siam a, an lungawu dun a ni ang, court sang zawkah pawh an appeal lo, an ngawi hmaks. Ka Reiek tlang pawh chu Pass hlui thi tawh takngial pawh ka nei lo va, court-ah inkhing ta mai ila chu tanchhan tur ka nei lo ve ngawt chuan a rinawm.

Anthurium Kut chang hian ka chhim ta zauh zauh a, zokhua Mizo hnam hrang hrangte in, a chung di, a chhe mawih lutuk hmuh chang erawh chuan siam that a itawm thin hle. Hman kum deuha kan kal phei chu, kan zu fang leh ngei a. A hmain an lo riak tawh a, chhun lamah kha chuan mi hrang hrangin a tlawh thin avangin a in luahtu a lo riakate kha mahni hnam bil incheiin an inchei thin a. In pakhata kan lut chu nula ria lam deuh pian nal deuh Lai incheia inchei hi a lo awm a. Kan han lut chu Lawngtlai nula, kan hmelhriat a lo nawlh mai a, kan lawmin kan hlim  ngei mai. Zokhua leh Anthurium Kut chu a inzawm, chuvangin Anthuium Kut kan hmang zel dawn a nih chuan Zokhua khu sawrkar, a changtu Depatment pawhin a en zui zel ngei ang.

Tum khat kan kal leh chu kawng sirah khan Zufang kha plastic No hian an lo hung tlar thet a, no khat chu cheng 10 an ti a. Kan han lei ve a, kan in chu e, a thlum tuizia tak kha aw. Mahse a ruiha ruih chi a ni lo, in hnem leh tui-puar a ni ang. An Grape-Wine te kha chu thawk na fe mawle. Ka u, Revd. Chuauthuama te chu kalin zufang kha hmu ve se, a thlum tui em em a, ruih chi pawh a ni lo tih pawh hria se, a hmingah zu a tel miau avangin a in ngam lo ang. Pikhawizu pawh vuak hlum tuma um um thin kha a nia! A piahah kan phei chu dekchi lianpuiah sa buhchiar a lo awm, thla a muang teh e. Kan suaka kan hawp a, a man pek kan tum chu a thlawna sem a nia, Tourist Dept ta a ni e, an ti chu, kum tin siam ru aw, kan lo kal ziah ang, tih mai awl mawle.

2006 kuma Anthurium Kut kan chhimte khan a hma lawka an hal fai, lo chawr no hring hlim hliamte kha hmuh nuam kan ti a,  en nawm a tliang zawk lai khan khalai hmun tho  kha nikum hmasa lawk mai khan miin an lo hal fai ve a, a haltua zir nge a halna hmanrua a zir chu ka hre lo. Nge hal fai vik vek an lo khap ta zawk  pawh ka hre lo, mi sual dum ber hmuh khan kan hmu a, ka chu luai luaia IPC leh dan leh Police kan hmachhuan a. 2006 kuma hal faitute kha chu kan chu lo. Rethei fa thubuai kan siama court-a kan khin chhan thin ang hi  hausa leh mi lian thil tithei faten ti nise a thluk a dang zuai lo vang maw?