LEHKHATHAWN BAWK

Khatia ka lehkha­thawn ka hmuh ka zep loh kha, Pu K.Krawsa­thanga, Zobawm Run chuan ni 16 May, 2018 Nilaini khan Vanglaini-ah a rawn sermon chiam a, a ngaihnawmin a bengvar thlak phian lawi si. 2006 kum tawp lam December khan Lungleiah inrin lawkna awm lem loin ka pem phei rup mai kha, ka phei niin Bawngkawna kan kal laiin Lunglei aṭangin Sylvia, Pu J.Buana tunuin tlaia chaw eiah min sawm a, kan lawm hle.

Lunglei chu dar thumah kan thleng a, Rahsevenga u Tebawihi hnehah kan tlan lut rawih a, kan insil fai hnuin Syvia te inah chaw kan ei a, Wildlife Protection Act-in an lung a tileng chiah lo a ni mahna le, sakhi sate kan hmeha a tui phei chu a tui hle tho. A tuk zana chaw kan ei lai chuan he Pu Krawsthanga te, Jonunsanga, Sena Tlau te, Biaktluangi, BT-i teho an lo lut a, chatuan ata kan inhmuh vawi khatna a ni chungin ka chaw lo ei tui lai chet chet kha kawngka an hawn rualin, khawi Rs 75/-, Jt. MAL fee, phat theih loh, an tih chu mawle. Khua hi a var lo teh e. A tukah Sena leh Lal Kraws-a chuan Bt-i ina chaw eiah min sawm a nih chu.

Khua a lo var a, tlaiah chuan BT-i, nuthlawi a ni deuh bawk a, a inah amah ni loin chaw eiah min sawm si a, kan han chho a, kan puar hle. Eikham chuan a chhak lawk Saikuti Hall-ah chuan TV an tihah hian min kawm ni tain ka hria, eng emaw tihpui a awm deuh bawk a. In lam aṭangin ka thiannu chuan min lo bia a, tin, Ruotmawii lar tan kum kha a ni a, mi an tam avangin hmun falah ka va kal a, Pu Krawsathanga khan Ruotmawiin min bia emaw a ti a, min zui min zui mai a, a ni taw psi lo va, kan nuih tliah tliah.

2007 kum kha a ni ta a, Saihaah Rev. Dr. C.L.Hminga hoin kan kal a, ani hi Aizawla ka pem let dawn 2008 Khuangchawi thlaa nasa taka a nuih hnua Sap ram aṭanga a hawn nghawngawrh min petu a ni a, ka awrh a ring chiah lo deuha a nui a ni ber, khati khawpa Pu Hminga a nuih nasat kan la hmu lo an ti. Kawngah chuan he Krawsthanga hi kan motor-ah a lo chuang duh lo va, UPC motor-ah ka chuang duh lo, a ti vel mawle. Ruotmawi zai kha an ngaithla a, K.L. Liana lumennaa zaipuiah ka va duh tak, a ti bawk, ka thihsak duh der si lo.

Saiha Bangla-ah kan thleng a, min dahna kha Rajiv-te nupa thlenna a nia, an ti a, a room nuam ber a ni ang. Khum zaupui mai a ni a, ka thawl bawk a, Pu Kraws-a chuan i thawl bik lutuk, a ti a, ka khumah rawn riak ve ngawta le, ka sawm tawp si lo, zah tuar a chak ve reuh lutuk. Pu Hminga ho bawkin Lawngtlaiah kan lehlang a, zanah kan haw a, ruah a sur tam em em a, motor ka khalh a, Pu Kraws-a Saiha zin tuma UPC motor-a chuang duh lo kha a duh ta thung a. Ka khalh chak deuh bawk a, a rui chu a luak kawng tluan a, tukverh a hawnga a luak thin a, motor-a chuang e, ti lo chuan a huh hluam a, a vawi ti a khur beuh beuh a, kan khawngaih duh lo va, kan nuihpui nasa hle zawk a ni.

Lal pian hun pangpar a vul leh ta, tih Patea phuah a nihzia leh a phuahna hmun, a phuah chhante a rawn ziak a, a ngaihnawm ka ti khawp mai. Ziaktu dang pawhin Patea phuah a nih thu an ziak a ti a, a dik ang. Mahse an ziah apiang hi a dik ber vek kher lo, Zan lungngaih thlak Zion pindan chhungah, tih pawh hi ziaktu thenkhatin Patea phuah angin an ziak a, mahse ka sawi fo tawh a, Pastor Chhawna phuah a ni zawk.

Kan Mizo hla phuahthiam Patea hian sulhnu a nghah khawp mai, amah ka Pu, K. Krawsthanga sawi angin, Ka ropuina tur leh ka himna hmun, Ral hlauhawm leh titna awm lo chu; Thaler aṭang hianin ka thlir rinin, Chu hmun hlun chuan min tuam vel vangin, tih hi a phuah hmasak a nih thu, Patea tunu Ruateiin min hrilh a, a pu chu a tet laia a retheih em avanga lal ina awm niin a sawi. Lawk, lehkhathawn hi ka dawng nual, hmana ka dawn chu, To, Upa K.L. Liana, Bawngkawn, tih a ni. Bawngkawnah chuan awm chiah lo mah ila, engtin tin emaw chuan ka hmu ve hlawl a, kumah tih loh chuan Upa erawh ka ni lo, ka nui top.

A hla hmasa khi 1920 kuma a phuah a ni a, a tunu sawi angin naupang te a nih lai aṭangin a rethei em em a, piang lo law law ila te hi a ti rum rum thin. Ni khat chu a inngaihtuah hah em em laiin a thinlungah, I rilru a na maw? I nu leh pa kan la dam a, thlaphang reng reng suh ang che; tun hmain min hre lo mah la tun hnuah chuan min hriat theih nan ka rawng i bawl tawh ang, tiin a hria a. Mak a ti hle a, a tawngtai a, a aw hriat chu amah hmangaihtu Pathian aw ngei niin a hre ta a, a lawm ta em em mai a, tichuan Ka ropuina tur leh ka himna hmun, tih hi Patea chuan a hla hmasa ber atan a phuah ta a ni. Ka hla duh leh ka lung tileng em em thintu a ni bawk.

A ni e, lehkhathawn emaw lehkha emaw hi kan dawng fo thin, a chhung thu leh thawntu a zirin mi dang hmuh ve kan uiin kan ui lo fo bawk, kei takngial pawh hian miin an lehkha dawn min rawn hmuhtira min entirtu ka tawng zing ve tawh viau mai. A tam tak chu court lam aṭanga an lehkhathawn dawn a ni thin. Mi an bail a, an mi bail-te court-ah an kal tha leh duh si lo kha court khan lehkha a lo thawn a, a awmzia an hre chiah lo leh an mangangin min entir a ni ber.

Mi in bail a, court-a ka hruai theih loh chuan cheng chuti zat chu ka chawi ang, tiin Bond an ziak a, an mi bail kha a tlanbo emaw court-a a hruai theih loh chuan a intiamna ang zat kha, court-in a dila a tihhniamsak loh chuan a chawi a ngai thin. A chawi theih loh chuan Cr PC an tih mai chang 446 angin lung inah thla ruk thleng tan theih a ni. Hetianga mi bail avanga lehkha hmu, an bail tlanbo avanga pawisa tam tak chawi ta leh lung ina khung hial ta hi an tam mai.

Lehkhathawn kan dawn theuh theuh hi a lo inang lo hlawm dawn khawp mai, tin, court-in thuhretu nih avanga a thil hriatte court-a sawi tura kohna lehkha hmua phi buai ta mai tawk kan awm fo bawk. Engpawh nise, kan thil hmuh emaw hriat emawte hi tumah hlau lo leh dik taka court-a kan sawi kha kan bat leh tihtur a ni a, thuhretu avangin mi sual dan kalha che kha hrem a niin a ni lo thei tih hi hria ila, kan thil hriatte court-a dik taka sawi hi i hreh lo ang u.