ZIRTIRI COLLEGE LAMAH

Kum dang ang kha chu nise, April-par May thlaa vul ṭhin kha a vul chuk tur a ni a, mahse kumin erawh a danglam tlat, April-par chang a danglam a ni lo va, sik leh sa pawh a dang tho mai. April leh May thlate hi chu nipui sen sat lai, mual dung zuia laikingin bel a rawh hun, a hre lo pawh ni bik lo a lumzia thu kan inhrilh thin kha a ni ngai a, kumin erawh chu a vawhzia thu kan inhrilh thung ta a, nipuiah pawh thla a la sik a nih deuh ber mai hi maw.

Keini pawn lam aṭang chuan Zirtiri College kan ti a, mahse Govt. Zirtiri Residential Science College tih a ni thung. Keinin Dr Biakmawia Pawl, tia kan hriat Kohhran Thianghlim lo ni daih ang deuh hi a ni ang. Anni Kohhran Thianghlimho hi an fakawm riau a, an rinawm a ni ang, mi sawi ka hriat pakhat chu, taxi neih pawh hian Biakmawia Pawl a khaltu hmuh fuh chuan a la hlawk, an ti.

Tichuan an zirtirtu Masangi avang hian a ni pakhat ber a, he College-ah hian tun ang nipui chho vel hian ka va kal ve ṭhin a, a thlang lawk Republic High Sikul ni si, saw lai hmuna awm daih lai vela April-par vul chuk mai ṭhinte chu kum dang ang lo takin a lo vul chuk lo va. Chu chu ni 23, May 2018 kha a ni a, chhun dar 12 rikna tur chu a la pel lo a, ram hlui ni lo, Ramthar Venga he zirna in chhawng chungnung ber an hall-ah chuan kan chho rawih a, kan kalna thin a nih avangin kan bo lem lo.

Kei ve kha, min sawm ve si, mi dangte chuan zirlai tana ṭangkai tur hi an sawi hlawm a, kei chu min sawm chhan ber chu, coffee with K.L. Liana, tih a ni top. A awmzia ni bera ka hriatthiam ve dan chuan, thingpui ka hria ka heh viau, mahse thingpui thlum ni lo a hang dup in hnam erawh ka ni lul lo mai. Coffee pawh ka hria, thingpui a ni ber a, thingpui fe aiah coffee an telh a ni ang. Hman kumah Delhi-ah kan haw tur thlawhtheihna ṭumhmunah, kan Magistrate Lalduhsanga, Maduha kan tih mai chuan coffee min khilai a. No te reuh te hnih chu phai lam deuhin an thli a, kan pakla hisapah chuan No khat kha chengsawm vel turah kan ngai a, kan han zawt chu e, 120 a lo nih chu!

In turin kan keng laklawh tawh si, patlinga pumpa ve reng ruangin a to e mai, kan duh leh lo, han tih lah a zahthlak ve si, no te reuh te pahnih atan 240 a chawi ta a nih chu, ka lo pe ve ang ka tih leh a tlawmngai tawh si, a nupui man tur a khawl a zatve aia tam mah coffee mana a hmang chu ka uipui aiin nupui a neih lawk loh phah tur ber kha ka dawnin ka khawngaih. Chuta a senso khuh turin kum li vel tan a han la leh a, a tawpah chuan nupui pawh a phutawk ve te te chu a lei ve thei ta, ka lawmpui.

Chu chu coffee a ni, a in turin min sawm a ni ber turah ka ngai a, coffee no khat in tura saw lai hla taka va kal chu a vir thlak viau e. Mahse in tho mah ila, 120 chu ka seng ve lo va, zirlaite hnenah coffee in paha dan lam ka duh duh sawi tura beisei ruk hi ka lo ni ru zawk a. A ruk hle mai a, dan lah a tam si, a hming pawh kan hre seng lo a nih laia a enga ber chu nge ka sawipui ang tih ringawt pawh chu hautak deuh a ni. Fa chawmna lam han ti dawn ila, nula tlangval hlir an ni si a, an tan chuan a ho awm e.

Tichuan, tunlai khawvel changkang tawh taka cheng kan nih avangin phone changkang tak tak kan hum fur a, internet khawvelah kan khawsa a, kan kutin khawvel hi kan hum a ni ber mai. Chuvang chuan, cyberlaw an tih lam te kha tha ka tihpui deuh a, hei kan hriatthiam dan chuan inkhawm banah te, tihpuinaah te leh mahni pawhin phone an kheuh an kheuh a, a chang leh an nuih thin hi, mahni chauh pawha hlim taka min awmtirtu chu Lalpa aiin phone hi a ni mah tawh. Whatsapp an ti a ni awm e, fb an ti a ni ang, chutiang chuan kan ti a, tangkai taka hmang an awm laiin mi pawi sawi nana lo hmanga thubuai awrh phah an awm nual mai.

Fb an tih mai, Zosap Group an ti a ni awm e, kei pawh khawhar ina ka khuang vawlai thlalak leh ka hnathawk tui chet chet lai, kekawr bul ka hak ni ber khera ka thlalakte an lo tlangzarh uar mai pek a, mi chi hrang hrangin an duh duhin an sawi, comment a, ka u, Revd. Chuaua dung hi ka thul ve deuh roh tawha ka chalsam a tlak kawlh avangin ka chal hi a lang ve tawh a, mahni tawkah pa-challang ka ni ve ta, ka ha a la kuh zui, chhuanawm loh ve tak a ni, thenkhatin, Chhip-ruaka….. te min rawn ti vel, a nih hmel ve bawk lahtak a.

Hetiangah hian zirlai an ni a, mi pawi sawi nan leh mi huat zawng sawi nan, dan kalha thil ti lo turin ka sawi a ni deuh ber mai. Duh duh zawhna hun kha an siam tituai a, mahse dan lam a ni thung a. Parliament-in a dan siam emaw, India President-in Parliament-in dan a siam ni lo ama thupek dan siam, Ordinance an tih mai a siam theih chi, pawngsualtu damchhung tan theih mai baka thih thlenga hrem theih tihte hi Mizorama hman ve tho tur em ni? tihte kha zawhna a ni. Hman tur a ni, tih kha a chhanna chu a ni mai.

Mahse e, India danpuiah Special Provision-in min humhalh bik bik a, kan khawtlang nun leh chin dan thin te, kan sakhua leh kan hnam dan ang chi te, chumi khawih emaw kalh emaw zawnga dan siam reng reng chu, tun hma aṭanga lo hman tawh hman zui mek zel a nih si loh chuan, helaia kan Assembly hian hman ve tur a ni e, tia thu an titlu a nih ngawt loh chuan a hman ve theih loh a ni.

Chutianga dan lam kan va zir ho hnu chuan riah ngawt chi ni suh, haw a hun a. Masangi bawk khan, hun a tam lo, a mal chuan thla lakpui theih loh, a pawl pawl khan a theih chauh a ti a, thla kan lak lai a huhoin, selfie an tih maia min han lakpui kha an awm thin a, ka chal a lang ve bawk si, bazarah zuar ta se, man lo pawhin lei duh an tam hmel lem loh viau. Chutiang cchuan hun chu kan va hmang a, coffee tui tawk man loin kan in a, chhang nen, a zawngchhang tlak khawp ang.

Nia dan hi a pawimawh a ni ang, keini takngial pawh sawi tur leha hre lo ve lehchhawngte hrilh tur hian hla deuh leh hnai deuhah pawh kan tei ve fo thin mai zawng a nih hi. Dan hi a pawimawh a ni e, dan a lalna apiangah zalenna a awm thin, tih thu hi a lo dik takzet mai.