ATC LAMAH

June thla tawp lam leh July thla tir lam kha a ni a, chhum a zing phui chuk a, ruah a sur seng seng a, tuklo beng­ngawng chhum zin hnan an sawi ang maiin kan hawi lawl lawl a, thui tak a hmuh theih loh a, hla tak a thlir theih hek loh bawk. Fur lai hi chuan, Fur khawthiang an tih hi kan tawng a nih lem loh chuan ruah chu a sur hun a ni miau a, a mak lem lo.

Tun hma deuh kha chuan, ATC, Durtlangah khian ka fapain B.D. a zir ve laiin kan kal fo va, a kawt zawl nuam leh thawveng tak, zan thla eng thlir nana itawm taka tang khian zan thla eng pawh ka thlir fo tawh a, kan in aṭanga khamphei deuha ka thlir thin ka Reiek tlang pawh he lai aṭang hi chuan kan chhuk thlir titih tituai thung a, a hmun a nuam a, a bul vela thing an phun lo puitling tawhte pawh a buk li liai a, nipui laia hnahthel ro a chunga laiking a tlan pawha ri riap riap chunga nipui thereng thing zara an hram thinna laiah khan losul thereng a hram tawh zawk a. Nakinah phei chuan favang a lo ni ang a, ngirtling leh rengchal an la kiu leh ngei dawn si a.

Ka fapa BD zir bawk chuan a aia sang M.Th. an ti a ni awm e, a zir leh dawn avangin kan han fang leh a. Tun hma ai khan a thingte pawh a lo lian tawh zawk a, tichuan hostel-a awm thin kha tunah chuan quarter-ah an awm ta thung a. Ka u, Revd. Chuauthuama quarter luah ṭhin pawh chu mi dangin an luah tawh a. Ani fur khawthiang leh favang ni ri riai, zan thla engah pawh lunglen nachang hre ve lo tan chuan kawtzawl zau nuam thla eng thlir remna hmun te khi, engteh ruai mah va ni mai mai suh.

ATC-a an hotupa ber Principal an ti a ni ang, leh zirtirtute khi an fel em em a, an hawihhawm hle bawk a ni. Keinin Tlawng tui kan rin anga a rin ve theih loh avangin tuizem lianpui pui ṭha tak tak an hung thluah a. Ka u Revd. Chuaua ten YMA no beng nei khat pawhin a thlawra thlawrin mi tam tak Baptisma an chantir ṭhin kha a ni si a, Tuizem tin za tam dawng a inhung thluah mai chu, zem khat hmang zo tur chuan a thlawr hnem theih khawp ang mawle.

Zirlaite awmna tur in ṭha pui pui an sa a, zirlai tan pawh a nuam khawpin a rinawm a, an fela an zauhzia chu chhumpui zing hmum hnuaiah chuan ka ngaihtuah neuh neuh a. Keini an pawl pawh ni ve reng reng lo, an Baptisma chantir dan pawh a dik lo, tia sawisel peih ber berte pawh kha kan kala kan zir ve an phal a, an in sakahte kan chen ve an phal a nia, tluk loh rim an namin fak hi an phu khawp mai. Tuizem ṭha tak tak an siama a inhung tlar thluah han hmuh chuan, tui an va uar ve aw, UPC an ni lo maw? tih mai awl tak tur hi a ni a, mahse an lo ni chiah lo remchang lawi si a ni deuh ta ber awm e.

Gate-ah chuan duty an lo awm ve a, a bul lawkah chuan eichawp thil, chhang ilo vel zawrhna dawr a awm a, a hung chhungah chuan motor kawng a kal kual thlur sung a, chungte chu a dum hun a, kan nau P.R.Hmuaka, zirtirtu a nih lai pawh khan kan han kal ṭhin a, ani pawh ka u Chuaua te ang deuha lunglen nachang hre lo, beram kawng kal ang ni mai awm chi hi a ni a, anni tan zawng Pathian thil siam mawi leh ropui, zan Lalnu, keinin chhawrthlapui tia hlaa kan sakpui ṭhin zan thiang mawi taka eng kulh ṭhinte khian awmzia a nei ve vak pawhin a lang lo, ṭah an tichhuak. Han ṭap vak dawn ila a ni meuh bawk si lo.

Hmana Mission Vengthlang kawna a awm nen khan chuan tehkhin rual a ni lo ve, tunah chuan a hung chhunga thing an phunte chu a ngaw khup tawh a, thingrah chi chungleng savate tana an buhchangrum tur ang kha an phun tel hlawm em tih erawh ka hre chiah lo thung a. Chutianga savate ei duhzawng tak thing rah mi an phun hlawm phei chuan nakinah a la rah ang a, chungte chu khawi aṭanga lo kal nge tih pawh hriat loh vahui te, tawllawt te, a ni e, sava chi hrang hrangin a rah thlamuang takin an rawn tlan ang a, an tan malsawmna a ni dawn si a, tihte chu ka ngaihtuah neuh neuh a.

Niukum lawka Zuangtui Muanna veng an ti emaw ta kha ni, chumi atanga ral khat hla deuha a kham awih pangper ngaw ruih chung deuh puk chhunga saza bawk ṭhin an thlir a, kan thlir ve lai pawha kan hmuh ve kha, anni leh sakhite tan tual lenna hmunah a remchang chiah lo a nih pawhin, fartuah kung khat buk luai mai pawh chu, Ka rawn fang leh hmana kan tuanna tlang, Tuahpui leh vau an vul leh ta, tih hla sak hun laia a vul mawi mai ni lova a parzu tlana kulherh leh changsen, tukkhumvilik baka hleihmualrangten, Zing ata ni tlak thlengin kan Lalpa tan i thawk ang u, ti chunga ni lenga a parzu an tlan turte chu rinna mitin ka thlir a, hlim tawp hlau loin an leng dawn si a.

A ni e, ramsa leh nungcha humhalhna dan kan sawi fo ṭhin, Wildlife Protection Act, an tih mai khan chung savate chu a humhim tlat dawn a, bawhchiat ruk tuma sairawkherh leh silai lek tumtute chu Gate vengtute bakah zirtirtu te, zirlaite kha vengtu an lo ni dawn bawk si a, savte ei duh zawng thingrah chi an phunte chu tunah la rah rih lo mah sela, a la rah hun a thleng ngei ang a, chumi hunah chuan chungleng savate tan chuan lei Eden a lo inhawng a ni ang a, Pathian thu zirna hmunpui mai bakah savate tan Buannel ram nuam a chang dawn tawh si a. Chung lam leh hnuai lam khawvel dan lalna a ni bawk ngei ang.

Hmuh hla zawk aṭanga pawl ṭhenkhatten a huhova a en tura an lo kal a, ATC an han fang ṭhinte chu a awm hliah hliah mai. Mahse e, nipui lai a nih loh vek pawhin favang thengthaw van dumpawl ruih hun, chhum zinna piah ram ni mai awma a lan hun, hla tak tak a lan theiha zana thla a en kal ruai laia en tura thawh chhuah kha a fuh ber, tih hretu ka lo ni tawh a, hmun nuam leh thawveng a ni e.

Chung lam dan zirna hmun a ni a, khi lam dan zira hretu tan mai bakah Kristian intite tan hi chuan kan khawvel sawrkar dante pawh hi kan zawm ngei ngei tur a ni, tih hi kan Bible-ah hmun tam takah kan hmuin kan hre ṭheuh awm e. Khua leh tui ṭha kan ni tur a ni a, chuti chunga sawrkar dan siamte kan bawhchhiaa dan kalha thil kan tia jail a khat reng maite hi a zahthlak a, chung lam dan kan zawm rualin lei dante pawh hi kan zawm tur ngei a lo ni zawk asin.