BETHLEHEM LAMAH

Nikir thla, ni 25, kumin 2018 Thawhtan a ni a, zanriah ei kham chuan Bethlehem lam panin ka tlan thla dawr dawr a, Chhandamna Sipai Pawl ṭhalaiten inkhawm ve turin min sawm avang a ni ber. Kei kha thusawi turin min ti hi a ni awm e, mahse Pathian thu lam a nih chiah loh avangin inkhawm tur e, ti lo chuan Pathian Lehkhabu Thianghlim pawh ka keng lo va. Ka thawk mawl tawp a ni ber mai. Unau thiangzauho an sawi ang deuhin ka tlachawp thei khawp mai.

Bethlehem vengthlang kawnah chuan zawt chawp chung zelin ka zu pawh ve thei hram a, an biak in a hmun a nuam a, a zau a, a mawiin a nalh bawk. Chu biak in lian puiah chuan ṭhalaite chu tawt em em lem lo takin kan inkhawm a, dawhsan pulpit awmna lamah chuan min hruai a, min hruaitu chu an ziaktu nula Zothansangi Sailo a ni. Tichuan, inthlahrung ve angreng tak chuan ka zui chho a, Pulpit hnungah chuan kan ṭhu tlar ve dal a, a duh duh kha chuta thute chu Pulpit-a thu va sawi a thiang a ni ang.

Tin, heti hi a ni a, in thianghlim tur a ni, kei ka thianghlim si a, tih ziakte chu hre ve ri ruai fo mah ila, kangvara kan feh changa kan balh thinzia leh a dum hian kan dum cheu chuau mai thin kha a niin, lei kan lai ruah a tla siap siap kan berh lutuk ṭhinte ka ngaihtuah a, khati chunga thianghlim intih talh tum kan inthlahrun ve si thinzia te chu ka ngaihtuah reuh reuh a. Keini kan tualchhung kohhrana kan inkhawm thinte ka suangtuah a, zuk leh hmuam ti thin mi thianghlim ve loho keini ang duangte chuan Pulpita din chu sawi loh, a hnung lam thutnate chu hla deuh aṭangin kan thlek ve dek dek ngam chauh kha a ni a, kei mi sual dum ber Mizo zial zuk nghei thei lo chutia ka han lawn chho ve ta mai chu mumangte pawh a ang rum rum a.

Tichuan, a hun a lo thleng a, kei chu Sermon sawitu tur ni loin, Personality Development sawi tur chuan chairman chuan min sawm ta rup mai a. Tin, heti hi a ni a, Pulpit-a ka din chu phal a ni. Hman kum khan Bungkawn Vengthar Chhandamna Sipai Pawl ṭhalai zingah ka tel tawh a, anni hi an zau khawpin ka hria. Tin, Baptist Kohhran ṭhalai zingah phei chuan vawi ruk emaw lai ka tel tawh a, kan Inrinnia inkhawm thin, vawk thithun ei hreh mi, Pu G.L.Hnamte leh Pu R.C.Thanga te ang awmna Seventh Day Adventist kohhranah hian vawi hnih ka tel tawh bawk a, kei vawk thau hmawn hmak hmak thin pawh kha an Pulpit-a ka lawn kaite an phal a, an rilru a zauzia a lantir hle.

Tichuan ka thusawi tur kha Sap tawngin an ziak kha a ni a, kei lah Zopa ve em em, ha kuh ve mai ka ni si, a awmzia pawh Dictionary en lo phei chuan ka hrethiam mumal lo, ka hriatthiam ang ang chuan ka han phuahchawp vel ta mai mai a, Pulpit tlanga thusawi mah ni ila, Vanram lam chu a kawk lutuk lo. Darkar chanve dawn lai han phuahchawp tur chu ka hre ve ta mai a, ka thaw huai. Ka kawr hma ip teah lah Mizo zial bawm, ka dumbur ka ak puar el mai si, tlem chuan inthlahrun chu a na duh ve deuh.

Hman kuma Bungkawn Vengthara kan va inkhawm phei chu maw, thlasik khaw vawh em em lai a ni a, Hall-ah a nia, an tih avangin Jacket dum ka ha a, biak in pangngaiah chuan han hak chi a ni lem lo. Kan va thleng chu, hall-ah tih tur kha a lo rem leh lo remchang a, biak in pangngaiah an lo sawn hi ni reng chuan, kan hre ve si lo. Kan inthuam dan lah chu a inkhawm thawmhnaw lo ve laklawh si, ka va haw anga ka inthlak lawk, tih chi rual lah ni bik hek suh, a nawm dan a nuam lo e. Chutah pulpit tlanga sawi turin min la ti zui, huiham, Nghawngawrh an tih lah ka nghawng nen a inmil ve si lo, ka va ding hreh tak.

An chairman lah khan ka din hrehzia leh ka inthlahrun chu hrethiamin, pawiti reng reng suh, kei pawh tract ha ten a nia ka chair fo thin, tiin min lo hnem a. Chutiang ha chuan a chair lul lo ang tih chu ka hrethiam ve si, kan ding zum zuut a ni ber mai. Hman kumah Good Friday lai hian ruai kan theh a, nula hlim deuh a awm a, vawk sumruk vel hi hralh chi pathum kan vulh a. A zu hmu fuh nge ka hre chiah lo, bakah bazaar kang tanpuina cheng singthum lai kan lak hlim kha a ni a. Nula chuan in sahmim a puar, in chawimawi a tul, a ti ta mai a. Kei chuan kan vawk kha a zu hmu a nih ka ring a, vawksa a chak a ni ang, lei ula chaw eiah ko mai ang, ka ti a. mahse ka Nu khan a awih lo va, an duh ber chu an talh ta nge nge a, kan hlim phian a.

Kan inah kan zaikhawm a, min kaih lam an tum deuh a, choka lamah ka chhuk daih. Nula hlim kha a lo kal ve zel a, ka malpuiah a khupin min tauh thin chu maw, hnek a chakawm duh asin, na tak a ni na tak, min dim lo ve bawk lahtak a. Kal loh ngam ni hek lo le, min lamtir lui, ka hnungah min zui, ka kut an dawma min phartir der der, ka nu nau fapa J.E. khan ka zah a hlau a, ani chuan lam huaina a lo ti zauh deuh tawh bawk a, ka hnungah phur tawkin a rawn lam ve thung, rau thawh vang ni lova tihluiha inkaih lam chu e, a rei duh, hla an nawn a ninom top.

A ni e, chutiang chuan, Bethlehem Vengthlang Chhandamna Sipai Pawl biak inah chuan hun kan hmang a, an zauha an felzia te, an hmelthatzia te chu sawi nawn fo pawh a ngai lo. Dumbur chu ak mah ila, puipunna hmuna meizuk khapna dan ka bawhchhe si lo, eng kohhran mahin biak ina meizuk an khap ka hre lem lo, chhia leh tha hriatna aṭangin biak ina meizu duh khawpa mawl leh a an awm ka la hre ngai bawk hek lo.

Nikum hmasa lawk khan Khawzawlah UPC biak inah, kohhran leh YMA ṭang kawpin an huaihawtah dan kan han sawi tawh bawk a, chutiang bawkin Vairengteah kan ti tawh bawk. Kohhrante pawh hian Pathian dan mai ni lova kan ram dan kan sawia kan inzirtir pawh hi a lo tulin a lo pawimawh ve dawn khawp mai. Pulpit tlanga an sawi duah hluah pawh hi khi lam dan a ni deuh ber zawk a, chu dan bawhchhia chu Central jail-ah ni loin, chatuan jail hremhmun an tihan an khung tur thu min hrilhin min sawithaih thin a ni deuh ber.

Dan zir leh inhrilh hriatte hi a pawimawh a, kohhran tan pawh a ni tho mai. Kum 18 la pumhlum lote hi lo innei palh ta se kohhran dan angin, Pastor-in a tiamtir si chuan ram dan kalh a lo ni dawn asin. Dan zawm hi kan bat a ni.