THILPEK KA DAWNG A

Thuruk hi chu hria tam se, a zep theia mual mual hi an awm ve zel a, amah Pu R.Thangkanglovan a lo ti thin ang deuhin, amah leh Pu Rualkhuma Hmar inkawpin, MLTP Act, Zu Khap Burna Dan awm lai kum kha leh chen kha, nuthlawi chhul lak tuai per purhoin an phunpui sur sur thin a, han zawt ila, Ukil min ruaitu turten a ruka kan bula an sawi mi dang hrilh a thiang lo, an ti tlat a dik bawk si, chawhnu tlang her tlai lam tawha an fee inpe tur ni awm tak Aizawl Hmar lam pana an kal thinte kha ka la zep ve tang tang zel a.

A dika dik chuan kan ka hi ang duh ni ila, chaw ei tituina tham a dang sawi tur pawh kan la hria a, mahse kamtam nih kan hlau ve si a, kan la ngawi ve hram hram zawk tih chu an hre khawp mai. Chuvang chuan ka sawi chhuah loh a, ka ka ka chip tlat theihna tur a nih beiseina avang a ni tih chu ka hrethiam ve lutuk, August ni sawmthum, sanghnih sawmpariat chhun lai tak pelh hret khan, Pu Rualkhuma Hmar chu a lo tei lut nawlh mai a.

He ni hi ka Nu thih champha vawi hnihna a nih avangin ka tan a pawimawh hle a, chumi tizual tur reng chuan Pu Rualkhuma chuan a lehkhabu ziah, THANGHUTA, Ex-M.P. (M.N.F.) tih chu a rawn keng a, ka thiante chuan tangkain an lei a, nang erawh chu Pu Kanglova kuatain man loin ka leitir ang che, a ti ta mai a. Ka lawm hle rualiin, Pu Thangkanglova kuata (quota) han nih chu a lawmawm dan a lawmawm lem loh hle thung. Amah zawk kha ka kuata ni awm tak a ni zawk a, chu pawh ka duh mang lo lehnghal. AIDS aia cancer vei, kal pakhat chauh nei tawh quota han nih chu a ropui lo viau bawk lah tak a.

Thanghuta chu Pu Rualkhuma Hmar pa a lo ni a, a lehkhabu kawma a thlalak atang chuan a hriat mai a, Pu S.L. Thansanga phei chuan, a awr a puar, a ti, a daw lo a dik chiah. Amah unauten, Kan zirna khawl zawng a dang mang e, Cherra val leh BD an vai ta si a, Kan nambar sang lur e, sang lur e, an lo ti ang deuh khan, Pu Thanghuta chu a zir sang lo va, pawl thum chauh a ni. Ka han chhiar a, a lo ngaihnawm hle mai a, a chanchin zawng zawng erawh kan sawi seng lo ang a, mi hrang hrangin ziak meuha a chanchin an lo sawite pawh kan sawi seng lo ang. Lehkhabu phek 191-a chhah a chhung thu chutia han sawi sen mai rual a ni law.

Pianpui B.A. a neih thatzia erawh pui tak a ni thung. Pu Malsawm Colney-a te nen inkawm rual a ni, ti ila a dik mai awm e. Mi dangte nupui hmua thlir liam ve hram hram thin khan, ama mimal nupui a hmu ve ta erawh Pu Malsawm Colney-a kan lawmpui hle thung. A tlangval zual lai deuhin kawngah kan intawk a, ka thian nu nen kan ni a, nupui i hmu zo ve si lo, hei hi ka nupui a nia en teh, tichuan nupui hmu i ni ve mai, ka ti chu e, Liana, nanga nupui chhe te khaaa…..a ti. Bantawia ang deuhin a phutawk a hria, an chhe ema a duh bik thin loh avanga nei har erawh a ni kan tihna a ni hran lem lo. Pu Rualkhuma Hmar pa chu, pawl thum chauh zir thleng mah nise e, tunlaia B.A. tam tak tluk loh hi a ni ve tlat thung, chuti maia zuam chi a ni hauh lo.

Rambuai laia kekawr te ha lova Adama dungthula a mu til tel sipaiin a puan sin an hlim hnu pawha a awr lo puar nen, India ram ropui tak han do hneh tur emin an ring lo a ni ang, a man pawh an man duh loh kha, Pu K.Hawla nen chuan Sap tawng ngatin ni lengin len zu han deng thei lawi si a! Sap tawnga len den chu a ziaawm a ni ang, sanghate lah Mizoram luia mi ngei an ni si a, Sap tawng hre ve hek lo le, hlauh nachang pawh an hre lo a ni ang chu, an man teuh mai thei a ni, Pu K.Hawla a la dam a, zawh mai a chi ber ta ve ang.

Mizopa, lehkha zir sang lo leh thiam sang lo, mahse chhuanawm tak tak, B.A val, M.A. valte pawhin an tluk loh hi an tam mai, chung zingah chuan Pu Thanghuta pawh a tel ve a ni. Burkhawni Pa, Vana Pa, Taitesena leh mi dangte, an zir sang lo ve, mahse Mizo hnam a awm chhung chuan an hming a dai tawh ngai lo vang. Kan tunlai khawvel thiamna leh finna sang tawh tak, phone atanga kan kutphaha khawvel kan ken a, kan thlir theih tawhnaah hi chuan, hmanlai nena tehkhin dawn chuan a hrethiam phak lo rambuai hreawmzia hre lo thangthar hi kan tam tawh em a ni.

Keini mi tam takin TV kan en a, a ni e, phone atangin whatsapp kan ti, facebook kan ti, instagram kan ti, twitter kan ti, keini ang rual chuan a lam pawh kan lamri thiam lo, chutiang buaipui reng renga ni kan hman ral a, thla kan hman tawp a, engmah thawh chhuah erawh kan nei lo chunga kan chaw ei a la tui hlei hlei lai khan, mite chuan lehkhabute an ziak a, phone ringawt kheuh loin hna an thawk a, pawisa tam tak tak an la lut zawk thin a nih hi.

Rambuai lai leh Pu Rualkhuma pa te vanglai ngaihtuah chuan kan khawvel hi, a ni, kan nun leh khawsak hi a danglam nasa em em tawh a, chutihlai chuan kan thalai tam takte zu leh ruihhlo avangin an thi zawih zawih a, tar leh upa lam ai hian a la thalai zawkate hi an thi tam zawk nite pawhin a lang zo ta. Sum duh vanga danin a phal loh zu kan zuar a, mi faten chhiatpuiin thih phah mah se, a ni e, an in chhung khurin tuar dawn mah se sum kan hmuhna tur a nih dawn phawt chuan engmah pawiti lova ND&PS Act leh MLPC Act kalha zuar thinte hi an demawm a, an dan zah lohna sual kha chu thu hran nise, kan thalaite nun an tihchhiat avang pawh hian ram hmelma chu an va ni em.

Tangka sum ngainat hi sual tinreng bul a ni, tih hi a dikna a tam hle, mahse Pulpit tlanga changthlana hmangtu erawh an tam lo ve, tih mai chauh a ni thung. A dik em em laiin, IPC emaw POCSO emaw dan kalh a, tisa chakna avanga naupang kum tling lo an pawngsual te erawh hi chu, tangka sum ngainat vang a nih hmel chiah lo deuh. A ni emaw ni lo emaw, a engapawhchu nise, dan kalha khawsak leh thil tih reng reng chu tha reng a awm lo ve. Kan sawi fo thin a, sawi nawn hi a tul thin, dan kan zaha kan zawm hian tu pawi mah kan sawi lo va, dan a lalna apiangah zalenna a awm thin, tih hi a lo dik khawp mai. Chuvang chuan dan hi i zahin i zawm hram hram ang u.