INTHLANNAAH KA KAL VE A

Khatia Pu Rajiv Gandhi, India P.M. mi sualten an thah ṭum kha a ni a, Thinglianah inthlanna buaipui turin kan kal a, Buhchangah Thinglian Primary Zirtirtu Pu Zuia kan sawm thla a. Kan sikul thliin a len chhia a, an la sa duh rih lo a, chuvangin sikul kan nei si lo a, thla khatah vawi khat te hi ka zu kal vel mai mai, a ti. A hahdam phian ang.

Thinglian chu a bir hle a, an VCP Pu Ghandia inah kan thleng a, Bru unaute hlir an ni a. Kan kal hma sia, kar khat kan cham a, thutna chu chhuat ni mai a, chakawk a tama kan hmeh zing hle. Inthlan ni chuan zngah bawm kan hung a, mi pahnihin vote an thlak chiah tih chuan, Buhchang aṭanga kan bungrua phurtu tur an lo thleng a, Pu Rajiv-a a thi a, inthlan thulh a nia, an rawn ti ta mai a. Puakphur thu ringawt han awiha inthlan han thulh chu kan hreh hle mai.

Kan Police hruai Lawmawma khan WT set chu a keng ve a, mahse tumah a be pawp thei lo a, tumahin an be thei hek lo. Thinglianah chuan Radio nei pakhat a awm a, ani lahin a battery a neih loh avangin a ngawi hmak, pawn lam chanchin engmah ka hre ve thei lo a. Puakphurte thu chu awi lo ngawt dawn ila a ni meuh si lo, rilru nuam lo deuhin kan insiam sawk sawk a, vote hnih an thlak hman chu ngun deuhin kan char a, kan haw ta a.

Pi Tochhawngi Bawrhsap a nih lai kha a nia, Aizawl Bawrhsap Pisa tual kan han thleng chu mi an lo zi nuai nuai a, keini chiah kha vote hawn awm chhun kan ni, kan Bawrhsap nuih a za hle mai. A hnua inthlang tura kan han kal leh chu chinchang kan hre tawh a, ka U, Dr Lalengi Khiangte Radio te chi chu ka keng a, ballot box pahnih kan keng a, chawhmeh tur dailuah leh thil dang kan thun khat tlat. Police lam pawhin WT tha zawk an keng a, thawmhnaw hlui kan khawn khawm buara ip hnih kan keng bawk a, kan thawk tha leh a.

Mau-thing hlir an tuah a, kawtah chuan thingluang lianpui a awm a, zanah lehkha kan deng a, dawl kan inchuh a, a kawt zawkin thingluang chu tuah atan eh tur a ni. Keini kha kan kawt ta si a, a tuka hreipuia thingluang kan phawhlawh chu kan Police khan hreipui min chhuh a tum a, nang emin thing han eh chu a ni thei lo, a ti. Mahse keiin kan kawt miau sia lawm, ka tia ka phal bik lo a, kan hlim phian mai. Thawmhnaw hluite kha kan kenga kan pe a, VCP chhungte kha an lawm a ni ang, thingpui sen thlum leh artui chhum min pe. An in leh lo enin chu aia min duhsakna sang chu awm bikin a lang lo.

VCP chuan an Bru hnam dan min hrilh a, keini pawhin Mizo hnam dan kan nei angin an nei ve a. A sawi dan chuan Chauduri a lal em em a, nupui nei lai leh pasal nei ramhnuaia kal duna miin an hmuh chuan chesual ngeia ngaih an ni a, a ti. Chuvangin Chauduri khan mipa kha vawk a chawitir a, khawtlangin ruai kan theh thin, a ti. Kan nui nasa hle. Chesual lo pawh nise chesuala ngaih an ni tho a, mipa tan vawk chawi a ngai a, chuvangin an chesual nge nge zel, a ti. Tin, Chauduri kha thubui hlabuai remtu a ni a, mi lei a chawitir thei a, mahse pawisa hi kan neih hlawm loh avangin pawisa aiah mau pum a bituk zat an pu thin a ti.

An hnam danah chuan nupui pasal an inneih pawhin hmeichhe man kha a tam sia, pawisa an nei si lo va, hmeichhe inah khan kum eng emaw zat a man aiah an awm a, chumi chhung chuan an duh duhin chhiahhlawh angin an chhawr a, an hun tiam kum a ral hnuin an indang chhuak thei chauh, a ti. Ani erawh chuan, kei chu leilet tanpuina cheng sangthum ka la a, ka nupui manah ka pe a, an inah ka awm ve a ngai lo, ka nupui hi sangthum man a nih hi, a ti a, a nupui chu a lo nui kar kar a.

Le, inthlan ni chu a lo thleng ta. Vote thlak tur awm tawh lo mah se, tlai dar 5 thlenga bawm hawn tur, tih kha min chah ngun hle a. Candidate-te aiawh an agent an tih te an awm vek a, VC an awm bawk a. Dar 10 a rik meuh chuan an ning tawh em em mai a, vote la thlak lonu pakhat chiah a awm, thing a phur, an ti a. Ani chu a lo haw a, vote a rawn thlak a. Tumah an awm ta lo, an ti a, keini chu dar 5 thleng bawm hawng turin kan inpeih at a, agent leh VC zawkte khan an ning a, bawm khar an rawt chhen tawh mai a.

Inthlan chuan lehkha ziak tur leh dahkhah tur, hming ziakna tur a tam phian thin a, dawhkan a awm lo va, thutthleng a awm hek lo. Dap chhuat kha dawhkan leh thutthleng chu a ni zawk. Bawkkhupin ka ziak a, ka nin deuhah ka thingthi a, a chang chuan bungbu deuh rohten, kan ti nek nek a, kan zo ve mai. VC leh agent ten an ngen nasa bawk a, tlai dar 5 chu kan thleng zo ta lo. Lehkha kan ziak a, Bawm hi tlai dar 5-ah chiah khar a ni e, tiin. Tah chuan VC leh agent tinten an hming an ziak thlap a, chhhun dar 12 a rik meuh chuan kan haw vuk vuk tawh. Chhun dar 12 kha tlai dar 5-ah kan chantir a ni ta ber mai.

Mahse e, Bawrhsap Pisa zana kan thleng chu mi an zi huai huai a, hmun dang dang aṭangin an thleng indawt zut zut a, lut leh chhuak an insul zut zut a, chutiang karah chuan kan han vai ui dum luh ve rawih kha a nia, tumahin chhunlai takah bawm kan khar tih reng an hre bik miah lo. Tlai dar 5-a khar thutin kan thu a, kan bawp kan khawhkherh phu hleuh hleuh vel mawle!

Hetianga mipuiten kan aiawha dan siamtu tur kan thlan thin hi Democracy ramah chuan a tur a ni a, kan India danpuiah a chuang a, dan tesep dang a awm bawk a, kan duh ber kan thlana vote kan thlak hi kan dikna leh chanvo a ni a, tumahin thlak turin min tilui thiang lo va, thlak lo turin min tilui thiang hek lo, tihte hi i hre nawn fo ang u. Dan siamtu tur kan thlang a, danin kan dikna leh kan chanvo, kan right chu min humhimsak a, tumahin min chhuhsak thei ngawt lo tih kan hriat hi a pawimawh ber fo.

Tunah pawh hei kan hma lawkah dan siamtu tur kan thlang dawn a, i duh leh tha i tih ber kha i thlang thiang a, chumi khami chu thlang ngei ngei rawh, tumahin an ti thiang lo che a, dan angin i duh ber thlang turin dikna leh chanvo danin a pe che a, tuma tihluih theih kan ni lo, tih hi kan hriat sa pawh nise i hre nawn leh theuh ang u.