EDEN A TANG KHA

Thlarau lo kal la, Edena thil hlui, a lo ral ang i ram mawi ka thlir ang, Patean a lo ti a, keini ve thung erawh chuan Eden Huan kan sawi thar thung thin. Camping a awm ngat phei chuan e, Eden Huan chu a serh zinga a mei ang maiin piangthar lo emaw da leh tawh emawte chu thuhrilhtupain a hrilh ngei ngei thin a ni, ti ila kan daw awm lo ve, chutiang deuh chuan keini pawhin Eden Thuthlung, Sap tawnga Natural Justice Principle an tih mai chu kan sawi thin a ni hi.

Tunlai khawvel changkang tawh, mahni chauh pawha phone kan hui khamphei ruak ruaka kan tleipui em em tawhna khawvelah kan cheng mek a, keini ang rualin kan hriat ve ngai loh internet an tih ramah chuan kan cheng a, thian dang ngai lo leh ngai lawi siin mahniin kan tlei em em a, Lalpa ni loin, kan phone hi, mahni chauh pawha hlim taka min awmtir thintu chu. Social media an ti a, thil hi a darh chak em em a, dawt leh thutak pawh hi hriat hran har khawpin a insul zut zut a ni deuh ber mai.

Pathianin, tih loh tur dan a siam a, huan lai taka thingrah chu ei a khap a, a dang chu ei a phal a, nunna thingrahte kha kan thlahtute khan lo ei nise chuan e, Evi leh Adama kha an la dam dawn tihna a ni ang a, an tar ve tawh ngawt ang! Khawvelah hian tar an tam turzia hi i ngaihtuah ngai em? An lo ei lo hlauh kha a lawmawm phian ti raw? Lalpa Pathian engkim siamtu leh hretu chuan Adama ten a dan siam chu bawhchhiain thingrah ei a khap kha an ei ta tih tih chu a hriat loh kan ring em ni? Dan hmasa ber chu bawhchhiat a lo ni ta, dan kalha thil tih leh a bawhchhiat a pawizia leh nghawng thuizia chu kan hre awm e, vawihin thlengin camping, crusade kan la ti tih phah thin a ni lom ni?

Tichuan hrereng chung pawhin Pathian chuan, thiamthu sawina hun pe loin hremna a lekkawh nghal mai lo va, thiamthu sawina hun pein, Adam khawnge i awm? Saruakin i awm tih tuin nge hrilh che, thingrah kha in ei a ni maw? A ti a nih chu. He thuthlung pawimawh tak hi Court lamte hian an ngai pawimawh em em a, a ni e, pawl leh kohhran thlengin an ngai pawimawh thin a nih hi. A awmzia ni ta ber chu, mi thiamthu sawina hun pe loin thiamloh chantir ngawt loh tur, tih hi a ni ta a ni ta a ni.

Social media-in kan khawvel nun nasa taka a khawih danglam tawhna khawvelah hian, hman deuh khan kei pawh fb an tiha mi pakhatin a thu ziak, kan CM zahawm thubuai lam hawi, whatsapp an tih mai group pakhatah ka hmingin ka ziak angin tuin emaw a lo chhuah a. Ka hmu ve si lo, mahse kan chhungten min lo hrilh a, hetiang thil hi i ziah kan ring si lova i ziak angin an pho lang ut a nia, an rawn ti ta mai a. Ka ziak a nih lohzia lo sawi turin kan inchah ta a, mak thei hle mai.

Ngai teh, chumi hnu, inthlan hma lawk kha a ni a, hla tak aṭangin ka thian pakhat hian, hei ka awmna Whatsapp group pakhatah ZPM fakna lam i ziak an rawn tilang e, a rawn ri ta mai a. Chu ka hminga an ziak sei tak chu min rawn pe ve a, a chhiar pawh ka chhiar chhuak peih ve lo a. Tichuan ka ziak a nih lohzia chu ka ziak ve leh a, chu chu whatsapp group hrang hrangah ka theh darh a. Chu chu a ziaktu diktak chuan a lo hmu ve a ni ang, ama ziak a nihzia chu group tam takah a rawn tilang a. Liana Jathang a ni a, JL Liana, tiin a hming a ziak a, a J laia kha siam danglama K-a thlakin, tuten emaw ka ziak angin an lo theh darh hi a lo ni a. Ka hmingin ramhuaite hi hnawhchhuah an la tum ang aw, te ka ti fiam ta mai mai.

Hengte hi ka han sawi duah chhan chu social media kan tihte hi a chak em em a, di hmun kang ang maiin a rang a, hmang sual lah an tam. Dan kalha ti an awm chawk a, chhun arsi kan chungah a eng, tih ang deuh khan cyberlaw hi kan chungah a awm reng tihte pawh hi kan hriat a tha khawp mai.

Kan khawvel chenna hi a changkang lutuk tawh a, keini ang rual hi chuan kan umphak ta meuh lo, mahse sikeisenah kan pem thei ngawt bik si lo, kan uipui tui lian thlir chang a tam hle thin. Tuemaw demna thu makpui puite hi a tam em em a, a chang chuan, an dema thu hmuh tur awm ve ta si lo chu thenkhat lahin kan hmu mi khaw sial hu a. Kei tehlul hi ka ngaihdan min zawt ve thin. Eden Huan Thuthlung kan tih ka rilruah hian a lang nghal uar uar zel.

Naupang an inkawm a, pakhat chu a rawn tap ta a, tunge vel che an tiin a veltu a sawi a. Nu a deuh leh pi a deuh chuan Eden Huan thuthlung reng an ngaihtuah lo, naupang tapin a sawi chauh an ngaithla a, a veltu kha thiamthu sawina hun pawh pe loin, i va sual em em ve engvanga lo vel ngawt ngei i nih, tiin va vel ve ta mai an awm chawk thin. A nuin a lo chhan ve a, naupang tap vangin nutling patling an inhau a, an inhauh thinrim laiin naupangte erawh hlim takin an lo inkawm leh tawh thung si thin.

Eden Huan thuthlung, Natural Justice Principle an tih kha zawm ngei chi a ni a, naupang veltu kha, i va sual ve, tia haua vel mai loin, engtizia nge ni ta i lo velh mai, tia thiamthu sawina hun pek tur a ni. Ani khan a han sawi ve ta a, a tapa kha a lo thiamlo zawk daih a, velhawm tak hi a lo ni zawk daih thei a ni. Chuvangin lehlam thusawi ringawt hriata ngaihthak hian thudik a hriat theih tak tak thin loh fo a, court-ah te pawh mi an inkhing thin. A khingtuin a duhtawka thiama a han sawi ringawt ngaihthlak chuan, lehlam chu mi sual tak leh thiamlo em ema ngaih mai awl tak a ni thei.

Mahse court chuan khi thuthlung khi a zahin a zawm ṭhin a, court hniam a ni emaw court sang a ni emaw a lem chuang lo, thuthlung pawimawh a nih avangin court sang zawkte hlei hlei hlei hian an ngai pawimawh zawk fo thin. Mahse, lehlam chauh thusawi hriat leh ngaihthlak avanga thutlukna siam emaw ngaihdan nghet tak lo siam ngawt chu a dik lo fo a, a lehlamin an han sawi ve hi chuan, mikhual a zawk kha a fing zawk a nih chang a awm fo ṭhin. Kan Pathian meuh pawhin a ngaih pawimawh hi keini pawhin kan ngaih pawimawh ve a ṭul fo ṭhin a, lehlam thusawi kan hriat ve hma chuan a lehlam sawi ringawt kan hriat avangin ngaihdan siamin dikloah ngai mai suh ang u.