LAL LENNA ZION KHAWPUI

August ni 1, 1983 zan chu favang khua ang maiin a thiang mawi em em a, arsite chu a pe un mai a, Chung thangvan zawl mawitu si-ar mah khian, Tuahrem biahthu di sawi lote hian, Kum­tluang hal loten an leng a, Khiangawih zamual min liamsan hi, Parte i tum reng maw lo ni? tih hla kha tingtang nena sak nan a itawm hle mai a. Darlunga Primary Sikul-1 a, an Headteacher Lalliansawma lungleng pawh chuan khawvel dangte a ngaihtuah a, a muhil lawk thei lo va.

Muhil thei hek lo le, a tho thut a, towel vengin pawnah a chhuak ta mai a, a han hawi vel a, Hmar-Arsi awmna lai hmar thlang chung zawn, thlipui lo hawna zawn nia a hriatah chuan, a awmna lai tak erawh a hre fuh thei lo va, tuipui zau em em, mit tlin tawk hi a lo awm pung mai a. Lawng puanzar chi hrang hrang mawi em em chuan kil tin atangin lawngchawlhna chu englai pawhin an pan sup sup a. Chu tuipui kamah chuan, mipui tam tak an awm a, Amen, Haleluia, Lalpa chu a thianghlim a ni, tiin an zai tuar tuar a, a laiah chuan nunna tui a luang fim dem dem a, eng tak mai hi a awm bawk a.

Pathian hmuh tumin a en a, mahse eng tak mai tih loh chu engmah a hmu lem lo. An zingah chuan a zai ve ta a, a thuamhnawte chu an en a, mi dangte thawmhnaw ang bawk chu a lo ni ve a, a hlim hle a, mahse a han harh chuan a tak ram a lo ni hauh lo mai a, in chhungah a lut ta a. Keinin zan thla eng pawn atanga kan thlir a, lungleng tak a, Zanmu chhing loten pawnlerah ka dawn thin che, kan tihte a tak ram a nih vei nen khan maw! Chutia a lut chuan lehkhapuan a la a, pen a la a, Lal lenna Zion khawpui tual nuam, Ka thlir a mawi ropui mang e; Van mite chhun leh zan chawl loin, Zion hla mawi ropui an sa, tih chu a ziak nghal a, a thluk pawh chu a siam nghal a, chu a hla thar dawn chu a sa a, amahin ke per tlut tlutin a zai a. Zing dar hnihah chuan a hla thar chu a siam zo va.

A thunawnah, Lawng chawlhna chung lam Jerusalem, Lal hung chhung Beramno engah chuan, A thianghlim e, a thianghlim e, tiin, Zion hla mawi ropui an sa, tiin amah chuan a zai tlaivar chu a ni ta mai a, zing khua a lo var a, a thenawm nuho chu an inah chuan an lut khawm a, nizan chu i thawm a va tha ve, an ti a, mahse Lalpan hla thar a pe a ni, tih chu an hre ve ta a. Hla hi sawmkua vel lai a phuah nghe nghe a, October ni 10, 1942 khan Pu Sawma hi a piang a, a pa chu Laldanga a ni a, a nu chu Zachhingi a ni thung a, a nupui Dengziki leh a fate nen Darlungah khawsain, a lo upa ve tawh deuh nen, tunlai finna leh thiamnain a hrin, sam dumnate hi hman nachang ve hek lo, putar sam var a ni ta. 1979 kuma Darlunga ka zu awm ve laite kha chuan a la tlangval ve khawp asin mawle, a lo rei ta a ni ang e.

Chutianga Lal lenna Zion khawpui a nih lai chuan keini lenna erawh chu a dang deuh thung a, Jordan lui kamah ka dinga nghakhlel takin ka thlir, tia a sa tui ber berte pawh chu la hmu miah lo kan ni lawi si. Hmuh loh Zion ram ngaiin kan chau thin a ni deuh ber mai. Kan hmuh chuan loh ran thlengah kan lung a leng a, Krismas leh Kum Thar kan han hmang phei chu hmun tam takah chuan Kristian kan nihna awm hnuhma hmuh tur a tam lem lo khawp mai. Chu beram ven zanlaiah chuan, Van hla ropui takin a lo thang ni loin, Bus dum lian a lo thleng fo zawk thin a nih hi.

Pu Zoramthanga, Ex-CM u, Pu Nghakan, Pu Lian, civil hospital in pakhat ka sa ve a, JE khan a senchi um khat chawi rawh a ti a, kan in a, kan haw tur a thim chhelh chhawlh Bungkawnah Police-ten an Bus dum lianah min khung nghauh nghauh ta mai a, kei chu a hnuhnung berah min khung a, hetia ka men avanga min man dawn a nih chuan, naktukah pawh heti tho hian ka meng ang, mitkalh apiang in man dawn chuan ka thianpa R.Thangkanglova pawh khi han man ve ta che u, kan ti chu maw, Police-te khan, e ka pu, kan tihsual a ni, min ngaidam rawh, an ti a, kei chu min hawtir daih a tihte pawh ka hre chhuak rum rum.

A ni e, tinge danin a khap leh phal lohte hi tih kan chak tlat thin, tih hi ka ngaihtuah thin. Lal lenna Zion khawpui tual nuam, tia sa thinte chuan kan zawm ber tur a nih laiin, dan kan zawm lohzia mai chu e, jail-ah han kal ila, zai tui tham hi englai pawh kan awm reng a, ni tin a thar an lut zel bawk a, Kristian ram chu kan inti tak ve thin chu a ni si a. Kristian kan nihna leh khua leh tui kan nihna ang pawhin kan zahin kan zawm tur a ni dawn lawm ni? Zawma zah ni ila jail an tihte hi a ruak huai tur a ni asin. Hawh u, danin a khap leh phal loh chu ti lo mai ang u hmiang, dan kan zawma dan anga kan khawsak hian kan vai atan tha a ni asin.