INPUANNA

Enge Lal rawn lova di in chhai, Moab kawna thamral leh mai tur Siali, Kumtluang thai tur mah ni si hlei lo, tih ang deuh khan, lal rawn chu sawi loh, eng ang mi nge tih pawh hre lo, chhut hek lova riahbuk thing fawma nupui han ru ve rawihte pawh hi a lo awm theih dawn hle.

Tun hma deuh tawh khan, Aizawl atanga hla vak loah hian a nia, a veng hming ka theihnghilhna a rei tawh sia ka sawi lo ang, zanah an zaikhawm a, petromax engah chuan powder a inhnawih paw bawk a, a hmu hmeltha phuk a, an zaikhawm haw chuan a ru haw ta mai a. Zing an han tho chu a hmaihnawih a lo reh tawh si a, a han en a, chhia a ti em em a, haw rawh, a tih leh a hmeichhia chu a haw duh bik bau lo. Tlangval chu a leh mangan a, tihngaihna a hre si lo va, a tawpah chuan khumah chuan zun a cheh lui ta mai a. Puitling thankin zet han zung chu a lo huh zau duh deuh bawk a, a nupui ruk pawh chu a mu reng thei tawh lo, a thawh ruala a han ang chu a ropui khawp an ti. Haw rawh, tih a ngai tawh lo, a haw vang vang.

Police-ten a mi ringhlelh an man hian an sawisa thei em, tih zawhna hi tunlai hian ka dawng leh ta fo mai, a chhanna chu thei lo, tih a ni reng zel ang. India rama court sang ber Supreme Court-in a khap a, an mi man sawisatu chuan court sang ber rorelna a zah lo tihna a ni. Chutihrual chuan, police hnenah pawh a thil tih a inpuang vek a, court-in a chhuah leh ringawt a, thiam a chantir leh si a, tih tawngkam pawh hi ka tawng fo bawk. Hria sela ropuina Lalpa an khengbet lo tur ang hi a ni deuh ber mai.

Inpuan sawi taka zarah chuan, a tul lo thlenga inpuan a awm thei. Tun hma deuh khan nu pakhat chu a piangthar a, biak inah a inpuang ta a, Testimony a sawi an ti thung hlauh. A inpuang fai a ni ang, a nulat laia a khawsak dan thlengin a inpuang a, inkhawm banah an pain a ma nghal hmaks. Bethel uar lai khan pitar pakhat pawh a inhlan a, a inpuang ta mai a, Upa pakhat nen court-ah thubuai an neih phah tawp.

Kan sawi tur inpuanna kan tih hi, Sap tawng chuan confession an ti. Police hnenah inpuanna hi chu court-ah thu tlingah ngaih theih a ni lo va, hman theih a ni hek lo. Amaherawhchu, miin ka ru ngei a, ka thil ruk chu chumi khami hmunah ka thukru ti ta sela, a thuhruk a sawina kha ziakin daha thuhretute pawh awmin hming ziak ta se, an va kala a sawi ang chiah chuan a thil thuhruk kha va hmu ta sela, chu erawh chu thutlinga ngaiha rukru khan a ru ngei a ni a ni, tih finfiahna tur hmanrua, evidence an tihah hman a thiang thung.

Magistrate hma meuh pawha ziak thlapa an inpuanna pawh hi, hrem nana hman theih loh a tam mai nia mawle. A inpuang tura kha, an mi man kha police hmun, Police Station an tih atanga hruai a ni tur a ni lo va, jail-ah a rei lo berah zan khat leh zan khat tal a awm phawt tur a ni. Magistrate hnena a inpuang duh a nih chuan Magistrate khan inngaihtuahna hun darkar thum a pe phawt tur a ni. Tin, chumi hnu chuan tang hnenah khan, police a nih lohzia te, a inpuan chuan kha a inpuanna kha amah hrem nan a hman theih a ni, tihte a hrilh tur a ni. Chhia a chhamtir tur a ni lo.

Tin, inpuanna kha ama duhthu ngeia inpuang a ni tur a ni, vau vang emaw tih thaihna avang emawa inpuang tur a ni lo va, a inpuan laiin police an awm tur a ni hek lo. Chutiang chuan a tihdan tur kha a awm vek a, khitiang khi a nih avangin, tun hma deuh kha chuan, magistrate ngeiin ziak thlapa a inpuanna a lak a, tang pawhin a hming a ziah hnan thlap, mahse a inpuanna latu leh ziaktu zawkin a tih ve tur a tih loh avanga kha inpuanna kha hman theih loh a awm fo ṭhin a ni. Tin, an inpuan hmaa chhia lo chhamtir ta mai an awm zauh bawk ṭhin, chutiang a nih phei chuan kha inpuanna kha hremna tura hman theih a ni ta lo a nih chu.

Khitiang khi a nih dan tur chu a ni a, hei hi inpuan chungchanga kan dan leh a kalphung chu a ni a, hetia keini mimawl lo ngaiha chiang kuar nia kan hriat hi, court-ah chuan a lo ni mang hauh si ṭhin lo a ni ber. A ching lo Lelte va lam leh rawh, tih ang kha a ni deuh ta ber awm e. Court-ah chuan dan bawhchhiaa an puha an mante hian an tisual ngei a ni tih kha a puhtu leh mantu lamin an finfiah a ngai a, chumi tur chuan thuhretuah min pun ṭhin a nih hi. Mi tam tak court-a an kal hreh vangin hretu nih duh lo an awm fo. Dan bawhchhiate dan anga an phutawk hrem an nih theihna turin thuhretua awm hi kan bat a ni e.