NGANBAWM PAR A VUL BUNG E

Ka rawn fang leh hmana kan tuanna tlang, Ṭuahpui leh  vau an vul  leh ta; Kan suli hnu khuarei an chang zo ta, Hring leh thar hnah nemten lo bawm, tih hla pawhin a zu khuh pha thoin a lang a, engpawh nise, hun thuhmun a nih em loh pawhin inhlat erawh a ni hauh lo thung. Lamlian kawngpui kama mi hauhsaten in an sa, an insa hnaih lutuk tukverh pawh hawn theih loh, bang an inṭawm a ni deuhthaw e, mahse an thinlung erawh a inhnaih lem lo, an in sak a inhnaih zawh poh leh an rilru lam erawh a inhlat thung ang deuh hi a ni ang.

Nganbawm par mawi ka ti lo thei lo va, chu a mawina phenah chuan chungleng savate leh leia bawkvaka kal, mahse thingah pawh lawn ṭhin, thehlei leh chepa, hleimualrangte tan malsawmna inphum ru a keng tel ṭhin a. Kum a lo thar a, kum bul tan nan January thla a lo de a, February thla a lo thleng  a, a lo par vul ta. Chhim chhawng nikang chu duhthusam a ni ngei ang, mahse hmar hawi pawh niin chhak lam a ni emaw khawthlang lam a ni emaw a lem chuang lo ve, a par mawi em em, en zawh pawha en leh ṭul ṭhin chauh a ni mai lo, zu thlum tui tak mai a lo la pai leh nghal a nih chu.

Chu a par mawi phena a zu thlum tak mai chu kulherh leh tlaiberh, changsen, tukkhumvilik bakah sava dangte chuan an tlan a, inhmu ngai lo kal khawm pawh ni se, tumah reng reng an inhuphurh lo va, an inkawm ngeih dial dial zawk a, rilru tha leh zaidamin mahni niin a parzu an dawt kiang kiang a. Chutah hleihmualrang, theihlei te reuh pawh chu a u thehei lian zawkten an nuihzat lo va, thlamuang takin a mei a tikawm kawh ngeuh a, chhim lam leh zar thlang lamah chuan inthahrung bik loin a thutung ving veng a, par zu chu a thiam ang angin a dawt ve a a nih chu.

Tumah inhau lova hal loin, Lalngaihchhing pa runah dar-dawn a hawng e; Lunglen zu a ni e, thal mai rawh, tiin khuang nen ri bung bung lo mah sela, a takin an sa thung a ni zawk. Huphurhna thinlung leh itsik elrelna reng nei loin hlim takin zing ata tlai ni tlak thlengin a par hun chhung rei lo teah na na na chuan ni tin ni an leng a, Zing ata ni tlak thlengin kan Lalpa tan i thawk ang u, A hmangaihna mak zawng zawng i hril ang u; Tin, kan ni kan tumtawi zawh hunin kan thawhrim zawh hunin, Khita hming an lam hunin ka awm phawt ang, tih chu ri lova an khawmpui, nganbawm par zua ruai an theh ni tin chhunga an hla thunawn an sak fo chu a ni a.

Thil siam sava leh leia kal mite pawh, thla neia boruaka thlawk mite leh thla nei ve lote pawh, chi leh kuangah phei chuan  inlaichinna nei lote, inngeih dial dialin nganbawm a par chhung chu ni tin a zu an tlanho dial dial a. Keini a anpuia a siam ngei mihringte zawk erawh hi chuan  rilru ṭha lo leh itsikna, inhuphurhna hi kan pianpui ni awm tak hian kan nei fo va. Mihring chauh lo chu zirtir an ngai lo, tih hi a lo ni leh mai ṭhin.

Ngaihtuah ve teh, keimahni mihringte aṭang hian chungleng savate leh nungchate hian zir tur an nei lo a, keimahni zawk hian anmahni aṭangin zir tur hi kan ngah a ni lo em ni? Anmahni chauha an awm pawhin Siamtu an fak a, pahnih-pathum an nih pawhin an fak tho zel a, keini erawh chu mahnia chauha awma min Siamtu Lalpa fak har kan ti a, pahnih pathum kan nih phei chuan Lalpa min Siamtu fak aiin tu emaw that lohna lai sawi leh mi rel kan tuipui zawk fo ṭhin a ni lo vem ni?

Tunah chuan nganbawm parte chu hmuh tur a vang ta em em a, kan ramngawte chu keimahni ngeiin kan tichereu a, ransate chenna tur a chereu zel avangin hmuh tur pawh an vang ta. Kan pi leh pute hun laia sai ram an chhuak a, sai rual kalna  hnuhma hmuh tur a awm tawh lo ang bawkin a saia tak lah hmuh tur awm tawh hek suh. Heng zawng zawngte hi tu vang mah a ni lo va, keimahni vang liau liau a ni e.  Mahse tunah chuan nungcha leh ramsa, ramngaw thlengin humhalh kan uar ta zel a, beiseina nen thlir zel phawt teh mai ang.

Kei vannei ka inti thinna a lo bo ve ta. Kan in aṭanga hla lo te, kawng chhak kawrah ni loin a kamah zawk chuan nganbawm kung ui pum tiat tur vel hi a ding a. A hnahte chu a hring hlim hliam a, ka thlir ning lo. Ramhnuai a ni lo va, tute kawmthlang emaw a ni mai a, Khuanu siam leh duan ang, a ruat ang zelin a hun a lo thlen a, kum a lo thar hi chuan a par chu tam em em lo mah se a vul ve chhi chhiai a. Khawlai a nih vang pawh a ni ang e, hmun hla leh ramhnuai hla tak aṭang chuan a awm tih pawh an hre lo thei bawk, sava dang leh thehleite chu a par tlan turin an lo kal hran lem lo.

Mahse e, savaah chuan awm hunbi bik pawh nei lo hmun bik lah nei hek suh, tlaiberhte erawh chuan a parzu chu an tlan ṭhin a, a zaraah an fu che liai liai a, ka thlir fo a, mite tan eng ni  lem lo mahse ka tan chuan lunglen thlak leh hmuhnawm a ni si ṭhin. A thlang chu kawngpui a ni a, inte a awm bawk a. Nganbawm  nung reng tura ka lo ngaih chuan natna ruk a lo vei a. A chhungah chuan nget kawrawng hi a lo awm hlauh mai a. A ṭhang lian ve zel tho si a, a nget lah a kawrawng zau tial tial a, a tluk mai a hlauhawm ta, a tluk chuan kawnga kal tan leh kawng bula inte tan chuan hlauhawm a ni ta tlat mai.

Ani chu tui luang kianga nganbawm thing phun, a hnah pawh uai ngai lo mah nise, kih loh theih a ni ta lo, an kit ta, chatuanin a par sen mawi kha ka hmu leh tawh lo ang a, tlaiberhten a par zu an tlan leh tawh hek lo ang. Mahse mei kan vanga thi ta a ni lo. Kih a ni zawk, mei kan hlum a ni lo erawh kha chuan rilru a tinuam deuh thung. Tunah pawh khua a ṭhal leh ṭan ta, kangmei avanga thing kung a kan hlum i phal suh ang aw, nganbawm i phal lo leh zual ang hmiang.

Kangmei lakah kan fimkhur a ngai ta e, fimkhur loh avanga kangmei chhuak a awm fo a, ram zau tak tak a kang chhia a, in a kang a, mihring kang hlum pawh an awm ta zeuh zeuh mai. Mei hian thil a kan chhiat nasat theihzia hi i hrereng ang u, a kangmei tichhuaktu chu dan angin na taka hrem theih, kum tam tak lung in tan theih a nih avang chu thuhran nise, thil a tihchhiat rapthlak thinzia ngaihtuahin, chumi avang zawk pawh chuan kangmei lakah fimkhur i chhuah lehzual ang aw.