ZITIRI COLLEGE LAMAH

A tlangpuiin April thlaah a ni thin a, mahse kumin chu a ni lo va, May ni 29, 2017 ni a ni a, an zirtirtu Masangi chuan kum dang ang bawka an hnena kala thingpuite inah min sawm a. A pasal Aldrin Lallawmzuala, Ukil nen chuan inkawm ve thin kan ni a, Aldrina chu tluk loh em emna kawng hnih ka nei a, chu chu eng dang ni loin dulkiarah leh rihah a ni deuh ber. Ani chu Pu Lalmawia (L), MCS fapa a ni a, thil hluite min tihre chhuak uar uar a.

2006 April thla kha a ni a, mobile phone an tih mai hi kan Ukil Nanu-i chuan a hman hlui min pe a, ka lawm hle mai a, a ha kuh anpui ka nih vang a ni. Aldrina chuan, ka pa ang chauh i ni ang, min ti a, kei chuan i pa ai chuan ka changkang dawn hrim hrim ka ti thung a. A sawi dan chuan a pa chuan mobile phone kha kum hnih a nei tawh a, a ti. Ni tin a pai chhuak ve ziah a, miin an biakin a lo chhang thiam a, mi va biak a thiam lo va, mi a biak duh chuan telephone pangngai kha a hmang mai, a ti. Mi hming kha kan dah a, massage thawn dan min zirtir a, ka han ti niap niapa a tawpah hming hmasa ber Pu A.K. Rokhum, Ukil hnenah bawk a lut leh thin a, ani lahin massage a hawng thiam bik lo ni ngei tur a ni, a ngawi vang vang zel.

Ka phone chu BSNL an ti a, thla tawpa Bill pek chi, post paid an ti emaw ni, post pay an ti emaw ni zawk ni, ka hre hrang lo, chutiang chu a ni a. Top-up an tihte hi thun ngai ve hek lo, ka hre lo va. Lungleia kum hnih dawn ka va awm lai khan, 2007 a ni ang, hmun dang aṭangin top-up min chah a, dawrah an zuar mai em ni, ka ti a, aw an ti mai a. Bus-ah ka rawn thawn dawn tihna em ni? Ka ti chu an nuih a za hle. Mahse ka thawhpuiten min tihsak a, Bus-a thawn a lo ngai chiah lo a, ka thaw huai.

Chutiang vel chu kan ni a, tunlai finna leh thiamna thlipui chuan min nuai a, tuilian angin ni tin min chim reng a, keini ang rual hi chuan kan umpha meuh lo chu a ni e. Tichuan le, Zirtiri College lamah chuan kan va phei chu a thlang kawngpui thlang maia April-par lo vul sen chuk mai chuan ka mit a la hmasa ber a, Sap chuan May-par an ti thung a ni awm e. Chu Aprilpar chu May thla ral dawn tepah pawh a vul dawn chauh a, May-par tih chu a inhmeh zawk a. Chutianga pangpar mawi vul sen chuk ka va hmu ringawt pawh chu ka lawm hle.

A pangngai zawlah khan aw, tih ang deuh khan a pangngai Hall-ah chuan kan lut a, B.Sc. zirlai zir zo tawh mai tur nula leh tlangval kha an lo awm khawm a, enge ka sawi ber tur lah ka hre bik der lo mai a nih chu. Amah kan unauten a tlachawp an tih ang hi a ni ber mai. Mahse ka sawi tur nia an rin kha zan thla eng leh romei chhum zam paw chi chiai ni loin, fur khawthiang leh van dumpawl lung tileng ni bawk hek loin, dan lampang bawk a lo ni tih chu rinna mita ka han thlir khan ka hrethiam ri ruai a. A bul tan nan chuan Ehem…ti loin College thlanga April-par mawizia chu ka hmang ta zawk a. Ranthleng leh thing anchhedawng leh vana lallukhum a inzawm ang deuh khan, chu pangpar vul sen no chuk aṭang chuan dan inzawmtir chu a ngai a, a zia tak a awm.

Mi tin maite hi hria ila hre suh ila, mahni ram dan chu hre veka ngaih kan nihzia leh dan ka lo hre lo a ni, tih chu chhuanlama hman theih a nih lohzia chuan chu April-par kung chu kan dawh zawm chho va, dan hriat loh chhuanlam theih ni ta sela, kan awh zawng kan ru ang a, kan huat zawng kan vawhlum deuhthaw ang a, dan ka lo hriat loh vang a ni, kan ti zel mai dawn a. Chuvang chuan hria ila hre suh ila, dan hriat loh chhuanlama hman theih a nih loh hi a lo tha khawp mai a lo ni a. Mahse a nihna takah erawh chuan han hriat sen rual pawh chu a ni lo zawk si.

Keini India ramah phei chuan Parliament khuan ram pum tan dan a siam a, chung a dan lo siam tawh zawng zawng pawh chu a hming ringawt pawh hriat vek sen har tak a tling a, chutihlai chuan kha a dan siam zulzui khan dan tesep Rules an tih mai, dan ni ve tho si kha a la awm leh cheu va. Chumai chu a la tawk lo va, State tin maite hian India danpuiin thuneihna a sem angin anmahni State chhung bik atan dan a siam leh a, chung ang zawng zawng chu hriat sen a har turzia leh van sanzia chu kan hrethiam mai awm e. Mahse chuti chung chuan keini khua leh tuite chu dan kha hre vek tura ngaih kan ni tho tho.

Zawhna ka tawn pakhat chu, Mizorama court-te hian mi khaihlum theihna tur thuneihna an nei lo em ni? An va khaihlum ngai lo ve? Tih hi a ni khauh mai. Hei erawh zawhna chhan harsa a ni lem lo va, a chhan chu India ramah Cr PC an tih mai hi hman a nih avangin Delhi Court leh Mizoram Court kha a thuneihna a inang reng a ni. Mi khaihlum tur meuh chuan thil thleng kha, entir nan inthahna ang kha rapthlak leh uchhuak chungchuang, awm zen zen lo leh thil thleng ngai meuh lo a ni tur a ni tlat. Mizoramah hi chuan chutianga rapthlak chungchuang chu a tam lo, tihte chu kan sawi ta vel mai mai a.

Kum sawmhnih zet liam taa Hnahthial nula thah thute kha kan pakai zel a. Nula kha tlangvalin a bialpa lehkha anga ziakin daiah kal turin a ti a, a kal a, chu tlangval chuan a lo pawngsual a, a that zui a, a thawmhnaw zawng zawng a hlip a, saruakin a dah mai bakah a serhah a khamphei zawngin chemin a zaisak a, mi hmuh turin kawng kham zawngin a dah a ni awm e. Khatiang thil kha chu a rapthlak chungchuang a, India ram chu sawi loh khawvelah pawh a thleng khat khawp ang, a titu kha kei chuan khaihlum a phu ka ti a, a chungthu relsaktu ni ta ila, khaihlum turin ka ti ngei ang, High Court-in a remtih leh tih loh chu thu dang nise, te ka ti a. Session Court-in emaw mi khaihlum tura a tih chuan High Court remtihna, confirm a ngai thin a ni.

Dan hi a pawimawh avangin phak ve tawkin kan sawi thin a, kan bang chu le kei tehlul kha thla min lakpui ve sup sup mai a. Min lakpui duh chhan nia ka hriat tak ber chu ka hate hi a kuh ve angreng a, an lang hmeltha zawk lo thei lova chuvang chu niin ka hre ta ber mai. Min lakpui hnem bera ka hriat chu 2007 khan Pukpuiah thalai khawmpuiah kan kal a, zanriah kan eina venga mite khan min lakpui a, roll film thar an lei a, an hmet ral thak. Hmel hian puak han ti phawt mai sela, a zia tak a awm ber nge nge e, dan lam sawi tur erawh hi chuan hmel-puak kher erawh a pawimawh ber lem lo niin ka ngai ta deuh mai.