BAZAR-AH KA KAL A

A changkan thlak deuh a ni mahna, Mizo tawnga sawi theih reng pawh hi Sap tawnga sawi deuh kher an chin thin hi, kei chu ka Zopa deuh bawka Sap tawng hi ka thiam lo nen, chuvangin ni 17-6-2017, Inrinni khan Bazar-ah ka kal ve a, mahse “bazaar” tih kha Sap tawng em ni aw, mahse e, changkang ila kang suh ila, pen, han tihte pawh hi Sap tawng a nia…Mizo tawng pawh a ni bawk a, hnam dang tawng kan tawnga kan lakluh hi a tam ve a, chungte chu kan tawng hausakna a lo ni ve zel tho thin zu nia.

Kan mamawh miau si avang chuan bawngtuthlawh leh tiangthir lei chuan bazaar lamah chuan ka chhuak chho a, khawiah nge an zawrhna pawh chu ka hre ve chiah lo va, Zion Street-ah ka chhuk ang a, kawng sirah an lo zuar mai ang chu, tih kha ka ring ve tawp, ring la i nung ang, tih hla ang deuh khan. Mahse bazaar chawhhmeh an zawrhna chung in chhungah an zuar tih kha kawngah min hrilh a. Zion Street an zawrhna tur nia ka ngaiha ka chhuk chu bawngtuthlawh an lo zuar lo va, aifiar leh kaikuang erawh an zuar zawk. Tel hneh deuhin kang ro ila chu an sen vit vet ang.

In chungah chuan ka han lawn chho a, mi an lo zi hut hut a, tiangthir an zawrhna hmun pawh chu engtin tin emaw chuan ka hmu ve a, ka hmelhriat nu pakhat hian a lo zuar reng mai a. Bawngtuthlawh pawh chu a fawng nen lam an lo zuar tel a, a tihzia hle a, kei vawi khatmah bawngtuthlawh fawng la siam ngai lo tan chuan a lawmawm duh asin, pa pakhat vawk te zawng ka hre chhuak. Tun hma deuhin pa pakhatin vawk te a zawng a, Pu Vankhama in piah vai dawr lian deuhah a lut a, a hawi kual a, thil an nei chikim deuh berin a hria a, vawk te in nei em? An ti chu an lo nei lo hlauh. Kei erawh a fawng ka zawh tel loh an nei tel hlauh thung a, ka vannei a ni ber e.

Tin, heti hi a ni a, tiangthir lian pahnih leh bawngtuthlawh pahnih fawng pahnih chu min tawn kawpsak a, a bawngtuthlawh thir kha erawh chu polithin ipah min thunsak a, chu chu ka kut lehlamin ka khai a, tiangthir chu ka pu a, ka kut lehlamin ka dawma ka vawn a ngai a, chutiang chuan ka inpu khai bawr a, bazaar mi tamna leh vei vahna, kal lam leh haw lam an insul hut hutnaa kan haw chu e, a hawi champ a har duh, hmelhriat nula hmeltha deuh kan tawk ang tih hlauhawm deuh mawle, hrethiams?

Chawlhni tuka inkhawm tura kan kal nen chuan a inang chiah lo deuh bawk a, tiangthir pahnih leh bawngtuthlawh fawng pahnih put a, a bawngtuthlawh khai bawka kawngpui mi an vei huai huaina laia han chho kal chu e, a dang zuai mai. Chutihlai karah rem leh rem loin, e Pu KL… ka chibai duh che, min ti kha keia kar hian kan tawng ve khiah thin a nih chu. A va rem lo veeee, ti chung chuan kei tehlul min chibai ve duh chu chibai loh theih ni bik si hek lo, inkhawm bang biak in kawta inchibai nen chuan a inang chiah lo khawp mai.

Kawngpui ka chhuak chho chu kawng kha ka kan a, kea kalna tur an siamah chuan ka inpu bawr khai bawr ka kal lai chu kan vengpa khan min hmu a, a ngai lo ve…ka zo lutuk pawh ka ti hman meuh lo, thirtiang chu min chhuhsak a, a pu ta mai a, nuam deuh a ni. Kei chu a neitupa ang maiin ka khai nel nel. Bantawia puakphur ka hre chhuak a. Banzai Dengthuama Reiekah a kal dawn a, puakphur atan Bantawia a ruai a, thul a phur a. Bantawia khan thingpui te ka in ve duh ang a, tiin a hlawh tur a dila a la lawk a. Thul chu a phur a, chhukah chuan a awi thla luai luai a, Tlawng lui an thleng chu le, thul kha chho phurh a ngai dawn ta thung a. Bantawia chuan ka pum a na, ka phur thei tawh lo a ti ta tlat mai a, a hlawh tur a la lawk tawh bawk si. Mi pum na chung chung han phurhtir lah ni bik hek suh, a ruaitupa zawkin chho chinah thul a phur a, a phur tura a rawiha zawka kha a ruaitupa ni awm takin ruakin tiang hawlin a kal thung, chutiang deuh chu kan ni ber awm e.

A ni e, thalai tam tak hna han thawk zak deuh ta mai te, bus-a chuan zak deuh tituai ta maite kan awm thin, thawh zah kha a zahthlak zawk. Amah Pu Lianreman, IAS ka tling lo mak an ti lo hi a mak e, a ti ang deuh kan ni awm asin. Zana mut nachang hre lo, zinga thawh nachang hre bawk si lo, a thawk peih lo lo hi a duhtui leh phunchiar hlei hlei thehlei man thei hlei hlei kan ni chawk si thin. Chu ai chuan bazaar standing an tih maia a ruka dan bawhchhiaa zu leh drugs zawrhte hi a zahthlak daih zawk a, chumai a ni hleinem, mi ipte zena pawisa lak ching pick-pocket an tih mai nihte pawh hi thil zahthlak tak a ni zawk.

Kan Bible chuan, Thawk peih lo chuan ei pawh ei suh se, a ti a, hna thawk lova danin a khap thil lo tih a, damdawi ruihtheih zawrh te, zu permit nei lova zawrh leh rukruk te hi a zahthlak daih zawk a, chutiang an tih avangin mi tam tak jail-ah an tang tawh thin a, an tang meka an la tang zel bawk ang. Tiangthir leh bawngtuthlawh fawng bazara mi tamna hmuna put aiin dan kalha khawsak avanga man niha jail tan a zahthlak zawk daih a, hnathawha inhlawhfak aiin thawk peih si lo engmah thawh chhuah nei lova thiante khilaia a ngawl lo vei ringawt nih phei chu a zahthlak lehzual.

Kei pawh ka input bawra khai bawr avang khan dan ka bawhchhiat a awm lo va, bazaar nu chaklo zawk leh tar lam tawhin chawhmeh an zuarte pawh an taimain an fakawm a, an entawn tlak a, chutihlai kara ND&PS Act dan pawhin a khap tih hrereng chunga damdawi ruihtheih a ruka zuar a, PC Act danin a khap chung pawha sawrkar leh mipui pawisa eiruka eiruk suma hausak thur thur lah a zahthlak hle bawk. Dan kalha thil tih leh bawhchhiat hi a eng dana pawh nise tha reng a awm lo ve, dan kalha puipunna hmuna meizial zuka hnar khuchhuah a mawi lo va, a khap lohna hlothlawhnaa thosi ngalsang tial rin rian hlauh ni pah fawma zuk khuk luih luih erawh a zia viau thung.

Engpawh nise, Kristian kan nihna angin dan zawm hi kan bat niin kei chuan ka ngai, Tirhkoh Paula lehkhathawn tam tak en hian khawvel dan kan zawma thuneitu thua kan awm hian Pathian thu kan zawm tihna a ni zawk.