TRAFFIC POLICE

Ti ta daih ila, hman ni chu Pu R.Thang­kanglova hi an vanglai hun kan zawt hlawm a, a Ukil-pui pakhat khan Pu Kanglo, nuthlawi pakhatin a ruai che a, in inremna ang chuan fee atan pawisa ni loin, vawi sawmhnih paruk awm dun turin in ti a, Pu Rualkhuma Hmar, awh ni lo, Pu R.C.Thanga khan a puk thensak che an ti a, a ni tak tak em ni? A ti ta mai a. Pu Kanglova chu a nui a, muangchang hian, in sawi takah chuan a ni tak asin, R.C.-a khan vawi sawm lai kha min puksak a, han inrulh leh ngaihna a awm si lo va, a ba ral ta a nih hi, a ti, engtin chuan han inpuksak ni dawn maw.

Pu Thangkanglova chu Traffic Police chu a ni chiah lo va, mahse bul tan nan a itawm ve bawk si a, ka hmang tawp. July ni 14, 2017, Zirtawp kha a ni a, MLSA lama kan hotute leh Traffic Police lama kan hotute khan, ni nga chhung intuai tharna an nei a, a tawp ni a ni a, M.V.Act an tih mai hi ka hriat ve chhun a awm takin sawi ve reng reng teh, tiin min sawm ve khiah mai a. Aizawl PS chungah sawn Hall nuam deuh mai hi a lo awm a. Kan kal vawi khatna a ni bawk a, a chairman-tu pa, Pu Zoramthanga Pautu, Addl. SP, Traffic ho khan kan ri laih laih a, traffic police-ah hi chuan hmeichhia an tam lo a ni ang, kan pa tlang hle.

Nikum kha a ni ta awm e, Aizawl hmar lam aṭangin kan kal a, Chawlhni a ni a, Tempul police duty-naah hian pathum an lo awm a, kei he lai kawngah hian ka la tlan tlang miah lo va, damdawi ina kal kha kan duh a, ka vawi khat tlan tlangna a nih avangin hre hek lo i le, kan tlan tlang ve tawp mai a, hamrik a ri tuar nghal mai a! Hei, ding rawh, min ti a, ka ding a, Khai aw, ka hre ve lo a ni, ka vawi khat tlanna a nia, min hrethiam teh u khawngaihin, ka ti a, trafiic police-ho chu an lo fel em em mai a, kei sam sei hning hniang, khawi lai emaw-ah phei chuan khawlaia hmeichhe naupang lo awmten min hmuh chang a, a…hmeichhiain motor a khalh ve…an tih kha ka ni fo bawk a, kan police-te chu an nuih a za em em mai a, min hau anga min vaw hrep ang tih ka hlauh tehlul nen, nui chungin kal rawh kal rawh, min han ti chu e, lawmawm duh tak a ni asin.

MV Act lam sawi tura sawm e, ti lo chuan maw, pawngsual lam lamte kan peng kawi a. Tun hma leh hma lo pawhin dan kan zirna lamah pawngsual kan thlen tawh hi chuan kan rei iak zel a, hemi tum pawh hian mipa the thaw kan ni bawk a, zawhna hunah pawh motor lam aiin, danah rau rau chuan pawngsual lam kan tuipui zawk deuh roh ta mai a. Hrethiams?

A ni tak a, kan traffic police leh traffic lo police pawh, an thawkrim thei hle a, min vengtute an ni. Tin, motor lah hi ni tin mi an thleng thla tin an tam kum tin an pung zel, tih hla ang maiin a pung chak em em mai a, kan kawng erawh a pung ve lo va, motor a pun chak ema a tam em avangin a len phah si lo va, kawng an kalna a ngaiin a thuhmun reng mai si a, buaithlak tak a ni. Kan traffic police-te hi an hahin an indaih lo hle mai a, inneih leh mitthi awmnaah chuan an tel lo chuan kan buai a ni zel mai bawk nen, chutihlai karah motor khalh phalna pawh nei lo, kum tling lo tih hriat ngawih ngawih dan lova lo khalh ve tawk lah bo hek suh, rui chunga khalh phei hi chu danin a phut anga dim chi ni pawhin ka ngai lo.

Aizawlah phei chuan motor hi a jam ni tin a ni ta mai a, khaw nawm loh lai phei chuan a jam nasa em em mai thin a nih hi, hmanhmawh tan chuan kea kal mai chi a ni fo. Chutihlai karah tun hma khum sen awm hun laite khan e, ka hmanhmawh em a ni, ti ni awm takin hmanhmawh vek muang changa ding thup karah, a ni e, rilru a hmanhmawh ve tehlul nen varak no hruaiin min lehpel zut zut a, a chunga sen vet awm inti thei awm taka rem leh rem lo pawh thlu lova an han kal thinte hi chu, an zahawm phah sawt lem lo.

Kan ram khawpui ber Delhi-ah pawh a jam chang a awm ve put put thin, mahse elektrik hmanga motor-te thunun a ni a, a jam emaw din hun emaw a nih chuan, a chunga sen awm, Prime Minister pawh nise, ka hmanhmawh em a ni, an ti lem lo, a hunah chuan an ding ve mai. Traffic dan zawm chu motor khalhtute mawh a ni a, keini ramah chuan elektrik hman a ni lo va, police an duty zawk a, an thu kan awih kha kan bat a ni a, anni khan dan angin leh kan buai lohna turin thil an ti thin a ni tih kan hriatpui a tul khawp mai.

Zawhna pakhat ka dawn chu, keinin duty chungin chibai kan lo buk a, mi pawh buk let duh lo, a en pawh min en tha duh lova min tlan pel hi an awm fo va, enge i ngaihdan? tih a ni a. Min zawttu chu mipa a ni a, nang chu min han en a, min nuih seih pawh hian kan hlim thin asin, an tiaaa, nula chu nise, min ngaizawng chiang tih chi mawle. A ni tak a, kan traffic police emaw traffic police lo pawh ni se, min chibai chuan chhanlet chu kan bat a ni. Miin, chibai, tiin min bia sela, ngawi rengin chhan pawh chhang loin kalsan daih ila, a chibai buktu ni ve ila chu, a va aa lian tak, a induh nge maw a beng a chhet deuh roh zawk le, ka ti ang. Chutiang chu a ni mai, police-in chibai an buka chhanlet tum lo leh nachang hre lo chu, tupawh niin engpawh nise a aa a nih chu, te ka ti vel mai mai, kan nui tlang ham ham.

Chawhnu lamah chuan Pu Joseph Lalchhuana, DIGP kha a kharnaah khual lian a ni rup mai a, keini kan Magistrate Thomas Lalrammawia nen khan khual special min ti ve a nih chu. Dan kengkawhtute zingah dan zira awm kan ni bawk a, thla hi a muang duh. Traffic lama hotupa Pu C.Lalthanmawia, SP khan rei lo te aia rei thu a sawi a, khual lianin a sawi bawk a, lawmthu erawh Pu C.Vanlalvena, Dy SP-in a sawi thung.

Kan ramah a dahna kan nei emaw nei lo emaw, motor lah chu dahna nei inti vekin ni tin an lei pung thur thur a, motor dahna in tha deuh deuh a tam a ni ang, kawng sirah kan hung dul zel, chuvang chuan kan traffic police-te hian an thawkrim a, an hah em em a, kan zahin an thu hi kan zawm thiam a pawimawh hle a ni. Tin, chubakah MV Act a awm a, danin min phut anga kan tiha kan zawm kha keini mipuite bat a ni thung. Zu emaw drugs emaw rui chunga lirthei khalh hi dan kalh tih hriat a tha, kan rama chhiatna tawk tam ber hi a khaltu ruih vang a ni tih hi phat rual a ni lo. Motor khalhtu ruih vanga an chesuala mi tam tak an thi a, hliam an tuarte hi a pawi hle a, thi chhungte leh hliam tuarte hi a khaltu chungah an lawm i beisei suh ang u. Dan hi i zahin i zawm hram ang u aw.