BSNL HNUNG KA ZUI A

Kum danga kan lo tih thin angin kumin chu Khuangchawi thla hleinga zana a eng lawm tur chuan ni 6-10-2017 zing chuan kan inpuahchah ve sauh sauh a, khua a thiangin a veng uar ang tih chu rinna mittin kan thlir a, arsa chu kg riat kan lei a. Tlai lamah erawh Republic-ah kan chhungte innei an awm a, tlaiah chaw ei tawk velin ka kal ve a. Chaw ei kham chuan khua chu rei lo a thiang em em a, Chalfilh tlang mual dung sei ut mai chungah chuan kan lawm tur Khuangchawi thla chu a lo chhuak eng phung mai a, ka en a, ngai teh, a bial a, a eng a, lung hi a tileng em em mai a, nun hlui thui tak min ngaihtir a.

Mahse, aw mahse, in nunna chu chhum rei lo te lo langa ral leh ta ang hi a ni, tih ang mai khan, chhum chu rei lo te lo langa ral leh mai tur ni loin pung tual tual zawk turin a lo kal a, thla chu rei lo te chhungin a rawn khuh ta mai a, a lang leh ta reng reng lo. Kan haw a, dar sarih velah in kan thleng a, khawi aṭanga lo kal nge an nih tiin ka zawt lo, chhum chuan khawvel hi a khuh phui ta luk a nih kha kan hre hlawm awm e. Chu mai a ni lo, ruahpui vanawn a rawn sur ta, Sudden Muanga artui hip laklawh ang deuh khan, arsa kan lei laklawk tawh si a, kan kang ve sauh sauh a, ruah erawhin ban zai reng a rel thei lo.

Zanlai dar sawmpahnih thleng kan meng a, arsa kan ro kan ei a, thingpui kan in a, a then tingtang perhin Khuangchawi thla eng no ruai hnuaiah ni loin ruah sur tluk tluk hnuaiah lung tileng chawpin an zai a. Sualin tling lo mah ilangin, Ka rawn dil zel anga Lalpan min ngaidam ve ang a, A buatsaih sa chatuan ramah, Kan la intawng leh dawn nia aw, Thapui nang nen chuan, tih hla ka duh em em thinte chu an sa a. Van zawl zau ni leh thla leh arsite, indip lo leh thenawmte nek miah lova lungrual taka tual an lennaah khian chhum hmuh tur reng reng awm loin khua chu a thiang em em a ni lo va, ruah chu a sur zawk si a, zanlai thleng kan nghah pawhin kan thla eng lawma ber pawh chu kan hmu lo. Hmu lova ringtu chu a eng a thawl e, tih a ni bawk a, a ziaawm viau tho. Kan thinlung lam a eng a ni deuh ber mai e.

Chhum leh ruah avangin hmu lo mah ila, chung lam sang takah khian a eng ruai tih chu kan hria, mahse kan karah chhumpui a awm avangin kan hmu thei lo mai chauh a ni zawk, thla eng lawm e, ti lo chuan, ruah a sur si a, lung erawh a leng lem lo. Len luih tum sa teh mah ila, a har lam deuh chu a ni. Chutianga lunglen leh thla eng sawi taka zarah chuan, ka lunglen lohna lam tak hawi zawngin, BSNL hian Vigilance Awareness Week an hmang a, chu chu Mizo tawng chuan Eiruk Dona Hapta a ni ber ang, min rawn sawm ve rup mai a nih chu.

Kei sam sei, a tlak nasat tawh vanga chal khuhtu pawh awm mumal tawh lo vanga pa-challang lo ni ve tituai deuh roh tawh, ha kuh bawk nen, min han sawm ve chu eng tak sawi ang i maw, tihte chu ka ngaihtuah reuh reuh a, hetianga dan lam sawi tura sawmna hi ka tawng ve ta zauh zauh fo a, lung chu a tileng lem lo. Amah Pu R.Thangkanglovan, ka eizawnna ber dan hi ka hre rei thei lo ka theihnghilh thuai a, zahmawh deuh an sawi thung hi chu hmana mi pawh ka hrereng thei lawi si a, a ti ang deuhin, keini erawh chuan dan lam aiin zan thla eng ruai hnuaia luhkapuia tingtang nen a, Chhawrthlapui a lo en chang hian nanhgmah ngaiin, Zan mu chhing loten pawn lerah ka dawn thin che, kan tih thin laite khan kan lung a tileng a, kan hrereng fo thin zawk a nih hi.

Dan hi a pawimawh em avangin tun hma pawhin YMA leh sawrkar tang kawpin dan inzirtirnaah ka lo tel ve zeuh zeuh tawh thin a, mipui lam tana a ngaihnawm loh duhzia pawh ka lo hre ve ri ruai tawh a, a sawitute zingah ka awm ve chang a awm thin. Dan, a bik takin PC Act lam sawitu tura sawm ka ni ve mai ni loin, Khual Lian, Chief Guest an tih maiah ka awm dawn kha a lo ni reng mai a, pui tak chu a ni. Kei tehlul Khual Lian han ni ta chu a ropui ve hrim hrim e, 2007 kum YMA Day-a, Haulawng YMA-in min sawm ve khiah tuma Khual Lian ka nihte kha ka hre chhuak uar uar a.

Khuangchawi thla eng lawm tur ni loin, dan lam zira sawi turin November ni 1 chawhnu chuan Greenland Higher Secondary School, Chaltlangah chuan kan chho va, motor intlan chhawk an tih mai avang hi a ni ang, motor jam nasa lutuk, varak no hruai pawhin min kal pel zut zut ang kha a awm lo. BSNL lama kan hotu liante chu an lo awm tawh a, sikul zirtirtute chuan thlate min han lakpui ve ang zawk zawk a, an fel hle mai. Naupang zirlai pawh an tam e. BSNL lama hotu lian pahnih chu Vai an ni a, Sap tawngin thu an sawi a, kei erawh Mizo ka ni bawk a, Mizo tawngin ka sawi thung a, anni khan Mizo tawng an hriat ve leh ve loh pawh ka hre lo, an hrethiam ve lo nih pawhin ngawi rengin an ngaithla a ni ve mai e.

Tin, heti hi a ni a, November ni 3, Zirtawpni erawh chuan Aizawl High School, Republic Vengah kan hmang thung a. An zirtirtute bakah an Headmaster, Pu Lalrawngbawla, an fel hle mai. Kan Mizo kalvari tlang piaha Chalfilh tlang chu ral hla takah a lang paw ruai a, thlasik ni chawhnu lam tawh chuan a chhun paw ruih mai a, lung a leng duh hle a. BSNL lam aṭangin Pu Vanlalzidinga, SDE chuan min ho thin a, ani pawhin Mizo tawngin thu a sawi ve tho mai. Hemi tum hi chuan BSNL lama hotu lian ber General Manager Pu VK Mahuli chuan min ho a. Ani chuan, zirlaite kha, in hriatthiam zawk nan Pu Liana hian Mizo tawngin a sawi dawn nia, a ti niin ka hria, ka thaw huai mai.

BSNL chuan kan ram India hi eirukna lak aṭanga fihlim turin hma an la a ni ber a, chumi avang chuan kei tehlul kha chutiang lam hawi dan kha sawi turin min sawm ve a nih chu. Kei pek khan, PC Act dan bawhchhiaa eiruk hmang Upa sermon-a pianthar chu har tak a ni, te ka ti vel, tunge Upa eiruk hmang tih erawh ka hre tawp si lo, khua a var lo khawp mai. A ni tak a, thenkhatin ND&PS Act kalhin damdawi an zuar a, chutiang avanga jail-a tang an tam khawp mai. Thenkhat dang chu PC Act bawhchhiaa eiruk avangin an tang ve zeuh bawk thin.

A ni e, PC Act a ni emaw, ND&PS Act a ni emaw, eng dan pawh nise, a kalha thil tih chu a dik lo va, khua leh tuiten kan bat leh tihtur chu dante hi kan zawma kan zah hi a ni, tihte chu sikul naupangte kan hrilh uat ber ni tain ka hria.