Dan leh hrai THLIR LETNA

He khawvelah pawh hian aman, A hmangaihna thlazar hnuaiah, Lawmin min la hruai khawm leh ang, Ṭapin inṭhen rih mah ila. Khawmpuiah leh hmun danga lehkha zira awm te, hna avanga awm te leh thil dang avanga awmte pawhin Krismas a lo thlen dawn a, tlangsampar a lo vul tawh chuan mahni khaw lam panin kan haw darh sang sang a, kan lungduh kan ngaih em emte nen inngaiin inthlahlel mah ila, inthen a ngai si ṭhin.

Chutihrual chuan in lama kan khaw lama thlahlel taka kan inhmuh hun a lo ni ve thung a, mas kan hmang zova kum thar ruai nena kan lawm zawh hnu kum a lo thar meuh chuan in lama kan lenrual lungduhte ṭhen a ngai leh a, Damtakin aw unaute u, A ṭhenten thlanmual kan zawng ang, Kan inhmuh leh hun ni-ah chuan, Aw lungduhte kan kim tawh lo’ng, tih a lo
ṭul leh ṭhin a nih hi. A ni e, kan in leh lo a chhia emaw ṭha emaw lam a ni lo, kan awmna khua leh veng tluka nuam leh ngaihawm hi a lo awm hauh lo mai. Chutah kan lehkha zirpui leh thawhpui kan ngaihte nen inhmuh lehna hun a lo inher chhuak a ni ve leh thung a, chutiang reng reng chuan kan khawvel hi a vir kual ṭhin.

Krismas kan hmang zo ta, thla bial engin min nangching a, thingtlang khaw pilril, lei mihringte siam chawp elektrik eng reng reng awm lohna hmunah hmang ila, zan thla eng kha a va nuamin a va hlu zual dawn em, tih chu ka ngaihtuah reuh reuh a. Tunah zawng kum thar January, Pawl Kut Thla laihawl kan thleng leh ṭep ta, romei zam chi chiai karah khua pawh a thiang mawi a, zanin pawh thim hlimah khawthlang lam hawiin han hawi vel teh, thla de tir pawh a lo lian fe reuh tawhin lung tileng tawk chiahin a eng leh reih dawn asin. Zanin ka lunglen reng chu, Ka dawn thin engvang nge ni, Chhawrthlapui en vang em ni, A ni lo nun hlui liam hnu ngaih vang a ni, tiin lungleng takin lo zai pawh ni la, kei zawngin ka dem lul lo vang che.

Kumin Krismas vuak vet chu, kawtthler leh kawn, thlanmual chei ni tho mah sela, a kum hmasa ang em em chuan chei a ni lo va, mahse mit titlai tawk zawng a tling e. MLPC Act dan anga zu zawrh kum mah nise, khawlaia rui buai leh buaina siam leh thil duhawm lo lian tham thleng a awm lo. Halpuah hal khapna dan pawh kan zawm tha hle, mahse kum a lo ral dawn a, December ni hnuhnung ber a lo nih a, 2015 ni, chatuana tumahin an hmuh leh tawh ngai loh tur ka Reiek tlang chhip chung zawna a han pil ta riai riai mai kha chu lungleng khawhar taka ka thlir loh i ring em ni? Auh vaka ding thei niiin chelh avanga ding tur ni se chuan e, pil liam thei lek loin ka chelh ngei ang, mahse ṭuan ṭulin a nang zo ta, hmuh phak lohin min liamsan ta si a.

Zanlai a lo ni a, kum a thar dawna kum hlui a han liam dawn tak tak meuh kha chuan maw, halpuah leh halmawi khapna dan a hma zawnga ṭha te tea kan zawm khan awmzia reng a nei tawh lo, a ring apiang chu an nung ang a, ring la i nung ang, tih hla ang maiin kan inhal rinsiakin kan inhal mawisiak ta emaw tih mai tur a ni leh si.

A hma thla rei lo teah Kelkang harhna rau changin ruah sur pawh pawisa loin leh motor kal tiding thuap khawpin bingbletin Zawlkhawpui dung kan fang chhuak a, zan tir leh reh lamah pawh khawlaia zurui au ni lo, Halelui tia au thawm hriat ṭhinte khan chuan hmanlai a lo chang zo ta. Kan Excise Officer pakhatin, piangthar chu thil rei lo te sawina, tiin a hrilhfiah a, chutiang deuh bawk chuan ni tin motor lian hmanga thlarau pur chaw tura Kelkang lama haw leh kal lam kan insul zut zutna rah pawh a hmin tawih zo ta a ni mahna, khuang nena zai thawm a reh thuap a, Thuhrilru leh zaipawlte pawh an lo reh thuap tawh ang, tih ang deuh a ni ber, han hriat tur ting erawh a awm ve zeuh chauh a ni.

Chutiang chu kan dinhmun a ni a, kan pianthar leh thingfanghma rah ang maiin, rau lama a te te leh a naupang pang kha kan chungnung lar lar zel a, thla tam erawh a daih lem hlei law. Kan KK-rau chante pawh kan tibo zo leh hman ta emaw tih mai awl tak a ni. Pianthar leh Camping uarna ram, Bethel hrin chhuah, (puanthui khawl leh buhher khawl, fuher khawl leh thingzai khawl mai bakah rawra herna khawl mai ni lo), Ṭawngṭai Khawl hial nei khawpa rau uarnaah hian thlarau lamah chuan kan lung erawh a leng lem lo viau a ang hle. Ka u Revd Chuauṭhuama te bingbileta an lam ve hunah chuan heti reng hi chu kan ni bik kumkhua hlei lo’ng e, ti rawh maw. Aw ti ve mai ṭhin la.

Mahni seh seh mual hranah tih ang deuhin mahni tawkah kan hlim leh lawmna inang vek lo mah sela, kan hlim tlang viau chuan a lang, sawi tawh angin rau lamah erawh kan hlim vak hlawm lo va, chuvang chuan zan rei deuh thlenga lengkhawm khuang ri hriat tur a vang hle, zan rei sawi taka zarah chuan han duham leh ta zel ila, zan rei mut hun dawn vela aurinna hmanga Pathian thu sawi ta lung lung hi tun hma khan an awm fo va, a lawmawm viau rualin a ninawm chang a awm fo bawk. Thuneitu hnenah pawh aurinna hman phala dil lem si lova mahni phur vanga ti ta maite an niin a lang, hetianga zan rei lama mi mut hun dawn veleha au ta lung lung avanga han piangthar ta erawh sawi tur an tam lo khawp mai.

Tin, chutiang deuh chuan Bible chhiara ri ta lung lung tawk kan awm fo ṭhin, biak in aṭanga chhiar a nih vanga lo pianthar phah ta pawh an tlem hmel hle, hengte pawh hi mipuite tan hnawksak, public nuisance a ni em, tihte hi kan ngaihtuah a ṭha hle, dan hi kan ngaih pawimawh a ṭul a, dan kan zaha kan zawm hian kan zavaia atana
ṭha leh nuam a lo ni ṭhin.