HIGHWAY IS MY HOME (IM A LONESOME FUGITIVE)…

Kan ṭhianpa PC Lalchuangkima kha, KṬP hruaitu, inpe tak mai a ni a. Biak In chowkider-ah pawh hlawh nei loa ṭang ngat peih a ni a. Chutianga a vanglai tak chuan, Truck pakhat handyman-ah a ṭang ta daih a. A truck zuiah chuan, ‘Highway is my home,” tih hi a inziak a. Highway-a hun hmang tam ta na na na chu, Bilkhawthlir-a kan zu tlawh leh dawn ṭum pawhin, Pathianniah Phaiphengah a lo zu kal daih!

Ka zin ve ta fo, kawng lakah truck lian pui pui ding, a khalhtu leh a puitu zana kawng laka riak hi ka hmu tam hle. An tlan muang a, an phurrit a, an kalna tur a hla a. Chung truck-ah te chuan, ‘highway is my home’ tih a inziak fo mai. An tan chuan, ‘highway’ khan an ‘home’ a ni tak tak fo. He ‘Highway is my home’ tih thu hi hla pakhat aṭanga kan hriat a ni ber a. He hla, Mizoten Highway is my home tia kan hriat lar hla hi "The Fugitive' tih a ni a, "(I'm a Lonesome Fugitive") tiin a thupui an vuah Ṭhin bawk. Kum 1966-a Merle Haggard –an a rawn sak chhuah a ni. "The Fugitive" hi haggard-a hla zinga Country chart top ni hmasa ber a ni a, kar khat chhung a top-ah a awm.

San Quentin Lung Ina a lo tan tawh avangin Merle Haggard-a hian ama chanchin behchhana a phuah leh sakzui a nih duh hmel viau nain, ama phuah erawh a ni lo thung. Liz Anderson leh Casey Anderson te phuah a ni a, country singer lar Lynn Anderson nu leh pate an ni.

All my friends are gonna be strangers tih pawh kha Liz Anderson hla tho hi a ni a. 1960 chhoa zaithiam lar Charlie Pride, Ernest Tubb, Loretta Lynn, George Jones, Skeeter Davies te khan Liz Anderson hla te hi an albumah an sa tel ve ziah a ni. Hla phuah mai bakah zaithiam lar a tling a. A fanu pawh a lar zui ve leh ta hle a ni.

Liz Anderson te nupa hian thingtlang kawnga an tlankualna lamah, TV show lar tak mai David Jansen te channa The Fugitive ngaihtuah chungin he hla hi an phuah a ni. He The Fugitive TV Show hi 1963-1967 chhungin an changin an tichhuak ṭhin a. a thawnthuah chuan, David Jansen-a hi a nupui thattuah puh a niin, thiam loh chantir a ni a, thi turin a chungthu relsak a ni. Ama tihhlum tura an hruaina kawngah a tlanchhuak thei hlauh mai a, a nupui thattu tak tak zawk zawngin, America ramah a tei vel ta a, amah chu thuneituten an lo um ve tho bawk a. Chu TV serial chuan, he hla hi a rawn hring chhuak ta a ni.

Haggard-a khan a hla a han ngaihthlak hmasak ber aṭangin ama tawn ang riakah ngaiin, a rilru la lian em emtu hla a tling. Country hla sa thiam tia a hmingthan phahna hla a ni ta a ni. Liz Anderson-in Haggard-a hriata a han sak tirh pawh khan San Quentin-ah a lo tang tawh tih a la hrelo a ni.

Haggard-a hian a nunah harsatna a tawk nasa tawh ṭhin a. A tleirawl chhuah tirhah pawh tleirawl enkawlna hmunah an dah zak zak a, ruk ruk kaihhnawihah Bakersfield Jail-ah te a han tan zak zak hnuin 1958-60 inkarah San Quentin Jail-ah a tangzui ta a ni.

A nupui hlui leh zaia pui ṭhintu Bonnie Owens chuan, “San Quentin-a a thil tawn khan eng ang chiahin nge amah hi a nghawng ka hre ngai chiah lo. A sawi vak silo a. Ṭum khat chu, rilru hah hmel taka a awm hi ka hmu a. 'Engkim a tha vek a maw?' tia ka zawh chuan, 'Ka hlauthawng tak zet mai' a ti ta a. A chhan ka han zawt a. 'Engtikah emaw chuan, ka tan hun laia tang vete nen kan la inhmu anga...45200 engnge i tih a?' min la rawn ti nulh thut thei a ti ta a," tiin Bonnie Owens hian a sawi. Amah Haggard-a kha chuan tan ina a tawn hriatte a sawi lem lo a. A thil tawn te hi kan hre thuk ta vak lo a ni. San Quentin hi California lung in upa ber a ni a, 1852 aṭanga awm tawh a ni. Mi sual tawrawt ber ber an dahna a ni.

Mi ngaih dan turah a buai a. Zai lama a zinkawng chu a lung in tan tawhnate chuan a chhe zawngin a nghawng pawh a hlauthawng ṭhin. Heng a ngaihtuahna te hi Branded Man tih hlaah khan a rawn puang chhuak zui ta bawk a ni.

“When they let me out of prison, I held my head up high

Determined, I would rise above the shame

But no matter where I travel, the black mark follows me

I'm branded with a number on my name

I'd like to hold my head up and be proud of who I am

But they won't let my secret go untold

I paid the debt I owed them, but they're still not satisfied

Now I'm a branded man out in the cold, ” tihte a nih kha. A sualna sulhnu te chu, miten an hriat sak reng thu a sawina a ni. C. Lalzarmawia’n, “Ka sualna zawng zawngte chu,

Miten hre reng ṭhin mah se,

Lalpa, nang erawh chuan,

I theihnghilh si,” tih level kha chu Branded man-ah hi chuan, Merle Haggard-a hian a han thleng pha lo a ni.

Merle Haggard-hi a hming pum chu Merle Ronald Haggard a ni a. April 6, 1937-ah a piang. Country music singer, guitarist, fiddler, instrumentalist, leh hla phuahtuu a ni a. 1970 vel khan Outlow Country Movement lar zet maia meizang hlaptu zinga mi a ni. He hla, The Fugitive pawh hi Outlow Country Movement huang chhung a mi a ni a. A changtupa hian man hman loha tlanbo a tum a, a tlan reng mai a nih hi. ‘Duh thlan tur pahnih chauh ka nei a, dan tlan san emaw, tan ina hun hman a ni mai; ka tlan reng mai a, kan tan chuan kawngpui hi ka in a ni,’ tih a nih hi. A tleirawl chhuah tirh hian jail tang reng mai, dan bawh chhe reng mai hi a ni a, chuvangin, a hla leh Merle Haggard-a nun pawh hi a inhmeh em em mai a, a larpui leh zual a tih theih awm e. Haggard-a nun hi tlan reng mai a ni a, “I'd like to settle down but they won't let me ‘ tihte hi a inhmeh hle a ni.

April ni 6, 1937 a piang a ni a, a birthday april ni 6-ah vek 2016 khan a thi. A nunah harsatna tam tak a tawk a, a insiam remin a insiam ṭha a, hlawhtling leh hlu takin a nun a hmang chho zui ta a ni. Bul ṭan chhe mah se, mawi takin a tawp a ni.

Haggard-a nun aṭang hian eng nge kan zir theih ang?:

1. I harsatnate pawm rawh: Merle Haggard-a hian naupan laia hun harsa tak paltlangin, a mi mal harsatna tam tak a hneh a. A thil tawnte chuan a mihrinna leh zaimi a nihnaah thuk takin a nghawng a. I ṭhanlenna leh chhelna atan nun harsatnate pawm thiam zir rawh.

2. Nangma nihna zepui vawng him rawh: Haggard-a music hi a thuk hle a, a thil tawn leh a rilru put hmanga zung a kai a ni. A style danglam tak chu a vawng tlat a, a hun laia lar (trending) zui ve ngawt a tum lo. Chutiang bawkin, i danglamna pawm la, nangma nihna zepui vawng him la, ‘Nangmaha nangmah’ kha vawng him tlat ang che.

3. I tuinaah kal rawh: Haggard-a hian a naupan lai aṭang tawhin music hi a ngaina hle a, ama nun pawh a thimna tihpun leh tihchangtlun zel nan a hlan a ni. I tuizawng hria la, inpekna leh thahnemngaihna nen I tuizawnga hlawhtling turin thawk rawh.

4. I tihsual aṭangin zir rawh: Haggard-a hian harsatna tam tak a tawk a, mimala tihsual tam tak a nei bawk. Mahse, heng a thil tawn atang hian a zir a, mi mal angin a ṭha zawngin hma lam a pan a, chutianga a nun aṭanga a tawnte chu a hlate-ah a dah tel ta a ni. Thil kan tisual ṭhin, insiam ṭhain, hmasawnnan hmang rawh.

5. Taima taka thawk la, chhel rawh: Haggard-a hlawhtlinna chhan chu a thawhrimna, a chhelna leh a duhthusam nei tura hmalam pan a bansan ngai loh vang a ni. Eng harsatna pawh hmachhawn mah la, tumruh takin awm la, i thil tumte hlen chhuah tumin theihtawp chhuah zel rawh.

Nun chawl lo haggard-a khan, cancer a han vei takah chuan, Pathianah chawlhna a lo hmu ta a, “Pathianin mi lo ngaihsak em em tih han hriatte hi ka zak lek lek mai, mahse, khawvel hriatah ka puang dawn a ni,” tiin, 2008 khan a sawi. A nun a thlir letnaah chuan, “Mi sual thuk tak ka ni a, thil ṭha lo tam tak ka ti. Pathianin ka kawng mi han hersak ta a le, kawng dangah min hruai ta a ni. Kum tam tak chu mi au tak meuh meuh a, a aw ka hriat hma chu min au a ni,” a ti. Pathian hnenah a kir leh hnu chuan, a hawikir ta lo a, Pathian hla te pawh a sa chho ta a ni. Tunah chuan, a in tak takah a haw tawh e.

Down every road there's always one more city

I'm on the run, the highway is my home

I raised a lot of Cane back in my younger days

While Mama used to pray my crops would fail

I'm a hunted fugitive with just two ways:

Outrun the law or spend my life in jail

I'd like to settle down but they won't let me

A fugitive must be a rolling stone

Down every road there's always one more city

I'm on the run, the highway is my home

I'm lonely but I can't afford the luxury

Of having one I love to come along

She'd only slow me down and they'd catch up with me

For he who travels fastest goes alone

I'd like to settle down but they won't let me

A fugitive must be a rolling stone

Down every road there's always one more city

I'm on the run, the highway is my home

I'm on the run, the highway is my home