CYBER CRIME

Tun hnaiah India ramah cybercrime hi ngaihven hlawh tak a ni a, internet leh digital technology hman a pun chhoh zel avangin a buaithlak hle. Cybercrime chi hrang hrang, hacking, identity theft, online-a inbumna, cyberbullying, leh thil tenawm tak tak thehdarh te hian mi mal leh pawl hrang hrangte tan harsatna nasa tak a thlen a ni. Hemi chungchangah hian India sorkar chuan hmalakna eng emaw zat a nei a, cybercrime dona atan dan pawimawh tak tak a siam bawk a ni.

India rama cybercrime chungchanga dan pawimawh tak pakhat chu Information Technology Act, 2000 (IT Act) a ni a. IT Act hian electronic transaction, digital signatures, leh cyber offense chungchangah dan mumal tak a siam a. Cybercrime hrang hrang a sawifiah a, hremna tur a ruat bawk. Data humhalhna, mi mal chanchin humhalhna, leh electronic evidence chungchanga thupekte pawh a huam tel bawk.

Cybercrime hi internet kaltlang emaw computer technology emaw hmanga thil sual tih hi a ni. Heng thil sual tihte hi Computer leh Mobile phone leh chumi Inthlunzawmna (network) hmansualna leh khawl hmanga thu pawimawh tak tak ruk emaw, tihchhiat emaw, mi bum emaw, mi hnathawh tibuai emaw, dan loa thil dang tih emaw a ni.

Cyber-Crime-ah hian mi chi hnih an awm a. A titu leh a tuartu. A titu kan ni tih inhre mang lo hian a awm theih a, a tuartu kan ni tih ngaihtuah thloeng mang lo hian a lo awm theih bawk a. Tunlai khawvel hi chu, ‘Cyber-Khawvel’ a ni tawh a, Cyber Crime tuartu nih chu kawng tam takah rilru lam pawh a nghawng thuk leh zual tawh mai thei.

Mizorama case tam takah chuan, internet kaltlanga sum leh pai kaihhnawiha inbumna hrang hrang hi case tam ber a ni hialin a rinawm. Sextortion an tih mai hi a lar em em ta bawk a. Hmeichhiain, mipa tu emaw an be tlangnela, video call an neihpui a, an lo record a, pawisa an pek loh chuan, tih mualphoah an vau ṭhin. Nula emaw, tlangval emaw an be lungleng a, gift ka lo pe dawn che tiin a account no te an dil a, pawisa an ruh sak hiau hiau ṭhin. Bank details indila, OTP indil te a tam bawk. Sexual harssment case a awm nual bawk a. Zahmawh deuh deuha hmeichhe biak te, sazu thlalak thawn ta mai tih ang chi.

Cybercrime ṭhenkhat chu:

1. Nihna inruk sakna (Identity Theft): Hei hi phalna nei lova mi mal information hrang hrang, a birthday, a thalak, a aadhar no, pan no etc. emaw credit card, Debit card details emaw hmanga mi dang va bum a, sum leh pai lama hlawkna hmuhnan emaw, thil sual dang tihnan emaw hman hi a ni.

2. Phishing: Phishing hian email, message emaw website emaw hmanga mi dang bum a, thu pawimawh tak tak, account login na thil pawimawh hrang hrang te, mi mal bank account leh a sum leh pai kaihhnawih details neih sakte a huam a. Cybercriminal-te chuan an mi bum tumten amahnia rinna an nghah theih nân pawl awihawm leh rin tlak hmel takte an inchhal thin a ni.

3. Ransomware: Ransomware hi malware chi khat a ni a, mi Computer-a file pawimawh va tihbuai emaw, an Computer lock sak emaw hnuin, pawisa an dil a, an dil zat pek loh chuan, computer neituten an hmang zui thei lo a ni. Mizoram chhungah ngei pawh buaina nei an awm tawh a ni.

4. Malware Attacks: Malware tih hian computer system tibuaitu, tihchhiat emaw, phalna nei loa luh theihna tura siam software ṭha lo eng pawh a kawk a ni. Hei hian virus, trojan, worm leh spyware te a huam a ni. Malware hhre miah loin, file, attachment, link buai-virus etc kai tawh kal tlanga download theih a ni.

5. Online inbumna: Cyber misualte chuan mi dang bumna atan thil hrang hrang an ngaihtuah chhuak a, an sum leh pai te, mi mal chanchin emaw, an account-a an luh theihna turin kawng hrang hrang an hmang ṭhin. Entirnan, online lottery scam, inngaihzawnna hmanga inbumna (romance scam), emaw investment scheme lem te hi a ni. A dang pawh a tam mai. Hei hi Mizorama kan tawrh nasat ber a ni hial mai thei.

6. Cyberbullying: Cyberbullying tih hian digital platform hmanga mi mal tihbuai, tihhrehawm emaw, vau emaw a huam a ni. Hei hi social media, chatroom, email, online inbiakpawhna kawng dang hmangin a thleng thei a ni. Mizorama kan in-troll na tam tak Cyber-bullying a ni a, mi kan tihrehawm em em a ni.

7. Data Breaches: Data breaches han tih chuan, : Cyber misualte’n phalna nei loa pawl emaw sorkar ta - thu pawimawh tak tak an an kuta an lo neih hi a huam a ni. Chu chuan mi mal data, hming, address, password, a nih loh leh sum leh pai chungchânga a hre lo turin an lo hriat hi a huam a ni.

8. Cyberstalking: Cyberstalking kan tih hian tih hian online kaltlanga mi tu emaw ṭul loa umzui reng leh tihbuai reng hi kan sawi a ni. Chu chu vau emaw, nun tibuai message thawn te, an chungchang thu dik lo thehdarh te, a nih loh leh mimal nun (privacy) tihbuaite hi a ni.

9. Distributed Denial of Service (DDoS) Attacks: DDoS attack-ah chuan website emaw online service emaw chu nasa takin an tibuai a, entirnan webiste a lo awm a, website-in a zawh loh khawpa luh tumin an bei a; Chutichuan a hmangtuten an hman theih loh phah a ni. : Cyber misualte hian hetiang atan hian botnet leh thil dang an hmang a ni.

10. Online Child Exploitation: Hei hian Child pornography siam, sem darh emaw, mi dang pek ve te, online kal tlanga naupang buaipui (grooming) emaw,dan phal loh dang tihpuite a huam a ni.

India ramin IT act a neih sa chu, kum 2008 khan IT Act siam ṭhat a ni a, cybercrime dona tur dan an dah belh a. Heng siam ṭhatnate hian cyber offense, phalna nei lova computer system hman, identity theft, leh cyber terrorism te venna kawngah nasa zawkin hma a la a ni. Cyber Crime kaihhnawiha hmalakna lian tak, Indian Computer Emergency Response Team (CERT-In) din a ni bawk.

IT Act bakah hian cyber crime chi hrang hrang ngaihtuah turin dan dang siam a ni bawk. Entirnan, Indian Penal Code (IPC)-ah hian hacking, forgery, leh cheating ang chi dan bawhchhiatna nena inzawm thupek a awm a. IT Act Section 66C hian identity theft chungchang a sawi a, Section 67B hian online-a thil tenawm tihchhuah emaw, thawn darh emaw chungchang a sawi thung. IT Act hian Section 66A hnuaia cyberbullying, online harassment, leh stalking hremna tur ruahmanna a siam bawk a, mahse he section hi Supreme Court of India chuan kum 2015 khan a hman dik loh chungchangah ngaihtuahna a neih avangin a lo titawp a ni.

A dan kaihhnawih hi chu umzui thui lo ta mai ila. Cybercrime tuartu nih hi a hautak a, a buaithlak a. Chumi laka inven theihna tur ṭhenkhatte chu hetiang hian i han sawi teh ang.

1. Password chak leh danglam bik hman: Password chak tak siam la, chutah chuan hawrawp lian leh te, number leh character danglam bikte (&*#@ etc) te rem khawm ang che. I hming emaw, I pianni emaw ang chi awlsam taka rin dik mai theihte hman loh tur a ni. Account hrang hrang atan password chi hrang hrang hmang ṭhin angche.

2. Two-factor authentication hman: Two-factor authentication hian account-te himna turin tih tur finfiahna pek tur a chhawng a siam a, i password bakah i phone-a code thawn ngaiin a siam a, a him a ni. A theihna apiangah he Two-factor authentication hi hmang rawh.

3. Phishing tumnaah inveng rawh: Email, message, call emaw ṭul lo lo lakte; mi mal chanchin emaw sum leh pai chungchang emawa hriat tur an rawn dil che a nih chuan fimkhur rawh. Link rinhlelhawm click emaw, hriat loh aṭanga attachment download emaw kha pumpelh rawh. Thu pawimawh tak tak i share hmain a thawntu che a rin tlak leh rin tlak loh enfiah hmasa phawt ang che.

4. I software leh device te update reng rawh: I operating system, apps leh antivirus te chu update reng rawh. Update fo hian I khawl (Computer/phone) a veng him sawt a, thil ṭha lo tam tak lakah i him ang che.

5. Wi-Fi network him hmang rawh: Pawn lama internet i hman hian password ngai lo, public Wi-Fi network te hman loh hram hram a ṭha. Public Wi-Fi hman a ngai a nih chuan VPN (Virtual Private Network) hmangin i internet connection hung (encrypt) la, i data chu veng him rawh.

6. Social media-ah fimkhur rawh: Social media-ah hian fimkhur a ṭha hle. I mi mal chanchin tar lang tlem la, i thu post leh i mi mal thil (Personal information) hmutheitu turah fimkhur la, chumi atan chuan i privacy settings siam rem rawh. Hmel hriat lohte hnen aṭanga friend emaw connection emaw dilna pawm chungchangah fimkhur rawh. Thil ṭul lo leh ṭangkai lo sawi tam lo la. A taka I hriat lohte lakah in hawng zau lo la, I hriat chian loh thu sawi tam lo la. I hriat chian ngei pawh thu pawi a ni thei em tih ngaihtuah hmasa ang che.

7. Sum leh pai thawnkualna him: Online hmang hian sum kan inthawn nasa ta a, hetah hian app lehwebsite rintlak chauh hmang la, secure payment gateway hmangte chauh sum thawn nan hmang ang che. Website URL-ah "https" leh padlock symbol zawng rawh. I hriat chian loh mihring hnenah pawisa thawn mai mai suh. Sumdawnna rintlak lo nen inzawm lo turin fimkhur bawk ang che.

8. I data backup reng rawh: I data pawimawh tak takte chu external storage device emaw cloud service emaw-ah dah ṭha (backup) rawh. Hei hian i data I tihbo emaw ransomware attack emaw a awm pawhin i buai lo ang.

9. Online-a thil hlauhawm chungchang hre hneh hle rawh: Cyber khawvela hlauhawm leh inbumna thar ber berte hriatve zel tum la, : Cyber misualte thil tih dan tlanglawn tak takte chungchang hreve zel ang che. Him taka Online zelna tura tihngaite hreve zel la, I thil hriat chu I ṭhian te leh I chhungte hrilh rawh.

10. Security software rin tlak tak hmang ang che: I khawl(Computer/Phone) te chu virus, malware leh software ṭha lo dangte laka venhim nan antivirus leh anti-malware software ṭha leh rintlak tak hmang rawh. Software update reng la, i khawlte scan fo ang che.

Digital khawvelah hian invenna hi a pawimawh hle tih hre reng ang che. Heng invenna dante hi i zawm a, online security chungchangah fimkhur taka i awm hian cybercrime tuartu i nih theihna chu nasa takin a tlem dawn a ni. Sap ṭawng thu mal tam tak a hman loh theih loh a ni. Kan thu kal hmang aṭang hian a awmzia kan hriat thiam tho ka beisei. Kan hmun neihin a zawh chin a tam loh avangin, kan sawi kim thei lo a, kan ṭangkaipui ngei ka beisei e.