TALENT

Sir Alex Ferguson-a'n Manchester United a enkawl lai khan mipa naupang inkhel thiam em em mai a awm a. Ravel Morrison a ni. West Ham United te, Lazio te, Sheffield United leh club dang ṭha tak takin a thiam em avangin beseina sang tak nen an han chhawr kual dawn ṭhin a. A nungchangin a zir lo a. A nih tur ang hi a ni thei thlawt lo.

A rawn lar chhuah tirhin, Football ziaktu lar Henry Winters-a phei chuan, Ravel Morrison football thiam zia leh England ngei pawhin an la tangkaipui tur zia pawh ngaihnawm em emin a ziak a. Ka la hre reng mai. Manchester United khan amahah beiseina sang tak an nei a. Siam thaṭ tumin theih tawp an chhuah a. A tihmawh em avangin an chhuahtir ta ringawt a. Club hrang hrangin an tih fuh palh tak thutin tih thuah an han chhawr dawn ṭhin a, a nih tur a ni pha ta lo a ni. Mihring nunah hian talent chauh a ni lo a, nun ulukna leh thawhrimna hi a pawimawh a. Pianpui talent nei ṭha em em, engah mah chan ta lo sawi tur tam tak an awm a ni.

Morrison-a chu, Manchester United a a awm laiin thubuai a nei nual a. Thubuai pakhatah a chungthu an ngaihtuah a. Judge chuan a thutlukna puan pahin heti hian a ti a, " Mi dangte nuna hlimna thlen thei tur khawpin Talent i nei ropui a, a ṭha zawngin nung ang che," tia fuihin, a zilh a ni.

Judge-in Morrison-a a zilhna ang deuh hian, Mizo zingah talent nei ṭha tak tak, mi dangte nuna hlimna thlen thei khawp tur an awm ve ṭhin. Chung mite chu an thawh rim loh avang te, an nun an uluk tawkloh avangtein society hian thil tam tak kan chan a ni! Pathian en tlata mi thawkrim te hi kan hnam hian kan mamawh a ni.

Talent han tih chuan, pianken renga eng emaw thila tuina leh thiamna kan neih hi a ni a, chutianga kan tuina leh kan thiamna bikah chuan, thil tih kan awl sam a, a hneh pawh kan hneh bik ṭhin a ni. Chutih rual chuan, kan talent chu a la famkim lo a, chher hriam zel ngai. Huang hrang hrang, infiamna, arts, zirna, hruaitu nihna leh kawng dang dang a huam thei ang.

Talent chungchang hetiang hian han sawi zui lawk ila:

1. Mahnia theihna awmsa: sawi tawh angin, talent chu keimahnia awmsa, kan pianpui, zir chiam lo pawha kan thiam leh kan theih em em hi a ni. Pianpui renga rimawi tum thiam chuan a tet lai aṭangin rimawi chi hrang hrang hi a tum thiam nghal mai a ni.

2. Talent chi hrang hrang a awm: Talent chi hrang hrang hi a awm a, a lan chhuah dan hrang hrang a awm a. thil thar ngaihtuah chhuak thiam bik te, fing bik te, rual kawm thiam te, taksa chakna leh infiamna lama thei bik te leh talent hrang hrang a awm a. Talent ṭhenkhat chu a hriat mai a, ṭhenkhat chu a lang chhuak mai bik lo.

Talent entirna ṭhenkhat:

- Rimawi talent: Rimawi lama pianpui thiamna nei an awm a, rimawi tum an thiam thuai a, hla thluk siam leh hla phuah pawh an thei nghal mai. Pianpui ni loa zir chawp pawhin an tih theih chin chu a awm.

- Infiamna talent: An pian phung avanga infiamna thei bik an awm ṭhin.

- Zirna lama talent: Mi ṭhenkhat chuan thil harsa tak tak an hre thiam zung zung a, zirna kawngah pawh an ti ṭha ṭhin.

Lem ziah/lem siam talent: Mi ṭhenkhat chuan pianpui renga lem ziah leh lem siam thiamna an nei ṭhin a, a hrana zir kher ngai loa thiam an ni ṭhin.

3. Tlakna leilung a pawimawh: Talent hriat chhuah, ngaih hlut leh chawi san kawngah hian tlakna leilung a pawimawh hle. A hnam azirin talent ngaih san awl bik a awm. Brazil ramah chuan football khel thiam an langsar hma a, Mizoramah chuan zai thiam.

4. Talent hai chhuah: Kan talent hi kan ‘talent’ a ni tih kan hre nghal mai lo. Tuten emaw min hai chhuah sak emaw, engtin tin emaw a mahnia hriat chhuahte a ni ṭhin. Naupan deuh laia talent hriat chhuah nghal a awm a, a hnua lo lang chhuak a awm bawk.

Kum zabi 18-na laia English Painter lar berte zinga mi Thomas Gainsborough khan lemziak a thiam tih a hriat chhuah dan kha a danglam ve khawp mai. A naupan laiin tuk khat chu a zing tlanin an ṭhenawm huan hungnaa rukru lawn liam chu a hmu a. Chupa hmel chu chiang takin a hmu hman a. Inah a haw a, a mitthlaa cham ang chuan rukru lem chu a ziak ta a. Chumi thu chu a pain a lo hriat chuan, a fapa lemziak chu Police hnenah a pe a. Police chuan chumi lemziak hmang chua rukru pa chu an man ta a ni. A lo ziak ang kher lah tak a!

Mi tam tak chuan thiam nei lo ang maiin, theih nei lo ang maiin, kan tiha hma hauhin thei lo turah kan inngai fo. Kan la tih ngai miah lo chu kan tih mi tak pawh a lo ni thei. Kohhran ṭhalai pawl leh YMA te hian nasa takin talent a hai chhuak a, a tipung a. Kohhran ṭhalai pawl leh Tlawmngai pawlte Mizo society-ah chuan Talent factory ropui ber an ni tih hi hriat reng a ṭha.

Eng pawh ni se, a enga mah hmaa thil huphurh ngawt loin, Kohhran ṭhalaia kan inhmanaah te, YMA-ah te thil ti tura min ruat pawhin huphurh ngawt loin tih ve pawp mai hi a ṭha. Kawng dangah pawh kan talent hai chhuahna chi dang pawh a lo awm thei zel bawk ang. Thil hi huphurh leh thiam lo tura inngaih sa ngawt loh tur a ni.

5. Talent tihchangtlun: Talent hi pianpui a nih rualin, tihchangtlun ngai a ni a, a tawpa thlenga hlawhtling tur chuan taima taka inzir reng a ṭul a ni. Talent hi thel mam ngai a ni. Malcom Gladwell-a lehkhabu, Outliers-ah chuan 15,000 hours rule tih kan hmu a. Mi talent nei ṭha, hlawhtling zuite chuan an hlawhtlinna tak tak an hmuh chuan, darkar 15,000 tal chu kha an thiam thil kha an lo ‘practice’ tawh a ni tih a ni. Hlawhtling tur chuan talent ringawt a tawk lo a, mahni inthununa, taimaka, thawh rim a ṭul a ni..

Bible-ah Lal Isuan Talent tehkhin thu a sawi kha kan hmu a. Khata Talent lai kha han umzui dawn ila.

Mi pakhat hnenah Talent nga an pe a. Pakhat hnenah Talent hnih. A dang leh hnenah Talent khat. Talent khat dawngtu khan a tipung ve lo a, hrem a tawk a nih kha. Talent tipung tam ber khan talent tipung ve lotu talent kawl lai kha lawmman atan a dawng zui bawk tih kan hmu. Kha tehkhin thua Talent tih hi, hausakna lam sawina a ni a. Helai chang aṭang hian tunlaia Talent kan hmanna, 'Thiamna leh theihna' tih ang chi a lo chhuak a ni.

Talent khat hlut zawng hi chhut dan hrang hrang a awm thei ang a. Rangkachak talent, tangkaraw talent te a awm a. Pathian hnen aṭanga lo chhuak thil chu a hlutna sang berin chhut ṭhin a ṭha awm e. Tun laia hun milin, chung talent hlut dan chu lo chhut ta ila. Talent khat rih zawng hi kg 34 a ni a. Chuti a nih chuan, rangkachak talent khat dawngtu chuan, rangkachak kg 34 dawng ang a ni. Ni 2.06. 2024-a India rama 24 karat rangkachak gram khat hlutna chu ₹7255 a ni. Chuti a nih chuan, rangkachak talent khat man chu ₹246,670,000 a ni. Rangkachak talent khat dawngtu dawn pawh a tam tham hle mai. Rangkachak talent hnih chu ₹493,340,000 man a ni a. Talent nga phei chu ₹1,233,350,000 a ni. Talent nga dawngtu hian talent sawm zet (a dawn sa leh a tihpunna) a pe let a. Chumi hlut zawng chu ₹2,466,700,000 a ni. Talent hnih dawngtu pawhin ₹986,680,000 man hu a pe let a ni. Talent 10 pe lettu hian a lawmman atan ₹246,670,000 a dawng tih kan hre bawk a ni.

He tehkhin thuin a sawi ber chu, William Barclay-a ṭawngkam ngai ngai hi han dah ta ila, "There can be no religion without adventure, and God find no use for the shut mind," tih a ni. Pathianin ngaihtuahna hmang ngai lo, rilru kharkhip tlat chu eng atan mah a ti lo, tihna ang a ni. Pathianin Talent hrang hrang min pe a, min pek dan a in ang lo. A pawimawh ber chu engtin nge kan hman tih a ni.

He tehkhin thu a kan hmuh chu, hna thawh ṭhat chu a aia tam hmuh belhna a ni. Chhiahhlawh pahnih talent tipung ṭha te kha, chawla hahdam tura hrilh an ni lo, mawhphurhna sang zawk pek an ni. Hrem tawka ber kha, a tiha tih ve tum lo a ni. Kha pa khan a talent a hloh ta a ni lo a, hman ṭangkai a tum lo hrim hrim a ni. Talent hman ṭangkai tum lo tu chu hrem a ni.

Mihring nun phung diktak a tar lang bawk, a nei a piang an pek belhchhah ang a, a nei lo chuan a neih chhun a ch^n ang. Talent nei ṭha hmang ṭangkai chuan hma a sawn ang a, a hmang ṭangkai lo chuan a hnung tawlh ang. Kan talent te h kan hman ṭangkai zawh poh leh kan theihna leh thiamna a pung zel dawn a ni.

Pathian thilpek dawn reng theihna chu Pathian tan leh mihring te tana kan thiamna leh theihna, kan neih ang an te hman tangkai hi a ni.

Synod Bookroom aṭangin lehkhabu hlui tawh tak mai, cheng hnihin ka lei a. Upa V. Hawla lehkhabu ziah, “ Rawngbawltu Kal tate” tih a ni. Chutah chuan, 1983 hma lama Presbyterian Kohhran pastor thi tawhte chanchin a ziak a. Rev. Selkhuma chanchin kharna atan he thu hi a ziak a, “ Fate ṭha tak tak a nei a, a fapa Lalthangliana chuan pastor hna a thawk ve. Pastor Selkhuma hi Zoram thim su engtute zinga pakhat a ni. A Lalpan Talent va kawltir chu a theih anga a hman zawh hnuin a hnena chawl turin a ko lut ta. Kum 80 lai a dam,” tiin. Rev. Selkhuma fapa Lalthangliana hi Pastor aṭanga a pension hnuin Ramhlun north-ah a inbeng bel zui a. A tupa Chris Ms Dawngkima pawh zai leh hla phuah lama mi hriat hlawh a ni. Kan talent te hi, mi dangte nuna hlimna thlena malsawmna ni turin, mi dangte tan leh Pathian tan i hmang ang u.