“TAKE ME HOME, COUNTRY ROADS”

John Denver tih hming hi khawthlang pa ho hmingah chuan keini hoin kan hriat lar ber pawl a ni awm e. Amah tak hi chu zaia a lo chawi thin lei mawina te hmu theiin awm tawh lo mah se, a hlate chuan khawvel ala awi zel a. ‘Leavin’ on a jet plane’ te, ‘Good to be back home again’ te, ‘Annie’s song’ te, “Calypso” te, “Thank God I’m a country Boy” te, “Rocky Mountain High,” te chuan khawvel a deng chhuak a, tun thlengin mite ala awi zel a. ‘Take me home country roads’ tih angte phei hi chu kan lo zawm ve thei deuh vek awm e.

‘Take me Home, Country Roads’ tih hi John Denver, Bill Danoff leh Taffy Nivert te phuah a ni a. An phuah chhuah tirh hian John Denver hi a tel ve lo. 1970 December thla khan lirtheia a chetsual avangin John Denver chuan a kut zungpui a ti na a. In lamah a inenkawl a. Hemi tum hian Bill Danoff leh Taffy Nivert te nupa chuan an va kan a. Danoff leh Nivert te chuan thla khat lai an lo buaipui tawh, an hla phuah mek chungchang chu John Denver-a bulah chuan an sawi lang a. Danoff leh Nivert-i te hian Denver hi an zaipui ṭhin a, Lirtheia a chetsual hma lawk, 1970 krismas dawn Washigton-a John Denver-a zai ṭum pawhin an zai ve a ni.

Danoff- te nupain he hla an phuah ṭanna chu Maryland bul lawka Nivert-i chhungte chenna hmunah chhungkua an inhmuh khawm ṭumin a ni a. An kal kawng chu kawng zimte a ni a, thlifim a thaw heuh heuh a. Chumi behchhan chuan hun khawhral nan motor chhungah chuan Danoff chuan ballad a ziak a. A hla thu ziah chhuah hi a hnu deuhah, an ṭhianpa lemziak thiam, a lehkhathawn a pianga West Virginia ram engmawi tak chanchin ziak ziah ṭhin thu ziah ṭhin mil turin an siam rem leh a ni.

A tirah chuan chang hnihnaah a hunlaia mite duh loh zawng deuh hla thute a awm a. ‘Nula saruak’ tihte a awm deuh nuaih a vangin han record chiah pawh nise Radio-ah phei chuan an zaitir duh ngaiin an ring lo reng reng a. John Denver-a’n a han sak chhuah pawh khan a sa tel ta lo reng a ni. Scottish zaithiam leh mi chawkhlim thiam, musician ṭha tak mai ni bawk Andy Stewart erawh kha chuan ‘West Virginia’ hla hi phuah a nih tirha a thu an g chiah chiah khan a sa a. A chang hnihna an phuah tute’n an chawi lar duh lem loh pawh, ama album ‘My Homeland’ -ah a nihna ang angin a sa chhuak a ni.

He a chang hnihna an paih leh tak hi Danoff chuan tun hnu hian ama website-ah a rawn tar lang a. A hla thu chu hei hi a ni:-

“In the foothills hidin’ from the clouds,

Pink and purple, West Virginia farmhouse.

Naked ladies, men who looked like Christ,

And a dog named Pancho, nibbling on the rice,” tih hi. Tunlai hun chu nise an paih kher ange maw?

Dam samlo Denver-a bulah chuan an hla chu an han pharh a, Danoff-a te nupa chuan an han sa ta a. An tui khawp mai a. Zing dar 6:00 thleng rakin an pathum chuan an inkawm a. Hla thute chu an siam ṭhain an siam rem a. A tlarte an thlak thleng bawk a. An tuai hnum zawh chuan Denver chuan chu an hla thar chu a album siam leh hmasak berah a telh dawn tih a ṭhiante chu a hrilh nghe nghe.

December 30, 1970-khan Denver-a chuan a accident hnua a concert hmasa ber chu a nei a. A hla sak tur ho a sak zawh hnu chuan Encore mipuiin an beisei a, hla hran han sak mai tur neih loh avang chuan a hla nihphung an la siam zawh loh, ‘country Roads’ hla thu inziahna, a iptea a ah, lehkha them zawr tak chu a phawrh a, mipui hriatah chuan a chhiar chhuak ta a.Hla thu a chhiar zawh meuh chuan mipui chuan Denver-a chu Standing Oviation minute nga chhung an pe a. Cellar Door History-a Standing Oviation rei ber zinga sawi a ni nghe nghe.

1971 Favang khan John Denver chuan a album hming thang tak, ‘Poems, Prayers and Promises’ tih chu a ti chhuak a. He album-ah hian a hla hmingthang bera chhal ngam hial tur, ‘Take me home, Country Roads’ tih hi a telh ve a. A kum leh, 1972 vel atangin a lar ṭan chauh thung. A tih chhuah tirh atanga kar engemaw zat hnuah RCA chuan John Denver-a hnenah a single (Take me home country roads)-ah chuan beisei an nei lo a, thlauh thlak mai ṭhaa an hriat thu an hrilh a. Ani erawh chuan, RCA hnenah chuan ‘Thlauh thla miah suh u, in beisei aiin a ropui ang’ a lo ti thung. Denver-a thu chu an awih a, an ti fuh hle! 1972 August ni 18 chuan ‘Take me home, Country roads’ single ringawt pawh chu maktaduaih khat chuang an hralh chhuak a ni.

He hla hian ‘West Virginia’ a chawimawi hle.West Virginia hi US khawchhak lam lailia awm a ni a. 62,760 sq.km chauha zau a ni. Cherookee Indian ho khawsak ṭhinna hmun a ni. Ohio luipui a luang tlang a. Potomac luipui te pawh a luangin, Appalachian Mountain chu he ram chhung thoa awm hi a ni. 1863 khan US ram chhungah rin luh a ni a, US state 35-na a ni.

Rokunga’n Mizoram, ‘Chhawrpial Run i iang e’ a tih ang chiah khan, Danoff te hian West Virginia an chawimawi a.West Virginia mite pawhin he hla hi an ngai ropui hle. He hla hi West Virginia University hlapui a ni a.Home football an khelh apiangin, inkhelh hmaa an show neih ṭhin apiangah 1972 aṭang khan Mountaineer Field-ah an la sa ziah a ni. 1980 khan Denver chuan he stadium khat tlata kalkhawm Mountaineer fan te hmaah a sa a. Hemi ṭum hian Mountaineer field hlanna inkhawm hi an hmang a. Hei hi Coach ropui Don Nehlen-a’n WVU FootballTeam a enkawl hnua inkhelh a hmachhawn hmasak ber tum a ni nghe nghe. Athletics Event zawng zawng deuh thawha he hla hi an sa a, University Function pawimawh chinah chuan an sa vek a ni. An football team leh West Virginia University mipa basketball team te an chak apiangin he hla hi an sa ziah bawk.

He hla thua ram leilung pianhmang leh awm dan an tar lang langsar zet mai pahnih- Shenandoah luipui leh Blue Rigde tlang ram te hi West Virginia State nen an inzawm dan hi a pawnlawi hle a. Virginia hla nise a inhmeh mah mah zawk hial ang. Radio-a Nivert-i an kawm tum chuan, ‘Country Roads’ phuahtirtu kawnga ber chu West Virginia nena inhlat hlein a sawi. A chenna Washington D.C. lam a hnaih zawk a. Montgomery County, Maryland bul lawkah he kawng hi a awm a, Denver-a pawhin a tlawh fo ṭhin.Country Road an phuahna chhan ber kawng, Clopper Road hi tun thlengin a la awm a.A ram leilung erawh chu tun hma thingtlang hmun mawi tak leh lungti leng em em ṭhin nen chuan danglam tawh tak a ni. Khawvel hmasawnna hian thil hlu tam tak a tichhe ṭhin a. Ram hmunhma mawi tak kan lai chhia a, thing hmun duhawm takte hmasawnna chang chawiin kan ṭhiat a. He kawng pawh hian chu’ng chu a tuar ve a. Mihring nun chu a zalen phah sawt chuang lo. Hmasawnna hian rilru lama ti tawt sawt ṭhin em tihte hi inzawh fo a ṭul a ni? Thu uar lutuk kan ni kher lo ang- hmasawnna changchawiin keimahni chhiatna ngei hi kan insiam chawp a ni! tiin sawi ila. Clopper Road hi Gaithersburg, Maryland aṭangin a inṭan a. Tun hma chuan lane khat chauh a ni ṭhin a, tunah chuan Motor pali thawl takin a inpel zung zung thei tawh. German Town ava pawh a, Country Road chu a ni tawh lo chiang hle.

John Denver-an he hla a record lai khan West Virginia ram hi a la hmu ngai miah lo a. Bill Danoff leh Taffy Nivert te pawhin he hla an phuah lai hian an la hmu ngai miah lo bawk.

He hla phuahtu-a John Denver sawi tel a nih ve ṭhinna chhan chu, a hnena Country Roads hla an entir ṭum khan, mumal taka phuah zawh a la ni lo a, phuah zawhnaah a puih nasat em avangin a hming hi an sawi tel ve ṭhin ta chauh a ni. He hla hi John Denver-a hla hit puitham hmasa ber a ni a. 1998 khan ‘Take Me Home Country Roads’ vang hian John Denver hian, ‘Grammy Hall of Fame Award’ a dawng a ni.

‘The Poet For the Planet’ ti te, ‘Mother Nature’s Son’ ti te leh ‘A song’s Best Friend’ ti tea an sawi ṭhin, John Denver hi a hming tak chu Henry John Duetschendor Jr a ni a. December 31, 1943 khan Roswell, New Mexico-ah a piang a, Pacific Grove chung, California vuakamah an thlawhna a tlak avangin kum 53 mi chauh niin October 12, 1997 khan a chawl ve ta a ni. Hla 300 chuang zet a record a, chung zinga a zah ve aia tam mah chu ama phuah a ni. Country Music/Folk-Singer-Songwriter ropui, Folk Rock Musician zahawm berte zing a mi a ni. A engineer zir bansanin zai lamah a kal ta zawk a. A hlawhchham lo chiang hle. John Denver tih hming chu mi tam tak lawmna thlentu a ni ṭhin a. A hlate chuan thinlung khawharte chawlhna a lo siam sak tawh ṭhin.

Khawvel hi changkang zelin, ramngaw te hi ṭhiat zel mah se, khawvel khawimaw laiah chuan thing hnah te an la hring hlap zel ang a, nungcha te an la tlan ziai ziai zel dawn a, khawi maw laiah chuan ram rehah sava te an la chiar nak nak zel ang. Inhmangaihte chu an la inṭhen zel ang a, thlifimin nula hmelṭha tak tak sam chhawl leng ala chhem leng fo ang a, tute emaw chuan ni tla tur hi lungleng takin an la thlir zel dawn. Khawvel hian mi tam tak ei chhe tawh mah se, mi tam tak chuan leilung mawina an la hmu fiah thei zel ang. Khawpui nun zalen lo tak ai chuan thingtlang nun thawl tak maiah chuan Pathian a hnai zawkin an la hre fo ang. Chutiang mite tan chuan John Denver-a hi a la hlu zel dawn a ni. Thla a en changin mi tute emaw mittui chu a la tla leh ṭhin ang. Ni tlak dawnin mahni in ngaia lungleng an la awm zel dawn a ni. John Denver-a hming an la lam nawn zel ang.

Mihring hi a changkang tawh khawp mai. Pindan chhungrilah dam chhung hun a hman zawh theih hial tawh a. Khawl thil changkang ber ber nen, in sang ropui tak tak nen kan inchhek hnawk tawhna khawvelah pawh mihring thinlung chhungrilah ramngaw hi a che reu dawn lo a. Thing ding thelh sung kara kalkawng mawi leh ngil tak te chuan mite thinlung ala luah zel tho dawn. Chuvang chuan, ‘Take me Home, Country Roads” kan la ti leh thin dawn a ni.

He hla hi CMT-in kum 2003-a ‘Country hla ropui za’ an thlan zingah sawmpariatna a ni.