THLAHRANG THUKHAWCHANG

Ka ho ve ang reng a. Ka naupan laia naupang fel leh thuawih thei tak ka nih bak chu, tu thu mah ka awih ta ngai lo. Tichuan, ka thi ta a lawm le. Thih mai chu ka duh ngai bik lo. Mahse, mihring hi kan thih hun thuah hian kan lo thu lo khawp mai. Thih mai duh loh vang leh thih mai inrin loh vanga ka nun pawh ho taka hmang te pawh ka ni ve bawk a. Mahse, ka thi miau si. Thi ve ta na na na chu mi an lo kal khawm ve a. Ka ruang an kil ṭaihna bulah khan ka thu ve ran mai a. Min ṭahtu chu an awm ve pheuh pheuh.

Kan chanchin sawi tur an va han van teh reng! An han sawm khawm chiam pawhin min fak vak ngaihna an hre lo. Mi dangte tana ka ṭangkaina sawi tur an hre si lo, ka ṭangkai em em lo reng bawk a. Ka inkhawm peih bawk si lo. Inkhawm mite ka ngai sang lo ve khanglang bawk a. Khawtlangah ka inhmang bawk chuang si lo, inhmangte ngai sang bawk chuang si lo.

Kan puitlin hun chhung tam zawk ka rui a. Ka dam chhung hun tam zawka ka chanchin sawi nan chuan, "A rui ṭhin" tih bak sawi tur lah a awm na hek lo. Kei ngei pawhin ka chanchin sawi tur ka haihchham a. Mi dangin sawi tur an hre lo em em mai te hi chu an demawm loh. Kan thih hun tur ṭheuh ngaihtuah chungin kan nun hi hmang tur kan lo ni e.

Kum hlui thlah zanah kaltate sunna hunah min han thlah a. Ka chhungte bulah ka ṭhu ve a. Anni chuan an hre lem lo. An bulah ka ṭhu tih hria se an rilru put hmang a dang hle awm e. Kohhran secretary-in ka chanchin a han chhiar a. "A naupan lai chuan naupang fel leh thuawih thei tak a ni," tih bak chu ka nat thu leh ka thih thu bak sawi tur a nei ta lo.

Ka nun kha a lo ho hle tih ka ngaihtuah chhuak a. Mi dangte t^na ṭangkaina ka lo nei tlem khawp. Ka dam chhung khan zu lo in ṭhin teh reng pawh ni ila, mi dangte hlimna thlen tur khan tih theih ka lo nei teh meuh mai. Kha aia ṭangkai zawk khan ka nun ka lo hmang thei chiang a ni. Thih nia chanchin mawi hnai zawk sawi tur neih nan hrim hrim pawh dam lai nun hi hman uluk zawk tur a lo ni tihte chu ka ngaihtuah ta a. Mi tih ang ti le lu lo mah ila, ka chanchin sawi tur zawn chawp chiam ngai lo deuh khan ka nun kha ka lo hmang thei ngei si a. Thih hnua inhmuh chhuah chauh erawh a ṭangkai lo ngang mai.

Chuti khawpa chanchin sawi tur ka nei lo chu Thlahrang e ti lo chuan ka zak ta hle a. Ka lo sawi mai lo a, ka han thih a, ka ruang kiltute bula ka ṭhut ve dan aṭang khan thlahrang ka ni tih chu in hre thiam ve thoin ka ring a. Tichuan, Inkhawm ban hma chuan ka chhuak a. Keimahni min sunna hla pawh chu ka ngaithla ta lo. Biak in hnuaiah chuan KṬP hruaitu pahnih hian thingpui an lo chhuang lawk a, bana in tur a ni. Dam leh ila chu an zingah ka tel ve ngei ang mawle ka ti a. Ka dam leh dawn hlek si lo.

Pawnah ka chhuak a. Aizawl khawlaiah chuan inkhawm loho chu an lo vei sup sup a. A vawh teh reng nen khawlaia kan tei chak tlat ṭhin kha a lo atthlak hle hian ka hre ta a. Mahni in chhung lumah chhungte nen khan lo awm mai mai ila a lo nuam nasa daih zawk si a te ka ti ṭha leh hnuhnawh a. Thlahrang inchhir nih chu sawtna a awm lo hle. Kawncheiah nula leh tlangval thlalaknaah te chuan ka lo tel ve a. Ka lan mial chuan an phu nasa teh ang chu.

Kawnchei en tute zinga mi pakhat chuan, "Ṭawma te pafa ho chuan zanah chuan mi an tam em mai tiin chhunah kawn chei an en a sin" a lo ti lang lang a. Ṭawma an tih chu Pu Lalnunṭawma Fanai, Zonet vela mi kawm ṭhin hi a nih ngei ka ring. An piahah chuan tlangval pahnih rui fe mai hian thla an lo inlak sak ve mek bawk.

Ruih kher ka lo tum tlat te, thuawih loh ṭalh ka lo tum tlat te kha a atthlak zia chu ka thih hnuah ka han hre chhuak ta pek a. A sawt lo mai mai teh e maw. A sawt lohzia vawi thum zet ka sawi nawn ta reng mai, a chiang tawh hle awm e, ti ru. Ka kal zel a, kawng sir deuhah chuan ṭhianho rual khat hian zu an lo thli kerh kerh a. An ṭit hmel dak a. A piah leh deuhah chuan car hi a lo ding a. Tukverh a inkhar phui vek a. A car pum chu a nghing leh lat lat ṭhin a. "Aww" ka ti rilru a. Thil nuihzatthlak deuh ka ngaihtuah a. Ka pan hnai a, car tukverh darthlalang chu ka kik ta thut a. Mi nung ka ni tawh lo na a, ka thawm chu a la hriat theih a ni ang. Nula chunga mipa bawk vung chu a rawn hawi chhuak a. Ka hmel lan dan chu ka inhre mai bik lo a, a mak viau pawh a ni ang, a hmel chu a dang nghal sawp sawp a. Ka kalsan zui leh nghal a. Keimah chuan ka nui vur vur a. Engtin tak chuan sawi zui ang maw ka ti a.

A piah leh kawng kawiah chuan tleirawl rual hian car tape an lo play a. An lo lam su nghawng nghawng a. An sirah chuan chuan an ṭhiannu chu a lo ṭhu sawp nuaih a. Kekawrte a lo phelh tawh a. A lo zung luang duah duah bawk a. Chutiang teh hrepa khawlaia awm te chu a nuam lo zawk a ni tih an la hre chhuak ve chek ang chu maw! Helai bawr chu rei awmna chi a nih loh hi ka ti a. Ka ngaihtuah let a. Chutiang vel chu ka khawsak ṭhin dan a ni tihte chu ka ngaihtuah ta zel a.

Veng dang ka han thleng a. In pakhat chu ka bih chak ta tlat a. Nula leh tlangval hi hi an lo awm dun a. Inbe miah loin phone an lo khawih dun a. "Aw! In va han â tak em! In phone kha khawih loin titi ula. Hlim deuhin a nuih te nui ta che u," ka ti a. In dam chhung a rei si lo. Hun hman duna khati mai maia awm chu in va â em, ka ti a. Phone khawih dun chu an hlimna ber a nih erawh chuan a ṭha vek tho mai. An ṭhenawm inah chuan thian hoin arsa hem hmin an lo ei ho a. Tlangval pakhat hi a lo titi mek a. "Painting Exhibition-ah kan kal a, ka ṭhianpa nen. Pawisa kan neih vang te, lei kan tum vangtea kal kan ni lo. Pawisa kan neih loh vang a ni mah mah zawk! Painting chu kan ngaih san vang te, kan phak ang tawka kan ngaih hlut vang te, a thlawna en theih a nih vangtein exhibitionah chuan kan kal a. Lem ziak chi hrang hrang hi a intlar thup mai a. Sakawr var lem, oil canvass painting mawi tak mai chu nula pakhat hian hmuhnawm ti takin a lo thlir a. A painting nge amah zawk chu hmuhnawm ka hre thiam lo, ka en ta reng a.

‘Mustang a nih kha’ ka ti a. Ani chuan, ‘Sakawr hi maw? Sakawr chanchin i va hre awm ve a’ a ti a. ‘Cowboy ka nia’ ka ti a, ani chu a nui a. ‘Eng nga ti nge?’ Ka tih chuan, mak tih hmel deuh hian, ‘Eng maw?’ a ti ha a, ‘Eng nga ti nge i hmel ṭhat em em a, ka ti a. A nui a... ‘Pu Hnapa ka nia’ ka ti chu, a nui ri ta hial a...." tih chu a lo sawi a. An titi ngaihsak zui loin ka kalsan leh ta a.

Chutianga mi han bih dun dun pawh chu ṭul bera ka hriat loh avangin tu in chhung mah ka bih tawh lo ang ka ti a. Thlahrang tam takte pawh hian mi in te hi bih dun dun lo se, khawvelah hian mi tam takin sawi tur an nei dawn lo a nih hi te pawh ka ti rilru a. Thlahrangte pawh hian kan nun kan uluk deuh deuh a ṭulin ka hria.

Ka tei ka tei a. Veng pakhatah chuan inchhung aṭang hian ṭhian zaho lo zai hi a lo ri chhuak ṭhat ṭhat a.

"Ka sual ka hriat chhuah fo te hian

Min ti thlaphang lo ang

An tan ka fapa a thi si

Lal Pathianinin a ti," an lo ti ṭham ṭham a.

Rorelna ni lo thleng turah chuan thlamuanna ka neih phah ta a. Isuan min dinsak ve mahna tiin ka inhnem a. Ka Lallukhum erawh a pan teh ang chu.

Dyin' ain't much of a livin'

When you're livin' on the run

Dyin' ain't much of a livin' for the young

Is it too late to ask for forgiveness

For the things that I have done

Dyin' ain't much of a livin' for the young

The desert's been a friend to me

It covers me by night