‘THUTHLUNG THAR ZIRTIRNA' THLIRNA

Mizoram Presbyterian Kohhran hian kum 1925 aṭang khan Puitling Sunday School zirlai bu hi mumal takin an nei ṭan a, kumin (2025) hi Sunday School Zirlai bu centenary a nih chu! A bu ang zawng erawh chuan, bu 101-na a ni thung. (Day chhiar pawhin a day hmasa ber chhiar ṭanin, kum zat nen a inang lo ang chiah hi a ni mai)Heng kum 100 chhung hian Thuthlung hluia mi 25, Thuthlung Thara mi 47, Thuthlung hlui leh Thuthlung Thar inkawp vawi riat, Kohhran chanchin vawi thum leh Thupui dang vawi 17 an zir tawh a ni. Ṭah hla leh Obadia tih loh chu Bible bu dang zawng chu an zir kim tawh a, tun lai nun nghawng leh tunlai harsatna chhang zawnga Bible hrilh fiahna bu ngawt lo deuh an zir chhoh zel hi he ram pawhin a mamawh lian tak a ni awm e. Chutiang mamawh chhanna chi khat deuh chu, Sunday school zirlai bu centenary kumah, 2025 hian Puitling Sunday School-ah 'THLUTHLUNG THAR ZIRTIRNA' tih an zir dawn a. Rev. Dr. LH Rawse-a ziah niin, phek 268-a chhah a ni a, copy 95000 chhut niin, ₹100 man a ni. Zir man hla tak, chhiar pawh nuam tak a niin a lang.

He lehkhabu-ah Bung/zirlai 46 a awm. Chungte chu Ṭhen riatah ṭhen a ni a, A bu chhung thu ṭhen hrang hrang leh zirlai/bung hrang hrangte kan thlir ang a, a then mal malin i han sawi chho dawn teh ang.

Ṭhen khatna chu Thuthlung Thar zirtirna chungchang tih a ni a. Hetah hian zirlai panga awm a, chungte chu: Thuthlung Thar zirtirna thuhmahruai, Thuthlung Thar zirtirna zir dan, Thuthlung Thar ziaktute khawthlir, Thuthlung Thar khawvel, Thuthlung Thar leh ringtu hmasate, tihte a ni.

A ziaktu hian Thuthlung Thar chu Pathian thu tum pumpui puan chhuahna a ni a. Chanchin ṭha bu palite hi Lal Isua chanchin leh a hnathawh ziahna bu a ni a; Bu dang zawng hi Isua nun leh hnathawh sawi fiahna anga sawi theih a ni, a ti. Thuthlung Thar Zirtirna kan zir chhoh turah hian kohhran hote mamawh phuhhruk theih dan tur hi ngaihthah theih a ni lo a ti bawk.

Ṭhen hnihna chu Thuthlung Thar leh Isua tih a ni a, hetah hian zirlai pali a awm a chungte chu: Chanchin Ṭha bu hmasa pathumten Isua an sawi dan, Johanan Isua a sawi dan, Thuthlung Thar bu dangten Isua an sawi dan, Thupuana kan hmuh Lal Isua, tihte a ni.

Chanchin ṭha bu pathumte hi Synoptic Gospel an ti a, an hawi zawng leh thuziahte a inzul a, Johana ziak hi a hrang hlak a, chuvang chuan, hetianga zirlai hranga then hi a ni.

Ṭhen thumna chu Chhandamna tih a ni a, hetah hian zirlai pali a awm a, chungte chu: Chhandamna kan mamawh chhan, Isua rawngbâwlna leh chhandamna, Tirhkohte Thiltiha chhandamna kan hmuh dan, Paulan chhandamna a sawi dan, tihte a ni.

Tirhkohte khan Lal Isua vana a lawn hnu khan thuhrilin ṭhahnemngai takin an chhuak a. Chung an thuhril lai mu chu Chhandamna thu leh Lal Isua chanchin khaikhawmna ni pah fawmin hetiang hian a sawi theih awm e. Mi thiamtena an khaikhawm dan a ni:

(1) Thuthlung Hluia hrilh lawknate chu a rawn thleng a, thutiam a famkim a, Messia a rawn thleng tawh.

(2) Nazareth Isua nunah khan hêngte hi kan hmu:

(a) Davida thlaha mi a ni;

(b) Thuhrilin Galili dung leh vang a fang a, thil ṭha a ti a, Pathian thiltihtheihna ropui tak a tar lang;

(c) Pathian ruat ang zelin an kheng bet a, a thi a;

(d) Pathian thiltihtheihnaa kaih thawh a ni.

(3) Chung thilte hriatpuitu chu kohhran hi a ni.

(4) Vanah Pa ding lama thuin chawimawi a ni a, chuta tang chuan Israel tharte Lalpa niin ro a rêl.

(5) Kohhranhoa Krista awmpuina leh ropuina chu Thlarau Thianghlimin nemin a chhinchhiah a.

(6) Khawvel rorel tur leh tung ding leh turin Isua chu a lo kal leh dawn.

(7) Chuvangin, heng thuhretute hian Isua an rina, an sualte an sim chuan ngaihdam an ni ang.

Ṭhen thumna bik chu, a ziaktu sawi hi ring chhunzawm mai ila: Chhandamna campaign-ah chuan chhandamna thu hi a lawmawm zawng leh pawmawm thei ang zawng berin ṭhahnemngai takin kan zirtir ṭhin a, chu chu tih ngei tur pawh a ni e; amaherawhchu, kan sawi tlawr lutuk thei tih hriat a ṭha. Thurin lam aṭanga kan inzirtirnaah hian kohhran humhalhna rilru a lian lo thei lo a, kan sawi fip lutuk thei bawk a. Thuthlung Tharin engtin chiah nge chhandamna thu hi min lo zirtir tih hi theological agenda pawimawh a nihna zawn aṭangin han zir ve ta ila. He lai hlawm aṭang hian hriat belh tur leh hriat sa sawh nghehna tur te, kan hriat dan he deuh kawih ngil dan te a awm zel thei awm e.

Ṭhen lina chu Ringtu nun tih a ni a, zirlai pasarih zet a awm a, chungte chu: Jerusalem Inkhâwmpui - khawngaihna dinchantirtu, Chhandamna atana Thlarau Thianghlim hnathawh, Ringtu nun ze pui, Thlarauva ṭhan lenna leh hmasawnna, Ringtute hmelma, Ringtute nun dan ṭha Isua zirtirna, Pathian duh zawng nun.

Mark Twain-a khan a tia, “Bible-a thu har pui puite hian min tibuai lo, ka zawm theih loh thu mawl te te hian min tibuai zawk a ni,” tiin. Ringtute pawh hi hetiang hian kan ni fo. Ringtu nun hi, CS Lewis-a ṭawngkam takin, ‘A harsain a har lo’ bawk a ni. A ziaktu hian a taka kan hman zui theih turte a rawn lawr a, kan ṭangkaipuiin a rinawm.

‘Hmasawn zel tumna nei lo ringtu chu a puitling thei lo. Puitling lote ziaah chuan mahni hmasialna leh mahni indah pawimawhna a lian ṭhin,’ tih te, ‘An hlawhtlinna chu khawvel chhiarkawpin a chawh chhuah hlawhtlinna a ni a, sum leh pai leh lei ropuina atanga teh hmasawnnaah an nun a tawp ṭhin,’ tih zirlai 18-naa kan hmuhte hi tun lai hun atana zirlai pawimawh leh darthlalang fiah tak a ni awm e.

Ṭhen ngana chu kohhran leh thlarau thianghlim tih a ni a, hetah hian zirlai panga a awm. Chungte chu: Kohhrana Thlarau Thianghlim hnathawh,Thlarau thilpek, Thuthlung Thar Kohhran Pathian biak dan , Thuthlung Thar Kohhran inrelbawlna, Thlarauva khah, tihte a ni.

Hemi ṭhen nganaah hi chuan, Kohhran leh Thlarau thianghlim hi a inzawm tlat a ni, tih hi vawng reng ila a ṭha awm e.

Ṭhen rukna chu Kohhran rawngbawlna tih a ni a, zirlai paruk a awm a. Chungte chu, Pathian rawngbawl, Kohhran leh huho nun, Kohhran enkawlna, Khawvêl tâna kohhran mawhphurhna, Kohhran thil serh, Kohhran hmasa lo fimkhur ṭhinnate, tihte a ni.

Tun laia khawvela Kohhran hi NGO pakhat emaw kan tih mai tawh lai hian, hemi ṭhen ruknaa zirlaite hi zirlai pawimawh tak a ni awm e. Kan Biak in chhung rawngbawlna ṭha taka kan tih piah lamah hian, ‘Biak in pawn lam hna hian rawngbawltute min nghak ṭhuap a ni,’ tih erawh theihnghilh loh a ṭha hle awm e.

Ṭhen sarihna chu, Thuthlung zirtirna-Tunlai Khawvel thlirna aṭangin tih a ni a, zirlai hi 10 zet a awm a, chungte chu: Naupang ngaihsak, Hmeichhiate dinhmun, Kristianna leh hnam nun, Mipa leh hmeichhe inlaichinna, Thil siam dangte humhalh, Hnathawh kawnga taihmak, Zirna, Mikhual leh mi châm, Rualbanlote ngaihsak, Inbiak pawh dan kawng thar, tihte a ni.

Hemi ṭhena bung hrang hrangre hi zir chakawm tak a ni hlawm a. Tunlai khawvela ringtute, kohhran hote hi harsatna hrang hrangin min nek a. Heng min nektute hi eng tin nge Thuthlung thar zirtirna atangin kan hriat thiam ang a, kan lo hmachhawn ang tihte hi rawn chhan a tum a. Ṭhen sarihnaah hi chuan contextual reading an tih ang hi kan hmu ta a ni. Zirlai pawimawh tak a ni hlawm. Zirtirtute pawh an intuaihriam leh zual a ngai awm e. Lehkhabu ṭha dang leh thuziak ṭha leh ṭangkai dang chhiar tam a ṭha ang. Hemi thuah hian, ka rilrua awm fo thin a lo awm nawn leh a, ‘Kohhran hi khawvel milin a kal tur a ni lo a, khawvel harsatna milin rawng a bawl tur a ni,’ tih hi.

‘Naupang Sunday School lam pawh kan tihchangtlun deuh deuhva, an inkhawmna te pawh tunlai thiamna hmanga kan thuam that deuh deuh a ṭul tawh hlein a lang,’ tiin a ziaktu hian a sawi a. Hei hi a pawimawh khawp mai. Kohhran lian leh member ngah deuh phei chuan rilrua neih chi a ni a. Naupang leh tleirawl zinga rawngbawlna hi ngaih pawimawh deuh deuh a ṭul hrim hrim a. Kum 2007 chho vela Ramhlun North Kohhrana Youth Fellowship enkawltu kan nih chhoh lai khan, Ramhlun North Kohhran Committee kha an inhawng em em mai a. Kan rawt ang kha min tihsak zel mai a. A hunlaia an sum sen pawh kha sang tak a ni. Investment an ti a ni ka ti mai ṭhin a, chung hunlaia Youth Fellowship-a inkhawm ṭhinte chu mi puitling tak tak, KTP hruaitu pawimawh, Bial OB thlenga han ni leh eizawnna pawimawh tak tak nei an ni chho ta hlawm. Naupang leh Tleirawl puala insen hreh lohna hi a ṭhatna a takin ka lo hmu ve tawh a ni.

Ṭhen riatna hi Pathian chhandamna thutiam famkimna tih a ni a, zirlai hi panga a awm. Chungte chu: Zâwlneite hrilh lawk Lal Krista, Retheite nghahfak Pathian ram, Chatuan nunna, Lal Isua lo pianna leh a lo kal lehna Pathian ram a ding reng dawn, tihte a ni.

Hetah hi chuan, Pathian chhandamna Lal Isua kristaa kan chan, a lo thlen famkim dan kan hmu hlawm ta thung a, kum tawp lam, Krismas hnai lam tawh a ni a, a inhmeh vel viau awm e.

He lehkhabu ziahna atan hian Rev. Dr. LH Rawsea hian, lehkhabu 43 a rawn a. Josh McDowel-a aṭanga Lalzarmawia lehkhabu ziah chenin a keu a. Mizo pa sulhnu leh hnam dang sulhnu a keu pawlh a. Hman deuha Hnam dang ziah chhiar/rawn tel ve miah lo ai kha chuan ngaih pawh a ti ṭha reng reng a ni.

Puitling Sunday School Zirlaibu ziak tur hian anmahni line chiah lo ziahtir an nei zauh zauh a, a fuh tawk lo foin a lang. ‘Thuthlung Thar zirtirna’ bu ziaktu hi chuan ama thiamna lam a ziak a. Dawrpui pro pastor a nih lai atangin ATC-ah Thuthlung Thar a zirtir tawh a. 2024 atanga Melriat Bial vawnga a chhuak tih loh chu, zirna sang zawk zirin a awm bo a, a bak zawng chu ATC-ah Thuthlung Thar zirtirna hna a thawk a ni. Amah hi thusawi leh ziah thiam a ni a. Tuna mi hi chu, zirlaibu tur a ni bawk a, ama duh ang zanin a ziak lo a, a rilrua awm leh a vei pawh a phawrh kim lo tih a hmuh theih. Chuti chuang chuan, zirlai bu ang zawng chuan kum dang ngaihtuah chuan zir a phurawm tawh hle. A bu hrim hrim pawh hi chhiar man hla tak a ni a, Presbyterian Kohhran mi ni kher lo tan pawh lei ve chi a ni. Kohhran Sunday School zirlaibute hi chu mi thiam ziak a lo ni zel bawk a, eng kohhran zirlai pawh hi chhiar a man hla viau zel.