MI SUALTE HREM ṬHINTU PATHIAN...

Kan hnamah hian thil dik lo titu tam tak an awm a. Hrem lohin an chhuak fo ṭhinte pawh a nih hmel a. Dik lo taka khawsa, kuttling loa sum lalutte hi an arpa chan laite hi kan hmu ṭhin. Chumi avang chuan, awt ve ta mai niawm takte pawh hi kan tam niin a lang.

Mi tam tak chuan, dik bik nihte, rinawm bik nihte hi fuh lo leh awmze awm loin kan hre ta hial em ni aw, tihtur te pawh a ni ta. Ei ru te, dan lo sumdawngte hi van aṭanga ṭekin a deng laite hi kan hmu châk nite hian a lang a. Mahse, hetiang hi Pathian hnathawh dan a ni kher lo. Hei hi mi tam tak buaina pawh a ni foin a lang.

Mi sual leh a dik lo zawk an din chan a, an hmuingil zawk anga a lan hi chuan dik leh rinawm hi a chakawm loh fo ang. Mahse, mi suak sualte remruat anga awm a, dik lo taka tite awt chu an huai tak tak thei lo a. An mutui thei lo a.Pathian hian ei raltu a khap sak lo reng reng. Kan ngaihtuah chian chuan kan mitin kan hmu fur ang. Tin, tute emaw ka hup tum reng rengin an khawsa a. Sum leh pai leh thil dang an thehchhuah a ṭul ṭhin. Nun nuamin an awm tak tak lo. (Sam 1-na)

Mak taka sum nei, mak taka hausa, mak taka in lian pui pui neite hi anmahni chungah eng mah thleng lote hi an fate ei tling lo, an tute lak tlak lo hi an ni deuh zel mai. Mizoramah ngei pawh hian concrete building lian deuh deuh, a neitute faten an hralh tak mai hi a tam ta hle.

Pathian hian mi sualte hi a hrem ṭhin a. Keini angin a hmanhmawh lo fo chauh niin a lang zawk. Inchhirna leh simna hun min siam sak ve ṭhin bawk. Sim lote erawh chu a hrem ṭhin ngei mai. Davida thil tawn en kha chuan, an sim pawhin an tihsual man chu an rul bawk.niin a lang. Hei hi hriat reng a ṭha. Miin thil dik lo ati a nih pawhin, a sual a kalsan ta a nih pawhin, a sual ngaih dam ni tawh mah se, leiah hian rulh tur a nei thin ngei chu a ni.

Exodus 34:7 “Mi sang tam tak chunga khawngaihna lantir ṭhin, khawlohna te, bawhchhiatna te, suahsualna te ngaidam ṭhin; thiam lova ruatte chhuah mai ngai lo; pate khawlohna avanga fa te, fate fa leh te, chhuan thumna leh chuan lina thleng pawha hrem thin chu,” tiin a puang ta a.

KOHHRAN CHANCHINBU ENKAWL:

Mizoram kohhran tam zawkah hian tualchhung kohhran chanchinbu hi kan tichhuak hial awm e. Mi tam tak chu, bangbo ang reng taka chanchinbu enkawltu chanvo chelhte pawh kan lo ni ṭhin bawk a. He lam hawi thu chhiar tur a awm hi thil ṭul ve tak pawh a ni awm e. Chuvangin, tukin chu hemi thu hi han hrut tel ila a ṭhain ka hria.

Mizorama Chanchinbu hmasa ber chu, “Mizo Chanchin Laisuih,” tih a ni a. 1898 daih khan tih chhuah a ni tawh a, kuta ziak a ni a. Chumi hnuah chuan, Mizo Leh Vai chanchin tih a lo chhuak leh a, Nov 1902 atangin, November 1941 thleng a chhuak a. Khawlchhut a ni.

Kohhran Chanchinbu hmasa ber Kristian Tlangau chu October 1911 aṭang khan a lo chhuak ṭan a. Hemi hnu hian, Sipai Tlangau (1931), Tlawmngaihna (1934) , Kohhran Beng (1947) te pawh a chhuak chho ve bawk a ni.

Kohhran malin chanchinbu a neih hi 1980 chho vel aṭanga tihchhuah a ni a. Kohhran Ṭhalai Pawlte tih chhuah a ni deuh ber a. Kar tin Chhuak emaw, thla khata vawi hnih chhuak emaw, thla tin chhuak emaw ang tein, Kohhran mal te leh pastor bialte-ah pawh kal pui a ni. Kohhran Ṭhalaite buaipui mah ni se, kohhran pum huap chanchinbu anga kalpui a ni ṭhin.

Kohhhran tam zawk hian Mizoramah chanchinbu kan lo chhuah ta a. Chanchinbu enkawl hi a hautakin taimak a ngai a, ngaihtuahna sen a ṭul. Kohhran mipuite tana thu pawimawh puanchhuahna media ṭangkai leh ṭul tak a nih avangin a enkawl tute pawh taimaka, inzir peih a ṭul a. Kohhran pumpui tana hlawk ber tur eng nge ni ang tih ngaihtuah ran chunga awm a ngai thin bawk. Inthlahdah a thiang lo. A tui lo mite tana enkawl tak tak hleih theih a ni lo a. Chutih rual chuan, enkawl tui theih a ni bawk a. Kohhran chanchinbu kan enkawl hian kan hriat reng atana ṭha ṭhenkhatte lo tarlang ila:-

1. Kohhran chanchinbu hi chu Kohhran hote kawng hrang hranga ziak hmanga chawmna tur a ni tih hriat reng tur a ni.

2. Ṭawngkam pawh a mawi leh zahawm tak, Kohhran ṭawngkam kan neih te hman hram hram tur a ni. Mizo ṭawng ziah dan dik thei ang bera ziah tur a ni a. Mizo Language Committee-in Mizo ṭawng ziah dan te pawh hi a buin an tichhuak a, chutiang chu neih ngei tum ila, chuta ṭang chuan inzir ṭhin a ṭha hle a ni.

3. Kohhran hote tana hriat tur ṭul (information) tar lan nana hman tur a ni. Tualchhung kohhran chanchinbu enkawltute chuan, Kohhran Secretary leh Pastor te biak rawn tam a, Kohhran hriat tur ṭul awm chanchinbua tihchhuah turte a awm em tihte zawtin dil ṭhin tur a ni.

4.Ram pum huap kohhran chanchinbu enkawltute pawh ṭan a ngai hle. Kohhran mipui tam berte tana sawtna tur a tling em tih ngaihtuah fo tur a ni a. Tihchhuah ve zel duhna avanga hnawh khah luih hram hram emawni le tih tur ang a ni tur a ni lo. Kohhran mite chawmna tur sermon ṭha awm sela, Lehkhabu lian leh ril zawkte chhiar pha lo kohhran mipui engemaw zah tana sawtpui tur Bible zir zauna te pawh awm thei sela a ṭha. Hmun danga tih chhuah tawh hnu emaw, kohhran mipui hriattur pawh hmun danga lo chhuah tawh emaw, hmanraw dang hmanga inhrilh theih reng emaw chu tihchhuah loh nise aṭha zawk. A bua thla tin chhuakah chuan, hlui leh mai lo tur thu chuang tam se a ṭha ber. Sawi tur a tam mai, Zoram kohhran hrang hrang chanchinbu hi ka chhiar ve ziah ṭhin a. Kohhran pakhat chanchinbu pakhat hian, hma a sawn lo em em mai. A bu hming chu sawi kher lo ila. A hmel hmang, a thu inrem dan, chei mawi dan, a chhung thu ṭhat danah pawh tun hma a pha lo, duat loh fa ang maiin, a chul ruai mai a ni. Kohhran chanchinbu te hi kan literature kengtu pawimawh tak an ni ṭhin a, ram pum huap pha te hi an ni leh zual. Hma sawn zel sela a duhawm khawp mai.

4. Sermon, Article leh thuziak dang reng reng Kohhran thurin leh Inkaihhruaina te kalh leh sawisel zawngin a ni tur a ni lo. Nangmahni’n eitur pe rawh u, tih ang deuhin thu chhuah tur ngaihtuah uluk a ṭha a. Tualchhung kohhran chanchinbu enkawltu zingah thatchhe deuh mai, Kristian Tlangau editorial lo khar chhawng ta mai maite an awm fo mai. An ti tak tak lo hle a ni. Theihtawp chhuah a ṭul a, enkawltu chanvo kan chelh ve ṭum anih chuan, tih tak taka tih ve a ṭha.

5. A layout leh design (a hmelhmang leh a thu inrem dan) fel fai leh zahawm takin tih tur a ni a. Chei par chhiai te hi tih loh a ṭha a ni.

6. Editorial chu tawi fel takin, a hun laia thil thleng leh kohhran boruak milin ziah ṭhin a ṭha. Editorial hi a thupui vuah thin a ṭha.

Entir nan: Kohhranin inkhawmpui kan dawng a nih te, Programme kan siam a nih te leh hunpui a lo thlentein chumi lam hawi chuan Editorial pawh ziah ṭhin tur a ni. Editor ni lo pawhin, Editorial hi ziah theih a ni a, chutiang a lo nih chuan, a ziaktu hming leh a nihna te tar lan tur a ni. Liana, Jt Editor tih angtein.

7. Kohhran programme hi tihsual awm miah loh tura tar lang thei turin uluk tur a ni. Kohhran Chanchinbua Kohhran mipuiten an thlir nasat ber leh an en zin ber chu Kohhran Programme a ni. Kohhran Programme a tihsual a lo awm hian, a pawi ṭhin hle a, tihsual awm lo tura fimkhur tur a ni.

8. Sawiselna dawn sawn thiam tur a ni. Thil dang zawng zawng tidik vekin, thu ṭha eltiang tichhuak mah ila, hawrawp pahnih khat chauh sawi dik lohah sawiselna kan tawng dawn a ni. Sawiselna kan tawh hian, miin kan chanchinbu an chhiar tihna a ni a, lawm zawk tur a ni. Kan sawiselna dawn tam takah hian, insiam ṭhatna leh hmasawnna tur te a tel ve ṭhin a, chung chu rilrua vawng rengin chanchinbu kan buatsaih laiin insiam ṭhain, hmasawn tum tur a ni.

9. Mi mal ngaih dan inziahna thu kan tar lang dawn a nih chuan, a ziaktu hming ngei nena tar lan ṭhin tur a ni. Chutianga tar lan a nih loh chuan, Editor ngaih dan leh thuziak anga ngaih a ni ṭhin. A ziaktute an mawhphurhna a ni tih hi tih lan a ṭul ṭhin.

10. Editorial Board kan nih angin, thu chhuah tur a lo lut a nih pawhin, kohhran tana chhiar tura him leh mawiin, a chunga kan sawi takte hre reng khian siam rem a, siam danglam ṭhin tur a ni.

11. Chanchinbua kan thawhpui te leh kan rawngbawlpui te nena kan inkarah pawh inlaichinna ṭha siam tum tur a ni a, rawngbawlna peng danga kan rawngbawlpui te nen pawh inlaichinna ṭha siam tur a ni.

12. Tualchhung kohhran tana thu ṭangkai, Information, Rawngbawlna Programme leh sermon ṭha te ngaih pawimawh tur a ni.