PRIVACY

Supreme Court of India chuan kum 2017 khan ‘Right to Privacy hi Fundamental rights, a ni e,’ tiin thu a ti tlu a. Hemi nghawng zelah hian homosexuality pawh dan anga hrem theih a ni tawh lo e, tiin an puang zui ta bawk a nih kha. Right to Privacy chungchang hrim hrim hi vawiina kan sawi tum a ni lo a, mahni ‘privacy’ vawn him leh inpho lan dan chin tawk neih chungchang thu hi kan sawi dawn a ni. Right to Privacy pawh hi kan privacy kan vawn ṭhat loh chuan, a hlut dan a chuti lutuk lo ve thei tlat a. Kan privacy kan vawng hle chunga miin min pho lan luihsak ṭalh a nih erawh chuan, a dan a dang leh thung ang.

Privacy han tih chuan,kan mi mal nun, kan mi mal thil, vantlangin min lo hriat sak kher ṭhin loh leh min hriatsak kher ṭul lo thilte pawh a ni ang, chutiang chu a ni ṭhin a. Social Media khawvelah hi chuan, kan mi mal nun leh kan mi mal thil hi kan veng uluk lo a ni mai lo a, kan pho lang nasa ta ṭhin a. Mahni mi mal nun leh mi mal thil pho lan hi a ṭha lo ngawt bik lo a, pho lan chin tawk erawh neih a ṭhain a ṭul tak zet mai. Mi dang privacy va zah sak te pawh hi a ṭul ve ṭhin bawk a. Mi tam takin kan mi mal nun kan ven uluk lohna rah hian, cyber bullying a thlen fo ṭhin bawk. Miin a mi mal nun a lo pho lang nasa a nih pawhin, cyber bullying tawh erawh a phu chuang kher lo. A titute an dik chuang lo. Mi a nun dan tur nia kan hriat anga a nun loh avanga social mediaa kan beih leh sawi chhiatna hi, kan tihtur a ni vek bik kher lo a, thil dik lo tak tituah pawh kan chhuak fo zawk a ni.

Khawvel mi lar eng emaw zah hian, an mi mal nun chu an ulukin an veng ṭha em em mai a. Social Media account nei miah lote, vantlang mit hmuha an talent an pho chhuah bak pho chhuak lo te an awm nawk mai. Chung zingah chuan Manchester City Midfielder Rodri-a hi a chanchin hi a ngaihnawm ka ti khawp mai. Football-a khelhna pawnah lo hi chuan a lang sar lo khawp mai bawk.

Manchester city leh spain midfielder Rodriguez Hernandez, Rodri tia an koh hi footballer tha leh danglam tak mai a ni a. Footballa a hlawhtlin chhoh hnu pawha a mize danglam chuang reng reng lo a ni.

a) Publicity angaina lo a. Social Media account pakhat mah a nei lo. Ngaihzawng pawh hi a nei ve ngei a ni awm e, a ngaihzawng hi an hre lar lo hle thung.

b) Manchester City -a a khelh hma hian Villareal leh Athletico Madrid-a a khel thin a. Tunlaia Aizawla tawngkam lar tak hmanga sawi dawn chuan 'Madrid mihlun thlah' a ni. An chhungkua hi madrid chhungkaw hlun an ni. Amah phei chuan, 'Madrid mi hlun thlah' a inti lem lo!

c) A pain zirna a ngaina em em a. Amah pawhin a ngaina chhunzawm ve a. University-ah Business studies and economics Major a la a. Athletico Madrid-a a khelh lai phei chuan footballer lar tak ni tawh si kha, university hostel-ah a khawsa ve mai. Class pakhat mah ṭhulh a duh lo a. Class a ṭhulh ta miah lo nghe nghe a ni awm e. ‘Football-a kan dinhmun tur a hriat loh a,’ tia zir ṭang ṭang a ni a. Football khelh hun chhung hi a rei lem loh avangin, Football chauh loh thiam a tum em em a ni.

Lehkha chhiar leh lehkha zir a ngai pawimawh a. Football training period dawn pawhin zirlaibu/lehkhabu a keng zel. European U-21 championship an khelh dawn hnaihah pawh Marca chanchinbuin an interview a. A kut lehlamin ball a keng a. Lehlamin lehkhabu a lo zakzeh a ni.

d) Hun rei fe second hand car a khalh. Car thar a lei duh lawk lo a ni. Rodri hian a tia lawm, "Engnga ti nge maw car nalh pui pui man to tak tak hi an lei mai ni. Hmun A aṭanga hmun B a min hruai thlengtu mai a ni a " a ti.

NCIS Procedural series-a Leroy Jethro Goibbs-a lema chang Mark Harmon-a hi mahni mi mal nun pho lang lutuk lo chi a ni a. A nupui pawh film chang thiam tho a ni a. Mipui vantlang hmuh pawh hian an inlan mang lo. Kum 1987 khan an innei tawh a, nupa hlim tak an ni a. An thiltihah chuan an hlawhtling em em tho. Chuvangin, social media hmangtea kan inpho lan hian inpho lan chin neih a, thup chin neih thiam a pawimawh em em a ni. Mark Harmon-a pa hi American Football star lar Tom Harmon-a a ni a, Heissman Tropphy dawng pha a ni. A nu pawh Actress a ni. Harmon-a hian a nu leh pate hi mi lar an ni tih a hre har hle! Tiang khawp chuan, a nu leh pa aṭangin mi mal nun ven himna, Privacy vawn ṭhatna hmunah a lo sei lian a. Ani pawhin a chhunzawm ve ta zel a ni. A lar loh phah lo a, a hlawhtlin loh phah lo bawk.

Oscar vawi thum dawng tawh Sir Daniel Day Lewis-a hi mi langsarah chuan, mahni privacy vawng him ber a ni pha hial mai thei a ni. A ni pawh thlahtu aṭanga mi ropui an ni a. A pa hi Irish Poet ropui Cecil Day-Lewis, Poet laurate ṭhin kha a ni. Lemchan lamah heti khawp hian hlawhtling mah se, Daniel Day Lewis-a hian a mi mal nun chu a pho chhuak ngai lo a. An chhungkua hian Ireland rama thingtlang khaw te tak te mai, Wicklow khuaah an khawsa daih nghe nghe a ni.

Tun laiah chuan, social media avangin thup nei mang loin kan khawsa a. Kan che vel engkim mai kan pho lang a. Kan mi mal nun, kan chhungkaw thil, kan thil neih thar leh kan pindan chhungril thlengin kan pho lang ta a. Mi tam takin a nghawng ṭha lo an tuar a. An routine thlenga an pho lan avanga rukruin an in an lo rawk zawng zawng nen a thleng tawh a ni.

Thil thleng zawng zawngah ngaih dan kan lo nei a, rawtna kan lo siam a, kan pho chhuak a. Kan hriat chian mang loh thlengin kan chai a, kan dem a. Rilru sa hut neiin kan phu suau suau ta emaw tih tur a ni a. Kan thil thar neih zawng zawng zawng nen miin an lo hmu a. Keimahniah hian, a bak chuang awm lo thlengin kan phawrh a, a nihna takah chuan kan hlutna te pawh kan hloh a ni.

Privacy vawn him ṭhatna te hetiang hian han sawi chhunzawm ta ila:

1. Kan ‘privacy’ kan vawn ṭhat chuan, mi tam tak buaina ṭhin, ‘Mi dang ngaih dan’-ah buaina tur a awm dawn lo a, rilru kamtu tam tak hi a bo dawn a ni. Mi tlem thei ang berin i mi mal nun, i mi mal ngaih dan an hriat chuan, i thutlukna siam leh i thiltih te sawi fiah i mamawh tlem dawn a ni. Chhungril hahdamna thuk zawk i nei thei ang.

2. Mi tlemtein i lawmna, i harsatna, i hlawhtlinna thlenga an hriatpui che hian, i hahdam daih zawk a. Rilru paukhau zawk i nei thei ang a, mala awm i thiam zawk dawn bawk a ni. Pawn lam mi, mi dang pawmpuina i mamawh tlem poh leh stress/anxiety i nei tlem ang.

3. I nih tum, i tih tum, i thlen tum lam pana ngawi renga i kal ṭauh ṭauh khan, pawt buaitu che an tlem zawk bawk a, i seh ngai i seh ngar ngar thei ang. I kawng zawh tibuaitu an tlem ang a, i tum ram i thleng thei zawk ang.

4. I mi mal nun, in chhungkaw bil nun i vawn ṭhat chuan, ṭul loa lo teh sektu che, an thurawn pawh i lak ngai loh turte leh i hriat ngai reng reng loh ten an sawiselna tur che, an lo ‘judge’-na tur che a tlem dawn a ni.

5. Eng tik emaw lai khan, hlimna daih rei chungchang zir chianna hi an nei a. Chuta an hmuh chhuah chu, mahni privacy vawng ṭhate hlimna hi a tak zawk a, an hlimna pawhin a daih rei zawk tih a ni.

6. Mi tlemtein i mi mal leh chhung ril nun leh ngaihtuahna an hriatpui che hian inlaichinna nghet leh awmze nei thuk zawk i nei thei ang.

7. I privacy i vawn ṭhat hian, i duh angin i nun i thlak danglam thei zawk ang. I mi mal nun i vawn ṭhat a, i privacy i vawn him hrim hrim chuan, miin an sawi dan tur che leh an hriat dan che i thu nun thei zawk vawk ang.

8. I privacy i vawn ṭhat hian i mi mal nun leh i hna te i kal kawp tir thei zawk ang.

9. Online-a kan inpho lan nasat lutuk hi a him lo a. Miin kan lem an chan theih phah fo zawk a. Tin, bum pawh kan awl sawt zawk a ni. Keimahni kaihhnawih information leh data pawimawhte hi kan lo pho lang fo zawk a, min tihbuaina tur hman rua kan sem chhuak fo a ni.

10. Mahni nun bihlet duh pawhin a awl zawk a, mi dang sawi bengchheng tel loa mahni inhriat thiamna neiin, kan nihna tak tak kan nung chhuak thei zawk ang.

Privacy vawn him kan sawi a. Mahni kalna kawnga mi langsar kan sawite pawh khian chhan neiin an mi mal nun vawn him an thlang a. Rilru hahdamna an duh a ni. A takah leh online-a bawhbuai rengnain rilru leh taksa lama mi tam tak a nghawng dan an hria a, chu chu pumpelh an duh a ni. Interview an hmachhawn ngai lo a ni lo a, interview an hmachhawn sek duh lo thung a. Mizoramah pawh mi kan tlem si a, lang tam deuh chu tihsual, sawi sual leh chet sual a awm fo. Kan in nuih leh ṭhin si! Privacy vawn him hian, nun hahdam leh nun reh neih a awl zawk a. Tin, tunlaiah hian ka zir ṭul deuh chu, mahni a awm, nun mal tlat neih thiam a ni. Nun mal tlat neih thiam lohna hian kawng dik lo min zawhtir ta fo a. kan inzir thar leh a ṭul awm e.

Bible thu pahnih hmang hian, kan thu i han khar dawn teh ang:

Tu pawh a kâ leh a lei vêng ṭha chuan Manganna lakah a nunna a vêng ṭha a ni. - Thufingte 21:23

Nang erawh chu i ṭawngṭaiin, i pindan chhûngrilah lût la, i kawng khâr la, i Pa a rûka awm hnênah chuan ṭawngṭai rawh; tichuan, i Pa a rûka hmu ṭhîntu chuan a rûl ang che. - Matthaia 6:6

Vawiin hun hman nuam vek ule.