NUNA THIL HLU BER CHU

Tunlai Khawvel hi chu, mahni inhmangaihna khawvel a ni a. A nawi berte thleng hian, kan duh dan leh duhzawng hi khawvelin min pein, min tih hlawhtlinsak turah kan ngai hi a ni ber mai. Ropui te, lar te, lansarh te, hausak te, thuneih te kan duh a, chung kan duh te chu daih rei lo tur mah ni se, tun hun chauh kan thlir avangin, a neih dan dik leh zahawm pawh ngaihtuah loin kan umin kan ban ruak ruak ṭhin.

Thlirna kawng khat atanga thlir chuan, Mihringin hlawhtlinna sang tak neia nun chenin a awma, thlirna danga thlirin, a nun dan chu, “nun chhan tlak hlawl lo” tling thei si a awm thei. Lal Isuan, Marka 8:36 a a zawhna zawh ber chu, “Mihring nunah hian eng thilte nge i ngaih hlut ber le?” tih hi a ni deuh ber mai. Ngaih hlut loh tur lo ngaih hlut ngar ngar a, a tlai tawh deuh hnua a ni lo zawk kan lo ngaihhlu thin a ni tih hriat chhuah leh si hi thil awm thei a ni.

Ngaih hlut tur dik kan ngaih hlut chuan, nun dan kan thiam dawn a. Kan buaina tam takah hian kan buai dawn lo a ni. Ngaih hlut tur dik lo zawk kan lo ngaih hlut ṭhin dan chu hetiang hian i lo thlir teh ang:-

Zahawmna aia Hlawkna: Mi tam tak chuan, hlawkna duhin, mahni zahawmna an hralh fo mai. Thufingte-a kan hmuh, “Sum tam tak aiin hming ṭhat hi thlan zawk tur a ni” tih kha a dik nawn zel.

Khawvel hausakna thil miin a duhin, neih a tum a, a neih danah chuan pawisak a nei lo fo. He khawvel hi chu, dik mang loa tiha hlawk theihna tur kawnga thlemna hlira khat hi a ni deuh ber. Dan lo angin han ti ve zeuh ila, hlawkna lo luan luhna remchang a tam ṭhin. George Mc Donald-a khan, a lehkhabu pakhatah, Puan zuar pakhat, a kut zungpui hmang ṭangkaia teh tling lo ziah chanchin a ziak. Khatiang Puan zuar ang chi deuh pawh kha kan ramah hian kan tam mai.

Engtikah emaw chuan, He zawhna hi kan chhan a la ngai dawn, “Pathian mithmuhah, ‘Kan nun Balance sheet hi eng ang chiahin nge a lan? ” tih hi. Pathian hi auditor ropui ber, mi tinin hun tawpa kan la hmachhawn tur a ni. Pathianin min audit hunah, remarks tur a ṭha lo lam a ngah viau ang tih a hlauhawm khawp mai.

Tunlaiah chuan, dik leh dik loa hlawkna leh hamṭhatna chang tur chuan, tih hreh kan nei lo a. Insumkarna kan nei lo a. Pawisak lah kan nei hek lo. Mi dangin an hriat loh tihte chu sawi loh, mi zawng zawngin hre dawn pawh ni se, kan hlawk dawn chuan, hamṭhatna kan hmuhna a nih dawn chuan, chutiang chu kan pawisa ta reng reng lo.

Hetiang hlawkna leh hamṭhatna erawh hi chuan a daih rei lo a, Rilru nawmna tak tak a thlen lo bawk . Hahdam tak leh thlamuang taka awm kan duh chuan, rinawm taka awm mai hi a ṭha ber mai a ni. Rilru hahdam taka awm theihna chu, rinawm taka awm hi a ni. Mi dangin hre lo mah se, a ruka thiltih hi mahniin kan hre reng a. Zawi zawiin keimahni min ei chhe tho tho a ni.

Nun dan leh ngaih dan nghet dah ṭhaa lar khelh:Principle nghet cherh chawrh nei lo, nun dan nghet leh zahawm zawng vuan loa, lar khel ta ngawt mai hi Mizo ṭhalai zingah hian an pung ta hluai emaw tih tur a ni ta. Social Media vangte pawh a ni ang Mi pawhin an hre ta ngei a. An nuih luih luih te, an nuih tet tet te, an nuih ruk vak vak te hi an tam takzia chu kan hre vek awm e.

Social Mediaa lar khel ngang ngang mai, saruak deuh thawa thla laa post chite, mahni leh chhungkua mualpho ta vak te, thu eng eng emaw post chi te, beih dan chi hrang hranga beia lar tum ngang ngang mai hi kan society pawh hian kan ngah ta hle. Chutiang hohzia chu kan ngaihtuah ngai lo. Hlawkna a awm lo a. Hlawkna awm pawh ni se, a hlu lo a, a zahawm lo.

Pa ngaihsam tak, mi dang ngaih dan ṭawm ve mai, mi awm anga awm ve mai hian, buaina an tawk lo mai thei e. Principle nghet tak nei, nun dan phung mumal taka nungte hi mi tam takin an ngaina lo fo. Mizo te pawh hian, chutiang chu kan ching khawp mai.

William Shakespeare-a khan, Cadinal Ropui tak mai, Wolseley-a chu a drama pakhatah a chanchin a ziak tel ve a. England Lal Henry pariatna hunlaia mi a ni. “Ka Lalpa thu ka zawm phurna chanve ang tal pawh khan, ka Pathian thu zawmin a rawng lo bawl ila chu, Ka hmelma te mithmuhah saruak mualphoin mi siam hauh lo ang le” tiin a sawitir a ni.

Zawhna pawimawh tak, mi tinin an chhan la ngai tur chu, “Miten engtin nge an ngaih ang?” tih ni loin, “Pathianin engtin nge a ngaih ang?” tih zawk hi a ni. Keini chu, mi te ngaih danah kan buai lutuk a. Kan ni tin nun hman dan, kan mi mal nun a ni emaw, kan eizawnna a ni emaw, kan rawngbawlna a ni emaw mi ngaih danah kan buai lutuk ṭhin a, Pathian ngaih dan tur kan ngaihtuah thleng ṭhin lo a, nun kawng hrang hrangah hian kan tisual ṭhin. Khawtlang rorelna, Sawrkar rorelna, Kohhran rorelnaah pawh hian, mi ngaih dan tur hi kan chhut nasa lutuk em a tih theih. “Mihring tih lawm tum ni ila, Lalpa rawngbawl ka ni ang em ni?” Tirhkohin a tih kha, a pawimawh nawn fo ang.

Thil daih reilo leh Tlawm zawk, awlsam zawk duhin, Thil daih rei leh tlo zawk, hlu zawk kan hlamchhiahin kan kalsan fo mai bawk. Hun rei daih tur aiin, a awlsam zawk te kan zawng ṭhin a. Thil tlo leh daih rei chu, beih tang tangte a lo ngai thin a, kan peih lo a. Thil Cheap deuh deuhah kan duhtawkin, kan duhna te kan ti hlawhtling fo mai. Hlawhtlin thuai duhna vangin, hlawhtlinna leh hlawkna daih rei lo zawk hi kan vuan fo. A lo awlsam zawk zel bawk a. Lehkhabu ziaktu pawhin, a kutchhuak ropui tak ni thei tur ziaha beih aiin, tun dinhmuna hlawkna leh hlawhtlinna a thlang zawk thei fo. Musician pawhin, a hun laia mite lawm zawng daih rei lo zawk siam chhuah a thlang zawk fo- kum tam tak daih theih kutchhuak nei thei a nih laiin.

Miin, hlawh a hmuh tamna leh hahdamna a hmuh tamna tur zawk chu, a mihringpui tam zawkte tana a ṭangkai tam theihna tur hna aiin a thlang zawk fo. Miin a damchhung hunah thil ho te te buaipuiin, thil lian zawk a chan phah fo a ni. Kan thil buaipui em em tam tak hi, tlawm leh nawite te daih rei lo tak tak a ni ṭhin. Mizo Thalaite hi kan ‘Priority’ set thiam loh vangin, ngaih pawimawh tur zawk kan ngai pawimawh ṭhin loh a, kan buai lohna turah hian kan buai nasat pha hle a ni. Krista zara kan chan ve ngei tur hi kan ch^n fo a ni.

Kan zu heh dan te, kan zuk leh hmuam tih nasat dan te, Kan drugs tih nasat dan te, kan hur tak lutuk dan te hi a manganthlak tak zet a. A manganthlak tak zet a ni tih ngaihtuah pha lo hi a tam zawk kan la ni leh si ang. Kan tih ve loh avanga kan buaina ni loa hre tlat hi kan la awm ve leh zel bawk a.

Mizo te hian, chhungkua te, Chhungkaw inenkawlna leh kaihhruaina leh, fa enkawl leh inlaichinna te hi kan hlamchhiah viau. Mizo te zingah ṭhalai, mahni in nuam ti lo an tam hle. Nupa nun hlim lo leh buai, inṭhen pawh a tam hle mai. Kan chhungkaw nun buai vanga Police Station thleng ta nawlh nawlh fo te. Chu chu mi mal leh kan society pawhin a tuar a ni. He lamah kawngah hian mi tam tak an harh ṭan tawh a. A chhan chu eng pawh ni se, kan chhungkua, kan nupa leh a kaihhnawihte aia ngaih pawimawh kan neih vang a ni fo mai tih chu a chiang lutuk. Lansarh kan duhna te, dinhmun ṭha kan khelhna te, sum leh pai kan zawnna te hian min tibuai a, kan chhungkua a tichhia a, kan hlimna min laksak ṭhin. Heng zawng zawng hi hlimna duha kan tih a ni tho si. Zawn leh neih tuma beih thiang lo a ni lo a, Sum leh pai zawn leh neih tumte hi a dik lo pawh a ni lo. Kan tih dan dik se, hlamchhiah bik nei lo ila, ngaih pawimawh tur ngai pawimawh tel ila. Hlimna kan zawn ṭhin hi, kan zawn dan a dik loh avangin hlimna hmu lek loin dam chhung hun a hman ral theih.

Tun huna kan duhna tihlawhtling tur hian, hun rei zawk leh chatuana kan lawmna tur thil hi kan paih bo zawk fo a ni. Chatuana lawmna tur hi, tuna nawmna nen kan thleng phal fo mai. Chatuan Eng aṭanga thil thlir ṭhin hi chu ni ila, Mihring nuna kan tihsual tam tak hi kan tisual lo ang. Thil tam tak tuna nuam leh hlimawm hi, hun rei zawk atana hrehawm leh lungngaihna min thlen tu a ni ṭhin. Nakkum chu sawi loh, kar leh lawk emaw, naktuk emaw maia kan lung ti zing tur thil te hi kan buaipui fo a ni. Chatuan fiahna, Pathianin a hmuh anga thil hmu thiam tura fiahna hi fiahna ropui ber a ni.

Mosia kha, Aigupta Lal ni thei turah an ngai a. General ropui leh theihna sang nei a ni. Rei daih lo tur lalna leh thuneihna, ropuina leh hausakna ai chuan, Pathian duh dan zawm a, a kohnaa kal a thlang a ni. Mosia khan, chatuan thlir lo se chu Aigupta Lal Inah khan a tap ral mai awm e. Amaherawhchu, rei lote atana sual nawmna hlimpui ai chuan, Pathian mite nena tihduhdah tuar a thlang ta zawk a. Krista an hmuhsitna chu, Aigupta ram rote ai chuan, sum ropui zawkah a ruat a. Lawmman pek tur chu, a thlir ṭhin avangin. (Hebrai 11: 25-26)

Pathianin a thlirna ang a thil thlir thiam, Kraws eng aṭanga thil thlir ṭhin, Lal Isua hmangaihna eng aṭanga a nun bih ṭhin mi chuan, a thlarau a chan phahna tur, a nun a hloh phahna tur thilte a ti ngai lo ang.