INTAWNNA

Ruah chu a han tawh na a, ka tukverh ruahin a rawn thehnaa ruah mal cham bangte chu a la hul lo a. Pawn lamah thli a la thaw vuk vuk a. Thli thawin thir a chhem rik chu a khat tawkin a ri fawn leh hlarh ṭhin a.Kan kawmthlang kawngah chuan motor tlan thawm a awm leh zauh ṭhin a. Chu bak chu thawm dang a awm lo.

Hetiang hunah hian Ruati kha a lungleng ṭhin a nih kha.

Book Fair-ah kan intawng a. Chu chu Kum nga kaltaah khan a ni. M.A kan zir zawh hlim a ni a. Hna thawh ka la nei lo a. Lehkhabu an chhap dul te chu en en mah ila, lei theih loh tur ka awh belh mai mai a ni.

Lehkhabu ngaina mi ka ni a, ka chhiar mai loh tur pawh ka lei hram ṭhin a. Engtikah emaw ka la chhiar duh ang tih vang te leh lehkhabu thar han hum hrim hrim nuam tih vangte pawh a ni ṭhin.

Vana Pa Hall-ah Book Fair an buatsaih a, tam tak lei thei dwn lo mah ila, lehkhabu intlar thup mai thlir tur hrim hrima kal ka ni a. Banga lehkhabu intiang zui mai chu ka thlir phei dan dan a. English Classical Novel ho chu ka en kan vek a, a ṭhen chu ka chhiar tawhte a ni a, a ṭhen chu ka la chhiar lohte a ni tho a. Ka chhiar lohte pawh chu ka hne niin ka hria. Undergraduate Course-ah English Literature ka la a, a zira han zir ralah chuan Kum 100 deuh thaw kaltaa an Novel ziah te ho chu lo hneawm deuh bawk em a, melh pawh ka melh peih lo a; chutiang lehkhabu ni lo lehkhabu dang tam tak a awm bawk nen.

Ka awh deuh deuh chu lei ngam loin ka thlir a, ka keu a. Science lam lehkhabu te, Music lam lehkhabu te, Philosophy lam lehkhabu te chu ka keu a, ka bih a. Ka dah leh a.

Hmeichhe aw nem tak hian, “Eng bu nge i zawn a?” a ti a. Aw ri lo chhuahna lam chu ka han hawi a, ka dinglam sirah chuan sikul form ha, tleirawl hmelṭha deuh hi a lo ding a. “Zawn em em pwh ka nei lo...ka lei theih zat man hi a tlawm hrim hrim bawk a” ka ti a. “I nute buatsaih em ni, hei hi?” ka han ti ngawt pek a. “Ni lo e, kei pawh ka en mai mai a lawm” a ti a. Sikul ban hun a ni tawh reng reng a. A in sut leh ṭhin a, khawlum lai takin a hritlang a ni!

“Khua a lum sia, i hritlang bawk sia, a hrehawm awm” ka ti a. A nui sak a. “Kawrlum hak a ngaih phah a, a hah thlak tak tak a ni” a ti a.

Lehkhabu chu kan bih dun ta zel a, Ruskin Bond-a lehkhabu hi chhuar pakhatah chuan an lo rem dal a. Ruskin Bond-an Nature lam hawi a ziahna ho dahkhawmna a ni a. Pakhat chu a phawrh chhuak a. “The Book of nature” tih bu a ni a. Ruskin Bond-a hi, India Today ho phei cuan, “Our Very own resident Wordsworth In Prose” an tih a ni a, khuarel lam hawia a thuziak chu a ngaihnawm bik hian ka hre ṭhin a. A lehkhabu mi kawhhmuh chu khuarel lam hawi bik a ziahna ho dahkhawmna a ni. Kei pawh chuan ka lei ve ta mai bawk a. “Ka lo hawh ve dawn nia,” a ti a. “I chhiar tawh vanga min kawhhmuh emaw tia” ka tih chuan, “Chhiar bik lo e, a ngaihnawm hmel em a lawm,” a ti a.

“Ruskin Bond a hi i hre ngai hrim hrim em?”

“Hre ngai e, a lehkhabu ho hi ka pa’n a nei nual a lawm”

“I chhiar ve ṭhin a maw?”

A nui a, “Chhiar ve ṭhin e, ka ngainat zawng tak a ni” a ti a. “Nangmahni ang rual ho hian lehkha chhiar in that chhe hle sia”

“Kan ni vek hlei nem”

Lehkhabu man chu ka pe a, “Ka haw dawn e” a bulah chuan ka ti a.

“Haw rual ang, keipawh ka haw dawn a lawm” a ti a.

“Khawi vengah nge in awm a, kan haw rual ngawt thei nang”

“Kan veng a inan loh leh min thlah mai ang chu”. A hming a sawi a, Ruati tiin min ko mai a, a ti a. An veng hming te chu a sawi bawk a.

Kan inthlah ta nge nge a. Kein kan chhuk thla a. Zana thla eng mawi a tih ṭhinzia te, fur laia ruah a sur zawh chiaha khaw thiang kak mai te chuan a rilru a tih hahdam ṭhinzia te chu a sawi a. Zan reia lama ṭo thli a han thawt a, khawpui a han rik rum rum a, kawl a han phet deuh te hian hlauh a hnekin a lung a len ṭhin thute a sawi a. Amah ang rual rilru puthmang atan chuan mak ka ti deuh hlek a. Chutih rual chuan, chutiang ngaihtuahna nei mi a nih avang chuan, Ruskin Bond-a lehkha bu, ‘Book of Nature’ tihte a han thlang nalh mai chu a awm ka ti viau bawk a.

An in kan zu thleng thla a. In nuam tak mai hi a ni a, chhungkaw khawsak ṭha tak mai an ni ang tih ka ring thei a. “Lo lut ve reng reng rawh” a tih avang chuan ka lut a. A nu leh pa te an la haw lo a. Rei pawh awm loin ka hawsan ta a. Mobile Phone a nei em tih ka zawt a. A nei. A number min pe duh lo a. Ka number erawh chu a la a. Tleirawl te ni si a zia chu a mak ka ti khawp mai a. Ka haw kawngah pawh ka ngaihtuah reng a.

Kar hnih hnuah min rawn bia a. Zan rei lamah. Ruah a sur a. Khawpui a ri a. Thli a thlaw vuk vuk bawk a. A lunglen thlak a tih thu a sawi a. Lehkha zir a ngai nasa a, a ṭang a. Mark ṭha tak hmuh a duh thu a sawi a. Ruskin Bond a thawnthu pakhat Time stops at Shamli chung chang te a sawi a. Ruskin Bond a thawnthu tawi ho chuan a lung a ti leng a ni tihte a sawi a. Ruskin Bond chauh em ni i chhiar ka tih chuan “Ni lo e, ‘A brief History of Time’ te pawh ka chhiar ve vek a lawm,” a ti a. Chu lehkhabu chu kei pawhin pawl sawm pahnih ka zirlai khan Police Bazara lehkhabu dawr pakhat atangin ka lei ve tawh nghe nghe.

“Keiman ka rawn be leh ang che. Ka rawn biak leh hun aṭang che chuan min be let ve tawh ang,” a ti a. A aw ri atang chuan a nui lek lekin ka hria, keipawh ka rilruin ka nui a.

Hun a kal a. College-a kai a. Kan inbe zel a. Kan la inngaizawng ta rih lo. A graduate chho a. Kan training bo aṭangin kan inkawm uluk leh zual ta a. Mid-term break neiin July thlaah kan haw a. A pute inah a awm dawn a, chuta leng mai tur chuan min ti a. Phur takin ka kal ta a.

A pute bathlarah chuan ṭhutthleng awnah hian a lo ṭhu a. A pute inah hian thlang lam thlirna bathlar zau nuam tak mai hi a awm a, chutah chuan a lo ṭhu chhuak a. Thla en zan a ni nain, chhum a tam deuh a. Chhum chuan thla eng chu a hliah ṭhen a. Hahdam deuh hian a lo ṭhu awn diai a. Thla eng chu chhumin hliah ṭhen mah se, a la eng ṭha viau tho a. Chumi engin a hmel a chhun chu a ṭha teh kher em mai a. A bula ṭhutna awlah chuan ka ṭhu awn ve ta a. A hmel chu ka en leh a. A hmui chu fawh chak awm em em hian ka hmu a. Ka fawp ta a. Chumi thla eng hnuaia a hmel ka hmuh chu, chutiang em ema thil mawi chu ka la hmu ngai lo hialin ka hria a! Thawnthu tam tak ka rilruah a awm ṭhin a. Chumi zan aṭang erawh chuan thawnthu pakhat chauhin ka rilru a luah tawh dawn tih ka hre thiam a. Chu thawnthu erawh chuan dam chhung a daih dawn a ni.

Elvira

Elvira

My heart’s on fire for Elvira

With eyes that look like heaven

Lips like cherry wine

That girl can sure enough make my little light shine

I get a funny feelin’ up and down my spine

‘Cause I know that my Elvira’s mine