NOBODY’S CHILD

Mami haw tur ka thlah a, tih tur dang teh chiam ka hriat tawh loh avangin, Beautiful Books lehkhabu dawr, Mami nen kan in tawnna hmunah (Our Last Rendezvouz ) ka lut kual a. A ṭhenawm lawka ka khasi tṭhian pa, Firstborn Khongwir-a te inah ka peng kawi leh a. Lalnunmawia'n mi chah tlat avangin thil eng emaw hawn sak ka tum a, an zawrhna dawr lam pan chuan ka kal ta a.

Shillong hi chu ka tlangnel ve tawh a. Ke hian ka kal zung zung mai a. A hriat pawh hi ka hre hneh ve hlein, ka inhria. Sherlock Holmes-an London khawpui a hriat chian ang em em chuan ka hre chiang lo na a, keima tawkah chuan hre chiang ve tak ka ni.

Kal pah chuan thil tam tak ka ngaihtuah a. Shillongah pawh ka awm rei ve tawh hle mai. Rei lote-ah ka zirna ka zo tawh mai dawn a, eng kawng nge ka zawh chhunzawm zel ang tihte chu ka ngaihtuah pah a. Chutia eng emaw ngaihtuah a ka kal zel lai chuan, Shillong fahrah chawmna in chu ka kal tlang mek a. In hung chhung kawt laia naupang infiam ri nak nak chuan ka beng a verh riau a. Hlim taka naupang tual chai hian ka nun a tih hlim ṭhin em avangin, chung naupangte nungchan zir thlir tur chuan a hung chhungah chuan ka lut ta a.

Chutianga, naupang hlim taka ri nak nak chu, hmuhnawm ti taka ka thlir lai chuan, kil khata naupang lo ding zum reng mai, a ṭhiante pawh zawm tum lo chuan ka mit ala ta riau a. Ka va pan hnai a, engtizia a a ṭhiante zinga tel ve lo nge a nih tih chu ka zawt ta a. A aw ri hriatna lam chu a rawn hawi a, chu nau chuan eng mah a lo hmu thei hauh lo mai a. A mit khing hnih chu a lo del hi a lo ni a. A biangah chuan mittui a lo luang chhuak a, chu chuan mi hneh ngang mai.

Chu nau chuan a chanchin min hrilh ta a.

"Ka pu, tu mahin min duh ve lo. Tu nau mah ka ni lo a, tu ta mah ka ni hek lo. Ram daia pangpar ang maiin tuma ngaihsak lohin ka lo sei lian ve tawp mai a ni.

Min hmangaihtu tur nu ka nei ve lo a, lainat taka ka bianga min fawp ve tu tur nu ka duh ve ṭhin asin. Ka pa han tih tur reng reng ka nei ve lo a, pa nei ila, a nui ri te hre ve ila tiin duhthu ka sam ṭhin. Tu man min duh lo a, tu nau mah ka ni ve lo. Ka tan chuan, nun hi khawharna tur hlir a ni"

Chu nau khawngaih thlak tak chuan, a chanchin a sawi chhunzawm zel a. " Kan chen khawmna inah hian mi tam tak fa la turin an lo kal thin a. Fa nei thei lote'n an fa tur thlang turin an rawn kal thin.

Naupang hrang hrang chu min rawn en kual a, mah se, kei chu lak loh pawlah ka tel zel a. Tun thlengin he hmunah hian ka awm ta a ni. Ka thiante, heta ka seilen pui hote chu, mite'n an faah an la bo zo tawh a, kei chu hetah hian hnutchhiahin ka la awm ta zel a ni"

Chu'ng thu chuan ka thinlung chhung ril tak a luhchilh a. Thenkhatte tan chuan hringnun hi a rawng mang e maw... ka ti a ni. Chu mipa naupang chu a hmel a fel khar mai a. Kum 13 emaw lai a ni tawh a. Tual zawla naupang infiam awm khawm ho ai chuan a u deuh fe tawh a ni. A pumrua a len teh chiam loh avangin, ralkhat atang chuan naupang te takte emaw tih tur a ni reng a. Ka rin ai tak chuan a upa tawh a ni

Chu nau riangvaia chuan a chanchin chu heti hian a la sawi chhunzawm zel a.

"Fa atana lak chu min duh thin ngei ang tih chu ka hria. Mahse, ka mit a del tih an han hriat hian naupang dang an la leh thin a. Kei chu hetah hian ka la awm ta zel a ni. Chhungkua ka nei loa, heti tawp mai hi ka ni.

Hmangaihna kuta min kuahtu tur nu ka duh ve a, ka lunga chhiata, ka tah pawha min hnem thintu tur. Mahse, chutiang chu, tumah ka nei ve si lo. Engemaw chang chuan, ka khawhar lutuk chuan, thih daih maite hi ka duh rum rum thin" tia sawi pah chuan a biangah chuan mittui a lo luang chhuak ngiai ngiai a. Ka rawmawl ka phawrh a, a mittui chu ka hruk sak a, sawi tur engmah ka hre lo. Ka khawngaih lutuk chu, ka mittui a tla ve lek lek a. Ka la insum hram hram a ni.

Chu naupang chuan ka kut a vuan a, 'ti hian a sawi zawm leh a.."mahse maw ka pu, engtikah emaw chuan van kawtthlerah tual ka la chai ve ang tih ka hria. Chutah chuan, mit del zawng zawngin an hmu thei tawh ang. Chutah chuan, in ka nei a. Nauapang dang dangte ang bawkin chu inah chuan ka cheng ve tawh dawn tih ka hrai a sin" a tih chuan ka mittui a ti tla tak tak a.

Ka rilruah chuan, Cathedral Quartet ho hla sak ṭhin, 'Halleluiah Square' tih kha a lo lang a. 'Mitdel ka hmu a, kal hlei thei lo. Chu chuan ka mittui a ko chhuak a. Ṭhianpa, i hmu thei loa ni maw ka ti a. A ni chuan nui chunga mi chhangin, 'vanah ka ṭhiante zawng zawng ka hmu ve anga, hlim takin kan hun kan la hmang ho dawn a ni' a tih te a nih kha.

Remdeption Singers khan Mizo ṭawnga siam (Lehlin chu a ni chiah si lo a ni),

“Mitdel kan awm ṭhin

Hringfa zingah

Thil siam mawina eng mah reng hmu loin

Kawng chhuk chhoah ṭanpuitu kan ngai e

Mahse lawmna thuruk Lal Isuan min pe

Lenrual lungduhte kimna khawpui mawiah

Aw hun lawmawm leh nuam a lo thleng thuai dawn

Lal Isua chawimawiin fak hla kan sa ang

Mitdel awm tawh lohna ram Angelte lennaah,” tih a ni a. The Sun Beams-in an sak leh sak loh ka chiang ngam ta lo.

Chu mipa naupang mitdelah hmelah chuan, Pathian ka hmu a. Amah chu khawngaih em em mah ila, tih theih ka nei si lo. Chu khasi naupang mitdel chuan, kei aiin Pathian a ring a, ka rinna aiin a rinna pawh chua ropui zawk a ni tih ka hria. A nun khawhar tak atanga hmalam hun a thlir theihna chu a ropui a, naupang mitdel, tu ma duh loh hnen aṭang chuan zirlai ka zir chhuak a ni.

A tan tih theih ka nei lo lutuk chu pawi ka ti hle. Ka sana ka en a, chawhnu lam dar hnih a lo ri tawh a. PB ka thlen thlak vat a ṭul tawh a ni. Dar 3 Umbir Bus ka nan ngei ngei a ngai a. A nih loh chuan, Taxi lak a ngai dawn a ni. Taxi ka lak chuan a thla tluana sum nei loa khawsak chhunzawm a ngai dawn a, ka peih hauh si lo. Pawisa hmang mang loa khawsa tur chuan Laltea te ang kan nih a ṭul. A chhungten pawisa an thawn a, a hmang bang nasa lutuk a, a thawn let leh!

Chu naupang bian lu chu ka chul sak a, "Vanah kan inhmu leh dawn nia. Chutah chuan, ka hmel i hmu thei tawh ang," ka ti a. Ani chuan,"Ka pu, nizana ka mumangah tu emawni hian, vantirhkohin a rawn tlawh dawn che tih min hrilh a. Nangmah hi Pathian vantirhkoh i ni tih ka hria asin. Pathian hnenah ka hlim hle tih min lo hrilh sak la, engtik emawah ka lo la hawng ve ang," a ti ta reuh a. A hmel chu ka en nawn leh a, ka biangah chuan mittui a luang nawn leh a. Hmanhmawh takin chulai hmun chu ka chhuahsan ta a.