ACADEMY AWARD LEH REVD. DR. CHUAUṬHUAMA 1

Mizo Academy of Letters chuan kum thum dana a pek ṭhin, Academy Award chu a dawng turin Rev.Dr. Chuauṭhuama (L) a thlang a, November 29, 2025 khan chhungte hnenah hlan a ni. Revd. Chuaṭhuama hi dawngtu zinga 15-na a ni. He Award hi award hlu tak mai a ni a. Damlai leh thi tawhte hnena hlan theih a ni a, a dawng turte hian an dawn dawn hnaihah chauh an dawng dawn tih an inhre chauh ṭhin a ni. Mahni in-nominate ve a ngai lo a, mi dang nominate pawh a ngai lo . A thlangtu committee-in uluk takin a ngaihtuah hnuah, MAL Executive Council-ah a chhawp chhuak a, EC-in a pawmpui hnuah dawng tura thlan fel an ni a, a lawmmana thuziak (Citation) pawh EC meeting-in a hranpain a ngaihtuah leh thlap ṭhin a ni.

Revd. Dr. Chuauṭhuama kha eng ang mi nge a nih chiah le? A sulhnute hi kan hnam tana eng ang hlu nge a nih? Huai taka thuziak leh sawi ṭhin hmuhin kan hmu ṭhup a, chumi piah lama Chuauṭhuama chu tu nge a nih chiah? Mizo Academy of Letters hian eng vangin nge Academy Award hial an pek le?

Hemi kan sawi hma hian Academy Award dawng tura thlan thuah, MAL danpui chuan a thlan dan tura kaihhruaina a duang a, chumi chu han la chhuak lawk ila:

“He Award hi kum thum dana pek tur a ni a, mi pakhatin dawn nawn theih a ni lo.

He Award hi damlai leh a thlan kum bituk, kum thum huam chhunga thi tate hnenah pek tur/pek theih a ni ang.

He Award hi mi mal kutchhuak zawng zawng thlira pek ṭhin tur a ni.

Hla phuah (sak leh hril/chham chi reng reng) baka talent dang nei - zai, lam, rimawi tum, lem chan, lem ziak leh thu sawi thiamte chu an dinhmun inangah duhsak bik theih an ni ang.

He award thlan nan hian lehkhabu chhuak tawhte uluk taka thlir a ni ang.

Thu ziak thlur hrang hrang thlir turte chu - Literature, Language , Culture, Theology, Music, Arts, Social Sciences, Journalism and other writings tih a ni.

A kutchhuak ṭhuang (genre)-ah sulsutu, hmahruaitu, mi dang chawk thotu a nih dan .

Ziaktu/ziak mi dang aia a chungchuanna leh thiam bikna a neih te en tur a ni.”

Revd. Chuauṭhuama kha kan hnam tana a hlutna em em mai chu, mipui nawlpui ban phakah Theology a chhawp chhuak a. Chik taka Pathian thu ngaihtuah thei turin Mipui nawlpui rilru a chher hi a ni. Chung chu a lehkhabu eng emaw zatah kan hmu a. 2002 Nilai Thupui a ziah phei chu hal an awm a. Khami kumah erawh kha chuan Nilai zan inkhawm tam zan leh ram pum huapa Presbyterian kohhranin an tuipui ber kum a ni hial ang. Tun ang huna ziah ni se chu tu man an hal tawh lo tawpin a rinawm. Pathian thu ngaihtuahna thuk zawka ngaihtuah turin Mizo mipuite min nawrkal tak zet a ni. A lehkhabu dang, Isua Tuallenna Ram tih leh Bible zir nan –Thupui 80 tihte chu lehkhabu ṭha a tling. Pathian thu zir zauna lam hi Vanglainia a column-ah vawi tam tak a ziak bawk. Amah avang hian Mizoten Pathian thu fim takin kan ngaihtuah phah a, a nawlpuiin kan pulpit tlang sermon thlengin a nghawng a, kan hnam nun leh Pathian thu ngaihtuah danah awmze thuk tak a nei. Theological Education-a a ṭhahnemngaihna hi a ropui. Ani tluka mipui mimir tana mahni thiamna sem chhuak hnem hi an tam lo ang. Theology lama mipui ban phaka thuziak chhawp kawngah a hmahruaitu leh thawhhlawk eltiang a ni a, mi tam tak a tihphurin a tihhmuh a, ama hnungzui hian theologian dang tam takin lehkhabu ṭha tak tak an rawn ziak ta zel a, kan hnam tan thil hlu tak tak kan lo nei pung ta zel a ni.

Phek 1282 zeta chhah Zoṭawng Bible Dictionary a buatsaih a. Bible dictionary bu mal (one Volume Bible Dictionary)-ah chuan khawvela thumal fun hnem berah mi thiamte chuan an chhal a. Christian Media Society chuan, 2011 Book Award a hlan nghe nghe a. Senate of Serampore-in DD- an pekna chhan an ziahah pawh, “Magisterial book” tiin an sawi hial nghe nghe a ni. Hei ringawt pawh hi Mizo hnam rohlu a tling a, Academy Award pekna tham a ni thei hial ang chu. Bible Thumal hrilhfiahna (Christian Media Society 2008 Book Award) tih leh Mizo Bible Encyclopedia a buatsaih bawk. Hengte hi Mizo ṭawnga kan la neih ngai loh leh mi mal tana buatsaih harsa tak a ni. Dictionary of theological terms ATC-in an buatsaihah convener niin, a bu an han buaipui tak tak chuan, Managing Editor a ni a, First Edition-a ziaktute thuziak kha a edit vek bawk a ni.

Literary Criticism huang chhungah Biblical Criticism-a tilar a. Mizo Literature -a hemi kawnga sulsutu a ni. Anni leh Kei, Chinbawr, Bible Code thlirna, Chinbawr, Ka kal zel dawn tihte hi Literary Criticism huang chhunga khung tur lehkhabu a ni. Critic pawimawh tak a nihna hi Mizo Literature chanchin zir leh ziaktute chuan an rawn hrut fuh chho ve tawh turah ngai ang.

Social Critic ropui tak mai a ni a. Vanglainia a column-ah pawh he lam hawi hi a ziak tam hle. Bible zir zauna lam hawi leh kohhran lama ziak ṭhin tih loh kha chu social Criticism lam zel a ni a. Hemi kawnga Mizo Thu leh Hla tihausatu pawimawh tak hi a ni a. Vanglainia a column te hi a hnuah a buin a tichhuak a, bu 2 lai a tichhuak nghe nghe a ni. 2013-2023 inkarah khan article 520 vel zet a ziak hman a ni. Vanglainia columnist- a nihna kha Senate of Serampore chuan, DD an hlan chhan thuziakah pawh an tar lang tel nghe nghe a ni.

Social Criticism-ah hian Rev. Dr. Chuauṭhuama nuna mi dang daih kan hmu a. Zirna (Scholarship) kawnga mi inhawng, ngaih dan thar dawng thei leh insiam rem thei em em a nih laiin, mi mal leh kan hnam nun danah erawh chuan a duh uluk em em a. A fimkhur a. A huai bawk a. Ngaih dan conservative, Nun liberal hi a ṭha lo te pawh a ti ṭhin. Eng thil pawimawh emaw thleng se la, a ngaih dan kan ngai chang a. Rilru leh khawsak dan lama thil dik lo langsar a awmin Revd. Chuauṭhuama kan thlir ṭhup ṭhin.

ATC hian Didakhe Chanchinbu a tichhuak a. Mizo ṭawng Theological Journal awm chhun a tih theih ang chu, kum 50 chuang a chhuak tawh a. ATC-a dinhmun pawimawh tak, Registrar chelh chungin kum 5 ½ chhung Didakhe Editor hi a ni. Didakhe hi Theological Journal chhuanawm tak a tling. MAL Journal “Thu leh Hla” pawh a thih thlengin a enkawl. Kum 74 zet a nih hnua Thu leh Hla editor a han ni leh te hian MAL a ngaih hlutzia te leh Mizo literature tana a ṭhahnemngaihna a tar lang awm e. Heng journal hlu tak mai pahnih enkawltu a han ni te hi a chhinchhiah tlak hle a ni. Synod- aiawha ATC-in a buaipui “Presbyterian review Journal”-ah Editorial Board member a ni ṭhin bawk.

Lehkhabu hi a dam chhungin, ama puala ziah hi 59 a nei hman a. Heng zinga pakhat Ka Zirna Ram chu 2006 Book of The Year Top 3 zingah a tel a ni. Mi dang nena buatsaih leh endiksak hi 17 a nei bawk a. A damlaia a lo peih fel hman lehkhabu pahnih chu a thih hnuah tihchhuah leh tawh a ni. Article a ziah zah hi hriat mai a har a, Vanglainiah ngawt pawh 500 chuang a ziak a, hmun danga a ziah te nen zawng zawng chuan 800 vel zet chu a ni ngei ang. A damlai khan amah chawimawina lehkhabu pahnih a chhuak hman a, a thih hnuah bu dang pakhat a chhuak leh a, Mi hrang hrang thuziak lakkhawm a ni. A pualin special lecture ṭum khat huaihawt a ni tawh bawk. An damlai ngeia an puala lehkhabu pahnih zet an buatsaihsak hi chu an tam lo ngawt ang. Chu chu mi thinlunga a tlaknat dan a tar lang chiang hle awm e.

Bible lehlin ennawn leh Siam ṭhat kawngah a ṭangkai ṭhin hle a. Mizo OV re-edited ‘11 a tawpa endiktuah Rev. Dr. Vanlalnghaka Ralte nen an ṭang a. Hei hi Mizo Bible (OV, re-edited ’13) tiin an lo chhuak ta a ni. Hemi hnu hian Mizo Bible (OV re-edited ’17) a chhuak leh. Re-edited ’17 hi ennnawn a lo hun leh chuan English Standard Version (2001) behchhana ennawn a lo ni ta a. 2017 aṭangin Chief Translator atana thlan leh ruat a ni a, a thih thlengin he dinhmun hi a chelh a ni. 2019 khan Thuthlung Thar leh Sam chu chhut theihin an peih hman a, Covid avang khan an han khaihlak a, an chhunzawm leh hnuin Pu Chuaua damlai khan Thuthlung Hlui bu 39 zinga Joba aṭanga Hla Thlankhawm, Jeremia Ṭah hla thlengin an enfel zo hman a. Bu dang pawh an en nual hman a, thawk zo hman loin a thihsan ta a ni.

Rev. Zairema ti tunlai lehtu leh mipui banphaka chhawp lehtu a ni a. Ani hi awm lo se tun hnua Rev. Zairema kutchhuak hi kan hmu lo ang. “I ni min pekte hi” tih te pawh kha ama buaipui vek a ni. RL Kamlala kutchhuak a lakhawmin a buatsaih bawk a. Hengte hi Literary Criticism huanga a inhmanna dang leh a ni a. Mizo Language Committee-ah a tel ṭhin bawk.

A sulhnu leh a hlutna, kan hnam tana a ṭangkaina hi sawi tur tam tak a awm a. Kan han sawi chin aṭang ringawt pawhin, Mizo Academy of Letters-in Academy Award dawng tura a thlang hi a phu hle tih kan hmu thei ang a, an tehfung zam nena teh pawhin a tling hle tih kan hre thei ang.

Kan dam chuan kar lehah a chanchin dang nen kan chhunzawm ang.