REV. LZ ZOLAWMA DAM LOH THU

Kum 1980 khan Mizoram Synod chuan Revival Committee a din thar a. Chutah chuan, 1982-a BD zir zo, Rev. Bankuaia makpa LZ Zolawma chu secretary atan an ruat a. Ani hi 1974-a nemngheh a ni a. Nemngheh a nih hlim hian Chanmari pastor bial vawntir a ni nghal a ni. Chutih lai chuan, kum 34 mi chauh a la ni.

Revival Secretary a han nih chuan, theihpatawp chhuahin hna a thawk a. Campaign, Camping leh Crusade te an buatsaih ṭhin a. Amah pawh Pathianin a hmang hle a. Revival Secretary a nih laia an hmalakna chhinchhiah tlak deuh mai chu kum 1982-a Dawrpui Biak Ina harhna inkhawmpui an buatsaih kha a ni. Speaker-ah chuan Upa LN Tluanga u, Rev. Dr. R.K. Nghakliana, Durtlang doctor ṭhin missionary-a kalta kha rawih a ni a. Rev. Zolawma hian zing Bible Study-ah Thupuana Kohhman pasarihte hnêna lehkhathawn a zirpui ṭhin. He khâwmpui hi chhimtu mipui an ṭhahnem thei hle. Kohhran tân nghawng tha ropui tak a nei a ni.

Heng hunlai hian Zorama harhna a lo thlen nan nasa takin kohhran an ṭawngṭai ṭhin a. Kum 1984-ah chuan an dil harhna ropui tak chu an hmu ta a ni. He mi kum hian Synod Revival Committee chuan AR Lâmmualah harh thar lehna inkhawmpui ropui tak a buatsaih a. He mi inkhawmpui tawp zanah hian

Rev. Zolawma hian 'Krista kan nunna’ tih thuchah a sawi. Hemi ṭum hian Lalsangzuali Sailo chu zaia rawngbawl turin a sawm a. Hetih lai hian Lalsangzuali Sailo hi naute nei hlim, zai chhuah lehnghal a ni a, naute sen pawm bawk si chuan a lo pha a. Rev. Zolawma chuan, "Zualbawih, mi pakhat tal tan pawh malsawmna i ni mai thei asin," tiin a thlah a. Chu ṭawngkam khat te chuan Lalsangzuali thinlung a vit ta ngut ngut a. 'Harhna kan ngai tih hla hi a phuah ta a ni.

Mi dang pakhat tâna malsawm thlentu,

Ni thei ila a ropui dâwn mang e;

Krista chanchin ziahna inti siin,

Kan nunah rêng i hmël a lang si lo.

Tih hi kan hre fur awm e.

1985 kum tawp lam aṭang khan a taksa lamah insawiselna a nei ṭan ta a. Aizawlah an inenkawl hnuin, Vellore lama kal turin an rawn a. A nupui Darlianthangi, a u L.Z. Zomawia leh a fapa upa ber Lalthansanga (tuna Aizawl Venglai kohhran upa) ten an hruai a. 1985 December ni 27 zan laiah Vellore an lût a. Thin cancer a ni tih an hre ta a; Amah hruaitute hian Cancer a ni tih an hrilh ngam mai lo a, aman a zawh tâk tlat avângin an hrilh ta a. Cancer a ni tih a inhriat veleh a nun a inbuatsaih nghal a, Pathian hnênah ṭawngṭainain a natna hriat chhuaha a awm avângin lâwm thu a sawi a, a rawngbâwl chhung zawnga a lo tihsual palh thil a awm chuan ngaihdamte dilin Pathian hnênah a inhlan nghal ta vek a ni.

A natna cancer a ni tih an hrilh hlim chuan Kristian doctor-in a kan a, "Pathian rorêl dânah i vui em? A rawngbâwltu i ni si a," tia a zawh chuan,

Rev. LZ Zolawma chuan, "Pathian rorêl dânah hian ka vui lo, ka tana ṭha lo turin ro a rêl ngai si lo a," tiin a chhang!

January 13, 1986 khan Aizawlah an haw leh ta a ni. January 14-ah in an thleng a. A thlen zân hian aman an zin dân leh an lo enkawi dânte a report a, a tûkah Synod Office-ah kalin a hna zawng zawng a ching fel vek a, a tûkah in lamah a file zawng zawng a ching fel leh vek !

Rev. L.Z. Zolawma hian Vellore-a a awm laiin Pathian hnenah "Eng dang mah dil tur che ka nei lo a, ka neih chhun che chu Kohhranho hmaa vawi khat tal thu sawi leh theih hi a ni," tiin a dil a. A dilna chu Pathianin a hria a, January 19, 1986 (Pathianni chhun) khan Chanmari Kohhran Biak Inah Chanmari Bialtu Pastor C. Vanlalhruaian Sakramen a ṭheh tumin thuchah sawina hun a pe a. "Khawvel a dam lo, khawvel dam nan a Fapa a pe' tih a sawi a. Hemi ṭuma a thusawi ngaithla tur hian Aizawl vêng hrang hrang aṭanga pungkhawmin, Biak Ina leng lo an inkhâwm a ni. Tuna Leitan S kohhran Upa K. Lalthanzâman 'Inkhawmpui ṭiak tawh lohna hmun' tih hla hnukulh ṭeuhin a sa.

He mi hnu hian January 22, 1985 zânah Electric veng Kohhran Biak Inah thu a sawi leh a, hemi tum phei hi chuan a taksa a chau tawh bawk a, hun a hmang tluan hram a ni.

A thih hma hian Zoêng leh Focus chanchinbu ten an kâwma, Focus chanchinbuin an kawmna 3rd Feb., 1986-a an tihchhuaha rilru hneh deuh mai chu:

1. Thih i hrehna chhan ber?

= Kan kum a la tlem si a, Pathian tan hman tlak ka nih ka la beisei tlat a; tin, ka chhungte ai pawhin Kohhranho ka ngaihtuahin ka inhria.

2. Pathian lakah vuina i nei rum rum lo maw?

= Min hmangaihna ka sawi seng lo zâwk a ni. Krista kha a thih dawn chuan a ṭhiante ngei pawhin an phatsan a, kei zawng amah avangin miten min ṭanpui a, ka mamawh tinrêng min ngaihtuahsak zawk asin, ka vui lo.

3. Taksa chak lo chunga i thusawi kha i chauh phah em?

= Zâng huaiin ka inhria.

A natna hian zual lam a pan zêl tih a hria a. A nupui fanau te hnenah a kalsan huna an awm dan turte ngun takin a chah a. Pathian chauh rinchhan tur leh Kohhran bel tlat turin a ti a. Johana lehkhathawn pathumna chang 4-na 'Ka fate thutakah an awm tih ka hriat aliama lawmna nasa zawk reng ka nei lo e' tih chu mumal taka a thuchah hnuhnung a ni ta a ni.

A thih hma hian a ṭhian ngaih em em leh Chanmari Bialtu Pastor,

Rev. C. Vanlalhruaia nen inkawmin amah vuina programme an siam dun thlap. Bible châng chhiar tûr leh hla sak turte a thlang fel sa diam bawk. February 3 aṭangin thiin a luak a, February 5 zan dâr 12:50-ah Kristaa nunna thar sin turin a haw ta a ni.

February ni 6- khan vui a ni a. In lamah Bialtu Pastor C. Vânlalhruaian an programme duan lâwk sa angin a hmang a. Chawhnu dâr 1-ah Electric Vêng Kohhran Biak Inah vui a ni a. Moderator-in a kaihruai a. Synod aiawha thusawitu Rev. Lalngurauva Ralte, Senior Executive Secretary chuan, "Pastor Zolawma hi hnathawha inpumpek mi, hna ngai pawimawh mi a ni a, ṭhenrual kawm thiam leh mite ngainat hlawh tak, amah aṭanga zir tur tam tak awm a ni," tiin a sawi.

Upa Lalhrângluaia (Chanmari Kohhran upa), Aizawl Hmâr Presbytery Secretary Senior chuan, "Pastor Zolâwman Zoram dung leh vângah rawngbâwlna a nei ṭhin a, amah hi Kohhranin kan chhuang em em a ni. Lal Isua hnena thlarau bo tam tak hruaitu kan chan ta hi, chan nasa kan inti hle a ni," tiin a sawi bawk. Synod Moderator Rev. Robawia chuan, "Pastor Zolâwma thihna hian mi zawng zawng a khawih niin ka hria," tiin a sawi.

Pastor Zolawma thuchah hnuhnung tihbu hi kan nei ṭhin a, ka hmu zo ta hauh lo thung a. Pastor Zolawma dam loh thu leh natna, tawrhna leh thihna a hmachhawn dan hi a ropui em em mai a. Ringtute tana Pathiana innghah hahdam thlakzia a lang chiang a. Natna leh tawrhna te hi engtia hmachhawn tur nge, tu nen nge kan hneh theih ang tihte pawh pastor dam loh chanchin aṭang hian kan hmu thei a. Natna te hi huatthlala awm hle mah se, Pathian hnathawh lanna leh Pathian ropuizia puan chhuahna a ni ṭhin.

Pathianin a hman em em chu, kum 46 chauh a nihin Pathian a la ta mai a. Mihring lam ngaihtuahna aṭang chuan hriat thiam a har hle. Pathianin a ropui nan a duh a ni tih a ni deuh mai ang chu. A nun aṭang hian Pathian rin thlamuan thlakzia a lang a. Pathiana innghah hahdam thlak zia a fiah em em a. A thihna aṭang hian ringtute thihna chu a lo mawi zawk em em a ni tih kan hmu thei bawk a ni.

Kum 40 zet kal taa LZ Zolawman Thihna lui kama zaia Pathian hming a fak theihna kha thlarau nun chak lo leh nun thla tliak, khupzawi te min fuih thartu lo ni se.