MARYLIN MONROE LEH JOE DIMAGGIO

A thih aṭanga kum 50 a liam hnu pawha khawvelin a theihnghilh theih loh, Marylin Monroe khan makna tak a nei te pawh a ni ang a, hmeichhe hmelṭha ber leh pian nalh ber ni miah si lo khan, mi hip theihna danglam tak mai a nei a, a mi tawnte leh mipui rilruah a tlana em em ṭhin a ni.

Pasal kha a nei nual a, ngaih­zawng leh han kawp zuaite pawh a nei nawk. Lemchan thawnthu ziak thiam, Arthur Miller nen pawh khan an innei a. Miller-a lemchan thawnthu ziah, Death of a Salesman te phei kha chu a lar em em a ni. Arthur Miller nena an inneih khan, nupui ṭha tak nih tumin, lemchan te pawh Marylin Monroe hian a chawlhsan rih hial a; nun hi beisei angin a kal kher lo a, a tum angin a nun a hmang thei bik lo a ni.

Arthur Miller-a hmaa a pasal, Baseballer ropui Joe DiMaggio a ni a, ani nen khan thla kua an innei a, chanchinbu mite chaw tui ber an ni ve a ni.

An inhmuh hmasak ber ṭum khan Marylin Monroe kha a tui lutuk bik lo; March 8, 1952-ah Sunset Boulevard –a Italian restaurant pakhat, Villa Nova an tih, tuna, The Rainbow Bar and Grill ni taah hian inhmu tur an ni a. Marilyn Monroe chu a tui lohna pakhat pawh, Baseball a tuipui em em lo a, Di Maggio ber pawh chu darkar hnih laiin a la rawn tlai zui a!

Mahse, Marylin-i rilru kha a hneh tlat. Pa zawi awi leh ṭawng tam lo tak a ni chung khan, a huhang chuan an ṭhut dunna pindan pum chu a luah khat zo tlat! Pa hmelṭha tak a ni lo a, a hmaitlang a hriam si, a ha a rual loin a kuh deuh a, a mit pahnih lah chu a inhnaih si! A cher ria awr mai a, a ke pen te reng reng chu, a ti deuh hnalh hnalh mai bawk si. Amaherawh chu, amahah chuan theihna mak tak a awmin a lang tlat thung. Zan riah an kil dun zawh hnu chuan, darkar thum zet mai Beverly Hills-ah chuan lirtheiah an chuang kual dun a ni.

“Joe-a ka atchilh ta viau chu keimah leh keimah pawh mak ka inti ang reng hle. New York infiammi dangte anga inti vei tak ni turah ka lo ngai a, a lo ni teuh si lo. Pa zahawm leh inkiltawih tak a lo ni a, mi han hmuh pawhin, mi buaipui ve huam chuang lo. Pa zahawm tak a ni a, mi dang pawh mi zahawm tak anga inngaihna a neih tir ṭhin a ni,” tiin Marylin-i hian a sawi nghe nghe a ni.

1952 nipui a lo thawt chuan, an inrim zing ta hle a. A chanchin ziaktu ṭhenkhatte ziah danah chuan, Marylin-i ṭhiante chuan, Joe nena an inlaichinna chungchangah ngaih ṭhatlohna lian ang reng tak an nei a. Joe chuan, Marylin-i eizawnna chu a tuipui lutuk lo. Joe-a ngaih dan chuan, hmeichhia chu inchhung enkawl tur an ni. Bakah, mipa dang tam takin an ngaihven danah chuan, a thikthu a pe chhe ve riau bawk a ni.

July thla chuan Joe chuan Marylin-i chu an inah a hruai a. Chutah chuan, Marylini chuan, Joe-a’n a nupui chu chhungpui nu nia ina awm a, inchhung khur enkawl tura a duh chhan chu a hrethiam ta a ni, DiMaggio chhungkuaah chuan hmeichhiain naupang an buaipui a, an tifai a, ei an siam a, in an ti fai a, chutiang chuan, an chhungkaw inawpna chu a kal a ni.

Kum 1953 Kumhlui thlah ni chuan, Joe chuan Marylin-i chu innei turin a sawm a, Marylin-i pawhin lawm takin aw a lo pawm a. January ni 14, 1954 khan San Franscisco-ah an innei ta a ni. Marylin-i hian, ngenna danglam tak mai erawh a siam a, amah (Joe) aia a lo thi hmasa a nih chuan,a thlanah kar tin pangpar dah ṭhin tura intiam turin a ngen a. Joe pawh chuan a intiam a.

An inlaichinna chu a tir aṭangin a a rualrem lutuk lo ve bawk a. Marylin-i film chan tur a rawn inpangawinzial tup tup mai si a. Niagara, Gentlemen Prefer Blondes, The Seven Year Itch te chuan a tilar leh zual ta a. Mi ngaihven a hlawh nasa tial tial a. Marylin-i’n mi ngaih ven a hlawh ṭhin dan chu,amahin a lo tawn tawh ang ṭhin kha a ni a, tunah chuan Marylin-i nena an awm dun chuan tuman Joe chu an ngaihsak tawh lo. Mi zawng zawng thlir rawn kha a ni ve ṭhin a. Marylin-i bulah erawh chuan, tu pa mah hian ngaih sak an hlawh zawk thei lo hrim hrim! “Dinner with DiMaggio: Memories of an American Hero”tih bu, Dr.Rock Pasitano leh John Pasitano te ziahah erawh chuan, an inṭhen chhan chu, Marylin Monroe fa neih theih loh avang a ni an ti thung. Joe khan, fa neih a duh a, Marylin-i pawh khan fa hrin sak a chak em em bawk a, chu chu a theih si loh a, chu chuan an nupa nun kha a tihrehawm em em a,an inṭhen chhan ber pawh thil dang vang ni loin, hemi vang hi a ni an ti thung. Joe khan, Marylini kha mi khan remchangah lain, hman ṭangkai an tum ṭhin niin a hria a, a chhan em em mai bawk a ni. Dinner with DiMaggio bua an ziah zel danah chuan, “Tunlai American hmeichhe ho ngaihzawn duh tur chi a ni. Joe kha gentleman dik tak a ni a, a ‘caring’ em em bawk,” tiin.

An inneih aṭanga thla kuana chauh, October 27, 1954, khan Marilyn chu roreltu hmaah a ding a, inṭhen a duh chhan a sawi fiah a, DiMaggio chuan a ngaihsak tawh lo a, nilenga biak loh ṭum te a nei ṭhin a, hrehawm a ti a ni. DiMaggio chu a inlan ve lo a, inṭhen phalna pek a ni a, anni pahnih erawh ṭhian inhnai tak an ni zui zel a ni. Sawi tawh angin, Joe nena an inṭhen hnu hian, Lemchan thawnthu ziak thiam Arthur Miller nen an innei leh a, an han inṭhen a, a rilru na hnemtu leh a tana lungpui anga nghet taka awm chu Joe kha a ni. Marylin-i kha, a tana mi ṭha lo nia a hriatte lakah ven him a tum ṭhin a, Kennedy te lakah te khan, ven him a tum ṭhin a ni. Innei leh mai tur pawhin a sawm a, Marylin-i kha thi lo ta nise an innei leh lo ang tih a sawi theih loh, an ti! A lo thih pawh Joe hian a ruang a hlawm a ni. Marylin-i kha dam rei deuh hlek se, Joe nen khan an innei ang a, depression-in a nun a tihbuai te, damdawi hman sual leh pa, nupui nei laite nena inlaichinna ṭha lo an neihte lakah pawh khan a chhan chhuak thei ngei pawhin a rinawm.

An inneih hunlaia an inkawp rem theih lohna chhan kha, an chanchin ziahna bu hrang hrangte han zir chian chuan, an nupa awm dan tur leh an duh dan inan loh vang kha a ni thui hlein a lang a. Mumal takin sawi dunin, inrem siam dan zawng sela chu an inṭhen lo hial mai thei a, Marylin-i pawh rei tak a dam ngeiin a rinawm.

Kum 1962-a Marylin-i thih hnu khan, DiMaggio khan hnu kum 20 chhung chu kar khatah vawi thum chu, Marylin Monore thlanah hian rose par a dah ziah ṭhin a ni. DiMaggio hian, Marylin Monroe nena an inṭhen hnuah nupui dang a nei leh ta lo. Kum 1999-a a thih khan, “Marylin-i ka hmu leh tawh dawn e,” a ti niin an sawi a, Di Maggio unaupa erawh chuan a awih lem lo thung. Anni pahnih chanchin hi a ngaihnawm danglam riauin ka hria a, ziah ka tumna a rei tawh a, ziak loa ka awm reng hnuah, tukin chu ka han thai ve a ni e.

Goodbye, Norma Jean

From the young man in the 22nd row

Who sees you as something as more than sexual

More than just our Marilyn Monroe

And it seems to me you lived your life like a candle in the wind

Never knowing who to cling to when the rain set in

And I would like to know you but I was just a kid

Your candle burned out long before your legend ever did

Your candle burned out long before your legend ever did

Your candle burned out long before your legend...