VALENTINE’S DAY-AH THAWNTHU tawi 3

Vawiin hi Valentine’s Day a ni hlauh mai a. Kum hnih chuang zet chu a tak lam kan ngaithla ngar ngar tawh bawk a, vawiin chu thawnthu tawite te pathum i han sawi hlauh teh ang. Sapho tih dan lakna tiin vai ho chuan an sawisel nasa fo a, bawng kuah ai ngawt chuan, ngaihzawng te emaw, nupui/ pasal te kuah chu a la mihring zawk hrim hrim.

A ngai thupui lo chi awm theih a ni a, vawiin angah chuan miin hmangaihna hlate, hmangaihna thawnthu te an ngaihtuah a, chu chu thil tam tak ai chuan a ṭha hrim hrim.

HMANGAIHNA KA HMU A...

"I ṭha ngawt mai. Sakhaw thar dina pathian pawimawh pangngai tak zinga telh ve che a, biak che a ni ka duh," ka ti a. A nuih te tak chu a za a.

Kan han nui leh rih a.

Ruah a han ta a, "Ka kal ange aw, Pu Mawi," a ti a. "Pu Mawi" min ti rawh ka ti kha a ni a. Chu chu ani nena kan inhriat tan tirh lam thil a ni a. University Bus-ah Tanhril panna kawngah khan kan ṭhu dun a, chuta ṭanga inhre ṭan chu kan ni a. 'Pu Mawi' min ti rawh, chumi ni chuan ka ti a. Khata ṭang khan Pu Mawi min ti ta ngar ngar kha a ni.

University kal lai khan, class room kawtah kan lo titi mai mai a. A ṭhiannu nen an lo phei a. Chutah chuan, kan inhmel hriat chiangin, kan innel chho ṭan ta tak tak chauh a ni. "Hawh, Library-ah zu kal ang" a ti a. Library hi ka kal tam lo khawp a. Ka kal chhun pawhin Journal-a article ṭha Xerox tur hian ka kal chauh ṭhin a. Lehkhabu ka hawh ve chhun pawh, English Department ho lehkhabu huanga mi Dracula tihte a ni.

Ka zui thla var a. Ka phur khawp mai. An awm tui ang reng si a, ngawi rengin ka lo han chhoh san leh daih a. Tlaiah chuan, "Tinge ngawi renga i kal bo daih a" tiin min chhuah chhal nghe nghe. "Nia" ka tia..

A hmelṭhat thu kha samkhai zet khan ka hrilh ṭhin kha a ni a. Mi a ngaina ve hle tih chu ka hria a. Mi ngaizawng em aw tih kha ka ngaihtuah ṭhin a. Ṭum khat pawh, "Hetiang taka min ngaina thei a, min ngaizawng ru lo a nih chuan, tuai ang chauhvah min hmu tihna a ni anga, ka ngaih a ṭha miah lo" ka ti a. A nui tak awr awr a. Ka darah a chum a, “I tuai lo tih ka hria a lawm” a ti mai a, a dang a sawi hauh lo a. Ngaihzawn ka tum deuh ni berin ka inhria a, ka ka a kua a, ka ṭawng ve mai mai a nihna chen a awm bawk a. Ani kha ngaihzawn loh theih loh a ni ve bawk a.

Class a zo tawh a. Keini kha eng enaw vangin thil dang kan ti a, department dang an ni reng reng bawk a. Bus dinkhawmna hmuna kan kal kha chuan, bus chhungah an lo ṭhu fel et tawh a. "Ṭhutna ka lo hauh che" a ti a. "Ka lo la lut dawn lo. Khawimaw cheng nga min lo pe teh" ka ti a. A nui a. A va mawi teh reng. Eng dang sawi loin, bus tukverh-ah cheng nga thir a rawn theh thla a. Canteen-ah thingpui hang ka va in a. Chutiang vel chu kan ni ṭhin .

Hun a liam a. Inkawp ni si loin, kan inkawp a. Inkawm ni si khan, a bak awm thei se ka ti a, a ti ve em tih kha ka hre ngai lo reng reng a. Ṭum khat chu, Library kawtah khan, kan ding dun a. Ms-a a lo kal a. "Nangni pahnih hi ni tak tak rawh u” a rawn ti a. Ani khan, “Mawia chuan mi dang a sawi zel a lawm” a lo ti khauh a. “A ti ve mai mai a nih hi, amah hi a lawm. A hmelthat thu pawh ka hrilh reng a” ka ti a. Ms-a chu a nui a. Sawizawm ta lem loin a kal sawn a. Ms-a kal sawn hnu chuan, “Mi dang ka sawi mai lohin, Ngaihzawng i nei char char a tin nih kha,” ka ti ve ta thung a. “Mi ngaihzawn i tum si lo a,” a ti a. “Mi duh pawh ka ring chiah lo a lawm,” ka ti ve thung a. Min chhan leh hmain mi dang an lo kal a. Han sawi zawm a rem chang ta lo a.

Bus-in kan haw chho a. Chaltlang Dawrkawnah kan chhuk a. Ke-in C. Ngura ‘White House’ te in kawngah kan chhuk thla a. Ruah a rawn tla fuap fuap a. “I Nihliap kha kap parh la,” a ti a. “Ruah hi do zawk ila,” ka ti ve thung a. Mi hnial zui loin, ri loin a nui a. Ruah hmi a ni bawk a, kan do ta a. Thawklehkhatah a rawn tla tam thut a. “Tlan rawh” tih pahin ka tlan thut a, mi rawn um a. Kan nui vak vak a. Rev. Mangchhuana te kawm chhak lawkah bikhulna tur remchang deuh a awm a, kan ding dun a. Ruahin kan thawmhnaw hak a nan zawr a. A sam a hup chiap a. Ka lam a rawn hawi ve a. A mit leh ka mit a intawk a. Hmangaihna ka hmu a.

VALENTINE'S DAY

Bathlar ṭhutthleng seiah chuan ngawi rengin an ṭhu dun a. Thlang lam aṭanga thli rawn thaw chuan an biang a rawn chhem a. A vawt lam lek lek a ni.

Thil eng eng emaw an sawi dun a. Nakinah chuan, nula zawk chuan, "I awm dan hi ka hrethiam lo. Mi rawn be hmasa a, i lo leng a. Kan inkawm chho reng a. Ṭhian kawma min kawm tura min rawn be hmasa chu i ni loin ka hre si a..." a ti ta hlawl mai a. Tlangval chuan, "Ṭhian a tan ngawta rawn bia che chu ka ni lo a lawm" a ti ve mai a, amahah chuang thil danglam awm hi a awm lo a.

Nula chuan, "Tihian kan inzui kan inzui a...In ngai zawng kan ni ti ngam em si loin, kan awm a...Mi ngaihah chuan, In ngaizawng te chu kan ni mai ang chu... Min duh tak tak lo em ni?" a ti leh a. Tlangval chuan, "Duh lo che ila hei chen ka be zui dawn che em ni?" a ti a.

Nula chuan, "Thil i sawi chiang lo em a lawm... Mipa te chu first Move siam tur in ni a" a ti a.

"Ka first move vanga hetia awm hi kan ni lawm ni"

Nula chuan, "Ni ve bawk sia" a ti ta ngawt a. A sawizawm leh a. "Chu pawh nise, ngaihzawng nghet tak tak atan min duh lo em ni...Ṭhian kawmin min kawm a... Ṭhian satliaha kan chhuah mai i hlau lo em ni...? Ngei min hrilh ngam tak tak lo"

Tlangval chu a ngawi vang vang a. Nulain chutiang a han sawi chu mak ti ang reng a. A buai ru hle a nih dawn hi a ti a... "Sawi ngam e... Ka la nghak rih mai mai... Kan pahnih inkarah hian induhna leh inhmangaih tawnna tak tak hi lo thang chho se... Inngainatna leh inkawm ngeihna neih belh ila ka ti a... ka nghak a ni... Ka duh che a lawm, chu phei chu i hria a... ka ngaihzawng tak tak mai ni lo, ka nupui nila ka ti a sin...Chumi hma chuan ka thian tha tak ni tel hmasa phawt la ka ti a.." a ti ta a...

Nula chu a nui a, Tlangval biang­ah chuan a fawp a....Thli thaw chuan an biang chu a rawn chhem vawt raih a,,,,

"Valentine’s day a liam chiah" Nula chuan a ti a...February ni 15 a inṭan a ni. Tlangval chu a lengrei hle mai.

BUS CHUAN THU

Guwahati aṭangin Capital Travels Bus-ah kan chuang dun a. A titi siam siam a. Bus hi Thlawhtheihna ni thut se, tih vel a sawi a. Kan tlan rei deuh a, ka darah a lu a nghat a. A muhil zui ta mai a. Ka walkman ka phawrh a, Country Collection chu ka ngai thla a.

Bus chu a tlan chak vak lo a. Thla a eng raih a. Bus Tukverh darthalang chu ka nam hawng sa a. Thlifim a lo thaw lut a. Thla eng chuan a biang chu a rawn chhun phat a. Thli chuan boruak a tih vawh deuh avangin a harh ka hlau a. Darthalang chu ka pawt phui a. A muhil tui hle a, a thaw sak sak a. A thla chu a muang hle mai. Ka bula chuti khawpa a thlamuang thei chu ka hlim hle.

Khawvelah hian kan hmangaih tak te kan tawng a, kan inṭhen leh fo a. Enge maw chang chuan, ngaihzawng neih duh vang hrim hrimin inhmangaih luih te pawh kan tum fo bawk. Chutianga ka bula thlamuang em em maia awm thei erawh chu a hlu ka ti hle a. Mi zawng zawng bulah hian kan thla a muang hauh lo a ni.

Kha Bus a kan khualzin hun chhung kha a rei lo hle. Ka bula chuang chu hun tam zawk a muhil a ni. Mihring hlauthawng leh thlamuang lo hi a hah chawl thei lo a, a muhil thei lo a ni.

Mihring nun hi Bus chuan dun ang deuh a ni a. Khawiah emaw kan chhuk a ngai ṭhin ang hian, kan nuna kan thil tawn ṭhenkhat te hi chu hun hian a liampui angai si a. Hun kaltaa kan duh ang kha vawi khat nei let leh dawn ila, Bus ka chuang nawn leh ang, amah telin.

Tikhan, Valentine’s Day puala thawnthu tawi pathum chu i lo chhiar zo ta a. Kum upa lam tan chuan a ho deuh mai thei e. Engmah zirtirna awm lo, infuihna awm chuang lo, a niin a zir em avanga thawnthu pathum han sawita mai chauh ka ni e.