Sulhnu 186: Kum 1913 aṭangin Kohhran Diakawn chu Kohhran Upa an ti ta

Kar hmasa khan Mizoram Presbyterian Kohhran Upa chu Diakawn an lo tih thin thu leh an thlan hmasak berte chanchin kan sawi a, kha kha kan chhunzawm ang. Kan thu lakna hi Rev. H. Remthanga lakkhawm, Synod Thurel Lakkhawm tih bu, 1910-1950, Volume I (SLPB, 1996) ami a ni a, kan hmang zel ang.

Kum 1911 April thlaa Presbytery inkhawmin Kohhran Diakawn an nemngheh hmasak berte kha 16 an ni a, October thlaa 5 an nemnghet leh nen, kum 1911 chhunga an nemngheh chu 21 an ni a. Khaw hrang hrangin an thlan zawng zawng chu 27 an nih thu kan sawi tawh a, chhan eng eng emaw avanga an nemngheh tak loh chu 6 an nih chu. A kum leh kum 1912 October thlaa Presbytery inkhawmah Kohhran Diakawn 4 an nemnghet leh a, chungte chu Laltawnga Mission Veng, Aizawl. Laipawnga, Khama leh Sikhuma Arpu Veng, Sihphir te an ni a. Laltawnga chanchin hi Vanchhungan a zawt a, amah pawhin a chanchin leh lawmthute a sawi a. Awmia Pain fuihna thu a sawi a. Sihphir Diakawn pathum te erawh chu Darchhingan anmahni chanchin a zawt a, annin an rilru putziate an sawi bawk a. Dokhaman an hnenah fuihna thu a sawi a, Chhungekan a ṭawngṭaisak a ni.

Hetah hian Mission Veng tih hi a lo lang leh ta a, Aijawl kohhran ti chung reng hian Laltawnga hi Mission Veng, Aizawl ti thlapa an lo ziak hi a mak hle mai, Mission Veng kohhran tih hi an la hmang si lo va. Laltawnga chanchin zawttu Vanchhunga hi hetih lai hian tirhkoh a ni a, a hnuah Pastor-a nemngheh a ni a, hla phuahthiam Vankhama pa a ni. Awmia Pa hi kar hmasa lam khan kum 1911 October thlaa Presbytery inkhawma Kohhran Diakawn thlan tharte fuihtu a nih thu kan sawi tawh a, amah hi kum 1910 April thlaa Presbytery inkhawm neih hmasak berah khan Evangelist atan ruat a ni. Kum 1910 vekah hian October thlaa Presbytery chuan Tirhkoh Phaisama chungchang an rel a, a zilhtu tur mi 5 an ruat zingah Awmia Pa hi a tel. Kum 1912 October thlaa Presbytery inkhawmpui hotu (Chairman) atan Awmi Pa hi an ruat bawk. Darchhinga hi kum 1911 October thlaa Aijawl kohhran Diakawna nemngheh kha a ni a, kum 1912 October Presbytery khan Presbytery Committee chu kum thum term ni tawh se la, a tih ṭumah khan membar atan thlan a ni. Kum 1914-ah Committee membar atan thlan nawn leh a ni a, kum 1915-ah kohhran upa kal peng, rin hran neih Kawlkhuma, Vanhlira leh Chalchhuna te zilh tur ruat zingah a tel a, hemi kum vek hian Kraws Sipai kal zel dan tur leh kohhranin a enkawl dan tur ngaihtuahtu tur mi 10 an thlan zingah a tel bawk. Dokhama hi Tirhkoh hmasa ber zinga mi kha a ni a, kum 1914 October thla Presbytery inkhawm chuan Ṭhawngliana khuaa awm turin a ruat a, a dam hleih theih loh avangin kum 1915 March thlaa Presbytery chuan Saituala awm rih turin an ruat a, kum 1916, August ni 6-ah a thi. Ṭhenkhatin Maubawk lal Dokhama, Subedar Pakunga pa nen khan an ngaihfin a, ani pawh kha Zosapte lo pui ṭhintu, Rev. William William-a lo mikhualtu leh a hnua Pu Buanga leh Sap Upa pawhin ṭhian anga an tlawh fo kha a nih avangin ngaih pawlh pawh a awm ve bawk e. Chhungêka hi Tirhkoh a ni a, kum 1911 April thlaa Presbytery chuan ‘Lalsavunga khua Taitea bial hluiah chhuak ve se la,’ tiin a awmna tur khua a ruat a. A hma hian Aizawlah a ṭhu deuh ngar ngar a ni awm e. Kum 1914-ah Darlawna awm turin an ruat leh a, kum 1915-ah Pastor tura ekzam bei tur zingah an ruat a. Kum 1917-ah Ratu bialah an dah leh a, a dam theih loh avangin hemi kum vek hian Aijal-ah an dah. Kum 1918 June thla Presbytery-ah Pathianni zing ṭawngṭai inkhawm hruaitu a ni a, kum 1921 October thla Presbytery chuan kum 1922 January aṭanga a pensawn tur leh a dam chhunga Rs. 3 hmua a pensawn tur an rel.

Kum 1910 aṭangin Presbytery inkhawm hi an nei tan a, hemi kum hian April-ah leh October thlaah an nei a, kum 1911-ah pawh April leh October thlaah bawk hian an nei a. Kum 1912-ah pawh April ni 12-a neih turin an ruat na a, October thlaah an nei ta zawk a. Kum 1913-ah chuan April thlaah an nei leh a, Diakawn leh Kohhran Upa tihngheh 5 an awm a, he Presbytery thleng hian Kohhran Diakawn tih leh Kohhran Upa tih hming hi an hman pawlh a. Kum 1913 vek, October thla aṭang chuan Kohhran Upa ti zelin an sawi ta a, mi 9 nemngheh turah pakhat a lo kal lo. Kohhran Hotu, Kohhran Deacon, Kohhran Diakawn tih te kha an hman pawlh ṭhin a, Kum 1913 October thlaa Presbytery inkhawm chuan Kohhran Upa a gti ta a, tun thlengin kan hmang ta zel a ni.

Mizoram hi Khasi Assembly hnuaiah Presbytery pakhat a ni ṭhin a, an inkhawm hmasak ber pawh kum 1910 April kha a ni a. Kum 1910 aṭanga kum 1923 thlengin Presbytery tiin an inkhawm hming chu an puttir a. Kum 1923 aṭanga kum 1952 thlengin an inkhawmpui hming chu Assembly tih a ni ta thung a. Kum 1953 aṭangin tun, kum 2024 thleng hian Synod Inkhawmpui an ti leh ta a, an inkhawmpui sang ber chu Mizoram Synod chauh ni lo, Presbyterian Church of India (PCI) chhunga synod hrang hrang awmte inkhawmpuina a ni a, General Assembly an ti ta a ni. Tunah hian PCI hnuaiah hian Synod 13 an awm mek a, a lian ber chu Mizoram Synod hi a ni.

Pathian zarah kan dam ang a, kar lehah chhunzawm kan tum ang.