Sulhnu 237 : Aizawla Bawrhsap hmasa ber kan kahhlum tak Browne-a kha

Kar hmasa lamah khan Pu Buanga leh Sap Upa rawn tirtu Robert Arthington Jr.-an India rama missionary a rawn tirh mission pawl hming kha The Indian Aboringines Mission tih a nih thu kan sawi kha a ni a, tun ṭumah chuan British-in min rawn awp tak hnua Aizawl Bawrhsap hmasa ber kan kahhlum tak Browne-a chanchin kan sawi ṭan ang.

A hming tak chu Herbert Richard Browne-a a ni a, kum 1858, October ni 11-a piang, kum 1890, September ni 9-a thi ta kha a ni a, a thih khan kum 32 mi a ni. Mizo chuan Hmaireka kan lo ti a, a biang thawp vang a ni awm e. Sapho chuan Kalkhaman a phatsan vanga kahhlum angin an ziak a, ‘phatsan’ tih ṭawngkam hi a na hle mai a, Kalkhama tehovin Browne-a hova inremna sa ui an tan hnu lawk, thla thum emaw chauh hnua kan lo kahhlum tak avang khan Sapho puh dan hi a awm thei ve bawk e.

Tun lai hian India sawrkar hian British ngaihsan lohna hi mipui zingah tuh an tum anga ngaih theihin ‘zalen nana British do’ tih ṭawngkam a hluar hle mai a. Mizo zingah pawh Sap lo do ngam chawimawina kan vulh lian chho zel a, Ropuiliani chu kan chawi lar ta hle. Tunah hian Nikuala te, Lianphunga leh Kalkhama te pawh chawimawi tur zingah kan sawi ri chho mek a ni. Pasalṭha Khuangchera pawh sawi rik lian zingah a tel bawk. Saphovin ‘hel’ min tih laiin India sawrkar chuan ‘zalenna sualtu’ tiin ram pumah British lo do apiang chu an hming leh an chanchin kan phochhuak mek a ni.

British-hovin ram dang an awp tawh dan history an lo ziah te hi hnam changkang leh ropui hmasa an nih avangin an duh dan leh hmuh dan angin an lo ziak zel a, chutiang chuan a zir pawh kan lo zir tawh ṭhin reng a. An awp tawh ramte chuan, “Chhura awm ta lo ve” tih ang maiin an chhuahsan tawh hnu hian an duh dan anga ziah ṭhat hi an tum ve ta zel a, chung zingah chuan India ram pawh hi kan bang bik lo ve. Kei pawhin kum 1890-a Aizawl Bawrhsap Captain Browne-a kan kahhlum tak khan, British hnawhchhuah nana Suakpuilala fate leh an sangawi zawnpuite thiltih a ni, tiin ka lo ziak ve tawh a nih kha. Eng pawh ni se, Browne-a chanchin chu i han chhui ṭan teh ang.

Browne-a pa chu Henry Ulick Browne, 5th Marquess of Sligo a ni a, a nu chu Catherine Henrietta Browne a ni. Browne-a pianna hmun hi Sap ram ni lovin West Bengal-a Hooghly District-a piang a ni. Unau sawm zinga a upa lama pathumna a ni. Royal Military college, Sandhurst-ah sipaia ṭang turin a inziak lut a, 70th (Surrey) Regiment of Foot-ah Second lieutenant-in bul a ṭan a ni. A hnu zelah chuan Shropshire Light Infantry lamah a insawn a, kum 1882-a Indian Staff Corps a zawm hma zawng a awm a, Second Anglo-Afghan War-ah khan huaisen medal dawng khawpin a lo thawk tawh a ni. Kum 1883 aṭangin Assistant Commissioner of Assam a ni a, kum 1890 aṭangin Political Officer of North Lushai Hills a lo ni ta a, chu chu Mizorama kan lo hmelhriat ṭan hun chu a ni. Browne-a pa title, 5th Marquess of Sligo tih hi kum 1800 aṭanga Great Britain lal berin Ireland rama lal chhungkaw zahawmna hming an lo siam a ni. Ireland rama Sligo ram bial khat chhunga khaw lian ber chu Sligo hi a ni. 1st Marquess of Sligo chu John Browne, 3rd Earl of Altamont a ni a, Browne-a pa chu a kal zela pangana a ni. Chutiang taka lal chhungkaw zahawm tak thlah chu kan Bawrhsap hmasa ber kha a lo nih chu.

Kum 1890-a Aizawla Bawrhsap a rawn nih hlima a thawh hmasak te han sawi ila. A hmasa berah chuan Changsil Bazar, kum sawm dawn emaw khar tawh chu a hawng thar leh a, Changsil mai ni lovin Sairangah leh Aizawla bazar te hi a hawn a ni. Bazara dawr neitute venhim hna pawh sipaite kutah a awmtir a, dawrkaite pawhin sipai venna hnuaia awm an nih tak avangin thlamuang takin an awm ta a, tun thlenga Aizawl bazar hi kum 1890 aṭangin, mei mit lovin a awm zui ta a ni. Aizawlah chuan a tirah dawr panga hawn a ni a, tualchhung mi pangain an vil a, thil man bi pawh tuk sak vek an ni. Manipur leh Assam lam te pawh sumdawnpui turin a sawm hlawm a, Mizote chu hmelma anga en lo turin a lo ti hlawm bawk a ni.

Pathian zarah kan dam ang a, kar leh lamah chhunzawm kan tum ang.