Sulhnu 278 : Robert Arthington-a thawhpui duh bik pawl te chu BMS leh LMS an ni

Kar hmasa khan Robert Arthington-an India ram a rawn hawi dan kan sawi kha a ni a, vawiinah chuan Asia khawmualpui leh hmun dang a hawi dan kan sawi ang a, kan thu lakna chu Zoram Varṭian a ni zel ang.

J.M. Lloyd-a chuan, “Arthington-a hi evangelist ruh tak, Pathian thu puan darh thuai duh mi a ni a, a missionary tirh chhuahte chu hmun khata kum rei lo tê te chauh awm turin a ti a. Ṭawng zir chhung pawh hun a duh rei avangin ṭawnglettu hmanga Chanchinṭha puan zung zung duh mi a ni. Arthington-a tirh chhuah zingah Pu Buanga leh Sap Upa hi a ṭang rei ber an ni a, anni hi London khuaa Highgate Baptist kohhran mi an ni,” a ti.

Baptist missionary writer Dorothy Glover-i chuan Arthington-an a missionary rawihte a enkawl dan heti hian a ziak a: “An senso zawng zawng a tumsak ang a, an hlawh a pe ang. A dan leh dun lam chu Arthington-a duh dan ang diak diakin a ni ang. Pahnih zela inkawpin an chhuak ang a, mi insum thei leh thil danga inhnamhnawihna nei miah lova an hnaa inpumpek mi an ni tur a ni. An kal chhuah hlimah nupui la nei lo, tlangval an ni tur a ni. Harsatna eng pawh huama thawk peih mi an ni tur a ni.” tiin. Dorothy Glover-i lehkhabu ziah hi ‘Set on a hill: The record of fifty years in the Lushai country, tih a ni a, kum 1945 khan chhuah a ni.

Leeds khuaa Arthington-a ṭhian hnai tak John Town-a chuan, “Kristian sakhaw tundin tum vang emaw, ring loten an lo rina, chhandam an lo nih duhsakna emaw hi ramthar rawngbawlna a ngaih pawimawh chhan ber a ni lem lo. Krista lo kal leh thuai nana khawvel hmun tina Krista chanchin puan darh hi a ṭul hmasa berin a hria a, chu chu Kristian kohhrante mawhphurhna hna pawimawh ber niin a ngai a ni,” a ti.

Kohhran nghet tak din te, Kristian sakhaw kalhmang zui tura mite hruai tumte hi ṭulin a hre lem lo. Chanchinṭha puang darhtute chu chawl lovin an kal zel tur a ni a, hmun khatah rei tak an awm tur a ni lo, tih hi a ngaih dan nghet tak a ni. Kohhran pawl thuah a zalen em em a, a rilru ṭawmpuitu pawl apiang a thawhpui mai ṭhin. “Missionary-te chu rinna thianghlim tak nen khaw pakhat aṭangin khaw dangah an kal zel tur a ni,” a ti. Ramthar rawngbawlna atana thawhlawm a thawh dawnin a hman dan turah a duh dan a dah lal hle ṭhin a, eng emaw chang chuan thawktute leh pawlho tan thawhpui a har hle ṭhin. LMS leh BMS-te hian a ril an rempui thei ber a, thawhpui theih loh chang chu an nei ṭhin a ni.

Ṭum khat pawh BMS nen inṭawmin Phillipines leh Borneo thliarkar vela hman tur Chanchinṭha puangtu meilawng lei an tum a, he lawng lei nan hian Arthington-a chuan a duh dan an zawm dawn chuan Pound 10, 000 thawh a tiam a. European-ho ram lak tharte leh India ram puma an rawngbawlnate chu tihtawp vek intiam turin Arthington-a chuan a beisei a ni. Arthington-a duh dan chu zawm ziazâng nia an hriat loh avângin an ṭhulh ta a ni. A ngaih dan chuan heng hmunahte hian mahnia ding mai thei kohhrante an awm tawh a, ngaihsak an ngai tawh lo a ni.

Chanchinṭha hrilh darh nana a ro hnutchhiah hman dan tur a ziakah chuan ṭawng khat hmang hnam khat zelin an ṭawng ṭheuhvin Chanchinṭha Luka ziak leh Johana ziak leh Tirhkohte Thiltih bute tal hi nei ngei se a duh a. Chung hnamte zingah chuan mi 10 vel zel ziak leh chhiar zirtir ni ngei se a duh bawk a ni. Hengho zingah hian Chanchinṭha la hre ngai lo hnamte hi buaipui hmasak zel ni sela, chung hnamte chu hnam dang vei ve tura zirtir ngei ni se a duh bawk. Ṭawng khat hmang hnam khat zingah kohhran a din tawh chuan ngaihsak zui ngaiin a hre tawh lo. Chirgwin-a chuan, ‘Thu hril ula, kalsan zel rawh u’ tih hi a thupui ber a ni, a ti.

Missionary tirh chhuah nan leh mission din nan sum a seng nasa hle chungin Arthington-a hausakna chu a zual zel a. Chanchinṭha hril nana a sen nasat zawh poh leh a hausakna hi a pung chak emaw tih mai tur a ni. Africa ram lailia Arthington-an Chanchinṭha hril hna a thawh dan leh a thih hnu thlenga a sum hmanga Pathian thu a hril chhoh zel dan hi a ngaihnawm a ni.

Pathian zarah kan dam ang a, kar lehah chhunzawm kan tum ang.