Sulhnu 34 ; Laldawngliani aka Iggy the Eskimo a awm ta lo

Kar hmasa khan Thang­phunga tunu Chawngpuiin Sap pasal a neih thu leh an fate nen England-a an khawsak tak dan kan sawi tawh a, tun ṭum chu Chawngpuii fanu Laldawngliani chanchin, kumin June thlaa lo darh ta hluai kha sawi kan tum dawn a ni.

Chawngpuii leh a pasal Joyce-a te khan fa pathum an nei tih kan sawi tawh a, Evelyn Laldawngliani Joyce (Evelyn Rose ti an awm bawk), Stephen Lal­lungmuana leh Elizabeth Anne (Eli­zabeth Jane ti an awm bawk) te an ni. Laldawngliani hi kum 1947 December ni 14 a piang a ni a, kum 2017 December ni 13 zan laiah a thi a. Men On The Border chuan December ni 14-ah Laldawngliani thih thu Facebook-ah an rawn tarlang a, heti hian: ‘Today, we remember Iggy Rose, on her birthday. Forever a girl of the 60s, she passed away yesterday, just before midnight, minutes before turning 70’ tiin. Goran Nystrom-a, Men On The Border dintu chuan Laldawngliani nena an thlalak a rawn pho chhuak a. Darkar pawh ni lo, minute tlêmtein kum 70 a tling lo hret a, chuvangin kum 69 miin a thi a nih chu. Keini chuan ‘kum 70 miin a thi’ kan ti ngei ang!

Men On The Border hi Swedish rock band a ni a, kum 2011-a Phil Etheridge leh Goran Nystrom te din a ni. Pink Floid rock band dintu zinga an zaitu leh an khaipa, kum 2006-a thi ta, Syd Barret-a ngaisang em emtu an ni a, chuvanga Syd-a bialnu hlui Laldawngliani hi zawng chhuak an ni nghe nghe. Thlalaka kan hmuh pawh hi Goran Nystrom-an Laldawngliani thih hma lawka a lakpui a ni. Laldawngliani thih thu hria ten a thlahna thu an ziak tlem han tarlang ila.

“Thu lungchhiatthlak a va ni em! Mize ropui tak nei leh mi hlim thei tak kha a ni asin le”

“Thin a ṭhawng dawt mai, Storrington-a Sommerfields-ah khan kan thawk dun tawh a, a ngaihawm dawn hle mai”

“Muang tein hahchawl teh le Iggy. Mihring thothang ṭha ber mai i lo ni e. Hlimna leh nuih hawk hawkna khawvel min hmanpui lai kha a va ngaihawm em. Willie Austen and Band zai ngaithla chunga kan lam dun kha ka theihnghilh lo’ng e”

“Thlamuang takin kal teh se, kawm nuam tak mihring kha a ni reng ṭhin”

“Iggy kha nu zahawm leh nalh tak a ni a, amah hria apiang khan kan ui vek mai. Hlim lo leh lungngaia awm te pawh Iggy bulah chuan an nui thei zel a ni”

“Iggy, vawi tam tak biain lo kawm tawh che mah ila, nun hlui ngaihnawm tak i nei tih ka lo hre ngai lo. Chhimbal mawi tak chungah thlawk delh delh la, muang tein chawl ang che”

“Chawl hahdam teh aw Iggy. Nang anga thlarau zalenna ngaina hi kan hmu zen zen lo, kan ngai dawn hle mai che. rock band inel em em mai ena kan lam thin laite kha aw... Min tih hlim theih ṭhinzia leh phur taka min lamtir thinte kha mitthlaan a cham”

“Duh ber Iggy, ṭhian ngaihawm, mi chawkphur thiam nutling hlu tak a ni. Pathianin malsawm che rawh se”

“Iggy kha Facebook-a ka ṭhian ṭha a ni a, mi ngaihsak thiam leh hmangaihna ngah a ni a, a hlim thei reng bawk. Mitin kha a ngaihsak a, mitinin an ngaina bawk”

A thih hnua miten a chanchin an sawi han en hian nu hlim thei tak, mi ngaihsak thiam leh mitin ngainat a hlawh ṭhin a ni ngei ang tih a rin theih a. A vanglai hun a hman lai kha khawvela music hun tawn san lai ber an tih ṭhin kha a ni a, muanna leh remna tih thupui au chhuahpuia hippies-hovin khawvel an dâp chhuah lai kha a ni.

Kum 1960 chho kha Sixties tiin an sawi deuh kher ṭhin a, politikah leh hnam nun ze inthlak danglam nasat lai kumte an ti mai bawk. Chu chu fet deuh zawka kan sawi dawn chuan kum 1963 aṭanga 1973 inkar kha niin an sawi ṭhin. Heng huna nun inthlakthleng hi ram pakhat chhung maiah a thleng lo va, khawvel pum a dâp chhuak a. Civil Rights lama harhtharna te, Vietnam rama indona nghawng leh indo duh lo pawlin kawng an zawh mup mup lai te a ni bawk a. Politik avanga inthahna rapthlak te a thleng a, nu leh pate, upa lam thil thlir dan leh ṭhalaite khawvel hman duh dan chu a kar a lo zau ta viau mai a, generation gap an tih mai hi a lo chhuak ṭan ta bawk niin an sawi.

Laldawngliani chu teenager a nih laiin heng kan sawi takte hi khawvelah a lo thleng mup mup a, abikin America ram leh Europe-ah a hluar zual a ni. Rimawi khawvel tui hal lai a ni bawk a, Beatles leh Rolling Stones, Pink Floid leh CCR te, Cream leh Jefferson Airplane te, Jimi Hendrix leh Simon and Garfunkel te leh mi dang tam tak lo indin chhuah lai a ni. Ṭhenkhat chuan an sawi uar deuh a, rimawi tak tak lo irh chhuah tam ber hun lai niin an sawi.

Laldawngliani tiin ka’n sawi lui zel na a, Laldawngliani hian a Mizo hming hi a pu duh ngai lo va, a pian leh murna leh a nu lam hi a sawi duh ngai lo. A sap hming Evelyn lah hi a pu rei lo. Chhungkaw khawsa thei tak an ni na a, kum 14 mi lek a nih laiin an in chhuahsanin a tlan bo ta a. Khawiahnge a kal ang a, engtin nge a awm ang tih hre lawk lovin a kawh chhuak ve tawp mai a ni. Pathian zarah kan dam ang a, Iggy Rose, Iggy the Eskimo tia lo lar ta Laldawngliani chanchin hi ziah chhun­zawm leh kan tum dawn nia.